‘ಪ್ರೌಢಶಿಕ್ಷಣಕ್ಕೆ ಹಣ ಹೊಂದಿಸಲಿಕ್ಕಾಗಿ 8ನೇ ತರಗತಿಯಲ್ಲೇ ದಿನಪತ್ರಿಕೆ ವಿತರಣೆ ಆರಂಭಿಸಿದೆ. ಅಂದಿನಿಂದ 25 ವರ್ಷ ಶ್ರದ್ಧೆಯಿಂದ ಈ ಕೆಲಸ ಮಾಡುತ್ತಿದ್ದೇನೆ. ದಿನಪತ್ರಿಕೆ, ಸ್ಪರ್ಧಾತ್ಮಕ ಪರೀಕ್ಷೆ ಪುಸ್ತಕಗಳ ಮಾರಾಟಕ್ಕಾಗಿ 2 ಮಳಿಗೆ ತೆರೆದಿದ್ದು, 7 ಮಹಿಳೆಯರು ಸೇರಿ 20 ಮಂದಿಗೆ ಉದ್ಯೋಗಾವಕಾಶ ಕಲ್ಪಿಸಿದ್ದೇನೆ. ಈ ಕೆಲಸದಲ್ಲಿ ನನಗೆ ಸಂತೃಪ್ತಿ ಸಿಕ್ಕಿದೆ’. ಇದು ಬೆಳಗಾವಿ ಜಿಲ್ಲೆ ಗೋಕಾಕದ ದಿನಪತ್ರಿಕೆ ವಿತರಕ ವೀರೇಂದ್ರ ದುಂಡಪ್ಪ ಕಿತ್ತೂರ ಅವರ ಮನದಾಳದ ಮಾತು. ಒಂಬತ್ತು ವರ್ಷಗಳ ಹಿಂದೆ ನನ್ನ ತಾಯಿ ವಿಲಾಸಮತಿ ಮೃತಪಟ್ಟರು. ರಾತ್ರಿಯೇ ಅವರ ಅಂತ್ಯಕ್ರಿಯೆ ನೆರವೇರಿಸಿ, ಮಾರನೇ ದಿನ ಬೆಳಗ್ಗೆ ಎಂದಿನಂತೆ ದಿನಪತ್ರಿಕೆ ವಿತರಿಸಲು ಬಂದಿದ್ದೆ. ಶ್ರಮಪಟ್ಟ ಪರಿಣಾಮ ಸ್ವಂತ ಮನೆ ಕಟ್ಟಿಕೊಂಡಿದ್ದು, ನಿವೇಶನವನ್ನೂ ಖರೀದಿಸಿದ್ದೇನೆ ಎನ್ನುತ್ತಾರೆ 39ರ ಹರೆಯದ ವೀರೇಂದ್ರ. ‘ನನ್ನ ಬಳಿ ಕೆಲಸ ಮಾಡುತ್ತಿರುವ 13 ಜನರು ಮನೆ-ಮನೆಗೆ ತೆರಳಿ, ದಿನಪತ್ರಿಕೆ ವಿತರಿಸುತ್ತಾರೆ. ಏಳು ಮಹಿಳೆಯರು ಸ್ಪರ್ಧಾತ್ಮಕ ಪರೀಕ್ಷೆ ಪುಸ್ತಕಗಳ ಮಾರಾಟದ ಜತೆ, ದಿನಪತ್ರಿಕೆ ಬಿಲ್ ವಸೂಲಿ ಮಾಡುತ್ತಾರೆ. ‘ವಿಜಯವಾಣಿ’ ದಿನಪತ್ರಿಕೆಯೂ ಸೇರಿ ವಿವಿಧ ದಿನಪತ್ರಿಕೆಗಳ 3 ಸಾವಿರ ಪ್ರತಿಗಳನ್ನು ನಿತ್ಯವೂ ಓದುಗರ ಮನೆಗೆ ತಲುಪಿಸುತ್ತೇವೆ’ ಎಂದು ಸಂತಸದಿಂದ ಹೇಳುತ್ತಾರೆ ವೀರೇಂದ್ರ.
