ಚಿನ್ನದ ಬೆಲೆ 2 ಲಕ್ಷ ರೂ. ದಾಟುತ್ತಾ?

ಭಾರತೀಯ ಸಂಸ್ಕೃತಿಯಲ್ಲಿ ಚಿನ್ನಕ್ಕೆ ಕೇವಲ ಆಭರಣದ ಸ್ಥಾನ ಮಾತ್ರ ಇಲ್ಲ, ಅದಕ್ಕೊಂದು ಆರ್ಥಿಕ ಭದ್ರತೆಯ ಸ್ಥಾನವೂ ಇದೆ. ಕಳೆದ ಐದಾರು ವರ್ಷಗಳಲ್ಲಿ ಚಿನ್ನದ ಬೆಲೆ ಏರಿಯಾಗಿರುವ ರೀತಿ ಬೆರಗು ಹುಟ್ಟಿಸುವಂತಿದೆ. 2020ರಲ್ಲಿ ಕೇವಲ 50 ಸಾವಿರ ರೂ. ಆಸುಪಾಸಿನಲ್ಲಿದ್ದ 24 ಕ್ಯಾರೆಟ್​ನ 10 ಗ್ರಾಂ ಚಿನ್ನದ ಬೆಲೆ ಈಗ 2026ರ ಮಾರ್ಚ್​ನಲ್ಲಿ 1.70 ಲಕ್ಷದಿಂದ 1.75 ಲಕ್ಷ ರೂ.ಗೆ ತಲುಪಿದೆ. ಈ ಭಾರಿ ಏರಿಕೆಗೆ ಕೇವಲ ಆಭರಣದ ಬೇಡಿಕೆಯಷ್ಟೇ ಕಾರಣವಲ್ಲ, ಜಾಗತಿಕ ಭೌಗೋಳಿಕ ರಾಜಕೀಯ ಸಂಘರ್ಷಗಳೂ ಕಾರಣವಾಗುತ್ತಿವೆ.

ನ್ನದ ಬೆಲೆ 2 ಲಕ್ಷದ ಗಡಿ ದಾಟುವುದು ಕೇವಲ ಊಹೆಯಲ್ಲ, ಅದು ಮಾರುಕಟ್ಟೆಯ ಸನ್ನಿವೇಶಗಳನ್ನು ಅವಲಂಬಿಸಿದೆ. ಯುದ್ಧದ ತೀವ್ರತೆ ಹೆಚ್ಚಾದರೆ ಈ ಬೆಲೆ ಅತಿ ಶೀಘ್ರದಲ್ಲೇ ಬರಬಹುದು. ಒಂದು ವೇಳೆ, ಜಾಗತಿಕ ಒತ್ತಡಕ್ಕೆ ಮಣಿದು ಉಭಯ ಬಣಗಳು ಯುದ್ಧ ನಿಲ್ಲಿಸಲು ನಿರ್ಧರಿಸಿದರೆ ಆಗ ಚಿನ್ನದ ಬೆಲೆ ಈಗಿರುವುದಕ್ಕಿಂತೂ ಕೆಳಕ್ಕೆ ಇಳಿಯಬಹುದು.

1. ಇರಾನ್-ಇಸ್ರೇಲ್ ಸಂಘರ್ಷ, ತೈಲ ರಾಜಕೀಯ: ಮಧ್ಯಪ್ರಾಚ್ಯದಲ್ಲಿ ಉಂಟಾಗಿರುವ ಉದ್ವಿಗ್ನತೆ ಜಾಗತಿಕ ಪೂರೈಕೆ ಸರಪಳಿಯ ಮೇಲೆ ದೊಡ್ಡ ಹೊಡೆತ ನೀಡಿದೆ. ಜಗತ್ತಿನ ಹಲವು ಭಾಗಗಳಿಗೆ ತೈಲ ಸೇರಿದಂತೆ ಪ್ರಮುಖ ವಸ್ತುಗಳು ಪೂರೈಕೆಯಾಗುವುದು ಹಾಮುಜ್ ಜಲಸಂಧಿಯ ಮೂಲಕ. ಈ ಜಲಸಂಧಿಯನ್ನು ಇರಾನ್ ನಿಯಂತ್ರಿಸುವುದರಿಂದ, ಅಲ್ಲಿ ಯುದ್ಧದ ವಾತಾವರಣ ನಿರ್ವಣವಾದರೆ ಜಾಗತಿಕ ತೈಲ ಪೂರೈಕೆಯ ಶೇ. 20ರಷ್ಟು ಭಾಗ ಸ್ಥಗಿತಗೊಳ್ಳುವ ಭೀತಿ ಇದೆ. ತೈಲ ಬೆಲೆ ಏರಿಕೆಯಾದಾಗ ಸರಕು ಸಾಗಣೆ ವೆಚ್ಚ ಹೆಚ್ಚಾಗಿ ಹಣದುಬ್ಬರ ಉಂಟಾಗುತ್ತದೆ. ಹಣದುಬ್ಬರ ಹೆಚ್ಚಾದಾಗ ಜನರು ಹಣದ ಮೌಲ್ಯ ಕುಸಿಯುವುದನ್ನು ತಪ್ಪಿಸಲು ಚಿನ್ನವನ್ನು ಆಶ್ರಯಿಸುತ್ತಾರೆ. ಆಗ ಸಹಜವಾಗಿಯೇ ಚಿನ್ನದ ಬೆಲೆ ಹೆಚ್ಚಾಗುತ್ತದೆ.

2. ಕೇಂದ್ರೀಯ ಬ್ಯಾಂಕ್​ಗಳ ಚಿನ್ನ ಸಂಗ್ರಹ: ಕೇವಲ ಸಾಮಾನ್ಯ ಜನರಷ್ಟೇ ಅಲ್ಲ, ಭಾರತದ ಆರ್​ಬಿಐ, ಚೀನಾ ಮತ್ತು ರಷ್ಯಾದಂತಹ ದೇಶಗಳ ಕೇಂದ್ರೀಯ ಬ್ಯಾಂಕ್​ಗಳು ಡಾಲರ್ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಭಾರಿ ಪ್ರಮಾಣದಲ್ಲಿ ಚಿನ್ನವನ್ನು ಖರೀದಿಸುತ್ತಿವೆ. ಪ್ರಸ್ತುತ ಭಾರತದ ಬಳಿ 800 ಟನ್​ಗಿಂತಲೂ ಅಧಿಕ ಚಿನ್ನದ ಮೀಸಲು ಇದೆ. ಈ ರೀತಿಯ ಸಾಂಸ್ಥಿಕ ಖರೀದಿಗಳು ಮಾರುಕಟ್ಟೆಯಲ್ಲಿ ಚಿನ್ನದ ಕೊರತೆಯನ್ನು ಉಂಟುಮಾಡಿ ಬೆಲೆ ಏರಿಕೆಗೆ ಕಾರಣವಾಗುತ್ತವೆ.

3. ಸುರಕ್ಷಿತ ಹೂಡಿಕೆಯ ಹೆಗ್ಗಳಿಕೆ: ಷೇರು ಮಾರುಕಟ್ಟೆಯಲ್ಲಿ ಅನಿಶ್ಚಿತತೆ ಕಂಡುಬಂದಾಗಲೆಲ್ಲಾ ಹೂಡಿಕೆದಾರರು ತಮ್ಮ ಬಂಡವಾಳವನ್ನು ರಕ್ಷಿಸಿಕೊಳ್ಳಲು ಚಿನ್ನವನ್ನು ಆರಿಸಿಕೊಳ್ಳುತ್ತಾರೆ. ಯುದ್ಧದ ಸಮಯದಲ್ಲಿ ಕಾಗದದ ಹಣಕ್ಕಿಂತ ಚಿನ್ನವೇ ಶ್ರೇಷ್ಠ ಎಂಬ ನಂಬಿಕೆ ಶತಮಾನಗಳಿಂದ ನಡೆದುಬಂದಿದೆ.

4. ಡಾಲರ್ ಮೌಲ್ಯ, ರೂಪಾಯಿ ಕುಸಿತ: ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನದ ವ್ಯವಹಾರ ಡಾಲರ್​ನಲ್ಲಿ ನಡೆಯುತ್ತದೆ. ಯುದ್ಧದ ಸಮಯದಲ್ಲಿ ಡಾಲರ್ ಬಲಗೊಂಡರೆ ಮತ್ತು ಭಾರತೀಯ ರೂಪಾಯಿಯ ಮೌಲ್ಯ ಕುಸಿದರೆ, ನಾವು ಅಷ್ಟೇ ಪ್ರಮಾಣದ ಚಿನ್ನವನ್ನು ಆಮದು ಮಾಡಿಕೊಳ್ಳಲು ಹೆಚ್ಚಿನ ರೂಪಾಯಿಗಳನ್ನು ನೀಡಬೇಕಾಗುತ್ತದೆ. ಇದು ಸ್ಥಳೀಯ ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆಗೆ ನೇರ ಕಾರಣವಾಗುತ್ತದೆ.

5. ಅಮೆರಿಕದ ಫೆಡರಲ್ ರಿಸರ್ವ್ ಬಡ್ಡಿದರ: ಅಮೆರಿಕದ ಫೆಡರಲ್ ರಿಸರ್ವ್ ತನ್ನ ಬಡಿ ್ಡ ದರಗಳನ್ನು ಕಡಿಮೆ ಮಾಡಿದಾಗ, ಬಾಂಡ್​ಗಳ ಮೇಲಿನ ಆದಾಯ ಕಡಿಮೆಯಾಗುತ್ತದೆ. ಆಗ ಹೂಡಿಕೆದಾರರು ಚಿನ್ನದ ಕಡೆಗೆ ಮುಖ ಮಾಡುತ್ತಾರೆ, ಇದು ಬೆಲೆಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ.

ವೈವಿಧ್ಯೀಕರಣ: ನಿಮ್ಮ ಎಲ್ಲ ಉಳಿತಾಯವನ್ನು ಚಿನ್ನದ ಮೇಲೆ ಹಾಕಬೇಡಿ. ಒಟ್ಟು ಹೂಡಿಕೆಯ ಶೇ. 10-15ರಷ್ಟು ಭಾಗವನ್ನು ಮಾತ್ರ ಚಿನ್ನದಲ್ಲಿ ಹೂಡಿಕೆ ಮಾಡುವುದು ಸೂಕ್ತ. ಡಿಜಿಟಲ್ ಗೋಲ್ಡ್ ಮತ್ತು ಎಸ್​ಜಿಬಿ: ಭೌತಿಕ ಚಿನ್ನದ ಬದಲು ಗೋಲ್ಡ್ ಇಟಿಎಫ್ ಅಥವಾ ಸಾವರಿನ್ ಗೋಲ್ಡ್ ಬಾಂಡ್ (ಎಸ್​ಜಿಬಿ) ಮೇಲೆ ಗಮನಹರಿಸಬಹುದು. ಇಲ್ಲಿ ಮೇಕಿಂಗ್ ಚಾರ್ಜಸ್ ಇರುವುದಿಲ್ಲ ಮತ್ತು ಸುರಕ್ಷತೆಯೂ ಹೆಚ್ಚು.