27ಕ್ಕೂ ಹೆಚ್ಚು ದೇಶಗಳಿಗೆ ವೀಸಾ ಬೇಕೇ ಇಲ್ಲ! ಆದ್ರೆ, ಈ ಹಿಡನ್ ಕಂಡೀಷನ್ಸ್ ಗೊತ್ತಿಲ್ಲದಿದ್ರೆ ಏರ್‌ಪೋರ್ಟ್‌ನಿಂದಲೇ ವಾಪಸ್

No Visa: ವಿದೇಶ ಪ್ರವಾಸ ಮಾಡುವ ಬಯಕೆ ಬಹುತೇಕರ ದೊಡ್ಡ ಕನಸು ಎಂದೇ ಹೇಳಬಹುದು. ಆದರೆ, ಈ ಪಾಸ್​ಪೋರ್ಟ್​ ಮತ್ತು ವೀಸಾ ಮಾಡಿಸಿಕೊಳ್ಳುವುದೇ ತಲೆಬಿಸಿ. ಜೊತೆಗೆ ದುಬಾರಿ ಹಣ ಹೊಂದಿಸುವುದು ಮತ್ತೊಂದು ಚಿಂತೆ. ಹೀಗಾಗಿ ಅನೇಕರು, ಜೀವನದಲ್ಲಿ ಮುಂದೊಂದು ದಿನ ಹೋದರಾಯಿತು ಬಿಡು ಎಂದು ಸುಮ್ಮನಾಗುತ್ತಾರೆ. ಅಷ್ಟಕ್ಕೂ, ವೀಸಾ ಸಮಸ್ಯೆಯಿಲ್ಲದೇ ಬರೋಬ್ಬರಿ 27ಕ್ಕೂ ಹೆಚ್ಚು ದೇಶಗಳಿಗೆ ಭಾರತೀಯರು ಹಾರಲು ಅವಕಾಶವಿದೆ ಎಂಬ ವಿಷಯ ನಿಮಗೆ ಗೊತ್ತಿದ್ಯಾ?

ಅನೇಕ ರಾಷ್ಟ್ರಗಳು ಈಗ ಭಾರತೀಯ ಪಾಸ್‌ಪೋರ್ಟ್ ಹೊಂದಿರುವವರಿಗೆ ವೀಸಾ ಮುಕ್ತ ಪ್ರವೇಶವನ್ನು ಅನುಮತಿಸಿವೆ. ನಿಮ್ಮ ಬಳಿಕ ಪಾಸ್‌ಪೋರ್ಟ್ ಮತ್ತು ಟಿಕೆಟ್ ಇದ್ದರೆ ಸಾಕು, ಪಟ್ಟಿಯಲ್ಲಿ ತಿಳಿಸಿರುವ ಅಥವಾ ಯಾವ ದೇಶಗಳು ಸಂಚರಿಸಲು ಅನುಮತಿ ಕೊಟ್ಟಿದೆಯೋ, ಅಷ್ಟು ರಾಷ್ಟ್ರಗಳಿಗೆ ನೀವು ಚಿಂತೆ ಇಲ್ಲದೆ ಪ್ರಯಾಣ ಮಾಡಬಹುದು. ಆದರೆ, ಯಾರು ಅಷ್ಟಾಗಿ ನಿಮಗೆ ಹೇಳದ ಕೆಲವು ಹಿಡನ್​ ಕಠಿಣ ಷರತ್ತುಗಳ ಬಗ್ಗೆ ತಿಳಿದು ಹೊರಡುವುದು ಒಂದೊಳ್ಳೆ ಸಲಹೆ.

ವೀಸಾ ಫ್ರೀ ಎಂದು ಕೇಳಿದೊಡನೆ ಟಿಕೆಟ್ ಬುಕ್ ಮಾಡಿಕೊಂಡು ನೇರವಾಗಿ ವಿಮಾನ ಹತ್ತಲು ಮುಂದಾಗಬೇಡಿ. ಇಲ್ಲೇ ನೀವು ಮಾಡೋದು ಬಿಗ್ ಮಿಸ್ಟೇಕ್​. ಕೆಲವು ಸಣ್ಣ ವಿಷಯಗಳ ಬಗ್ಗೆ ನಿರ್ಲಕ್ಷ್ಯ ವಹಿಸಿದಾಗಲೇ ನಾವು ದೊಡ್ಡ ಸಮಸ್ಯೆಯಲ್ಲಿ ಸಿಲುಕಿ ಪರದಾಡುವುದು. ವೀಸಾ ಇಲ್ಲದೆಯೇ ನಮ್ಮ ದೇಶಕ್ಕೆ ಬಂದು ಸುತ್ತಾಡಿ, ಎಂಜಾಯ್ ಮಾಡಿ ಎನ್ನುವ ರಾಷ್ಟ್ರಗಳು ಒಂದಷ್ಟು ಕಠಿಣ ನಿಯಮಗಳನ್ನು ಮೊದಲೇ ರೂಪಿಸಿರುತ್ತವೆ. ಅವುಗಳು ಹೇಗಿವೆ? ಯಾವ ದೇಶಗಳು ಯಾವೆಲ್ಲ ಷರತ್ತುಗಳನ್ನು ಹೊಂದಿವೆ ಎಂಬುದರ ವಿವರ ಹೀಗಿದೆ ನೋಡಿ.

ಶ್ರೀಲಂಕಾ: 30 ದಿನಗಳವರೆಗೆ ಉಳಿಯಲು ಅವಕಾಶ. ಶ್ರೀಲಂಕಾ ಶಾಶ್ವತವಾಗಿ ವೀಸಾ ಮುಕ್ತವಾಗಿಲ್ಲ ಎಂಬುದನ್ನು ಮೊದಲು ನೆನಪಿಡಿ. ಇವು ಭಾರತೀಯರಿಗೆ ನಿರ್ದಿಷ್ಟ ಸಮಯಗಳಲ್ಲಿ ಘೋಷಿಸಲಾದ ತಾತ್ಕಾಲಿಕ ವಿನಾಯಿತಿಗಳಾಗಿವೆ. ಆದ್ದರಿಂದ, ಪ್ರಯಾಣಿಸುವ ಮೊದಲು ಪ್ರಸ್ತುತ ಕಾನೂನನ್ನು ಪರಿಶೀಲಿಸಿಕೊಳ್ಳಿ.

ಮಾಲ್ಡೀವ್ಸ್: ನೀವು ವೀಸಾ ಇಲ್ಲದೆ 30 ದಿನಗಳು ಅಥವಾ ಒಂದು ತಿಂಗಳು ಉಳಿದು ಬರಬಹುದು

ಕಝಾಕಿಸ್ತಾನ್: 14 ದಿನಗಳವರೆಗೆ ವೀಸಾ ಮುಕ್ತ ವಾಸ್ತವ್ಯ

ಫಿಲಿಪೈನ್ಸ್: ಎರಡು ವಾರಕ್ಕಷ್ಟೇ ವೀಸಾ ಮುಕ್ತ ಎಂಟ್ರಿ. ಪ್ರಯಾಣಿಸುವ ಮೊದಲು, ಫಿಲಿಪೈನ್ಸ್‌ನ ಅಧಿಕೃತ 'eTravel' ಪೋರ್ಟಲ್ ಮೂಲಕ ಡಿಜಿಟಲ್ ಆಗಮನದ ಫಾರ್ಮ್ ಅನ್ನು ಭರ್ತಿ ಮಾಡಬೇಕು ಮತ್ತು ಕ್ಯೂಆರ್​ ಕೋಡ್ ಸ್ಕ್ಯಾನ್ ಮಾಡಿರಬೇಕು.

ಮಾರಿಷಸ್: 60 ದಿನಗಳವರೆಗೆ ವೀಸಾ ಫ್ರೀ ಎಂಟ್ರಿ

ಡೊಮಿನಿಕಾ: ಜಾಕ್​ಪಾಟ್​ ಎಂಬಂತೆ ನೀವು ಆರು ತಿಂಗಳವರೆಗೆ ವೀಸಾ ಇಲ್ಲದೆ ಉಳಿಯಬಹುದು

ಬಾರ್ಬಡೋಸ್, ಗ್ರೆನಡಾ, ಸೇಂಟ್ ಕಿಟ್ಸ್ ಅಂಡ್​ ನೆವಿಸ್, ಟ್ರಿನಿಡಾಡ್ ಮತ್ತು ಟೊಬಾಗೊ ದೇಶಗಳಲ್ಲಿ ನೀವು ಬರೋಬ್ಬರಿ 90 ದಿನಗಳವರೆಗೆ ವೀಸಾ ಇಲ್ಲದೆಯೇ ವಾಸ್ತವ್ಯ ಹೂಡಬಹುದು.

ಜಮೈಕಾ, ಹೈಟಿ: ಪರವಾನಗಿಗಳು 30ರಿಂದ 90 ದಿನಗಳವರೆಗೆ ಮಾತ್ರ ಲಭ್ಯವಿದೆ

ಮಾಂಟ್ಸೆರಾಟ್: 6 ತಿಂಗಳವರೆಗೆ ವೀಸಾ ಉಚಿತ

ಸೇಂಟ್ ವಿನ್ಸೆಂಟ್ ಮತ್ತು ಗ್ರೆನಡೈನ್ಸ್: ವೀಸಾ ಇಲ್ಲದೆ ಭೇಟಿ ಕೊಡಲು ಯಾವುದೇ ಅಡತಡೆ ಇಲ್ಲ

ಫಿಜಿ: ಈ ಸುಂದರ ದ್ವೀಪದಲ್ಲಿ ವೀಸಾ ಇಲ್ಲದೆ 120 ದಿನಗಳವರೆಗೆ ನೀವು ಸಮಯ ಕಳೆಯಬಹುದಾಗಿದೆ

ಕಿರ್ಗಿಸ್ತಾನ್: ನಿಯಮಿತ ಭಾರತೀಯ ಪಾಸ್‌ಪೋರ್ಟ್ ಹೊಂದಿರುವವರು ಸಂಪೂರ್ಣ ವೀಸಾ ಮುಕ್ತರಾಗಿರುವುದಿಲ್ಲ. ಯುಎಸ್​, ಯುಕೆ ಅಥವಾ ಷೆಂಗೆನ್ ಪ್ರವೇಶ ವೀಸಾ ಹೊಂದಿರುವವರು ಮಾತ್ರ ಸೀಮಿತ ಸಂಖ್ಯೆಯ ದಿನಗಳವರೆಗೆ ವೀಸಾ-ಮುಕ್ತ ಪ್ರಯಾಣಕ್ಕೆ ಅರ್ಹರಾಗಿರುತ್ತಾರೆ. ಇತರರು ಇ-ವೀಸಾವನ್ನು ಪಡೆಯಬೇಕು.

ಬೆಲಾರಸ್: ನಿಯಮಿತ ಪ್ರವಾಸಿ ಭೇಟಿಗೆ ಉಚಿತ ವೀಸಾ ಲಭ್ಯವಿಲ್ಲ. ಷೆಂಗೆನ್ ದೇಶಗಳಿಂದ ಮಾನ್ಯ ಬಹು ಪ್ರವೇಶ ವೀಸಾ ಹೊಂದಿರುವವರಿಗೆ ಮಾತ್ರ ಕೆಲವು ವಿನಾಯಿತಿಗಳು ದೊರಯಲಿವೆ.