ಕೋವಿಡ್​ 19ಕ್ಕೂ ಬೆದರದ ಪಾಕಿಸ್ತಾನ; ಮುಚ್ಚದ ಉಗ್ರರ ಕಾರ್ಖಾನೆ, ಲಾಂಚ್​ಪ್ಯಾಡ್​ಗಳಲ್ಲಿ ಕಿರಾತಕರ ಜಮಾವಣೆ

ನವದೆಹಲಿ: ಕೋವಿಡ್​ 19 ಸೋಂಕಿಗೆ ಇಡೀ ವಿಶ್ವವೇ ಬೆಚ್ಚಿಬಿದ್ದಿದ್ದರೂ ಪಾಕಿಸ್ತಾನ ಮಾತ್ರ ಏನೂ ಆಗಿಯೇ ಇಲ್ಲ ಎಂಬಂತೆ ಬಿಡುಬೀಸಾಗಿ ವರ್ತಿಸುತ್ತಿದೆ. ತನ್ನ ನೆಲವನ್ನು ಸುರಕ್ಷಿತ ಅಡಗುತಾಣವಾಗಿಸಿಕೊಂಡಿರುವ ಉಗ್ರರಿಗೆ ಕುಮ್ಮಕ್ಕು ನೀಡುತ್ತಾ, ಹೆಚ್ಚೆಚ್ಚು ಉಗ್ರರ ತಯಾರಿಕೆಗೆ ಉಗ್ರ ಕಾರ್ಖಾನೆಗಳಿಗೆ ನೆರವು ನೀಡುತ್ತಿದೆ. ಅಲ್ಲಿ ತಯಾರಾದ ಕಿರಾತಕರನ್ನು ಪಾಕ್​ ಆಕ್ರಮಿತ ಕಾಶ್ಮೀರದ ಗಡಿಯಲ್ಲಿರುವ ಲಾಂಚ್​ಪ್ಯಾಡ್​ನಲ್ಲಿ ಜಮಾವಣೆ ಮಾಡುತ್ತಿದೆ.

ಪಾಕ್​ ಆಕ್ರಮಿತ ಕಾಶ್ಮೀರದಲ್ಲಿರುವ 14 ಲಾಂಚ್​ಪ್ಯಾಡ್​ಗಳಲ್ಲಿ ಒಟ್ಟು 450 ಉಗ್ರರು ಇದ್ದು, ಅವರೆಲ್ಲರೂ ಭಾರತದೊಳಗೆ ನುಸುಳುವ ಅವಕಾಶಕ್ಕಾಗಿ ಹೊಂಚು ಹಾಕಿಕೊಂಡು ಕೂತಿದ್ದಾರೆ ಎಂದು ಕೇಂದ್ರ ಸರ್ಕಾರದ ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ಇದೀಗ ಲಭ್ಯವಾಗಿರುವ ಗುಪ್ತಚರ ಮಾಹಿತಿ ಪ್ರಕಾರ ಪಾಕಿಸ್ತಾನ ಭಾರತದ ಮೇಲೆ ಕೋವಿಡ್​ ಸಮರ ಸಾರಲು ನಿರ್ಧರಿಸಿದಂತೆ ಇದೆ. ಆದ್ದರಿಂದ, ಕಳೆದೊಂದು ವಾರದಲ್ಲಿ ಈ ಲಾಂಚ್​ಪ್ಯಾಡ್​ಗಳಲ್ಲಿರುವ ಉಗ್ರರ ಸಂಖ್ಯೆಯನ್ನು ಎರಡು ಅಥವಾ ಮೂರು ಪಟ್ಟು ಹೆಚ್ಚಿಸಿದೆ.

ಭಾರತದೊಳಗೆ ನುಸುಳಲು ಹೊಂಚು ಹಾಕಿರುವ 450 ಉಗ್ರರ ಪೈಕಿ 244 ಮಂದಿ ಲಷ್ಕರ್​ ಎ ತೊಯ್ಬಾಕ್ಕೆ ಸೇರಿದವರಾಗಿದ್ದಾರೆ. ಜೈಶ್​ ಎ ಮೊಹಮ್ಮದ್​ ಉಗ್ರ ಸಂಘಟನೆಗೆ ಸೇರಿದ 129 ಮತ್ತು ಹಿಜ್ಬುಲ್​ ಮುಜಾಹಿದ್ದೀನ್​ಗೆ ಸೇರಿ 60 ಹಾಗೂ ಅಲ್​ ಬದರ್​ನಂತ ಸಣ್ಣಪುಟ್ಟ ಉಗ್ರ ಸಂಘಟನೆ ಉಗ್ರರು ಇದರಲ್ಲಿ ಸೇರಿದ್ದಾರೆ ಎಂದು ಗುಪ್ತಚರ ಮಾಹಿತಿ ತಿಳಿಸಿದೆ.

https://www.vijayavani.net/jubliant-factory-covid-19-secret-will-be-broken-at-the-earliest/