ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಸಚಿವ ಸಂಪುಟವನ್ನು ಬುಧವಾರ ಪುನಾರಚಿಸಿದ್ದಾರೆ. ಎನ್ಡಿಎ ಮೈತ್ರಿಕೂಟ 2019ರಲ್ಲಿ ಎರಡನೇ ಬಾರಿಗೆ ಅಧಿಕಾರಕ್ಕೆ ಬಂದ ನಂತರದಲ್ಲಿ ನಡೆಯುತ್ತಿರುವ ಮೊದಲ ಸಂಪುಟ ಪುನಾರಚನೆಯಾದ ಹಿನ್ನೆಲೆಯಲ್ಲಿ ಯಾರು ಮಂತ್ರಿಮಂಡಳ ಸೇರಬಹುದು, ಯಾರು ಹೊರಬೀಳಬಹುದು ಎಂಬೆಲ್ಲ ಕುತೂಹಲಗಳು ಮೂಡಿದ್ದವು. ಇದಕ್ಕೂ ಮುನ್ನ ಖುದ್ದು ಪ್ರಧಾನಿ ಮೋದಿ ಸಾಕಷ್ಟು ಕಸರತ್ತು ನಡೆಸಿದ್ದರು; ಆಯಾ ಸಚಿವರನ್ನು ಕರೆಸಿಕೊಂಡು ಇಲಾಖೆಗಳ ಕಾರ್ಯಸಾಧನೆ ಬಗ್ಗೆ ಮಾಹಿತಿ ಕಲೆಹಾಕಿದ್ದರು. ಜತೆಗೆ, ಗೃಹ ಸಚಿವ ಅಮಿತ್ ಷಾ, ಬಿಜೆಪಿ ಅಧ್ಯಕ್ಷ ಜೆ.ಪಿ.ನಡ್ಡಾ ಮುಂತಾದ ಪ್ರಮುಖರ ಜತೆಗೆ ವಿಸತ ಸಮಾಲೋಚನೆ ನಡೆಸಿದ್ದರು. ಕರೊನಾ ಎರಡನೆಯ ಅಲೆ ವಿಷಯದಲ್ಲಿ ಸರ್ಕಾರಕ್ಕೆ ಒಂದಷ್ಟು ದಿಢೀರ್ ಸವಾಲುಗಳು ಎದುರಾಗಿ, ಒಟ್ಟಾರೆ ನಿರ್ವಹಣೆ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ನಕಾರಾತ್ಮಕ ಅಭಿಪ್ರಾಯಗಳು ಸಹ ಅಲ್ಲಲ್ಲಿ ಒಡಮೂಡಿದ್ದರಿಂದ, ಸರ್ಕಾರದ ಇಮೇಜ್ವರ್ಧನೆ ದೃಷ್ಟಿಯಿಂದ ಕೂಡ ಇಂಥದೊಂದು ನಡೆ ಅಗತ್ಯವಾಗಿತ್ತು ಎಂಬ ವಿಶ್ಲೇಷಣೆ ಸಹ ಕೇಳಿಬಂದಿದೆ. ಇದಲ್ಲದೆ, ಏರುತ್ತಿರುವ ತೈಲ ಬೆಲೆ, ದಿನಬಳಕೆ ವಸ್ತುಗಳ ದರ ಹೆಚ್ಚಳ ಮುಂತಾದ ಸಂಗತಿಗಳು ಸಹ ಇವೆ. ಶಿವಸೇನೆ, ಅಕಾಲಿದಳದಂತಹ ಮಿತ್ರರು ದೂರವಾಗಿದ್ದರಿಂದ ಆ ಕೋಟಾದಲ್ಲಿಯೂ ಮಂತ್ರಿ ಸ್ಥಾನ ಉಳಿದಿತ್ತು. ಹೀಗಾಗಿ, ಒಟ್ಟಾರೆಯಾಗಿ ಸರ್ಕಾರದ ವರ್ಚಸ್ಸನ್ನು ಮೇಲೆತ್ತುವಂತಹ ಕ್ರಮ ಅತ್ಯಗತ್ಯವಾಗಿತ್ತು. ಜಾತಿ& ಪ್ರದೇಶ ಲೆಕ್ಕಾಚಾರ, ವಯಸ್ಸು, ಆಯಾಯ ಕ್ಷೇತ್ರದಲ್ಲಿನ ಕಾರ್ಯಚಟುವಟಿಕೆ ಮುಂತಾದ ಸಂಗತಿಗಳನ್ನು ಸೂಕ್ಷ$್ಮವಾಗಿ ಗಮನಿಸಿ ಸಚಿವ ಸ್ಥಾನದ ಜವಾಬ್ದಾರಿ ವಹಿಸಲಾಗಿದೆಯೆಂಬುದು ಸ್ಪಷ್ಟ. ಮಹಿಳೆಯರಿಗೆ ಮತ್ತು ವಿವಿಧ ವೃತ್ತಿಪರರಿಗೂ ಮನ್ನಣೆ ನೀಡಲಾಗಿದೆ. ಕರ್ನಾಟಕದಿಂದ ನಾಲ್ವರು ಸಂಸದರು ಹೊಸದಾಗಿ ಮಂತ್ರಿ ಸ್ಥಾನ ಪಡೆದಿದ್ದಾರೆ.
