ಅಲ್ಲಮಪ್ರಭು ಲೋಕೋತ್ತರ ವ್ಯಕ್ತಿ. ಉಪನಿಷತ್ತಿನ ಜಾನಶ್ರುತಿ ಪೌತ್ರಾಯಣನು ರೈಕ್ವನನ್ನು ಬೆಳಕಿಗೆ ತಂದಂತೆ ಅಲ್ಲಮನು ಅನೇಕ ಅಜ್ಞಾತ ಸಾಧಕರನ್ನು ಲೋಕದ ಕಣ್ಣಿಗೆ ತಂದದ್ದುಂಟು. ಅಂಥವರಲ್ಲಿ ಮರುಳುಶಂಕರದೇವನೂ ಒಬ್ಬ. ಇದು ಹುಡುಕಿ, ಹುಡುಕಿಕೊಳ್ಳುವ ಪರಿ. ಬೆಳಕು ಬೆಳಕನ್ನು ಅರಿಯಬಲ್ಲುದೇ ಹೊರತು ಕತ್ತಲಿನೊಡನೆ ಅದು ಲೀನವಾದೀತೆ? ಒಂದು ಹಂತದಲ್ಲಿ ಇದು ಕತ್ತಲು ಹರಿದು ಕೊಂಡ ಕ್ರಮವೂ ಹೌದು. ವೀರಶೈವಾಗಮಗಳ ಆಚೆ, ವೀರಶೈವ ಪುರಾಣಗಳಾಚೆ ಇರುವ ರೂಪಕಗಳನ್ನು ನಾವು ಬಗೆದು ನೋಡಬೇಕಾ ಗಿದೆ. ಹಾಗೆ ನೋಡಿದರೆ, ಅಲ್ಲಮನೇ ಒಂದು ಬೃಹತ್ ರೂಪಕ. ಅವನ ಜೊತೆಗೆ ಉಳಿದವರೆಲ್ಲಾ ಉಪರೂಪಕಗಳ ಹಾಗೆ! ಅಲ್ಲಮನು ಮಾತಿಗೆ ನಿಲುಕಲಾರ, ರೂಪಕಕ್ಕೂ ಸಿಗಲಾರ, ಶಬ್ದಕ್ಕೂ ನಿಲುಕಲಾರ. ಇನ್ನೊಂದು ಬಗೆಯಲ್ಲಿ ನೋಡಿದರೆ ಸ್ಪರ್ಶಕ್ಕೂ ಸಿಗಲಾರ. ಇವೆಲ್ಲಕ್ಕೂ ನಿಲುಕಲು ಬಲ್ಲ ಬಲ್ಲಿದರ ಒಡೆಯ ನಮ್ಮ ಅಲ್ಲಮ!
