₹14 ಕೋಟಿ IPL ಸ್ಟಾರ್‌ಗೆ ಸ್ಥಳೀಯ ಲೀಗ್‌ನಲ್ಲಿ ಬಿಡ್ ಇಲ್ಲ! ಕೆಎಲ್ ರಾಹುಲ್ ಅನ್‌ಸೋಲ್ಡ್ ಆಗಿದ್ದೇಕೆ?

ಆದರೆ, ರಾಹುಲ್‌ಗೆ ಬಿಡ್ ಸಿಗದಿರುವುದಕ್ಕೆ ಅವರ ಕಳಪೆ ಫಾರ್ಮ್ ಅಥವಾ ಆಸಕ್ತಿಯ ಕೊರತೆ ಕಾರಣವಲ್ಲ. ಇದರ ಹಿಂದೆ ವಿಶೇಷ ಕಾರಣವಿದೆ. ಹೌದು, ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ (KSCA) ಆಯೋಜಿಸುವ ಮಹಾರಾಜ ಟ್ರೋಫಿ ಟಿ20 ಟೂರ್ನಿಯ 2026ರ ಆವೃತ್ತಿಗೆ ಆಟಗಾರರ ಹರಾಜು ಪ್ರಕ್ರಿಯೆ ನಡೆಯಿತು. ಈ ವೇಳೆ ಕೆಎಲ್ ರಾಹುಲ್ ತಮ್ಮ ಮೂಲ ಬೆಲೆ 2 ಲಕ್ಷದೊಂದಿಗೆ ಹರಾಜು ಪಟ್ಟಿಯಲ್ಲಿ ಇದ್ದರು. ಆದರೆ ಯಾವುದೇ ಫ್ರಾಂಚೈಸಿ ತಂಡವು ರಾಹುಲ್ ಅವರನ್ನು ಖರೀದಿಸಲು ಮುಂದಾಗಲಿಲ್ಲ. ಇದರಿಂದ ಅವರು ಅನ್‌ಸೋಲ್ಡ್ ಆಗಿ ಉಳಿದರು.

ಹರಾಜು ವೇಳೆ ಹಲವು ತಂಡಗಳು ರಾಹುಲ್ ಅವರ ಲಭ್ಯತೆ ಬಗ್ಗೆ ಪ್ರಶ್ನೆ ಕೇಳಿದ್ದವು. ಇದಕ್ಕೆ ಹರಾಜುದಾರರು, "ಪ್ರಸ್ತುತ ಲಭ್ಯ ಮಾಹಿತಿಯ ಪ್ರಕಾರ ಕೆಎಲ್ ರಾಹುಲ್ ಟೂರ್ನಿಗೆ ಲಭ್ಯವಿರುವ ಸಾಧ್ಯತೆ ಕಡಿಮೆ" ಎಂದು ಸ್ಪಷ್ಟಪಡಿಸಿದರು. ಈ ಮಾಹಿತಿ ಹೊರಬಿದ್ದ ತಕ್ಷಣ ತಂಡಗಳು ರಾಹುಲ್ ಮೇಲೆ ಬಿಡ್ ಮಾಡುವ ಆಸಕ್ತಿ ತೋರಲಿಲ್ಲ.

ಕೆಎಲ್ ರಾಹುಲ್ ಜೂನ್ ಮತ್ತು ಜುಲೈ ತಿಂಗಳಲ್ಲಿ ಭಾರತ ತಂಡದ ಪರವಾಗಿ ಆಡುವ ಸಾಧ್ಯತೆ ಇದೆ. ಜೂನ್ 20ರಂದು ಆರಂಭವಾಗುವ ಮಹಾರಾಜ ಟ್ರೋಫಿಯ ಮೊದಲ ದಿನವೇ ಭಾರತ ಮತ್ತು ಅಫ್ಘಾನಿಸ್ತಾನ ನಡುವಿನ ಏಕದಿನ ಸರಣಿಯ ಮೂರನೇ ಪಂದ್ಯ ನಡೆಯಲಿದ್ದು, ಅದರಲ್ಲಿ ರಾಹುಲ್ ಆಡಲಿದ್ದಾರೆ ಎಂದು ನಿರೀಕ್ಷಿಸಲಾಗಿದೆ. ಅದರ ಕಾರಣದಿಂದ ಟೂರ್ನಿಯ ಬಹುತೇಕ ಪಂದ್ಯಗಳಿಗೆ ಅವರು ಲಭ್ಯವಾಗುವ ಸಾಧ್ಯತೆ ಕಡಿಮೆಯಾಗಿದೆ.

ಮಹಾರಾಜ ಟ್ರೋಫಿ ಟೂರ್ನಿ ಜುಲೈ 12ರವರೆಗೆ ನಡೆಯಲಿದೆ. ಅಫ್ಘಾನಿಸ್ತಾನ ಸರಣಿಯ ಬಳಿಕ ಇಂಗ್ಲೆಂಡ್ ಪ್ರವಾಸಕ್ಕೆ ತೆರಳುವ ಭಾರತ ತಂಡದ ಮೊದಲ ಏಕದಿನ ಪಂದ್ಯ ಜುಲೈ 14ರಂದು ನಡೆಯಲಿದೆ.ಈ ನಡುವೆ ರಾಹುಲ್‌ಗೆ ಕೆಲವು ದಿನಗಳ ಅವಕಾಶ ಸಿಗಬಹುದಿತ್ತು. ಆದರೂ ಅವರು ಸಂಪೂರ್ಣ ಟೂರ್ನಿಯಿಂದ ದೂರ ಉಳಿಯುವ ನಿರ್ಧಾರ ಕೈಗೊಂಡಿದ್ದಾರೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಕೆಎಲ್ ರಾಹುಲ್ ಅನ್‌ಸೋಲ್ಡ್ ಆಗಿದ್ದರೂ, ಕರ್ನಾಟಕದ ಅನುಭವಿ ಆಟಗಾರರಿಗೆ ಹರಾಜಿನಲ್ಲಿ ಉತ್ತಮ ಬೇಡಿಕೆ ವ್ಯಕ್ತವಾಯಿತು. ಮಂಗಳೂರು ಡ್ರ್ಯಾಗನ್ಸ್ ತಂಡವು ಕರುಣ್ ನಾಯರ್ ಅವರನ್ನು 18 ಲಕ್ಷಕ್ಕೆ ಖರೀದಿಸಿತು. ಮತ್ತೊಂದೆಡೆ, ಗುಲ್ಬರ್ಗಾ ಮಿಸ್ಟಿಕ್ಸ್ ತಂಡ ಮನೀಶ್ ಪಾಂಡೆ ಅವರನ್ನು 12.75 ಲಕ್ಷಕ್ಕೆ ತನ್ನದಾಗಿಸಿಕೊಂಡಿತು.

ಭಾರತ ತಂಡದ ಕರ್ತವ್ಯಗಳಿಂದಾಗಿ ದೇವದತ್ತ ಪಡಿಕ್ಕಲ್ ಹಾಗೂ ಪ್ರಸಿದ್ಧ್ ಕೃಷ್ಣ ಅವರಿಗೂ ನಿರೀಕ್ಷಿತ ಮಟ್ಟದ ಮೊತ್ತ ಸಿಗಲಿಲ್ಲ. ಅವರು ಕೂಡ ರಾಷ್ಟ್ರೀಯ ತಂಡದ ಕಾರ್ಯಕ್ರಮಗಳಲ್ಲಿ ನಿರತರಾಗುವ ಸಾಧ್ಯತೆ ಇರುವುದರಿಂದ ಫ್ರಾಂಚೈಸಿಗಳು ಎಚ್ಚರಿಕೆಯಿಂದ ನಡೆದುಕೊಂಡಿವೆ.

ಐಪಿಎಲ್‌ನಲ್ಲಿ ಕೋಟ್ಯಂತರ ರೂಪಾಯಿಗೆ ಮಾರಾಟವಾಗುವ ಆಟಗಾರ ಸ್ಥಳೀಯ ಲೀಗ್‌ನಲ್ಲಿ ಅನ್‌ಸೋಲ್ಡ್ ಆಗಿರುವುದು ಮೊದಲ ನೋಟಕ್ಕೆ ಅಚ್ಚರಿ ಎನಿಸಿದರೂ, ವಾಸ್ತವದಲ್ಲಿ ಇದು ಲಭ್ಯತೆಯ ಸಮಸ್ಯೆಯಿಂದ ಉಂಟಾದ ಪರಿಸ್ಥಿತಿ ಎಂದು ಕ್ರಿಕೆಟ್ ವಲಯದಲ್ಲಿ ಚರ್ಚೆಯಾಗುತ್ತಿದೆ. ಹೀಗಾಗಿ, ಕೆಎಲ್ ರಾಹುಲ್‌ಗೆ ಬೇಡಿಕೆ ಇಲ್ಲ ಎಂಬುದಲ್ಲ; ಅವರು ಟೂರ್ನಿಗೆ ಲಭ್ಯರಾಗದಿರುವ ಸಾಧ್ಯತೆಯೇ ಹರಾಜಿನಲ್ಲಿ ಅವರ ಮೇಲೆ ಯಾವುದೇ ತಂಡ ಬಿಡ್ ಮಾಡದಿರಲು ಪ್ರಮುಖ ಕಾರಣವಾಗಿದೆ,(ಏಜೆನ್ಸೀಸ್​).