11 ಮಕ್ಕಳ ಕನಸು ಕಂಡಿದ್ದ ನಟಿ ಈಗ ‘ಮಕ್ಕಳೇ ಬೇಡ’ ಎಂದಿದ್ದೇಕೆ? ಅನುಪಮಾ ನೋವಿನ ಮಾತು | Anupama's painful words

Anupama Parameswaran: ನಟಿ ಅನುಪಮಾ ಪರಮೇಶ್ವರನ್ ತಮ್ಮ ಹಳೆಯ ಸಂಬಂಧದ ಬಗ್ಗೆ ಇದೇ ಮೊದಲ ಬಾರಿಗೆ ಮೌನ ಮುರಿದಿದ್ದು, ಹಲವು ಸೂಕ್ಷ್ಮ ವಿಚಾರಗಳನ್ನು ಮುಕ್ತವಾಗಿ ಹಂಚಿಕೊಂಡಿದ್ದಾರೆ. ಸುಮಾರು ಎರಡು ವರ್ಷಗಳ ಕಾಲ ರಿಲೇಶನ್‌ಶಿಪ್​ನಲ್ಲಿದ್ದ ನಟಿ, ತಾವು ಅನುಭವಿಸಿದ ನೋವಿನ ಬಗ್ಗೆ ಹೇಳಿದ್ದಾರೆ. ಆದರೆ ಅನುಪಮಾ ಎಲ್ಲಿಯೂ ಮಾಜಿ ಸಂಗಾತಿಯ ಹೆಸರನ್ನು ಹೇಳಿಲ್ಲ.

ಇತ್ತೀಚಿನ ಮಾತಾಡಿದ್ದ ಅನುಪಮಾ, ಪೀರಿಯಡ್ ಶೇಮಿಂಗ್‌ ಸೇರಿದಂತೆ ಹೆಣ್ಣಾಗಿ ತಾವು ಎದುರಿಸಿದ ಅವಮಾನಕಾರಿ ಅನುಭವಗಳ ಕಥೆ ಬಿಚ್ಚಿಟ್ಟಿದ್ದಾರೆ. ತಮ್ಮ ಫೀಲಿಂಗ್ಸ್​ಗಳನ್ನು ಪದೇಪದೇ ಕಡೆಗಣಿಸಲಾಗುತ್ತಿತ್ತು. ಮಾಜಿ ಪ್ರೀಯಕರ ತನ್ನ ಭಾವನೆಗಳಿಗೆ ಬೆಲೆ ಕೊಡುತ್ತಿರಲ್ಲಿಲ್ಲ ಎಂಬರ್ಥದಲ್ಲಿ ನೋವು ತೋಡಿಕೊಂಡಿದ್ದಾರೆ.

ಇನ್ನು, ತಾಯ್ತನದ ಬಗ್ಗೆಯೂ ಅನುಪಮಾ ತಮ್ಮ ಮನದ ಮಾತು ಹಂಚಿಕೊಂಡಿದ್ದಾರೆ. ಒಂದು ಕಾಲದಲ್ಲಿ ದೊಡ್ಡ ಕುಟುಂಬ ಇರಬೇಕು, 11 ಮಕ್ಕಳ ತಾಯಿ ಆಗಬೇಕು ಎಂಬ ಕನಸು ಕಂಡಿದ್ದೆ, ಆದರೆ ‘ನನಗೆ ಅನುಭವಗಳಿಂದ ಮಕ್ಕಳನ್ನು ಮಾಡಿಕೊಳ್ಳುವ ಆಸೆ ಇಲ್ಲ’ ಎಂದಿದ್ದಾರೆ. ‘ನನಗೆ 11 ಮಕ್ಕಳಾಗಬೇಕು ಎಂದು ಕನಸು ಕಾಣುತ್ತಿದ್ದೆ. ಆದರೆ ಈಗ ಮಕ್ಕಳೇ ಬೇಡ ಅನ್ನಿಸುತ್ತಿದೆ. ಹೆಣ್ಣಾಗಿ ಹುಟ್ಟಿದ್ದಕ್ಕೆ ನನಗೆ ತುಂಬಾ ಬೇಸರವಾಗಿತ್ತು. ನನ್ನ ಸಾಧನೆಗಳ ಬಗ್ಗೆಯೂ ಬೇಜಾರಾಗಿತ್ತು’ ಎಂದು ಅನುಪಮಾ ಹೇಳಿದ್ದಾರೆ.

ತೆಲುಗು ಸಿನಿಮಾ ‘ಪರದಾ’ ಚಿತ್ರದ ಪ್ರಚಾರದ ವೇಳೆ ನಡೆದ ಸುದ್ದಿಗೋಷ್ಠಿಯಲ್ಲೂ ಅನುಪಮಾ ಭಾವುಕರಾಗಿದರು. ತಮ್ಮ ಅನುಭವಗಳ ಬಗ್ಗೆ ಮಾತಾಡುತ್ತಾ, ತಮ್ಮನ್ನು ಬೆಂಬಲಿಸಬೇಕಿದ್ದ ವ್ಯಕ್ತಿಯಿಂದಲೇ ಅವಮಾನ ಎದುರಿಸಬೇಕಾಯಿತು ಎಂದು ಅವರು ಬೇಸರಗೊಂಡರು. ಸ್ಟೇಜ್​ ಮೇಲೆ ಹೋಗುವ ಮೊದಲೇ ತನ್ನ ಬಾಯ್‌ಫ್ರೆಂಡ್ ತನ್ನನ್ನು ಅವಮಾನಿಸುತ್ತಿದ್ದ. ತನ್ನನ್ನು ಕಾಪಾಡಬೇಕಿದ್ದ ವ್ಯಕ್ತಿಯೇ ತನ್ನನ್ನು ಮಾನಸಿಕವಾಗಿ ಕುಗ್ಗಿಸುತ್ತಿದ್ದ ಎಂದು ಅನುಪಮಾ ನೋವು ತೋಡಿಕೊಂಡಿದ್ದರು.

ಇದೇ ವೇಳೆ ಅನುಪಮಾ ಪರಮೇಶ್ವರನ್ ಮತ್ತು ನಟ ಧ್ರುವ ವಿಕ್ರಮ್ ಡೇಟಿಂಗ್ ಮಾಡುತ್ತಿದ್ದಾರೆ ಎಂಬ ವದಂತಿಗಳು ಕಳೆದ ವರ್ಷ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದವು. ಇಬ್ಬರೂ ‘ಬೈಸನ್ ಕಾಲಮಾಡನ್’ ಸಿನಿಮಾದಲ್ಲಿ ಒಟ್ಟಿಗೆ ಕೆಲಸ ಮಾಡಿದ ಬಳಿಕ ಈ ಗಾಸಿಪ್ ಜೋರಾಗಿತ್ತು. ಬಳಿಕ ಇಬ್ಬರೂ ಕಿಸ್ ಮಾಡುತ್ತಿರುವಂತೆ ಕಂಡ ಫೋಟೋವೊಂದು ಕಾಣಿಸಿಕೊಂಡ ನಂತರ ವದಂತಿಗಳಿಗೆ ಇಂಬು ಸಿಕ್ಕಿತ್ತು. ಅವಾರ್ಡ್ ಕಾರ್ಯಕ್ರಮಗಳಲ್ಲಿ ಇಬ್ಬರೂ ಒಟ್ಟಿಗೆ ಕಾಣಿಸಿಕೊಂಡಿದ್ದೂ ಚರ್ಚೆಗೆ ಕಾರಣವಾಗಿತ್ತು.

ಆದರೆ, ಅನುಪಮಾ ಅಥವಾ ಧ್ರುವ ವಿಕ್ರಮ್ ಇಬ್ಬರೂ ತಮ್ಮ ಸಂಬಂಧದ ಬಗ್ಗೆ ಅಧಿಕೃತವಾಗಿ ಯಾವುದೇ ಹೇಳಿಕೆ ನೀಡಿಲ್ಲ. ಅನುಪಮಾ ಇತ್ತೀಚೆಗೆ ಮಾತನಾಡುತ್ತಿರುವ ಮಾಜಿ ಸಂಗಾತಿ ಯಾರು ಎಂಬುದನ್ನೂ ಅವರು ಬಹಿರಂಗಪಡಿಸಿಲ್ಲ,(ಏಜೆನ್ಸೀಸ್​).