ಚೀನಾದ ಅಣ್ವಸ್ತ್ರ ಕಾರ್ಯಕ್ರಮಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿರುವ ಅಮೆರಿಕದ ತಜ್ಞ ಜೆಫ್ರಿ ಲಿವಿಸ್ ಪ್ರಕಾರ, ಈ ಸ್ಯಾಟಲೈಟ್ ಚಿತ್ರಗಳು ಅಣ್ವಸ್ತ್ರ ಉಗ್ರಾಣದ ನಿರ್ಮಾಣ ಬಿಟ್ಟು ಬೇರೆಯದ್ದಾಗಿರುವ ಸಾಧ್ಯವೇ ಇಲ್ಲ. ಚೀನಾದ ಐಸಿಬಿಎಂಗಳ ನಿರ್ಮಾಣ ಡಿಎಫ್-41 ಮಾದರಿಯಲ್ಲಿ ಇರುವ ಸಾಧ್ಯತೆ ಇದೆ. ಇಲ್ಲಿರುವ ಕ್ಷಿಪಣಿಗಳು ಬಹುಸಿಡಿತಲೆಗಳನ್ನು ಒಳಗೊಂಡ ಮಾರಕಾಸ್ತ್ರಗಳಾಗಿದ್ದು, 15 ಸಾವಿರ ಕಿ.ಮೀ. ದೂರವನ್ನು ಕ್ರಮಿಸುವಷ್ಟ ಸಾಮರ್ಥ್ಯ ಹೊಂದಿರುವ ಸಂಭವ ಇದೆ. ಅಂದರೆ, ಭಾರತ, ತೈವಾನ್, ಅಮೆರಿಕದ ಕೆಲವು ಭಾಗಗಳಿಗೂ ಇದು ತಲುಪಬಹುದು ಎಂದು ಜೆಫ್ರಿ ಹೇಳಿದ್ದಾರೆ. ‘ಒತ್ತಡಗಳನ್ನು ಕಡಿಮೆ ಮಾಡುವ ಪ್ರಾಯೋಗಿಕ ಉಪಕ್ರಮದಲ್ಲಿ ಚೀನಾ ನಮ್ಮೊಂದಿಗೆ ಜತೆಯಾಗಿದೆ. ಆದರೆ, ಸ್ಯಾಟಲೈಟ್ನ ಚಿತ್ರಗಳು ಚೀನಾದಲ್ಲಿನ ಕಳವಳಕಾರಿ ಬೆಳವಣಿಗೆಯನ್ನು ಎತ್ತಿ ತೋರಿಸಿವೆ’ ಎಂದು ಅಮೆರಿಕದ ವಿದೇಶಾಂಗ ಇಲಾಖೆಯ ವಕ್ತಾರ ನೆಡ್ ಪ್ರೖೆಸ್ ಹೇಳಿದ್ದಾರೆ. ಅಮೆರಿಕದ ರಕ್ಷಣಾ ಇಲಾಖೆ ಪೆಂಟಗನ್ ಕೂಡ ಚೀನಾ ಅಣ್ವಸ್ತ್ರ ಕಾರ್ಯಕ್ರಮದ ಬಗ್ಗೆ ಎಚ್ಚರವಹಿಸಬೇಕು ಎಂದು ಹೇಳಿದೆ.
