ಬೇಕಾಬಿಟ್ಟಿ ವಿದ್ಯುತ್​ ಕಡಿತ ಬೇಡ

ಬಂಗಾರಪೇಟೆ: ಗಡಿ ಭಾಗದ ಗ್ರಾಮಗಳಲ್ಲಿ ಆನೆಗಳ ಹಾವಳಿ ಹೆಚ್ಚಾಗಿರುವ ಕಡೆ ಬೆಸ್ಕಾಂ ನಿಗಾವಹಿಸಿ ಬೇಕಾಬಿಟ್ಟಿಯಾಗಿ ವಿದ್ಯುತ್​ ಕಡಿತಗೊಳಿಸದೆ ನಿರಂತರವಾಗಿ ಸರಬರಾಜು ಮಾಡಬೇಕು ಎಂದು ಶಾಸಕ ಎಸ್​.ಎನ್​.ನಾರಾಯಣಸ್ವಾಮಿ ಬೆಸ್ಕಾಂ ಅಧಿಕಾರಿಗಳಿಗೆ ಕಟ್ಟುನಿಟ್ಟಾಗಿ ಸೂಚನೆ ನೀಡಿದರು.

ಪಟ್ಟಣದ ಬೆಸ್ಕಾಂ ಕಚೇರಿಯಲ್ಲಿ ಶುಕ್ರವಾರ ಹಮ್ಮಿಕೊಂಡಿದ್ದ ವಿದ್ಯುತ್​ ಪ್ರಗತಿ ಪರಿಶೀಲನೆ ಸಭೆಯಲ್ಲಿ ಎಲ್ಲ ಹೋಬಳಿಗಳ ಅಧಿಕಾರಿಗಳ ಕಾರ್ಯವೈಖರಿ ಪರಿಶೀಲನೆ ನಡೆಸಿ ಮಾತನಾಡಿ, ಸರ್ಕಾರ ಸಾರ್ವಜನಿಕರಿಗೆ ಗುಣಮಟ್ಟದ ವಿದ್ಯುತ್​ ನೀಡಬೇಕೆಂದು ನಿರ್ಧರಿಸಿ ವಿದ್ಯುತ್​ ಪೂರೈಸುತ್ತಿದೆ. ಆದರೆ, ಕೆಲ ಹೋಬಳಿಗಳಲ್ಲಿ ಸರ್ಕಾರದ ನಿಗದಿಯಂತೆ ವಿದ್ಯುತ್​ ಸರಬರಾಜಾಗದೆ ಜನರು ಪರದಾಡುವಂತಾಗಿದೆ ಎಂಬ ದೂರುಗಳು ಕೇಳಿ ಬಂದಿವೆ. ಅದರಲ್ಲೂದೋಣಿಮಡಗು ಪಂಚಾಯಿತಿ ವ್ಯಾಪ್ತಿಯ ಕಾಡಂಚಿನ ಗ್ರಾಮಗಳಲ್ಲಿ ವಿದ್ಯುತ್​ ಕಣ್ಣಾಮುಚ್ಚಾಲೆಯಾಟದಿಂದ ರೈತರು ತಮ್ಮ ಬೆಳೆಗಳನ್ನು ರಕ್ಷಣೆ ಮಾಡಿಕೊಳ್ಳಲಾಗದೆ ಹೈರಾಣಾಗಿದ್ದಾರೆ. ಮತ್ತೊಂದು ಕಡೆ ಆನೆಗಳ ಹಾವಳಿಗೆ ತತ್ತರಿಸಿ ಹೋಗಿದ್ದಾರೆ. ಈ ಬಗ್ಗೆ ಹೆಚ್ಚು ಗಮನವಿರಲಿ ಎಂದರು.

ಪ್ರಾರಂಭದಲ್ಲಿ ಶಾಸಕರ ಪ್ರಶ್ನೆಗಳಿಗೆ ಎಇಇ ಉತ್ತರ ನೀಡಲು ಚಡಪಡಿಸಿದರು. ಇದರಿಂದ ಶಾಸಕರು ಸಿಟ್ಟಾದರು. ಎಲ್ಲದಕ್ಕೂತಮ್ಮ ಕೆಳಮಟ್ಟದ ಅಧಿಕಾರಿಗಳನ್ನು ಕೇಳಿದರೆ ಹೇಗೆ?, ಎಇಇ ಆಗಿರುವ ನಿಮಗೆ ಎಲ್ಲ ಮಾಹಿತಿ ಗೊತ್ತಿರಬೇಕು ಎಂದುಗರಂ ಆದರು.

ಇದಕ್ಕೂ ಮೊದಲು ಎಷ್ಟುಪೀಡರ್​ಗಳಿವೆ?, ಎಲ್ಲಿ ಸಮಸ್ಯೆ ಇದೆ?, ಪಟ್ಟಣದಲ್ಲಿ ಹಾಗೂ ಗ್ರಾಮೀಣ ಭಾಗದಲ್ಲಿ ಎಷ್ಟು ಗಂಟೆ ಲೋಡ್​ಶೆಡ್ಡಿಂಗ್​ ಮಾಡಲಾಗುತ್ತಿದೆ ಎಂದು ಪ್ರಶ್ನಿಸಿದರು. ಇದಕ್ಕೆ ಉತ್ತರಿಸಿದ ಅಧಿಕಾರಿಗಳು ಲೋಡ್​ಶೆಡ್ಡಿಂಗ್​ ಇಲ್ಲ. ನಿರ್ವಹಣೆ ಇದ್ದರೆ ಮಾತ್ರ ಕರೆಂಟ್​ ಕಡಿತಗೊಳಿಸಲಾಗುವುದು. ಈಗ ಮಕ್ಕಳಿಗೆ ಪರೀಕ್ಷೆ ಸಮಯ. ವಿದ್ಯುತ್​ ಕಡಿಗೊಳಿಸಿದರೆ ಓದಲು ಹಾಗೂ ನೀರಿಗೆ ಸಮಸ್ಯೆಯಾಗಲಿದೆ. ಹಾಗಾಗಿ ನಿರಂತರ ವಿದ್ಯುತ್​ ಪೂರೈಕೆಗೆ ಕ್ರಮವಹಿಸಬೇಕು ಎಂದು ಶಾಸಕರು ಅಧಿಕಾರಿಗಳಿಗೆ ಸೂಚಿಸಿದರು.

ಕಾಡಂಚಿನ ಮನೆಗಳಿಗೆ ವಿದ್ಯುತ್​ ನೀಡಿ

ಕಾಡಂಚಿನಲ್ಲಿ ಕೆಲವರು ಮನೆಗಳನ್ನು ನಿಮಾರ್ಣ ಮಾಡಿಕೊಂಡು ವಾಸವಾಗಿದ್ದು, ಅಂತಹ ಮನೆಗಳಿಗೆ ಇಲಾಖೆ ವಿದ್ಯುತ್​ ಸಂಪರ್ಕ ನೀಡಬೇಕು. ರಾತ್ರಿಯ ವಿದ್ಯುತ್​ ಇಲ್ಲದೆ ಜನರು ಸಮಸ್ಯೆಗಳಲ್ಲಿ ಸಿಲುಕಿ ಸರ್ಕಾರವನ್ನು ಶಪಿಸುತ್ತಿದ್ದಾರೆ. ಇದಕ್ಕೆ ಅವಕಾಶ ನೀಡದೆ ವಿದ್ಯುತ್​ ಸಂಪರ್ಕ ಕಲ್ಪಿಸಿ ಎಂದು ಶಾಸಕರು ಸೂಚಿಸಿದರು.

ಸಭೆಯಲ್ಲಿ ಶಾಸಕ ಎಸ್​.ಎನ್​.ನಾರಾಯಣಸ್ವಾಮಿ, ಕಾರ್ಯನಿರ್ವಾಹಕ ಇಂಜಿನಿಯರ್​ ಕವಿತಾ, ಎಇಇ ಸುಕುಮಾರ್​ ರಾಜು, ಬಸವರಾಜು, ಲತಾ, ಚಂದ್ರಮೋಹನ್​, ಎಇ ಗೋಪಿನಾಥ್​, ಬೆಸ್ಕಾಂ ನೌಕರ ಸಂಘದ ಅಧ್ಯಕ್ಷ ಸಿ.ಬಾಬು, ಕಾರ್ಯದರ್ಶಿ ನಾಗರಾಜ್​, ಉಪಾಧ್ಯಕ್ಷ ಸುಬ್ರಮಣಿ, ಕೆ.ಜಿ.ಮಂಜುನಾಥಾಚಾರಿ, ಸದಾನಂದ, ಸುರೇಶ್​ ಇದ್ದರು.