ಗುಟ್ಕಾ ಜಗಿಯುತ್ತಾಳೆಂದು ಮದುವೆ ರಿಜೆಕ್ಟ್​​ ಮಾಡಿದ್ದಕ್ಕೆ ಸಿಟ್ಟು; ಭಾವಿ ಅತ್ತೆಯ ಫೋಟೋ ಮಾರ್ಫ್ ಮಾಡಿ ವಿಕೃತಿ ಮೆರೆದ ಕಿರಾತಕಿ ಅರೆಸ್ಟ್..Mumbai

ಥಾಣೆಯಲ್ಲಿರುವ ಮಹಾರಾಷ್ಟ್ರ ರಾಜ್ಯ ಭದ್ರತಾ ಮಂಡಳಿಯಲ್ಲಿ ಕೆಲಸ ಮಾಡುತ್ತಿರುವ ಮಹಿಳೆ ತಮ್ಮ 22 ವರ್ಷದ ಮಗ ಮತ್ತು ಆರೋಪಿ ಯುವತಿ ಕಳೆದ ಮೂರು ವರ್ಷದಿಂದ ಪ್ರೀತಿಸುತ್ತಿದ್ದರು. ಇಬ್ಬರು ಇನ್​ಸ್ಟಾಗ್ರಾಮ್​ನಿಂದಾಗಿ ಪರಿಚಯವಾಗಿದ್ದರು. ಆಕೆ ಇತ್ತೀಚೆಗೆ ಮದುವೆ ಮಾಡಿಕೊ ಎಂದು ಪೀಡಿಸುತ್ತಿದ್ದ ಕಾರಣ, ಇಬ್ಬರ ನಡುವೆ ಜಗಳ ಶುರುವಾಗಿತ್ತು.

ಯುವತಿಯ ವಿಚಿತ್ರ ನಡವಳಿಕೆ ಹಾಗೂ ಆಕೆಗೆ ಇದ್ದ ತಂಬಾಕು ಮತ್ತು ಗುಟ್ಕಾ ಅಗಿಯುವ ಕೆಟ್ಟ ಅಭ್ಯಾಸಗಳು ಯುವಕನಿಗೆ ಇಷ್ಟವಿರಲಿಲ್ಲ. ಈ ಕಾರಣದಿಂದ ತಾನು ಈ ಸಂಬಂಧವನ್ನು ಮುಂದುವರಿಸಲು ಬಯಸುವುದಿಲ್ಲ ಎಂದು ಯುವಕ ತನ್ನ ತಾಯಿಗೆ ತಿಳಿಸಿದ್ದಾನೆ. ಮಗನ ನಿರ್ಧಾರದಂತೆ ತಾಯಿಯೂ ನಮಗೆ ಈ ಸಂಬಂಧ ಬೇಡ ಎಂದು ನೇರವಾಗಿಯೇ ಹೇಳಿಕೊಂಡಿದ್ದಾರೆ.

ಮದುವೆಯಾಗುವುದಕ್ಕೆ ನಿರಾಕರಿಸಿದ ಕಾರಣ ಸಿಟ್ಟಾದ ಯುವತಿ ಮೊದಲು ಕುಟುಂಬದ ವಿರುದ್ಧ ಸುಳ್ಳು ಪೊಲೀಸ್ ದೂರು ನೀಡುವುದಾಗಿ ಬೆದರಿಕೆ ಹಾಕಿದ್ದಾಳೆ. ಆನಂತರ ಯುವಕನ ತಾಯಿ ಬೇರೋಬ್ಬ ಪುರುಷನ ಜೊತೆಗೆ ಇರುವಂತೆ ಫೋಟೋಗಳನ್ನು ಮಾರ್ಫ್​ ಮಾಡಿದ್ದಾಳೆ. ಅಷ್ಟೇ ಅಲ್ಲದೇ ಫೋಟೋಗಳಿಗೆ ಅಸಭ್ಯ ಸಂದೇಶ ಹಾಕಿ, ಸೋಶಿಯಲ್​ ಮೀಡಿಯಾದಲ್ಲಿ ಹಂಚಿಕೊಂಡು ವಿಕೃತ ಮೆರೆದಿದ್ದಾಳೆ ಎನ್ನಲಾಗಿದೆ.

ಫೋಟೋಗಳು ಸೋಶಿಯಲ್​ ಮೀಡಿಯಾದಲ್ಲಿ ಹರಿಬಿಟ್ಟ ಬಗ್ಗೆ ಮಾಹಿತಿ ಪಡೆದುಕೊಂಡ ಸಂತ್ರಸ್ತೆ, ಬೇಸರಗೊಂಡು ಮುಂಬೈನ ಆರ್‌ಎಕೆ ಮಾರ್ಗ್ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ. ಸದ್ಯ ಪೊಲೀಸರು ಯುವತಿಯ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ ಮತ್ತು ಮಾಹಿತಿ ತಂತ್ರಜ್ಞಾನ ಕಾಯ್ದೆಯ ಸೆಕ್ಷನ್​ಗಳ ಅಡಿ ಆಕೆಯ ವಿರುದ್ಧ ದೂರು ದಾಖಲಿಸಿಕೊಂಡು ಬಂಧಿಸಿದ್ದಾರೆ,( ಏಜೆನ್ಸೀಸ್)