ಐಪಿಎಲ್ ಅಖಾಡಕ್ಕೆ ಯುವಿ ಎಂಟ್ರಿ!: ಡೆಲ್ಲಿ ಕ್ಯಾಪಿಟಲ್ಸ್ ಕೋಚಿಂಗ್ ಸ್ಟಾಫ್ ಸೇರಲಿರುವ ಸಿಕ್ಸರ್ ಕಿಂಗ್! Yuvraj Singh

ಮತ್ತೊಂದು ವಿಶೇಷವೆಂದರೆ, JSW ಗ್ರೂಪ್ ಮುಂದಿನ ಎರಡು ವರ್ಷಗಳ ಅವಧಿಗೆ ಡೆಲ್ಲಿ ತಂಡದ ಸಂಪೂರ್ಣ ನಿಯಂತ್ರಣವನ್ನು ತೆಗೆದುಕೊಳ್ಳುತ್ತಿದ್ದು, ಮಾಜಿ ನಾಯಕ ಸೌರವ್ ಗಂಗೂಲಿ ತಂಡದ ಮುಖ್ಯಸ್ಥರಾಗಿ ಮುನ್ನಡೆಸಲಿದ್ದಾರೆ. ಈಗ ಗಂಗೂಲಿ ಅವರ ನೆರಳಿನಲ್ಲೇ ಅವರ ಹಳೆಯ ಸಹ ಆಟಗಾರ ಯುವರಾಜ್ ಸಿಂಗ್ ಕೂಡ ಡೆಲ್ಲಿ ಡಗೌಟ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

44 ವರ್ಷದ ಯುವರಾಜ್ ಸಿಂಗ್ ಅವರಿಗೆ ಇದು ಐಪಿಎಲ್‌ನಲ್ಲಿ ಮೊದಲ ಕೋಚಿಂಗ್ ಆಫರ್ ಆಗಿದ್ದರೂ, ಯುವ ಆಟಗಾರರನ್ನು ತರಬೇತುಗೊಳಿಸುವಲ್ಲಿ ಅವರು ಈಗಾಗಲೇ ಸೈ ಎನಿಸಿಕೊಂಡಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಭಾರತದ ಉದಯೋನ್ಮುಖ ತಾರೆಗಳಾದ ಅಭಿಷೇಕ್ ಶರ್ಮಾ, ಪ್ರಭ್‌ಸಿಮ್ರಾನ್ ಸಿಂಗ್, ಅಬ್ದುಲ್ ಸಮದ್ ಮಾತ್ರವಲ್ಲದೆ ಸಂಜು ಸ್ಯಾಮ್ಸನ್ ಮತ್ತು ರಿಷಭ್ ಪಂತ್ ಅವರಂತಹ ಘಟಾನುಘಟಿ ಆಟಗಾರರಿಗೂ ಯುವಿ ವೈಯಕ್ತಿಕವಾಗಿ ಮೆಂಟರ್ ಆಗಿ ಕೆಲಸ ಮಾಡಿದ್ದಾರೆ.

ವಿಶೇಷವಾಗಿ ಸನ್‌ರೈಸರ್ಸ್ ಹೈದರಾಬಾದ್ ತಂಡದ ಸ್ಟಾರ್ ಬ್ಯಾಟರ್ ಅಭಿಷೇಕ್ ಶರ್ಮಾ ಅವರ ಬ್ಯಾಟಿಂಗ್ ಶೈಲಿಯನ್ನು ಸಂಪೂರ್ಣವಾಗಿ ಬದಲಾಯಿಸಿ, ಅವರ ಯಶಸ್ಸಿನ ಹಿಂದೆ ಯುವರಾಜ್ ಸಿಂಗ್ ಅವರ ಪರಿಶ್ರಮ ದೊಡ್ಡದಾಗಿದೆ. ಯುವಿ ಅವರ ಈ ಅದ್ಭುತ ಕೌಶಲ್ಯವನ್ನು ಹತ್ತಿರದಿಂದ ಗಮನಿಸುತ್ತಿದ್ದ ಹಲವು ಐಪಿಎಲ್ ಫ್ರಾಂಚೈಸಿಗಳು ಅವರಿಗೆ ಮನ್ನಣೆ ನೀಡಲು ಕಾಯುತ್ತಿದ್ದವು. ಈಗ ಡೆಲ್ಲಿ ಕ್ಯಾಪಿಟಲ್ಸ್ ಆ ನಿಟ್ಟಿನಲ್ಲಿ ಮೊದಲ ಹೆಜ್ಜೆ ಇಟ್ಟಿದೆ.

ಯುವಿ ಅವರಂತಹ ಲೆಜೆಂಡ್ ಆಟಗಾರ ತಮ್ಮ ತಂಡದ ಡಗೌಟ್‌ನಲ್ಲಿ ಇರಲು ಯಾರು ತಾನೇ ಇಷ್ಟಪಡುವುದಿಲ್ಲ ಹೇಳಿ, ಅವರ ಸಮಕಾಲೀನ ಆಟಗಾರರಾದ ಆಶಿಶ್ ನೆಹ್ರಾ, ಜಹೀರ್ ಖಾನ್ ಮತ್ತು ವೀರೇಂದ್ರ ಸೆಹ್ವಾಗ್ ಈಗಾಗಲೇ ಐಪಿಎಲ್‌ನಲ್ಲಿ ವಿವಿಧ ತಂಡಗಳಿಗೆ ಕೋಚ್ ಆಗಿ ಯಶಸ್ವಿಯಾಗಿದ್ದಾರೆ. ಯುವಿ ಈ ರೇಸ್‌ಗೆ ಬರುವುದು ಸ್ವಲ್ಪ ತಡವಾಗಿರಬಹುದು, ಆದರೆ ಅವರು ಯುವ ಕ್ರಿಕೆಟಿಗರ ಅಗತ್ಯತೆಗಳನ್ನು ಚೆನ್ನಾಗಿ ಅರ್ಥಮಾಡಿಕೊಂಡಿದ್ದಾರೆ ಎಂದು ಡೆಲ್ಲಿ ಫ್ರಾಂಚೈಸಿಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಯುವಿ ಅವರ ತರಬೇತಿ ಶೈಲಿ ಕೇವಲ ಫೋನ್ ಕರೆಗಳು ಅಥವಾ ವಿಡಿಯೋ ಕಾಲ್‌ಗಳಿಗೆ ಸೀಮಿತವಾಗಿಲ್ಲ. ಅವರು ಮೈದಾನಕ್ಕೆ ಇಳಿದು, ನೆಟ್ಸ್ ಹಿಂದೆ ನಿಂತು, ಉರಿಬಿಸಿಲನ್ನೂ ಲೆಕ್ಕಿಸದೆ ಗಂಟೆಗಟ್ಟಲೆ ಆಟಗಾರರೊಂದಿಗೆ ಬೆವರು ಹರಿಸುತ್ತಾರೆ. ಅವರ ಈ ಹ್ಯಾಂಡ್ಸ್-ಆನ್ ವಿಧಾನವೇ ಇವತ್ತು ಹಲವು ಯುವ ಕ್ರಿಕೆಟಿಗರ ಕೆರಿಯರ್ ಬದಲಾಗಲು ಮುಖ್ಯ ಕಾರಣ ಎನ್ನಲಾಗಿದೆ.

ಟೀಮ್ ಇಂಡಿಯಾದ ಸುವರ್ಣ ಯುಗದ ಆರಂಭಕ್ಕೆ ಕಾರಣವಾಗಿದ್ದ ಸೌರವ್ ಗಂಗೂಲಿ ಮತ್ತು ಯುವರಾಜ್ ಸಿಂಗ್ ಜೋಡಿ ಈಗ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಮುನ್ನಡೆಸಲು ಒಂದಾಗುತ್ತಿರುವುದು ಕ್ರಿಕೆಟ್ ಪ್ರೇಮಿಗಳಲ್ಲಿ ಭಾರಿ ಕುತೂಹಲ ಮೂಡಿಸಿದೆ. ಸದ್ಯ ಡೆಲ್ಲಿ ತಂಡವು ತನ್ನ ಮೊದಲ ಐಪಿಎಲ್ ಟ್ರೋಫಿಗಾಗಿ ಹಸಿದಿದ್ದು, ಈ ಇಬ್ಬರು ದಿಗ್ಗಜರ ಜಂಟಿ ತಂತ್ರಗಳು ತಂಡದ ಅದೃಷ್ಟವನ್ನು ಬದಲಾಯಿಸುತ್ತವಾ ಎಂಬುದನ್ನು ಕಾದುನೋಡಬೇಕಿದೆ,(ಏಜೆನ್ಸೀಸ್​).