ಪ್ರಶ್ನೆ: ನನಗೆ ಮದುವೆ ಆಗಿ ಹದಿಮೂರು ವರ್ಷಗಳಾಗಿದೆ. ಎಂಟು ವರ್ಷದ ಮಗಳೂ ಇದ್ದಾಳೆ. ನಾನು ಡಬಲ್ ಗ್ರಾಜುಯೇಟ್ ಹಾಗೂ ತುಂಬಾ ಬುದ್ಧಿವಂತೆ. ನನ್ನ ಗಂಡ ನನ್ನನ್ನು ಇಷ್ಟ ಪಟ್ಟು ಮದುವೆ ಆಗಿದ್ದರು. ನನ್ನ ತಾಯಿ ವಿಧವೆ. ನಮ್ಮ ತಾಯಿ ಹಾಗೂ ನಮ್ಮ ಕುಟುಂಬದವರ ಜೊತೆ ಇರಲು ಒಪ್ಪಿದರು. ಆ ಒಂದೇ ಕಾರಣಕ್ಕೆ ನಾನು ಅವರಿಗೆ ಸೋಲುತ್ತಾ ಬಂದೆ. ಆದರೆ ಇತ್ತೀಚೆಗೆ ಅವರ ಕಿರುಕುಳ ಹೆಚ್ಚುತ್ತಾ ಬಂದಿದೆ. ಮನೆಯಿಂದಲೇ ಕೆಲಸ ಮಾಡುತ್ತೇನೆ ಎಂದು ಹೇಳಿ ಮನೆಯಲ್ಲೇ ನಾಲ್ಕೈದು ವರ್ಷಗಳಿಂದ ಇರುತ್ತಾರೆ. ಅವರಿಗೆ ಎರಡು ಲಕ್ಷದವರೆಗೆ ಸಂಬಳ ಬರುತ್ತಿದೆ. ಆದರೆ ಒಂದೊಂದು ರೂಪಾಯಿ ಕೊಡಲು ಪ್ರಾಣ ಹಿಂಡುತ್ತಾರೆ. ಸಣ್ಣ ಪುಟ್ಟ ವಿಷಯಗಳಿಗೆಲ್ಲಾ ತಲೆ ದೂರಿಸುತ್ತಾರೆ. ಅವರು ಹೇಳಿದಂತೆಯೇ ಮನೆಯವರೆಲ್ಲಾ ಕೇಳಬೇಕು ಎಂದು ಬಯಸುತ್ತಾರೆ. ಮನೆಯವರನ್ನೆಲ್ಲಾ ಕಂಡಂ ಮಾಡಿ ಹೀಯಾಳಿಸಿ ಮಾತಾಡುತ್ತಾರೆ. ತನ್ನ ಮಾತೇ ನಡೆಯಬೇಕು ಎನ್ನುವ ಆವೇಶದಲ್ಲಿ ಕಿರುಚಾಡಿ ಎಲ್ಲರನ್ನೂ ಕೆಟ್ಟ ಕೆಟ್ಟ ಪದಗಳಿಂದ ಬೈದಾಡುತ್ತಾರೆ. ನಮ್ಮ ತಾಯಿಯ ಮೇಲೆ ನನ್ನ ಮೇಲೆ ಕೈಮಾಡುತ್ತಾರೆ. ನಾನು ಕೆಲಸಕ್ಕೂ ಹೋಗಗೊಡುವುದಿಲ್ಲ. ನನ್ನ ಹತ್ತಿರ ಬಿಡಿಗಾಸೂ ಇಲ್ಲ. ನಾನು ಒಳ್ಳೆಯ ಬಟ್ಟೆ ಹಾಕಿಕೊಳ್ಳಲೂ ಬಿಡುವುದಿಲ್ಲ. ನೀನು ಡಬ್ಬಿಯಲ್ಲಿ ಮುಚ್ಚಿಟ್ಟ ಹಾಗೆ ಇರಬೇಕು ಎನ್ನುತ್ತಾರೆ. ನಾನು ಹೊರಗಿನ ಗಾಳಿ ಬೆಳಕು ನೋಡಲೂ ಬಿಡುವುದಿಲ್ಲ. ತನ್ನ ಜೊತೆಗೂ ಎಲ್ಲಿಗೂ ಕರೆದುಕೊಂಡು ಹೋಗುವುದಿಲ್ಲ. ನಾನು ಫೋನಿನಲ್ಲೂ ಯಾರ ಹತ್ತಿರವೂ ಮಾತಾಡಲೂ ಬಿಡುವುದಿಲ್ಲ. ನನಗೆ ಸಾಯಬೇಕೆನ್ನಿಸುತ್ತಿದೆ. ನನಗೆ ಏನಾದರೂ ದಾರಿ ಇದೆಯೇ? ಈ ನರಕದಿಂದ ನಾನು ಹೇಗೆ ಹೊರಬರಬೇಕು ತಿಳಿಸಿ.
