ಹಂಗಾಮಿ ಪ್ರಧಾನಿ ಹೆಸರು ಶಿಫಾರಸು: ಅವಿಶ್ವಾಸ ಮತದ ಸೋಲಿನಿಂದ ಬಚಾವಾದ ಪ್ರಧಾನಿ ಇಮ್ರಾನ್ ಖಾನ್, ಹಂಗಾಮಿ ಪ್ರಧಾನಿಯಾಗಲು ಸುಪ್ರೀಂ ಕೋರ್ಟ್ನ ಮಾಜಿ ಮುಖ್ಯ ನ್ಯಾಯಮೂರ್ತಿ ಗುಲ್ಜರ್ ಅಹ್ಮದ್ ಅವರ ಹೆಸರನ್ನು ಶಿಫಾರಸು ಮಾಡಿದ್ದಾರೆ. ಅವಿಶ್ವಾಸ ನಿಲುವಳಿ ವಜಾ ಮತ್ತು ರಾಷ್ಟ್ರೀಯ ಅಸೆಂಬ್ಲಿ ಬರ್ಖಾಸ್ತು ಕುರಿತು ಸುಪ್ರೀಂಕೋರ್ಟ್ ನಲ್ಲಿ ವಿಚಾರಣೆ ನಡೆಯುತ್ತಿರುವಾಗಲೇ ಮಾಜಿ ಕ್ರಿಕೆಟಿಗ ಇಮ್ರಾನ್ ಈ ’ಗೂಗ್ಲಿ’ ಎಸೆದಿದ್ದಾರೆ. ಪಾಕಿಸ್ತಾನ್ ತೆಹ್ರಿಕ್- ಎ- ಇನ್ಸಾಫ್ (ಪಿಟಿಐ) ಪಕ್ಷದ ಕೇಂದ್ರೀಯ ಸಮಿತಿ ಸಭೆಯಲ್ಲಿ ಈ ನಿರ್ಣಯ ಕೈಗೊಳ್ಳಲಾಯಿತು ಎಂದು ಇಮ್ರಾನ್ ಸಂಪುಟದಲ್ಲಿದ್ದ ವಾರ್ತಾ ಸಚಿವ ಫವಾದ್ ಚೌಧರಿ ಹೇಳಿದ್ದಾರೆ. ಈ ಮಧ್ಯೆ, ವಿರೋಧ ಪಕ್ಷದ ನಾಯಕ ಶೆಹಬಾಜ್ ಷರೀಫ್ ಯಾವುದೇ ಹೆಸರನ್ನು ಶಿಫಾರಸು ಮಾಡಿಲ್ಲ. ಹಂಗಾಮಿ ಪ್ರಧಾನಿ ಆಯ್ಕೆಯ ಪ್ರಕ್ರಿಯೆಯೆ ಕಾನೂನುಬಾಹಿರವಾದರಿಂದ ಇದರಲ್ಲಿ ಭಾಗಿಯಾಗಲಾರೆ. ಇಮ್ರಾನ್ ಖಾನ್ ಮತ್ತು ಅಧ್ಯಕ್ಷ ಆರಿಫ್ ಅಲ್ವಿ ಸಂವಿಧಾನವನ್ನು ಮುರಿದಿದ್ದಾರೆ. ಅವರ ವಿರುದ್ಧ 6ನೇ ಅನುಚ್ಛೇದದ ಅನ್ವಯ ವಿಚಾರಣೆ ನಡೆಯಬೇಕು ಎಂದು ಆಗ್ರಹಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಫವಾದ್, ದೇಶದಲ್ಲಿ ಚುನಾವಣೆ ಎದುರಾಗಲಿದೆ. ಚುನಾವಣೆಗೆ ಪೂರ್ವಭಾವಿಯಾಗಿ ಈ ಪ್ರಕ್ರಿಯೆ ನಡೆಯುತ್ತಿದೆ. ಇದರಲ್ಲಿ ಭಾಗಿಯಾಗುವುದಿಲ್ಲ ಎಂದರೆ ಅದು ಅವರ ಆಯ್ಕೆ. ಆದರೆ ನಾವಂತೂ ಹೆಸರನ್ನು ಶಿಫಾರಸು ಮಾಡಿದ್ದೇವೆ. ಏಳು ದಿನದಲ್ಲಿ ಶೆಹಬಾಜ್ ಹೆಸರು ಕಳುಹಿಸದಿದ್ದರೆ ನಾವು ಕಳುಹಿಸಿದ ಇಬ್ಬರಲ್ಲಿ ಒಬ್ಬರು ಹಂಗಾಮಿ ಪ್ರಧಾನಿಯಾಗಿ ನೇಮಕ ಆಗುತ್ತಾರೆ ಎಂದಿದ್ದಾರೆ.
