ನವದೆಹಲಿ/ಮಾಸ್ಕೊ/ಕಿಯೆವ್: ಯೂಕ್ರೇನ್ ಮೇಲೆ ರಷ್ಯಾ ದಾಳಿ ಆರಂಭವಾಗಿ ಎರಡು ವಾರವಾಗುತ್ತಿದೆ. ಸಮರ ಭೂಮಿಯಾಗಿರುವ ಯೂಕ್ರೇನ್ನಲ್ಲಿ ಸಿಲುಕಿದ್ದ ಭಾರತೀಯರ ರಕ್ಷಣೆಗೆ ಭಾರತ ಸರ್ಕಾರ ನಡೆದುಕೊಂಡ ರಾಜತಾಂತ್ರಿಕ ರೀತಿಗೆ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ. ಬುಚಾರೆಸ್ಟ್ನಿಂದ 700 ಭಾರತೀಯರನ್ನು ಒಳಗೊಂಡ ಕೊನೆಯ ವಿಮಾನ ಬುಧವಾರ ಹೊರಟಿದೆ. ಇದರೊಂದಿಗೆ ಆಪರೇಷನ್ ಗಂಗಾ ಕಾರ್ಯಾಚರಣೆ ಮುಕ್ತಾಯ ಹಂತ ತಲುಪಿದೆ. ಯುದ್ಧ ಪೀಡಿತ ಯೂಕ್ರೇನ್ನಿಂದ ಭಾರತೀಯರನ್ನು ಸ್ಥಳಾಂತರಿಸುವ ಆಪರೇಷನ್ ಗಂಗಾ ಕಾರ್ಯಾಚರಣೆ ಗುರುವಾರ ಸಂಜೆಯೊಳಗೆ ಮುಕ್ತಾಯವಾಗಲಿದೆ. ಫೆ.24ರಿಂದ ಇದುವರೆಗೆ 18,000ದಷ್ಟು ಭಾರತೀರಯನ್ನು ಸ್ಥಳಾಂತರಿಸಲಾಗಿದೆ. ಇವರಲ್ಲಿ ಬಹುತೇಕರು ವಿದ್ಯಾರ್ಥಿಗಳು. ರಷ್ಯಾ ಗಡಿ ಭಾಗದ ಸುಮಿಯಲ್ಲಿ ಸಿಲುಕಿದ್ದ 700ರಷ್ಟು ಭಾರತೀಯರ ಕೊನೆಯ ತಂಡ ಪೋಲೆಂಡ್ಗೆ ಹೊರಟಿದೆ. ಅಲ್ಲಿಂದ ಇವರನ್ನು ಕರೆತರುವ ವಿಮಾನವೇ ಕೊನೆಯದ್ದು ಎಂದು ಸರ್ಕಾರ ತಿಳಿಸಿದೆ.
