ಜೀವಂತ ಇಲಿಗಳೊಂದಿಗೆ ರೆಡ್​ ಕಾರ್ಪೆಟ್​ ಮೇಲೆ ಮಾಡೆಲ್​ ನಡಿಗೆ: ವೈರಲ್​ ವಿಡಿಯೋ ಹಿಂದಿನ ಅಸಲಿಯತ್ತೇನು? Live rats

Live rats : ಸಾಮಾಜಿಕ ಜಾಲತಾಣದಲ್ಲಿ ಪ್ರತಿದಿನ ಸಾವಿರಾರು ವಿಡಿಯೋಗಳು ಮತ್ತು ಫೋಟೋಗಳು ಅಪ್​ಲೋಡ್​ ಆಗುತ್ತಲೇ ಇರುತ್ತವೆ. ಆದರೆ, ಕೆಲವೇ ಕೆಲವು ಮಾತ್ರ ವೀಕ್ಷಕರ ಗಮನ ಸೆಳೆದು ವೈರಲ್​ ಆಗಿಬಿಡುತ್ತವೆ. ಅಂಥದ್ದೇ ವಿಡಿಯೋವೊಂದು ಇದೀಗ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ.

ಮಾಡೆಲ್​ಗಳು ಬಗೆಯ ಬಗೆಯ ಉಡುಗೆ ಧರಿಸಿ ಕಾರ್ಯಕ್ರಮಗಳಿಗೆ ಬರುವುದನ್ನು ನೋಡಿದ್ದೇವೆ. ರೆಡ್​ ಕಾರ್ಪೆಟ್​ ಕಾರ್ಯಕ್ರಮಗಳಲ್ಲಿ ಕೆಲ ಮಾಡೆಲ್​ಗಳು ತುಂಬಾ ಹಾಟ್​ ಆಗಿ ಕಾಣಿಸಿಕೊಂಡರೆ, ಇನ್ನು ಕೆಲವರು ಸಾಂಪ್ರದಾಯಿಕ ಉಡುಗೆಗಳ ಮೂಲಕ ಎಲ್ಲರ ಗಮನ ಸೆಳೆಯುತ್ತಾರೆ. ಆದರೆ, ಜೀವಂತ ಇಲಿಗಳನ್ನೇ ಬಟ್ಟೆ ರೀತಿ ಧರಿಸಿ ಬಂದಿದ್ದನ್ನು ನೀವು ಎಂದಾದರೂ ನೋಡಿದ್ದೀರಾ ಅಥವಾ ಕೇಳಿದ್ದೀರಾ? ಇಲ್ಲಾ ಅಲ್ವಾ? ಕೇಳಿರುವುದಕ್ಕೇ ಸಾಧ್ಯವೇ ಇಲ್ಲ.

ಆದರೆ, ಈ ಡಿಜಿಟಲ್​ ಯುಗದಲ್ಲಿ ಎಲ್ಲವೂ ಸಾಧ್ಯವಿದೆ. ನಾವಿಂದು ಅಂಥದ್ದೇ ಒಂದು ವಿಚಿತ್ರವನ್ನು ನಿಮ್ಮ ಮುಂದೆ ಇಡುತ್ತಿದ್ದೇವೆ. ಇಲ್ಲೊಬ್ಬ ಮಾಡೆಲ್​ ಜೀವಂತ ಇಲಿಗಳನ್ನೇ ಬಟ್ಟೆ ರೀತಿ ಧರಿಸಿ, ರೆಡ್​ ಕಾರ್ಪೆಟ್​ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾಳೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ವೈರಲ್ ಆಗುತ್ತಿದೆ.

sherrysoni.wav ಹೆಸರಿನ ಇನ್​ಸ್ಟಾಗ್ರಾಂ ಪೇಜ್​ನಲ್ಲಿ ಈ ವಿಡಿಯೋವನ್ನು ಪೋಸ್ಟ್​ ಮಾಡಲಾಗಿದೆ. ಜೀವಂತ ಇಲಿಗಳ ಗೌನ್​ ಎಂದು ವಿಡಿಯೋಗೆ ಶೀರ್ಷಿಕೆ ನೀಡಲಾಗಿದೆ. ಮೂರು ದಿನಗಳ ಹಿಂದೆ ಅಪ್​ಲೋಡ್​ ಮಾಡಿರುವ ಈ ವಿಡಿಯೋವನ್ನು ಈವರೆಗೆ 96 ಮಿಲಿಯನ್​ ಮಂದಿ ವೀಕ್ಷಣೆ ಮಾಡಿದ್ದಾರೆ. ಅಲ್ಲದೆ, ಲಕ್ಷಾಂತರ ಮಂದಿ ಲೈಕ್​ ಮಾಡಿದ್ದಾರೆ.

ವಿಡಿಯೋ ಏನೋ ವೈರಲ್​ ಆಗುತ್ತಿದೆ, ಅದರ ಜೊತೆಗೆ ಒಂದು ಅನುಮಾನವೂ ಮೂಡಿದೆ. ಅದೇನೆಂದರೆ, ಈ ವಿಡಿಯೋವನ್ನು ಕೃತಕ ಬುದ್ಧಿಮತ್ತೆ ಸಹಾಯದಿಂದ ರಚಿಸಲಾಗಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಅದಕ್ಕೆ ಪುಷ್ಠಿ ನೀಡುವಂತೆ ಆಕೆಯ ಇನ್​ಸ್ಟಾಗ್ರಾಂ ಖಾತೆಯಲ್ಲಿ ಇಂತಹ ಅನೇಕ ವಿಡಿಯೋಗಳಿವೆ.

ಕೇವಲ ಇಲಿಗಳು ಮಾತ್ರವಲ್ಲ, ಪಾರಿವಾಳ, ಬೆಂಕಿ ಹಚ್ಚಿದ ಸಿಗರೇಟ್​, ಕುಕ್ಕರ್​ಗಳು, ರಣಹದ್ದುಗಳು ಹಾಗೂ ನಾಯಿಗಳು ಸೇರಿದಂತೆ ಚಿತ್ರ-ವಿಚಿತ್ರ ಫೋಟೋ ಮತ್ತು ವಿಡಿಯೋಗಳನ್ನು ಹಂಚಿಕೊಳ್ಳಲಾಗಿದೆ. ಹೀಗಾಗಿ, ಅವುಗಳೆಲ್ಲ ಎಐನಿಂದ ರಚಿಸಲಾದ ವಿಡಿಯೋ ಎಂಬುದು ಸ್ಪಷ್ಟವಾಗುತ್ತದೆ, (ಏಜೆನ್ಸೀಸ್​).