ಅಳುವಾಗ ಕಣ್ಣಿನಿಂದ ನೀರು ಏಕೆ ಬರುತ್ತದೆ, ಅದರ ಹಿಂದಿನ ವಿಜ್ಞಾನವೇನು? ಆಸಕ್ತಿದಾಯಕ ಮಾಹಿತಿ ಇಲ್ಲಿದೆ.. | Eyes Water

ಮಾನವನ ಸಹಜ ಪ್ರಕ್ರಿಯೆಗಳಲ್ಲಿ 'ಅಳು' ಕೂಡ ಒಂದು. ಅತಿಯಾದ ದುಃಖ ಅಥವಾ ಸಂತೋಷವಾದಾಗ ಕಣ್ಣುಗಳು ತೇವವಾಗುತ್ತವೆ. ಕಣ್ಣೀರು ಕೇವಲ ನೀರಲ್ಲ; ಅದು ನಮ್ಮ ಕಣ್ಣುಗಳನ್ನು ರಕ್ಷಿಸುವ, ಸ್ವಚ್ಛಗೊಳಿಸುವ ಮತ್ತು ನಮ್ಮ ಭಾವನೆಗಳನ್ನು ಹೊರಹಾಕುವ ಒಂದು ಸಂಕೀರ್ಣ ವ್ಯವಸ್ಥೆಯಾಗಿದೆ. ವಿಜ್ಞಾನದ ದೃಷ್ಟಿಯಲ್ಲಿ ಕಣ್ಣೀರು ಹಾಕುವುದರಲ್ಲಿ ಮೂರು ಪ್ರಮುಖ ವಿಧಗಳಿವೆ.

ನಮ್ಮ ಕಣ್ಣಿನ ಮೇಲ್ಭಾಗದ ಹೊರಮೂಲೆಯಲ್ಲಿ ಲ್ಯಾಕ್ರಿಮಲ್ ಗ್ಲ್ಯಾಂಡ್ಸ್ (Lacrimal Glands) ಅಥವಾ ಅಶ್ರು ಗ್ರಂಥಿಗಳಿವೆ. ನಾವು ಕಣ್ಣು ಮಿಟುಕಿಸಿದಾಗಲೆಲ್ಲಾ ಈ ಗ್ರಂಥಿಗಳು ದ್ರವವನ್ನು ಬಿಡುಗಡೆ ಮಾಡುತ್ತವೆ. ಇದು ಕಣ್ಣಿನ ಮೇಲ್ಮೈಯನ್ನು ತೇವವಾಗಿರಿಸುತ್ತದೆ.

ಬಾಸಲ್ ಟಿಯರ್ಸ್ (Basal Tears): ಇವು ಸದಾ ಕಣ್ಣಿನಲ್ಲಿರುತ್ತವೆ. ಕಣ್ಣಿನ ಗುಡ್ಡೆ ಒಣಗದಂತೆ ತಡೆಯಲು ಮತ್ತು ಧೂಳಿನಿಂದ ರಕ್ಷಿಸಲು ಇವು ಹಗಲಿಡೀ ಸ್ರವಿಸುತ್ತಿರುತ್ತವೆ.

ರಿಫ್ಲೆಕ್ಸ್ ಟಿಯರ್ಸ್ (Reflex Tears): ಕಣ್ಣಿಗೆ ಈರುಳ್ಳಿ ಘಾಟು ತಗುಲಿದಾಗ, ಹೊಗೆ ಅಥವಾ ಧೂಳು ಬಿದ್ದಾಗ ಬರುವ ಕಣ್ಣೀರು ಇದು. ಕಣ್ಣಿಗೆ ತೊಂದರೆ ನೀಡುವ ಹೊರಗಿನ ಅಂಶಗಳನ್ನು ತೊಳೆದು ಹಾಕಲು ಮೆದುಳು ಈ ಆದೇಶ ನೀಡುತ್ತದೆ.

ಎಮೋಷನಲ್ ಟಿಯರ್ಸ್ (Emotional Tears): ಅತಿಯಾದ ಭಾವನೆಗಳಾದಾಗ (ದುಃಖ, ಕೋಪ, ಸಂತೋಷ) ಬರುವ ಕಣ್ಣೀರು. ಸಂಶೋಧನೆಯ ಪ್ರಕಾರ, ಈ ಕಣ್ಣೀರಿನಲ್ಲಿ ಪ್ರೋಟೀನ್ ಆಧಾರಿತ ಹಾರ್ಮೋನುಗಳು ಮತ್ತು ಮ್ಯಾಂಗನೀಸ್ ಅಂಶ ಹೆಚ್ಚಿರುತ್ತದೆ, ಇದು ಮನಸ್ಸಿನ ಒತ್ತಡವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ನಾವು ಜೋರಾಗಿ ಅತ್ತಾಗ ಕಣ್ಣೀರು ಕಣ್ಣಿನಿಂದ ಹೊರಚೆಲ್ಲುವುದು ಮಾತ್ರವಲ್ಲದೆ, ಕಣ್ಣಿನ ಮೂಲೆಯಲ್ಲಿರುವ ಸಣ್ಣ ರಂಧ್ರಗಳ (Puncta) ಮೂಲಕ ಮೂಗಿನ ಹಾದಿಯನ್ನು ಸೇರುತ್ತದೆ. ಅಲ್ಲಿ ಕಣ್ಣೀರು ಮೂಗಿನ ಲೋಳೆಯೊಂದಿಗೆ ಬೆರೆತು ನೀರಾಗಿ ಹೊರಬರುತ್ತದೆ. ಇದಕ್ಕೇ ನಾವು "ಅಳುವಾಗ ಮೂಗು ಸೋರುತ್ತದೆ" ಎನ್ನುತ್ತೇವೆ.

ವಿಜ್ಞಾನಿಗಳ ಪ್ರಕಾರ, ಅಳುವುದು ಒಂದು ರೀತಿಯಲ್ಲಿ ದೇಹದ 'ಸೇಫ್ಟಿ ವಾಲ್ವ್' ಇದ್ದಂತೆ. ಅತ್ತ ನಂತರ ದೇಹದಲ್ಲಿ ಎಂಡಾರ್ಫಿನ್ ಮತ್ತು ಆಕ್ಸಿಟೋಸಿನ್ ಎಂಬ 'ಫೀಲ್ ಗುಡ್' ರಾಸಾಯನಿಕಗಳು ಬಿಡುಗಡೆಯಾಗುತ್ತವೆ, ಇದರಿಂದ ಮನಸ್ಸು ಹಗುರಾಗುತ್ತದೆ ಮತ್ತು ನೋವು ಕಡಿಮೆಯಾದ ಅನುಭವವಾಗುತ್ತದೆ.

ಕಣ್ಣೀರಿನಲ್ಲಿ ಲೈಸೋಜೈಮ್ (Lysozyme) ಎಂಬ ಕಿಣ್ವವಿರುತ್ತದೆ, ಇದು ಕಣ್ಣಿನಲ್ಲಿರುವ ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವ ಶಕ್ತಿ ಹೊಂದಿದೆ,(ಏಜೆನ್ಸೀಸ್​).