Argentina Hailstorm: ಅರ್ಜೆಂಟೀನಾದ ಕಾರ್ಡೋಬಾ (Córdoba) ಪ್ರಾಂತ್ಯದಲ್ಲಿ ಭೀಕರ ಚಂಡಮಾರುತದ ಜತೆಗೆ ಆಲಿಕಲ್ಲು ಮಳೆ ಅಬ್ಬರಿಸಿದೆ. ಶುಕ್ರವಾರ ಮಧ್ಯಾಹ್ನ ಆರಂಭವಾದ ಬಿರುಗಾಳಿ ಸಹಿತ ಮಳೆ ರಾತ್ರಿಯವರೆಗೂ ಮುಂದುವರಿದು ಹಲವು ಪ್ರದೇಶಗಳಲ್ಲಿ ಆತಂಕದ ವಾತಾವರಣ ಸೃಷ್ಟಿಸಿತು.
ಜನರಲ್ ರೋಕಾ, ಲಾಸ್ ಸರ್ಜೆಂಟೆಸ್ ಮತ್ತು ಇನ್ರಿವಿಲ್ಲೆ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಭಾರಿ ಗಾತ್ರದ ಆಲಿಕಲ್ಲುಗಳು ಸುರಿದಿವೆ. ಟೆನ್ನಿಸ್ ಬಾಲ್‌ನಷ್ಟು ದೊಡ್ಡದಾಗಿದ್ದ ಆಲಿಕಲ್ಲುಗಳ ಹೊಡೆತಕ್ಕೆ ಕಾರುಗಳ ಗಾಜುಗಳು ಪುಡಿಯಾಗಿದ್ದು, ಮನೆಗಳ ಮೇಲ್ಛಾವಣಿ ಹಾಗೂ ಕೃಷಿ ಬೆಳೆಗಳಿಗೂ ಹಾನಿಯಾಗಿದೆ.
ಟೆನ್ನಿಸ್ ಬಾಲ್ ಗಾತ್ರದ ಆಲಿಕಲ್ಲುಗಳ ಅಬ್ಬರ
ಕಾರ್ಡೋಬಾ ಪ್ರಾಂತ್ಯದ ದಕ್ಷಿಣ ಮತ್ತು ಆಗ್ನೇಯ ಭಾಗಗಳಲ್ಲಿ ಚಂಡಮಾರುತದೊಂದಿಗೆ ಭಾರಿ ಆಲಿಕಲ್ಲು ಮಳೆ ಸುರಿದಿದೆ. ಜನರಲ್ ರೋಕಾ ಮತ್ತು ಇನ್ರಿವಿಲ್ಲೆ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ದೊಡ್ಡ ಗಾತ್ರದ ಆಲಿಕಲ್ಲುಗಳು ಬಿದ್ದಿವೆ. ಕೆಲವು ಆಲಿಕಲ್ಲುಗಳು ಟೆನ್ನಿಸ್ ಬಾಲ್‌ನಷ್ಟು ದೊಡ್ಡದಾಗಿದ್ದವು. ಈ ಭೀಕರ ಮಳೆಯ ದೃಶ್ಯಗಳನ್ನು ಸ್ಥಳೀಯರು ಫೋಟೋ ಮತ್ತು ವಿಡಿಯೋಗಳ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ.
ವಾಹನಗಳು ಜಖಂ, ಮನೆಗಳಿಗೆ ಹಾನಿ
ಭಾರಿ ಗಾತ್ರದ ಆಲಿಕಲ್ಲುಗಳು ಮತ್ತು ಬಿರುಗಾಳಿಯಿಂದಾಗಿ ಹಲವು ವಾಹನಗಳ ಗಾಜುಗಳು ಒಡೆದಿವೆ. ಮನೆಗಳ ಮೇಲ್ಛಾವಣಿ, ಮರಗಳು ಮತ್ತು ಕೃಷಿ ಬೆಳೆಗಳಿಗೂ ಹಾನಿಯಾಗಿದೆ. ಜನರಲ್ ರೋಕಾ ಪ್ರದೇಶದಲ್ಲಿ ಮನೆಗಳಿಗೆ ನೀರು ನುಗ್ಗಿದ ಪರಿಣಾಮ 12 ಕುಟುಂಬಗಳನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲಾಗಿದೆ. ಇನ್ರಿವಿಲ್ಲೆಯಲ್ಲಿ 96 ಮಿ.ಮೀ ಮಳೆಯಾಗಿರುವುದಾಗಿ ವರದಿಯಾಗಿದೆ.
