ನವದೆಹಲಿ: ಕರೊನಾ ಸೋಂಕಿನ ಲಘು ಲಕ್ಷಣ ಕಾಣಿಸಿಕೊಂಡವರಿನ್ನು ಆಸ್ಪತ್ರೆ ಅಲೆದಾಟದ ಬಗ್ಗೆ ಭಯ ಪಡಬೇಕಿಲ್ಲ. ಇಂತಹ ರೋಗ-ಪೂರ್ವ ಲಕ್ಷಣ (ಪ್ರಿ-ಸಿಂಪ್ಟಮ್ಯಾಟಿಕ್) ಇರುವವರನ್ನು ಮನೆಯಲ್ಲೇ ಪ್ರತ್ಯೇಕ ವಾಸದಲ್ಲಿರಿಸುವುದಕ್ಕೆ (ಹೋಂ ಐಸೋಲೇಷನ್) ಸಂಬಂಧಿಸಿದಂತೆ ಕೇಂದ್ರ ಗೃಹ ಸಚಿವಾಲಯ ಹೊಸ ಮಾರ್ಗಸೂಚಿ ಬಿಡುಗಡೆ ಮಾಡಿದೆ. ಇಂತಹ ರೋಗಿಗಳು ಸೌಲಭ್ಯವಿದ್ದರೆ ಮನೆಯಲ್ಲೇ ಐಸೊಲೇಷನ್ಗೆ ಒಳಪಡ ಬಹುದಾಗಿದೆ. ಆದರೆ ಸರ್ಕಾರಿ ಕಣ್ಗಾವಲು ಅಧಿಕಾರಿ ಹಾಗೂ ಒಂದು ಆಸ್ಪತ್ರೆಯ ನಿರಂತರ ಸಂಪರ್ಕದಲ್ಲಿರಬೇಕು. ಒಪ್ಪಿಗೆ ಪತ್ರಕ್ಕೆ ಸಹಿ ಹಾಕಬೇಕು. ರೋಗಿ ಸರ್ಕಾರದ ಆರೋಗ್ಯ ಸೇತು ಆಪ್ ಡೌನ್ಲೋಡ್ ಮಾಡಿಕೊಳ್ಳಬೇಕು. ಅದನ್ನು ಸದಾ ಕ್ರಿಯಾಶೀಲ ಸ್ಥಿತಿಯಲ್ಲಿಡಬೇಕು. ಸದ್ಯ ಕೊವಿಡ್-19 ಪಾಸಿಟಿವ್ ಇರುವವರನ್ನು ತಕ್ಷಣವೇ ಪ್ರತ್ಯೇಕಿಸಲಾಗುತ್ತದೆ ಹಾಗೂ ಆಸ್ಪತ್ರೆ, ತಾತ್ಕಾಲಿಕ ಆಸ್ಪತ್ರೆ ಅಥವಾ ಕರೊನಾ ವೈರಸ್ ರೋಗಿಗಳಿಗೆಂದೇ ಮೀಸಲಿರಿಸಿದ ವಾರ್ಡ್ಗಳಿಗೆ ದಾಖಲಿಸಲಾಗುತ್ತಿದೆ.
