‘ದುಷ್ಟರ ದೌರ್ಜನ್ಯದ ಅಟ್ಟಹಾಸಕ್ಕೆ ಸುಶಿಕ್ಷಿತರು ಮೌನವಹಿಸಿ ನಿರ್ಲಕ್ಷಿಸಿದರೆ ಅದರ ಪರಿಣಾಮ ನಮ್ಮ ಸಂಸ್ಕೃ ಸಂಪ್ರದಾಯವನ್ನೇ ಹಾಳುಮಾಡುತ್ತದೆ’ - ಹೀಗೆಂದಿದ್ದಾನೆ ಫ್ರೆಂಚ್ ಚಕ್ರವರ್ತಿ ನೆಪೋಲಿಯನ್. ಈ ಮಾತು ಸಾರ್ವಕಾಲಿಕ ಸತ್ಯ. ಆದಿಕಾಲದಲ್ಲಿ ದೇವಿ ಭಾಗವತದಲ್ಲಿ ಬರುವ ಮಧು-ಕೈಟಭ, ಶುಂಭ-ನಿಶುಂಭ, ಮಹಿಷಾಸುರ ಮೊದ ಲಾದ ರಾಕ್ಷಸರು ದೇವಾನುದೇವತೆಗಳಿಗೆ ಹಿಂಸೆ ಕೊಡುವದನ್ನು ನೋಡಿ ಜಗನ್ಮಾತೆ ಮೌನವಾಗಿರಲಿಲ್ಲ. ರಾಕ್ಷಸರ ಸಂಹಾರಕ್ಕಾಗಿ ಚಂಡಿ-ಚಾಮುಂಡಿ ರೂಪ ತಾಳಿದಳು. ದುಷ್ಟ ನಿಗ್ರಹ, ಶಿಷ್ಟ ಪರಿಪಾಲನೆ ಯಿಂದಾಗಿ ತನ್ನ ಆದ್ಯ ಕರ್ತವ್ಯ ಪೂರೈಸಿದಳು. ಇನ್ನು ವೇದ ಕಾಲದಲ್ಲಿ - ಹಿರಣ್ಯಾಂಬಕ, ಹಿರಣ್ಯಕಶ್ಯಪ ಮೊದಲಾದ ರಾಕ್ಷಸರನ್ನು ಸಂಹರಿಸಲು ಸ್ವತಃ ನಾರಾಯಣನೇ ವರಾಹ ರೂಪ ಧರಿಸಿ ಹಿರಣ್ಯಾಂಭಕನನ್ನು ಸಂಹರಿಸಿದ. ಅವನೇ ನಾರಸಿಂಹ ಅವತಾರ ತೊಟ್ಟು ಹಿರಣ್ಯಕಶ್ಯಪುವನ್ನು ಸಂಹಾರ ಮಾಡಿದ. ಅದರಂತೆ ಹಯಗ್ರೀವ ರೂಪಧರಿಸಿ ಹಯಗ್ರೀವ ರಾಕ್ಷಸನನ್ನು ಕೊಂದುಹಾಕಿದ.
