ಅಂಡಮಾನ್ ಆಡಳಿತಕ್ಕೆ ಸಾವರ್ಕರ್​ ಸಲ್ಲಿಸಿದ್ದಾರೆ ಎನ್ನಲಾದ ದಯಾ ಅರ್ಜಿ ಸಂಬಂಧಿಸಿ ಯಾವುದೇ ದಾಖಲೆಗಳು ಇಲ್ಲ: ಸಂಸತ್ತಿಗೆ ಸರ್ಕಾರದ ಸ್ಪಷ್ಟೀಕರಣ

ನವದೆಹಲಿ: ವೀರ ಸಾವರ್ಕರ್ ಅವರು ಬ್ರಿಟಿಷ್ ಆಡಳಿತಕ್ಕೆ ಸಲ್ಲಿಸಿದ್ದಾರೆ ಎಂದು ಹೇಳಲಾಗುತ್ತಿರುವ ದಯಾ ಅರ್ಜಿಗೆ ಸಂಬಂಧಿಸಿದ ಯಾವುದೇ ದಾಖಲೆಗಳು ಇಲ್ಲ ಎಂದು ಕೇಂದ್ರ ಸರ್ಕಾರ ಮಂಗಳವಾರ ಸಂಸತ್ತಿಗೆ ತಿಳಿಸಿದೆ.

ಹಿಂದು ರಾಷ್ಟ್ರೀಯ ನಾಯಕ ವಿನಾಯಕ ದಾಮೋದರ ಸಾವರ್ಕರ್​ ಅವರು ಬ್ರಿಟಿಷ್ ಸರ್ಕಾರಕ್ಕೆ ಸಲ್ಲಿಸಿದ್ದ ದಯಾ ಅರ್ಜಿಯನ್ನು ಅಂಡಮಾನ್- ನಿಕೋಬಾರ್ ಸೆಲ್ಯುಲರ್ ಜೈಲ್ ಮ್ಯೂಸಿಯಂನಲ್ಲಿ ಪ್ರದರ್ಶನಕ್ಕೆ ಇರಿಸಿಲ್ಲ. ಅಂತಹ ಯಾವುದೇ ದಾಖಲೆಗಳು ಕಲೆ ಮತ್ತು ಸಂಸ್ಕೃತಿ ಇಲಾಖೆಯ ಬಳಿ ಇಲ್ಲ ಎಂದು ಕೇಂದ್ರ ಸಂಸ್ಕೃತಿ ಸಚಿವ ಪ್ರಹ್ಲಾದ್ ಪಟೇಲ್ ರಾಜ್ಯ ಸಭೆ ಸದಸ್ಯರ ಪ್ರಶ್ನೆಗೆ ಲಿಖಿತ ಉತ್ತರ ನೀಡಿದ್ದಾರೆ.

ಅಂಡಮಾನ್​-ನಿಕೋಬಾರ್​ನ ಕಲೆ ಮತ್ತು ಸಂಸ್ಕೃತಿ ನಿರ್ದೇಶನಾಲಯದಿಂದ ಪಡೆದ ಮಾಹಿತಿ ಪ್ರಕಾರ, ಅಂತಹ ಯಾವುದೇ ದಯಾ ಅರ್ಜಿಯನ್ನು ಅಲ್ಲಿ ಪ್ರದರ್ಶನಕ್ಕೆ ಇರಿಸಿಲ್ಲ. ಅಲ್ಲದೆ, ಇದುವರೆಗೆ ಲಭ್ಯ ದಾಖಲೆಗಳಲ್ಲಿ ಆ ರೀತಿಯ ದಯಾ ಅರ್ಜಿಯ ದಾಖಲೆಗಳು ಇಲ್ಲ ಎಂದು ಅಂಡಮಾನ್ -ನಿಕೋಬಾರ್ ಆಡಳಿತವೂ ಸ್ಪಷ್ಟಪಡಿಸಿರುವುದಾಗಿ ಅವರು ತಿಳಿಸಿದ್ದಾರೆ. (ಏಜೆನ್ಸೀಸ್​)