ಜಡ್ಜ್​ ಸೀಟಲ್ಲಿ ಕುಳಿತು 'ನಾನೇ ನ್ಯಾಯಾಧೀಶೆ' ಎಂದ ಮಹಿಳೆ!; ಸ್ಥಳದಲ್ಲಿದ್ದವರಿಗೆ ಆದೇಶ; ವಕೀಲರು ಮತ್ತು ಸಾರ್ವಜನಿಕರಿಗೆ ಶಾಕ್ | Woman

ಲಖನೌ: ವಾರಣಾಸಿಯ ಜಿಲ್ಲಾ ನ್ಯಾಯಾಲಯದ ಆವರಣದಲ್ಲಿರುವ ನ್ಯಾಯಾಧೀಶರ ಕೋಣೆಗೆ ನುಗ್ಗಿದ ಮಹಿಳೆಯೊಬ್ಬರು(Woman), ಜಡ್ಜ್ ಕುರ್ಚಿಯ ಮೇಲೆ ಕುಳಿತು, ನಾನೇ ನ್ಯಾಯಾಧೀಶೆ ಎಂದು ಹೇಳಿಕೊಂಡು ನಿರ್ದೇಶನಗಳನ್ನು ನೀಡಿದ ಪ್ರಸಂಗ ಶುಕ್ರವಾರ(ಜೂ. 12) ನಡೆದಿದೆ.

ಈ ಕುರಿತು ಮಾತನಾಡಿರುವ ವಾರಣಾಸಿ ಕೇಂದ್ರ ವಕೀಲರ ಸಂಘದ ಪ್ರಧಾನ ಕಾರ್ಯದರ್ಶಿ ಆಶಿಶ್ ಸಿಂಗ್, ಶುಕ್ರವಾರ ಘಟನೆ ನಡೆದಾಗ ಜಿಲ್ಲಾ ನ್ಯಾಯಾಧೀಶರು ರಜೆಯಲ್ಲಿದ್ದರು. ಆ ಮಹಿಳೆ ನ್ಯಾಯಾಲಯದ ಕೋಣೆಯೊಳಗೆ ಹೋಗಿ, ಜಿಲ್ಲಾ ನ್ಯಾಯಾಧೀಶರ ಕುರ್ಚಿಯ ಮೇಲೆ ಕುಳಿತು, ಅಲ್ಲಿದ್ದವರಿಗೆ ತಾನು ಜಿಲ್ಲಾ ನ್ಯಾಯಾಧೀಶೆ ಎಂದು ಹೇಳಿಕೊಂಡು ಸೂಚನೆಗಳನ್ನು ನೀಡಲು ಪ್ರಾರಂಭಿಸಿದಳು ಎಂದು ತಿಳಿಸಿದ್ದಾರೆ.

ಮಹಿಳೆ ಮಾನಸಿಕವಾಗಿ ತೊಂದರೆಗೀಡಾದಂತೆ ಕಾಣುತ್ತಿದ್ದಳು. ಅದೇ ನ್ಯಾಯಾಲಯದಲ್ಲಿ ಆ ಮಹಿಳೆಯ ಪ್ರಕರಣ ಬಾಕಿ ಇದೆ. ತನ್ನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅವಳು ಆಗಾಗ್ಗೆ ನ್ಯಾಯಾಲಯದ ಆವರಣಕ್ಕೆ ಭೇಟಿ ನೀಡುತ್ತಿದ್ದಳು ಎಂದು ಹೇಳಿದ್ದಾರೆ.

ಇನ್ನೂ ಜಡ್ಜ್​ ಚೇರ್ ಮೇಲೆ ಕುಳಿತ ಮಹಿಳೆಯನ್ನು ಮಹಿಳಾ ಪೊಲೀಸ್ ಸಿಬ್ಬಂದಿ ತಡೆದು ಕಂಟೋನ್ಮೆಂಟ್ ಪೊಲೀಸ್ ಠಾಣೆಗೆ ಕರೆದೊಯ್ದಿದ್ದಾರೆ. ಅಲ್ಲಿ ಮಹಿಳೆಯನ್ನು ವಿಚಾರಣೆ ನಡೆಸಿದ್ದು, ಈ ವೇಳೆ ಆಕೆಯೆ ಮಾನಸಿಕವಾಗಿ ಸರಿಯಿಲ್ಲ ಎಂದು ತಿಳಿದು ಬಂದಿದೆ. ಅಗತ್ಯ ಔಪಚಾರಿಕತೆಗಳನ್ನು ಪೂರ್ಣಗೊಳಿಸಿದ ಬಳಿಕ, ಆಕೆಯನ್ನು ಅವರ ಕುಟುಂಬ ಸದಸ್ಯರಿಗೆ ಹಸ್ತಾಂತರಿಸಲಾಗಿದೆ ಎನ್ನಲಾಗಿದೆ (ಏಜೆನ್ಸೀಸ್).