ಕಾರಿನ ಕೀಗೆ ಅಲ್ಯೂಮಿನಿಯಂ ಫಾಯಿಲ್ ಯಾಕೆ ಸುತ್ತಬೇಕು? 'ಸೈಲೆಂಟ್' ಕಳ್ಳತನದಿಂದ ಪಾರಾಗಲು ಇಲ್ಲಿದೆ ಟಿಪ್ಸ್! | Key Fob

ಹಿಂದೆಲ್ಲಾ ಕಾರು ಕಳ್ಳತನ ಮಾಡಬೇಕೆಂದರೆ ಗಾಜು ಒಡೆಯಬೇಕಿತ್ತು ಅಥವಾ ಲಾಕ್ ಮುರಿಯಬೇಕಿತ್ತು. ಆದರೆ ಈಗ ಕಾಲ ಬದಲಾಗಿದೆ. 2023ರ ಅಂಕಿಅಂಶಗಳ ಪ್ರಕಾರ ಅಮೆರಿಕವೊಂದರಲ್ಲೇ ಹತ್ತು ಲಕ್ಷಕ್ಕೂ ಅಧಿಕ ಕಾರುಗಳು ಕಳ್ಳತನವಾಗಿದ್ದು, ಇದರಲ್ಲಿ ಹೆಚ್ಚಿನವು ಯಾವುದೇ ಶಬ್ದವಿಲ್ಲದೆ, ಕ್ಷಣಾರ್ಧದಲ್ಲಿ ನಡೆದಿರುವ 'ಹೈಟೆಕ್' ಕಳ್ಳತನಗಳು. ನ್ಯಾಷನಲ್ ಇನ್ಶೂರೆನ್ಸ್ ಕ್ರೈಮ್ ಬ್ಯೂರೋ ಪ್ರಕಾರ, ಇಂದಿನ ಕಳ್ಳರು ಹಳೆ ಕಾಲದ ಆಯುಧಗಳ ಬದಲು ಡಿಜಿಟಲ್ ಸಾಧನಗಳನ್ನು ಬಳಸುತ್ತಿದ್ದಾರೆ. ಇದಕ್ಕೆ ಅವರು ಬಳಸುವ ತಂತ್ರವನ್ನೇ ‘ರಿಲೇ ಅಟ್ಯಾಕ್’ (Relay Attack) ಎಂದು ಕರೆಯಲಾಗುತ್ತದೆ.

ಇಂದಿನ ಬಹುತೇಕ ಕಾರುಗಳು ‘ಕೀಲೆಸ್ ಎಂಟ್ರಿ’ (Keyless Entry) ಸೌಲಭ್ಯ ಹೊಂದಿರುತ್ತವೆ. ಅಂದರೆ ಕೀಲಿ ನಿಮ್ಮ ಜೇಬಿನಲ್ಲಿದ್ದರೆ ಸಾಕು, ಕಾರಿನ ಬಳಿ ಹೋದಾಗ ತಾನಾಗಿಯೇ ಅನ್‌ಲಾಕ್ ಆಗುತ್ತದೆ. ಅನಾಲಾಗ್ ಡಿವೈಸಸ್ ಇಂಜಿನಿಯರ್‌ಗಳ ಪ್ರಕಾರ, ಇಂದಿನ ಶೇ. 70ಕ್ಕೂ ಹೆಚ್ಚು ಕಾರುಗಳು ರೇಡಿಯೋ ತರಂಗಾಂತರಗಳ (315 MHz ವರೆಗೆ) ಮೂಲಕ ಕಾರ್ಯನಿರ್ವಹಿಸುತ್ತವೆ. ಕಾರು ಮತ್ತು ಕೀ ಫೋಬ್ ನಿರಂತರವಾಗಿ ಸಿಗ್ನಲ್‌ಗಳನ್ನು ವಿನಿಮಯ ಮಾಡಿಕೊಳ್ಳುತ್ತಿರುತ್ತವೆ. ಈ 'ಮ್ಯಾಜಿಕ್' ನಮಗೆ ಸುಲಭ ಎನಿಸಿದರೂ, ಕಳ್ಳರಿಗೆ ಇದು ಒಂದು ವರದಾನವಾಗಿ ಪರಿಣಮಿಸಿದೆ.

ರಿಲೇ ಅಟ್ಯಾಕ್‌ನಲ್ಲಿ ಸಾಮಾನ್ಯವಾಗಿ ಇಬ್ಬರು ಕಳ್ಳರು ಭಾಗಿಯಾಗಿರುತ್ತಾರೆ. ಒಬ್ಬ ಕಳ್ಳ ನಿಮ್ಮ ಕಾರಿನ ಬಳಿ ಇರುತ್ತಾನೆ. ಮತ್ತೊಬ್ಬ ಕಳ್ಳ ನಿಮ್ಮ ಮನೆಯ ಗೋಡೆಯ ಬಳಿ ಅಥವಾ ಕಿಟಕಿಯ ಹತ್ತಿರ ಸಿಗ್ನಲ್ ಹಿಡಿಯುವ ಸಾಧನದೊಂದಿಗೆ ನಿಲ್ಲುತ್ತಾನೆ. ಮನೆಯ ಒಳಗಿರುವ ನಿಮ್ಮ ಕೀ ಫೋಬ್ ಕಳುಹಿಸುವ ರೇಡಿಯೋ ಸಿಗ್ನಲ್‌ಗಳನ್ನು ಈ ಸಾಧನವು ಹಿಡಿದು, ಅದನ್ನು ಕಾರಿನ ಬಳಿ ಇರುವ ಕಳ್ಳನಿಗೆ ರವಾನಿಸುತ್ತದೆ. ಕಾರಿಗೆ ತನ್ನ ಕೀಲಿ ಕೈ ತನ್ನ ಬಳಿಯೇ ಇದೆ ಎಂಬ ಭ್ರಮೆ ಉಂಟಾಗಿ, ತಕ್ಷಣ ಬಾಗಿಲು ತೆರೆಯುತ್ತದೆ.

ವಿಶೇಷವೆಂದರೆ, ಸಂಶೋಧಕರ ಪ್ರಕಾರ ಮನೆಯೊಳಗೆ 49 ಅಡಿ ದೂರದಲ್ಲಿರುವ ಕೀಯ ಸಿಗ್ನಲ್ ಅನ್ನು ಕೂಡ ಕಳ್ಳರು ಸುಲಭವಾಗಿ ಪತ್ತೆಹಚ್ಚಬಲ್ಲರು. ಇನ್ನು ಸ್ವಿಟ್ಜರ್ಲೆಂಡ್‌ನ ಇಟಿಎಚ್ ಜೂರಿಚ್ ಸಂಶೋಧಕರು ತೋರಿಸಿಕೊಟ್ಟಂತೆ, ಕೀಲಿಗಳು 160 ಅಡಿ ದೂರದಲ್ಲಿದ್ದರೂ ಕಳ್ಳರು ಕಾರನ್ನು ತೆರೆಯುವಲ್ಲಿ ಯಶಸ್ವಿಯಾಗಿದ್ದಾರೆ!

ಅಲ್ಯೂಮಿನಿಯಂ ಫಾಯಿಲ್ ಎಂಬ 'ರಕ್ಷಾ ಕವಚ'

ಈ ಡಿಜಿಟಲ್ ಕಳ್ಳತನವನ್ನು ತಡೆಯಲು ಜನರು ಈಗ ಅಡುಗೆ ಮನೆಗೆ ಬಳಸುವ ಅಲ್ಯೂಮಿನಿಯಂ ಫಾಯಿಲ್ ಮೊರೆ ಹೋಗುತ್ತಿದ್ದಾರೆ. ಇದನ್ನು ವಿಜ್ಞಾನದಲ್ಲಿ ‘ಫ್ಯಾರಡೆ ಕೇಜ್’ (Faraday Cage) ಎನ್ನಲಾಗುತ್ತದೆ. ಭೌತವಿಜ್ಞಾನಿ ಮೈಕೆಲ್ ಫ್ಯಾರಡೆ ಈ ಪರಿಕಲ್ಪನೆಯನ್ನು ಪರಿಚಯಿಸಿದರು. ಒಂದು ವಸ್ತುವನ್ನು ವಿದ್ಯುತ್ ವಾಹಕ ಗುಣವಿರುವ ಲೋಹದಿಂದ ಪೂರ್ತಿಯಾಗಿ ಸುತ್ತಿದರೆ, ಅದರೊಳಗೆ ಯಾವುದೇ ಹೊರಗಿನ ರೇಡಿಯೋ ತರಂಗಗಳು ಪ್ರವೇಶಿಸಲು ಅಥವಾ ಒಳಗಿನ ತರಂಗಗಳು ಹೊರಹೋಗಲು ಸಾಧ್ಯವಿಲ್ಲ.

ನಿಮ್ಮ ಕಾರಿನ ಕೀಯನ್ನು ಅಲ್ಯೂಮಿನಿಯಂ ಫಾಯಿಲ್‌ನಿಂದ ಸರಿಯಾಗಿ ಸುತ್ತಿಟ್ಟರೆ, ಅದರ ಸಿಗ್ನಲ್‌ಗಳು ಹೊರಹೋಗುವುದಿಲ್ಲ. ಆಗ ಕಳ್ಳರು ನಿಮ್ಮ ಮನೆಯ ಹೊರಗೆ ಎಷ್ಟು ತಲೆಕೆಳಗಾಗಿ ನಿಂತರೂ ಸಿಗ್ನಲ್ ಹಿಡಿಯಲು ಸಾಧ್ಯವಾಗುವುದಿಲ್ಲ.

ಸಂಪೂರ್ಣವಾಗಿ ಸುತ್ತಿರಿ: ಕೀಯ ಯಾವುದೇ ಭಾಗ ಕಾಣದಂತೆ ಅಲ್ಯೂಮಿನಿಯಂ ಫಾಯಿಲ್‌ನಿಂದ ಮೂರ್ನಾಲ್ಕು ಪದರಗಳಲ್ಲಿ ಸುತ್ತಿ.

ಪರೀಕ್ಷೆ ಮಾಡಿ: ಫಾಯಿಲ್ ಸುತ್ತಿದ ಕೀಯನ್ನು ಕಾರಿನ ಬಳಿ ತೆಗೆದುಕೊಂಡು ಹೋಗಿ ಬಾಗಿಲು ತೆರೆಯಲು ಪ್ರಯತ್ನಿಸಿ. ಒಂದು ವೇಳೆ ಬಾಗಿಲು ತೆರೆಯದಿದ್ದರೆ, ನಿಮ್ಮ ಸುರಕ್ಷತಾ ಕವಚ ಕೆಲಸ ಮಾಡುತ್ತಿದೆ ಎಂದರ್ಥ.

ದೂರ ಇಡಿ: ಯಾವಾಗಲೂ ಕೀಗಳನ್ನು ಮನೆಯ ಪ್ರವೇಶ ದ್ವಾರ ಅಥವಾ ಕಿಟಕಿಯ ಬಳಿ ಇಡಬೇಡಿ.

ಅಲ್ಯೂಮಿನಿಯಂ ಫಾಯಿಲ್ ಒಂದು ತಾತ್ಕಾಲಿಕ ಮತ್ತು ಕಡಿಮೆ ಖರ್ಚಿನ ಉಪಾಯ. ಆದರೆ ಇದು ಯಾವಾಗಲೂ ಪ್ರಾಯೋಗಿಕವಲ್ಲ. ಇದಕ್ಕಾಗಿ ಮಾರುಕಟ್ಟೆಯಲ್ಲಿ ಈಗ ‘ಸಿಗ್ನಲ್ ಬ್ಲಾಕಿಂಗ್ ಪೌಚ್’ (Faraday Bags) ಲಭ್ಯವಿವೆ. ಇವುಗಳನ್ನು ಕೀ ಇಡಲು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ.

ವಾಹನ ತಯಾರಕ ಕಂಪನಿಗಳು ಸಹ ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುತ್ತಿವೆ. ಹೊಸ ಮಾದರಿಯ ಕಾರುಗಳಲ್ಲಿ 'ಅಲ್ಟ್ರಾ ವೈಡ್ ಬ್ಯಾಂಡ್' (UWB) ತಂತ್ರಜ್ಞಾನ ಬಳಸಲಾಗುತ್ತಿದೆ, ಇದು ಕೀಲಿ ಎಷ್ಟು ದೂರದಲ್ಲಿದೆ ಎಂಬುದನ್ನು ನಿಖರವಾಗಿ ಪತ್ತೆಹಚ್ಚುತ್ತದೆ. ಕೆಲವು ಸ್ಮಾರ್ಟ್ ಕೀಗಳಲ್ಲಿ ಮೋಷನ್ ಸೆನ್ಸರ್‌ಗಳಿದ್ದು, ನೀವು ಕೀಯನ್ನು ಅಲುಗಾಡಿಸದೆ ಓರೆಗಿಟ್ಟರೆ ಅದು ಸಿಗ್ನಲ್ ಕಳುಹಿಸುವುದನ್ನು ನಿಲ್ಲಿಸುತ್ತದೆ.

ತಂತ್ರಜ್ಞಾನ ಬೆಳೆದಂತೆ ಸುರಕ್ಷತೆಯ ಬಗ್ಗೆ ನಮ್ಮ ಜಾಗೃತಿಯೂ ಹೆಚ್ಚಾಗಬೇಕು. ಒಂದು ಸಣ್ಣ ಅಲ್ಯೂಮಿನಿಯಂ ಫಾಯಿಲ್ ಅಥವಾ ಕೀಯನ್ನು ಸುರಕ್ಷಿತ ಜಾಗದಲ್ಲಿಡುವ ಸಣ್ಣ ಬದಲಾವಣೆ ನಿಮ್ಮ ಲಕ್ಷಾಂತರ ರೂಪಾಯಿ ಮೌಲ್ಯದ ಕಾರನ್ನು ಕಳ್ಳರ ಪಾಲಾಗದಂತೆ ತಡೆಯಬಲ್ಲದು,(ಏಜೆನ್ಸೀಸ್​).