ಪೌಷ್ಟಿಕ ಆಹಾರ ಆರೋಗ್ಯಕ್ಕೆ ಸೋಪಾನ

ಚಂದ್ರಶೇಖರ ಗಂಧನಹಳ್ಳಿ: ಶಾಲಾ-ಕಾಲೇಜು ಮಕ್ಕಳಲ್ಲಿ ಸ್ಥೂಲಕಾಯ ಮತ್ತು ಫ್ಯಾಟಿ ಲಿವರ್‌ನಂತಹ ಗಂಭೀರ ಆರೋಗ್ಯ ಸಮಸ್ಯೆಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ಆಹಾರ ಸುರಕ್ಷತಾ ಇಲಾಖೆಯು ಇತ್ತೀಚೆಗೆ ಶಾಲಾ-ಕಾಲೇಜುಗಳು, ವಿದ್ಯಾರ್ಥಿ ನಿಲಯಗಳ ಸುತ್ತಮುತ್ತಲಿನ ಜಂಕ್ ಫುಡ್ ತಯಾರಿಕಾ ಮತ್ತು ಮಾರಾಟ ಮಳಿಗೆಗಳ ಮೇಲೆ ದಾಳಿ ನಡೆಸಿ, ಆಹಾರ ಮಾದರಿಗಳನ್ನು ಪರಿಶೀಲನೆ ನಡೆಸಿದೆ. 2019ರಿಂದಲೇ ಶಾಲಾ-ಕಾಲೇಜು ಕಟ್ಟಡಗಳ 50 ಮೀಟರ್ ಒಳಗೆ ಯಾವುದೇ ರೀತಿಯ ಜಂಕ್ ಫುಡ್ಸ್, ಸಂಸ್ಕರಿತ ಹಣ್ಣಿನ ಜ್ಯೂಸ್ ಮಾರಾಟ ನಿಷೇಧವಿದ್ದರೂ ಕೆಲ ಶಾಲಾ-ಕಾಲೇಜುಗಳ ಕ್ಯಾಂಟಿನ್‌ನಲ್ಲೇ ಚಿಪ್ಸ್, ಬರ್ಗರ್, ನೂಡಲ್ಸ್‌ನಂಥ ಕುರುಕಲು ತಿಂಡಿ (ಜಂಕ್ ಫುಡ್) ಮಾರಾಟ ಮಾಡಲಾಗುತ್ತದೆ. ಇದರಿಂದ ಮಕ್ಕಳು ದಿನನಿತ್ಯ ಜಂಕ್ ಫುಡ್ಸ್ ಸೇವಿಸುವುದು ಸಾಮಾನ್ಯವಾಗಿದೆ.

ಚಿಪ್ಸ್, ಬಜ್ಜಿ, ಬೋಂಡಾ, ಬೋಟಿಯಂಥ ಕುರುಕಲು ತಿಂಡಿಗಳನ್ನು ಪದೇಪದೆ ಕರಿದ ಎಣ್ಣೆಯಲ್ಲಿ ತಯಾರಿಸಲಾಗುತ್ತದೆ. ಈ ತಿನಿಸುಗಳಿಗೆ ಬಳಸುವ ಬಣ್ಣ ಹಾಗೂ ರಾಸಾಯನಿಕಗಳು ಮಕ್ಕಳ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತವೆ. ಜತೆಗೆ ಬೇಕರಿ, ಹೋಟೆಲ್‌ಗಳು, ಫುಟ್‌ಪಾತ್ ಸ್ಟಾಲ್‌ಗಳಲ್ಲಿ ಮಾರಾಟ ಮಾಡುವ ಜಂಕ್ ಫುಡ್‌ಗಳ ತಯಾರಿಕೆಯಲ್ಲಿ ಅನೇಕ ರೀತಿಯ ಕೆಮಿಕಲ್ಸ್, ಕ್ಯಾನ್ಸರ್‌ಕಾರಕ ಬಣ್ಣ, ಅವಧಿಮೀರಿದ ಪದಾರ್ಥಗಳನ್ನು ಬಳಸುತ್ತಿರುವ ಘಟನೆಗಳು ಸುದ್ದಿಯಾಗುತ್ತಲೇ ಇವೆ. ಆದರೂ ಈ ರೀತಿಯ ಜಂಕ್ ಫುಡ್‌ಗೇನೇ ಬಹುತೇಕ ಮಂದಿ ಮಾರುಹೋಗುತ್ತಿರುವುದು ದುರದೃಷ್ಟಕರ.

ಇತ್ತೀಚಿನ ದಿನಗಳಲ್ಲಿ ಅನಾರೋಗ್ಯಕರ ಆಹಾರ ಸೇವನೆ ಹೆಚ್ಚುತ್ತಿರುವುದರಿಂದ ಜನರಲ್ಲಿ ಬೊಜ್ಜು ಮತ್ತು ಮಧುಮೇಹ ವೇಗವಾಗಿ ಹೆಚ್ಚುತ್ತಿದೆ. ಈ ಬಗ್ಗೆ 'ಲ್ಯಾನ್ಸೆಟ್' ಜರ್ನಲ್‌ನಲ್ಲಿ ಭಾರತೀಯರ ಸ್ಥೂಲಕಾಯದ ಬಗ್ಗೆ ಆತಂಕಕಾರಿ ವರದಿಯನ್ನು ನೀಡಿದೆ. ಜಂಕ್ ಫುಡ್ ಸೇವನೆ ಏರಿಕೆಯಿಂದ ದೇಶದಲ್ಲಿ ಬೊಜ್ಜಿನಿಂದ ಬಳಲುವವರ ಸಂಖ್ಯೆ 44 ಕೋಟಿಗೆ ಏರಿಕೆಯಾಗಿದೆ. ಈ ಪೈಕಿ 20.2 ಕೋಟಿ ಪುರುಷರು ಮತ್ತು 23.8 ಕೋಟಿ ಮಹಿಳೆಯರಿದ್ದು, ಅತಿ ಹೆಚ್ಚು ಮಹಿಳೆಯರೇ ಸ್ಥೂಲಕಾಯದ ಸಮಸ್ಯೆ ಎದುರಿಸುತ್ತಿದ್ದಾರೆ.

ಕರೊನಾ ಬಳಿಕ ಯುವಕರು ಹಾಗೂ ಶಾಲಾ ಮಕ್ಕಳಿಗೆ ಹೊರಾಂಗಣ ಕ್ರೀಡೆ, ಆಟದ ಚಟುವಟಿಕೆ ಮಾತ್ರ ಕಡಿಮೆಯಾಗಿಲ್ಲ. ಮಕ್ಕಳಲ್ಲಿ ತಿನ್ನುವ ಅಭ್ಯಾಸ ಕೂಡ ಹೆಚ್ಚಿದೆಯಂತೆ. ಅದರಲ್ಲೂ ಇತ್ತೀಚಿನ ದಿನಗಳಲ್ಲಿ ಫಾಸ್ಟ್ ಫುಡ್, ಬೇಕರಿ ತಿಂಡಿ ಸೇವನೆ ಹೆಚ್ಚಾಗಿದ್ದು, ಶೇ. 20ರಷ್ಟು ಮಕ್ಕಳಲ್ಲಿ ಅತಿಯಾದ ಬೊಜ್ಜು ಕಾಣಿಸುತ್ತಿದೆ. 5ರಿಂದ 14 ವಯಸ್ಸಿನ 3 ಕೋಟಿ ಮಕ್ಕಳು ಸ್ಥೂಲಕಾಯದ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಮಕ್ಕಳ ಈ ಅತಿಯಾದ ಬೊಜ್ಜು ಅಸ್ತಮಾ ಜೊತೆಗೆ ಕ್ಯಾನ್ಸರ್‌ಗೂ ಕಾರಣವಾಗುತ್ತಿದೆ.

ಜಂಕ್ ಫುಡ್ ಸೇವನೆಯಿಂದ ದೇಹದಲ್ಲಿ ಬೇಡದ ಕೊಬ್ಬು ಹೆಚ್ಚು ಶೇಖರಣೆಯಾಗುತ್ತದೆ. ಇದರಿಂದಾಗಿ ಚಿಕ್ಕ ವಯಸ್ಸಿನಲ್ಲಿಯೇ ಯುವಕ-ಯುವತಿಯರು ಅತಿಯಾದ ಬೊಜ್ಜಿನ ಸಮಸ್ಯೆಗೆ ತುತ್ತಾಗುತ್ತಿದ್ದಾರೆ. 16 ವರ್ಷಕ್ಕಿಂತ ಕಿರಿಯ ಮಕ್ಕಳಲ್ಲಿಯೇ ಈ ಬೊಜ್ಜು ಹೆಚ್ಚಾಗುತ್ತಿದ್ದು, ಬಾಲ್ಯದ ಈ ಬೊಜ್ಜು ಮಕ್ಕಳ ಟೈಪ್-2 ಡಯಾಬಿಟಿಸ್, ಅಧಿಕ ಕೊಲೆಸ್ಟ್ರಾಲ್, ಅಧಿಕ ರಕ್ತದೊತ್ತಡ, ಹೃದಯ ಕಾಯಿಲೆ, ಪಾರ್ಶ್ವವಾಯು, ಪಿತ್ತಕೋಶದ ಕಾಯಿಲೆ, ಉಸಿರಾಟದ ತೊಂದರೆ ಸೇರಿದಂತೆ ಕೆಲವು ಕ್ಯಾನ್ಸರ್‌ಗಳ ಅಪಾಯವನ್ನು ತಂದೊಡ್ಡುತ್ತಿದೆ.

ಹೃದ್ರೋಗಗಳ ಭೀತಿ: ಸಂಸ್ಕರಿಸಿದ ಆಹಾರದಲ್ಲಿರುವ ಟ್ರಾನ್ಸ್-ಫ್ಯಾಟ್ ಮತ್ತು ಕೆಟ್ಟ ಕೊಲೆಸ್ಟ್ರಾಲ್ ರಕ್ತನಾಳಗಳಲ್ಲಿ ಶೇಖರಣೆಯಾಗಿ ರಕ್ತಸಂಚಾರಕ್ಕೆ ಅಡ್ಡಿಯುಂಟುಮಾಡುತ್ತವೆ. ಇದರಿಂದಾಗಿ ಇತ್ತೀಚಿನ ದಿನಗಳಲ್ಲಿ 20-30 ವರ್ಷದ ಯುವಕರಲ್ಲಿಯೂ ಹೃದಯಾಘಾತ ಮತ್ತು ಅಧಿಕ ರಕ್ತದೊತ್ತಡದ ಪ್ರಕರಣಗಳು ಹೆಚ್ಚಾಗುತ್ತಿವೆ.

ಸಣ್ಣ ವಯಸ್ಸಿನಲ್ಲೆ ಮಧುಮೇಹ: ಸಕ್ಕರೆಯುಕ್ತ ತಂಪು ಪಾನೀಯಗಳು ಮತ್ತು ಸಿಹಿತಿಂಡಿಗಳ ಅತಿಯಾದ ಸೇವನೆಯಿಂದ ದೇಹದಲ್ಲಿ ಇನ್ಸುಲಿನ್ ಉತ್ಪಾದನೆಯಲ್ಲಿ ಏರುಪೇರಾಗುತ್ತದೆ. ಪರಿಣಾಮವಾಗಿ, ವಯಸ್ಸಾದವರಿಗೆ ಮಾತ್ರ ಬರುತ್ತಿದ್ದ 'ಟೈಪ್-2 ಮಧುಮೇಹ' ಇಂದು ಶಾಲಾ-ಕಾಲೇಜು ವಿದ್ಯಾರ್ಥಿಗಳನ್ನೂ ಬಾಧಿಸುತ್ತಿದೆ.

ಮಾನಸಿಕ ಆರೋಗ್ಯದ ಮೇಲೆ ಪ್ರಭಾವ: ಮಿದುಳಿನ ಚುರುಕುತನಕ್ಕೆ ಒಮೆಗಾ-3 ಮತ್ತು ಇತರ ಪೋಷಕಾಂಶಗಳ ಅಗತ್ಯವಿದೆ. ಜಂಕ್ ಫುಡ್ ಸೇವನೆಯಿಂದ ಪೋಷಕಾಂಶಗಳ ಕೊರತೆ ಉಂಟಾಗಿ, ಯುವಜನರಲ್ಲಿ ಏಕಾಗ್ರತೆಯ ಕೊರತೆ, ಅತಿಯಾದ ಕೋಪ, ಆಯಾಸ, ಮತ್ತು ಖಿನ್ನತೆಯಂತಹ ಮಾನಸಿಕ ಸಮಸ್ಯೆಗಳು ಹೆಚ್ಚಾಗುತ್ತಿವೆ. ಜಂಕ್ ಫುಡ್‌ನಲ್ಲಿ ನಾರಿನಂಶ ಇರುವುದಿಲ್ಲ. ಇದರಿಂದಾಗಿ ತೀವ್ರವಾದ ಮಲಬದ್ಧತೆ, ಗ್ಯಾಸ್ಟ್ರಿಕ್, ಅಸಿಡಿಟಿ ಮತ್ತು ಕರುಳಿನ ಅಲ್ಸರ್‌ನಂತಹ ಸಮಸ್ಯೆಗಳು ಎದುರಾಗುತ್ತವೆ.

ರೋಗನಿರೋಧಕ ಶಕ್ತಿ ಕುಂಠಿತ: ಕೃತಕ ರಾಸಾಯನಿಕಗಳು ಮತ್ತು ಪ್ರಿಸರ್ವೇಟಿವ್‌ಗಳ ನಿರಂತರ ಸೇವನೆಯಿಂದ ದೇಹದ ಸ್ವಾಭಾವಿಕ ರೋಗನಿರೋಧಕ ಶಕ್ತಿ ಕುಸಿಯುತ್ತದೆ. ಇದರಿಂದ ಸಣ್ಣಪುಟ್ಟ ಸೋಂಕುಗಳಿಗೂ ಯುವಜನರು ಸುಲಭವಾಗಿ ತುತ್ತಾಗುತ್ತಿದ್ದಾರೆ.

ವಿಶ್ವದ 'ದೊಡ್ಡಣ್ಣ' ಅಮೆರಿಕ ಕೂಡ ಅನಾರೋಗ್ಯಕರ ಆಹಾರ ಸೇವನೆಯಿಂದ ಬಳಲುತ್ತಿದೆ. ಶಾರೀರಿಕ ಮತ್ತು ಮಾನಸಿಕ ಫಿಟ್ನೆಸ್ ಮೇಲೆ ಇದು ಕೆಟ್ಟ ಪರಿಣಾಮ ಬೀರುತ್ತಿದೆ. 'ಮೇಕ್ ಅಮೆರಿಕ ಹೆಲ್ದಿ ಅಗೇನ್' ಹೆಸರಿನಲ್ಲಿ ಇತ್ತೀಚೆಗೆ ಜಾರಿಯಾಗಿರುವ ಸರ್ಕಾರದ ವರದಿಯಲ್ಲಿ ಪ್ರಸ್ತುತ ಪೀಳಿಗೆಯನ್ನು ಈವರೆಗಿನ ಅತ್ಯಂತ ಅನಾರೋಗ್ಯಕರ ಪೀಳಿಗೆ ಎಂದು ನಮೂದಿಸಲಾಗಿದೆ. 7.3 ಕೋಟಿ ಮಕ್ಕಳ ಪೈಕಿ ಶೇಕಡ 40ರಷ್ಟು ಮಕ್ಕಳು ಒಂದಿಲ್ಲ ಒಂದು ಗಂಭೀರ ಕಾಯಿಲೆ ಅಥವಾ ಆರೋಗ್ಯ ಸಂಬಂಧಿ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ದೈಹಿಕ, ಮಾನಸಿಕ ಫಿಟ್ನೆಸ್ ಇಲ್ಲದಿರುವುದು ಮತ್ತು ಅಧಿಕ ಬೊಜ್ಜಿನಿಂದ ಶೇ. 75ರಷ್ಟು ತರುಣರು ಸೇನೆ ಸೇರಲು ಅರ್ಹತೆಯೇ ಹೊಂದಿಲ್ಲ. ಬೇರೆ ದೇಶಗಳಿಗೆ ಹೋಲಿಸಿದರೆ ಅಮೆರಿಕದಲ್ಲಿ ಮಕ್ಕಳ ಆರೋಗ್ಯದ ಮೇಲೆ ಹೆಚ್ಚು ವೆಚ್ಚ ಮಾಡಲಾಗುತ್ತಿದ್ದರೂ, ಪರಿಸ್ಥಿತಿಯಲ್ಲಿ ಯಾವುದೇ ಸುಧಾರಣೆಯಾಗಿಲ್ಲ. ಅಮೆರಿಕದಲ್ಲಿ 6 ವರ್ಷ ಮೇಲ್ಪಟ್ಟ ಪ್ರತಿ 5 ಮಕ್ಕಳಲ್ಲಿ ಒಬ್ಬ ಸ್ಥೂಲಕಾಯ ಹೊಂದಿದ್ದಾನೆ/ಳೆ. 70ರ ದಶಕದಲ್ಲಿ 20 ಮಕ್ಕಳ ಪೈಕಿ ಒಬ್ಬನಿಗೆ ಬೊಜ್ಜಿನ ಸಮಸ್ಯೆ ಇರುತ್ತಿತ್ತು. ಅಂದರೆ, ಬೊಜ್ಜು ಸಮಸ್ಯೆ 270%ಗಿಂತ ಹೆಚ್ಚು ಏರಿಕೆ ಕಂಡಿದೆ. ಮಕ್ಕಳಲ್ಲಿ ಈ ಸ್ಥಿತಿಗೆ ಫಾಸ್ಟ್ ಫುಡ್ ಸೇವನೆ, ಅತಿಯಾದ ಔಷಧ ಸೇವನೆ ಮುಖ್ಯ ಕಾರಣ ಎನ್ನಲಾಗಿದೆ.

ಯುವಜನತೆ ಈ ತ್ವರಿತ ಆಹಾರ ಅಥವಾ ಫಾಸ್ಟ್ ಫುಡ್‌ಗಳಿಗೆ ಆಕರ್ಷಿತರಾಗಲು ಪ್ರಮುಖ ಕಾರಣ ಅದರ 'ರುಚಿ' ಮತ್ತು 'ಆಕರ್ಷಣೆ'. ಜಂಕ್ ಫುಡ್‌ಗಳಲ್ಲಿ ಕೃತಕ ಬಣ್ಣಗಳು, ರುಚಿವರ್ಧಕಗಳು, ಅಧಿಕ ಉಪ್ಪು ಮತ್ತು ಸಕ್ಕರೆಯನ್ನು ಬಳಸಲಾಗುತ್ತದೆ. ಇದು ನಾಲಿಗೆಗೆ ರುಚಿ ನೀಡುವ ಜೊತೆಗೆ, ಮಿದುಳಿನಲ್ಲಿ ಡೋಪಮೈನ್ ಎಂಬ ರಾಸಾಯನಿಕವನ್ನು ಬಿಡುಗಡೆ ಮಾಡಿ, ಪದೇಪದೆ ಅದೇ ಬಗೆಯ ಆಹಾರವನ್ನು ತಿನ್ನಬೇಕೆಂಬ ಬಯಕೆಯನ್ನು ಹುಟ್ಟುಹಾಕುತ್ತದೆ. ಇದರ ಜೊತೆಗೆ, ಆಕರ್ಷಕ ಜಾಹೀರಾತುಗಳು, ಸುಲಭವಾಗಿ ಮತ್ತು ವೇಗವಾಗಿ ಎಲ್ಲಿ ಬೇಕಾದರೂ ಲಭ್ಯವಾಗುವಿಕೆ ಹಾಗೂ ಸ್ನೇಹಿತರೊಂದಿಗೆ ಸೇರಿದಾಗ ಜಂಕ್ ಫುಡ್ ತಿನ್ನುವುದೇ ಒಂದು ಟ್ರೆಂಡ್ ಎಂಬ ಭ್ರಮೆ ಯುವಜನತೆಯನ್ನು ಈ ಜಾಲದಲ್ಲಿ ಸಿಲುಕಿಸಿದೆ.

ಅತಿಯಾದ ಕೊಬ್ಬಿನಾಂಶ, ಸಕ್ಕರೆ, ಉಪ್ಪು ಮತ್ತು ಕ್ಯಾಲರಿ ಇರುವ ಪದಾರ್ಥಗಳನ್ನು ಜಂಕ್ ಫುಡ್ ಎನ್ನಲಾಗುತ್ತದೆ. ಜಂಕ್ ಫುಡ್‌ಗಳ ಅತಿಯಾದ ಸೇವನೆ ಆರೋಗ್ಯಕ್ಕೆ ಹಾನಿಕಾರಕ. ಇಂಥ ಆಹಾರಗಳನ್ನು ಪ್ರತಿದಿನ ತಿನ್ನಲು ಆಗುವುದಿಲ್ಲ. ಹಾಗಾಗಿ ಜಂಕ್ ಫುಡ್‌ಗಳನ್ನು ಅತಿಯಾಗಿ ಇಷ್ಟಪಡುವ ಜನರಿಗಾಗಿಯೇ ಜಂಕ್ ಫುಡ್ ದಿನವನ್ನು ಮೀಸಲಿಡಲಾಗಿದೆ. ಪ್ರತಿವರ್ಷ ಜುಲೈ 21ರಂದು ಅಮೆರಿಕ ಮತ್ತು ಇತರ ದೇಶಗಳಲ್ಲಿ ಜಂಕ್ ಫುಡ್ ಡೇ ಆಚರಣೆ ಮಾಡಲಾಗುತ್ತದೆ. ಅಂದು ಜಂಕ್ ಫುಡ್ ಪ್ರಿಯರು ತಮಗೆ ಇಷ್ಟವಾದ ಜಂಕ್ ಫುಡ್‌ಗಳನ್ನು ಬೆಳಗ್ಗೆ ತಿಂಡಿ, ಮಧ್ಯಾಹ್ನದ ಊಟ ಮತ್ತು ರಾತ್ರಿಯ ಊಟದ ಹೊತ್ತಲ್ಲಿ ಸವಿದು ಮರುದಿನ ಡಯಟ್ ಮಾಡಲಿ ಎಂದು ಈ ದಿನವನ್ನು ಸೃಷ್ಟಿಸಲಾಗಿದೆ.