ಇರಾನ್ ಸುಪ್ರೀಂ ಲೀಡರ್ ಹತ್ಯೆಯಾದಾಗ ಮೌನವೇಕೆ? ಮೋದಿ ಸರ್ಕಾರದ ವಿದೇಶಾಂಗ ನೀತಿಯ ಗುಟ್ಟು ರಟ್ಟು ಮಾಡಿದರೇ ಓವೈಸಿ? Asaduddin Owaisi

ಈ ಬಗ್ಗೆ ಸಂದರ್ಶನವೊಂದರಲ್ಲಿ ಮಾತನಾಡಿದ ಓವೈಸಿ, ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಸಂಘರ್ಷಗಳ ಬಗ್ಗೆ ಭಾರತ ಸರ್ಕಾರವು ಸಂಸತ್ತಿನಲ್ಲಿ ಪೂರ್ಣ ಪ್ರಮಾಣದ ಚರ್ಚೆಯನ್ನು ನಡೆಸುತ್ತಿಲ್ಲ ಎಂದು ಓವೈಸಿ ದೂರಿದ್ಧಾರೆ. ಅಲ್ಲದೆ, ಸರ್ವಪಕ್ಷ ಸಭೆ ನಡೆಸುವುದು ಸಂಸತ್ತಿನಲ್ಲಿ ನಡೆಯುವ ಚರ್ಚೆಗೆ ಸಮನಲ್ಲ. ನಮಗೆ ಪ್ರಶ್ನೆ ಕೇಳುವ ಹಕ್ಕಿದೆ ಎಂದು ಹೇಳುವ ಮೂಲಕ ಸರ್ಕಾರದ ಪಾರದರ್ಶಕತೆಯನ್ನು ಪ್ರಶ್ನಿಸಿದ್ದಾರೆ.

ಭಾರತವು ಯಾವುದೇ ದೇಶದ ಏಜೆಂಟ್ ಅಲ್ಲ ಎಂಬ ಸರ್ಕಾರದ ಇತ್ತೀಚಿನ ಹೇಳಿಕೆಯನ್ನು ಓವೈಸಿ ತೀವ್ರವಾಗಿ ಲೇವಡಿ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಅವರು ಬಳಸಿದ ರೂಪಕಗಳು ಸಭೆಯಲ್ಲಿದ್ದವರನ್ನು ಬೆಚ್ಚಿಬೀಳಿಸಿದವು.

ಏಜೆಂಟ್ ಎಂದರೆ ಏನು, ಅದರ ಅರ್ಥವೇನು ಎಂದು ನನಗೆ ಹೇಳಿ. ಬಹುಶಃ ಅವರು ಇಸ್ರೇಲ್ ಅನ್ನು ವೇಶ್ಯೆ ಮತ್ತು ಪಾಕಿಸ್ತಾನವನ್ನು ದಲ್ಲಾಳಿ ಎಂದು ಕರೆಯಲು ಪ್ರಯತ್ನಿಸುತ್ತಿದ್ದಾರೆಯೇ ಎಂದು ಪ್ರಶ್ನಿಸಿದ್ದಾರೆ. ಅಲ್ಲದೆ, ನಮಗೆ ನಾವು ಏಜೆಂಟ್ ಅಲ್ಲ ಎಂದು ಹೇಳುತ್ತಿದ್ದರೆ, ಪ್ರಧಾನಿ ಮತ್ತು ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರು ಇಸ್ರೇಲ್ ಮತ್ತು ಪಾಕಿಸ್ತಾನದ ಬಗ್ಗೆ ಇಂತಹ ಕೀಳು ಮಟ್ಟದ ದೃಷ್ಟಿಕೋನ ಹೊಂದಿದ್ದಾರೆಯೇ ಎಂದು ನಾನು ತಿಳಿಯಲು ಬಯಸುತ್ತೇನೆ ಎಂದು ಓವೈಸಿ ಕಿಡಿಕಾರಿದ್ದಾರೆ.

ಇರಾನ್‌ನ ಸುಪ್ರೀಂ ಲೀಡರ್ ಹತ್ಯೆಯಾದಾಗ ಭಾರತ ಸರ್ಕಾರವು ಸಂತಾಪ ಸೂಚಿಸಲು ಐದು ದಿನಗಳ ಕಾಲ ವಿಳಂಬ ಮಾಡಿದ್ದನ್ನು ಓವೈಸಿ ಪ್ರಶ್ನಿಸಿದ್ದು, ಸತ್ಯವನ್ನು ಹೇಳಲು ನಾವು ಯಾಕೆ ಹೆದರುತ್ತಿದ್ದೇವೆ. ಅಮೆರಿಕ ಮತ್ತು ಇಸ್ರೇಲ್ ವಿಷಯದಲ್ಲಿ ಪ್ರಧಾನಿಯವರು ಮೌನವಾಗಿರುವುದೇಕೆ ಎಂದು ಓವೈಸಿ ತೀವ್ರ ವಾಗ್ದಾಳೀ ನಡೆಸಿದ್ದಾರೆ.

ಇರಾನ್‌ನ ಶಾಲೆಯೊಂದರ ಮೇಲೆ ನಡೆದ ದಾಳಿಯನ್ನು ಖಂಡಿಸಿದ ಓವೈಸಿ, ಅಮೆರಿಕದ ಅಧ್ಯಕ್ಷ ಮತ್ತು ಇಸ್ರೇಲ್ ಪ್ರಧಾನಿಯವರನ್ನು ಭ್ರಮೆಯಲ್ಲಿರುವ ಅಧ್ಯಕ್ಷ ಮತ್ತು ಜನಾಂಗೀಯ ಹತ್ಯೆ ಮಾಡುತ್ತಿರುವ ಪ್ರಧಾನಿ ಎಂದು ಬಣ್ಣಿಸಿದ್ದಾರೆ.

ಇರಾನ್, ಇಸ್ರೇಲ್ ಮತ್ತು ಅಮೆರಿಕ ನಡುವಿನ ಉದ್ವಿಗ್ನತೆ ತಾರಕಕ್ಕೇರಿರುವ ಈ ಸಂದರ್ಭದಲ್ಲಿ, ಭಾರತವು ತನ್ನ ನಿಲುವನ್ನು ಸ್ಪಷ್ಟಪಡಿಸಬೇಕು ಮತ್ತು ಪ್ರತಿಪಕ್ಷಗಳು ಕೇಳುತ್ತಿರುವ ಪ್ರಶ್ನೆಗಳಿಗೆ ಉತ್ತರಿಸಬೇಕು ಎಂಬುದು ಓವೈಸಿ ಅವರ ವಾದವಾಗಿತ್ತು. ಈ ಭಾಷಣವು ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧದ ಚರ್ಚೆಗಳಿಗೆ ನಾಂದಿ ಹಾಡಿದೆ.

ಸರ್ಕಾರದ ಪರವಾಗಿ ವಾದಿಸುವವರು ಇದನ್ನು ಅಂತಾರಾಷ್ಟ್ರೀಯ ರಾಜತಾಂತ್ರಿಕತೆಯ ಕನಿಷ್ಠ ಜ್ಞಾನವಿಲ್ಲದ ಹೇಳಿಕೆ ಎಂದು ಕರೆದರೆ, ಓವೈಸಿ ಬೆಂಬಲಿಗರು ಇದನ್ನು ಧೈರ್ಯಶಾಲಿ ಪ್ರಶ್ನೆ ಎಂದು ಕೊಂಡಾಡುತ್ತಿದ್ದಾರೆ,(ಏಜೆನ್ಸೀಸ್).