ಸರ್ಕಾರಿ ಸೌಲಭ್ಯದ ಹೆಸ್ರಲ್ಲಿ ವಂಚನೆಗೆ ಯತ್ನ, ಶೂ ನೆಕ್ಕುವ ಶಿಕ್ಷೆ ಕೊಟ್ಟ ಗ್ರಾಮಸ್ಥರು; ಮುಂದೇನಾಯ್ತು?..Rajasthan

ಕೋಟಾ: ರಾಜಸ್ಥಾನದ ಬಂಡಿ ಜಿಲ್ಲೆಯ ಗ್ರಾಮವೊಂದರಲ್ಲಿ ಯುವಕನೊಬ್ಬ ಸರ್ಕಾರಿ ಯೋಜನೆ ಹೆಸರಿನಲ್ಲಿ ಮಹಿಳೆಯರಿಗೆ ವಂಚಿಸಿದ ತಪ್ಪಿಗೆ ಗ್ರಾಮಸ್ಥರು ಶೂ ನೆಕ್ಕಿಸುವ ಶಿಕ್ಷೆ ಕೊಟ್ಟಿರುವ ಅಮಾನವೀಯ ದೃಶ್ಯದ ವಿಡಿಯೋ ಸದ್ಯ ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್ ಆಗಿದೆ.

ಕೇಂದ್ರ ಸರ್ಕಾರಿ ಯೋಜನೆಯಾದ ಪ್ರಧಾನ ಮಂತ್ರಿ ಆವಾಸ್​ ಯೋಜನೆಯಡಿ, ಮನೆ ಮಂಜೂರು ಮಾಡಿಸುವ ಭರವಸೆ ಕೊಟ್ಟು ಮಹಿಳೆಯರಿಂದ ಹಣ ವಸೂಲಿ ಮಾಡಿ, ಅಲ್ಲಿಂದ ಪರಾರಿಯಾಗಲು ಸ್ಕೆಚ್​ ಹಾಕಿದ್ದ. ಖತರ್ನಾಕ್​ ವಂಚಕನನ್ನು ಗ್ರಾಮಸ್ಥರು ಹಿಡಿದು, ಶಿಕ್ಷೆ ಕೊಟ್ಟಿದ್ದಾರೆ. ಆನಂತರ ಆತನನ್ನು ಬಿಡುಗಡೆಗೊಳಿಸಿ ಪೊಲೀಸರಿಗೆ ದೂರು ಕೊಟ್ಟಿದ್ದಾರೆ.

ಈ ಮಧ್ಯೆ ಗ್ರಾಮಸ್ಥರು ಯುವಕನನ್ನು ನಡೆಸಿಕೊಂಡ ರೀತಿಯು ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರು ಭಾರಿ ಕಿಡಿಕಾರಿದ್ದಾರೆ. ಎಲ್ಲ ನಿರ್ಧಾರ ನೀವೆ ಕೈಗೊಂಡರೆ ಪೊಲೀಸರು ಇರೋದಾದರೂ ಯಾಕೆ ಎಂದು ಪ್ರಶ್ನಿಸಿದ್ದಾರೆ. ಜೊತೆಗೆ ಗ್ರಾಮಸ್ಥರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಿಕೊಂಡಿದ್ದಾರೆ.

ಯುವಕ ಶನಿವಾರ ಹಿಂದೋಲಿ ಪೊಲೀಸ್​ ಠಾಣಾ ವ್ಯಾಪ್ತಿಯ ಕಬ್ರಿ ಗ್ರಾಮಕ್ಕೆ ಭೇಟಿ ಕೊಟ್ಟು, ನಾನು ಗ್ರಾಮಾಭಿವೃದ್ಧಿ ಅಧಿಕಾರಿ ಎಂದು ಹೇಳಿಕೊಂಡಿದ್ದಾರನೆ. ನಂತರ, ಸರ್ಕಾರಿ ಯೋಜನೆಗಳನ್ನು ಮಹಿಳೆಯರಿಗೆ ನೇರವಾಗಿ ತಲುಪಿಸುವ ನಿಟ್ಟಿನಲ್ಲಿ ನಾನಿಲ್ಲಿ ಬಂದಿದ್ದೇನೆ. ಸರ್ಕಾರದ ಈ ಪ್ರಯೋಜನ ಪಡೆಯಲು ಪ್ರತ್ಯೇಕವಾಗಿ ಒಬ್ಬೊಬ್ಬರು ಸಾವಿರ ರೂಪಾಯಿಯಿಂದ 2 ಸಾವಿರ ರೂಪಾಯಿವರೆಗೂ ಹಣ ಪಾವತಿ ಮಾಡಬೇಕು ಎಂದು ಆಮಿಷವೊಡ್ಡಿದ್ದಾನೆ. ಮಹಿಳೆಯರು ಆತನ ಮಾತನನ್ನು ನಂಬಿ ಹಣ ಪಾವತಿ ಮಾಡಿದ್ದಾರೆ. ಕೆಲವರು ಅನುಮಾನ ವ್ಯಕ್ತಪಡಿಸಿದರು.

ಕೊನೆಗೆ ಕೆಲವು ಯುವಕರು ಆತನ ಬಳಿ ಸರ್ಕಾರದ ಐಡಿ ಕಾರ್ಡ್​ ಪ್ರೂಫ್​ ತೋರಿಸಲು ಕೇಳಿದಾಗ ಆತ ತಡಬಡಾಯಿಸಿದ. ನಾನು ಸರ್ಕಾರಿ ನೌಕರನಲ್ಲ ಎಂದು ಹಣವನ್ನು ಹಿಂದುರಿಸಿದ್ದಾನೆ. ಮೋಸ ಮಾಡಲು ಹೊರಟವನಿಗೆ ತಕ್ಕ ಪಾಠ ಕಲಿಸುವ ನಿಟ್ಟಿನಲ್ಲಿ ಅವರು ಶೂ ಬೋಟು ನೆಕ್ಕಲು ಹೇಳಿದ್ದಾರೆ. ಆತ ಮತ್ತೆ ಮತ್ತೆ ಕ್ಷಮೆ ಕೇಳುತ್ತಾ ಈ ತಪ್ಪು ಇನ್ನೆಂದಿಗೂ ಮಾಡೋದಿಲ್ಲ ಎಂದು ಮನವಿ ಮಾಡಿಕೊಂಡಿರುವುದು ವಿಡಿಯೋದಲ್ಲಿ ಇದೆ.

ದೂರು ದಾಖಲಿಸಿಕೊಂಡಿರುವ ಪೊಲೀಸರು ಯುವಕನಿಗೆ ಶೂ ನೆಕ್ಕುವಂತೆ ಒತ್ತಾಯ ಹೇರಿದ ಪ್ರಜಾಪತ್​ ಮತ್ತು ಕೃತ್ಯ ಚಿತ್ರೀಕರಿಸಿದ ಯುವಕ ಲೋಕೇಶ್​ ಮೀನಾ ಎಂದು ಗುರುತಿಸಿದ್ದಾರೆ. ಈ ರೀತಿ ವಿಡಿಯೋ ಚಿತ್ರೀಕರಣ ಮಾಡೋದು ಕಾನೂನು ಬಾಹಿರ ಎಂದು ಎಚ್ಚರಿಕೆ ಕೊಡಲಾಗಿದೆ ಎಂದು ಹಿಂದೋಲಿ ಪೊಲೀಸ್ ಠಾಣೆ ಸರ್ಕಲ್ ಇನ್ಸ್‌ಪೆಕ್ಟರ್ ಮುಖೇಶ್ ಯಾದವ್ ಹೇಳಿದರು, (ಏಜೆನ್ಸೀಸ್​).