ಮನೆಯ ಗೋಡೆಗಳಲ್ಲಿ ನೇತಾಡುವ ದಪ್ಪ ಕಣ್ಣಿನ ಈ ನಿಗೂಢ ಮಹಿಳೆ ಯಾರು? ಉತ್ತರ ಹುಡುಕಿದ ನೆಟ್ಟಿಗರು! Big Eyed Mystery Woman

Big Eyed Mystery Woman : ನೀವು ಬೆಂಗಳೂರಿನಲ್ಲಿ ಒಂದು ಸುತ್ತು ಹಾಕಿದರೆ ಈ ಮೇಲೆ ಕಾಣುತ್ತಿರುವ ಫೋಟೋ ಹೆಚ್ಚಾಗಿ ನಿಮಗೆ ಕಣ್ಣಿಗೆ ಬೀಳುತ್ತದೆ. ಕೇವಲ ಬೆಂಗಳೂರು ಮಾತ್ರವಲ್ಲ, ಕರ್ನಾಟಕದ ಯಾವುದೇ ಪ್ರದೇಶಕ್ಕೆ ಹೋದರೂ ಹೊಸದಾಗಿ ನಿರ್ಮಾಣ ಮಾಡುತ್ತಿರುವ ಕಟ್ಟಡಗಳಾಗಲಿ, ಹೋಟೆಲ್​, ದಿನಸಿ ಅಂಗಡಿಗಳು ಸೇರಿದಂತೆ ಇನ್ನಿತರ ಯಾವುದೇ ಕಟ್ಟಡಗಳಲ್ಲಿ ಈ ಮಹಿಳೆಯ ಫೋಟೋ ರಾರಾಜಿಸುತ್ತಿರುತ್ತದೆ. ಅದರಲ್ಲೂ ಹೊಸದಾಗಿ ನಿರ್ಮಾಣವಾಗುವ ಕಟ್ಟಡಗಳಲ್ಲಿ ಈ ಫೋಟೋ ಇದ್ದೇ ಇರುತ್ತದೆ. ಈ ಫೋಟೋ ನೋಡಿದ ಕೂಡಲೇ ಎಲ್ಲರ ದೃಷ್ಟಿ ಅದರತ್ತ ಹೋಗುತ್ತದೆ.

ಜನರು ದೃಷ್ಟಿಗೊಂಬೆಯಾಗಿ ಈ ಫೋಟೋವನ್ನು ವ್ಯಾಪಕವಾಗಿ ಬಳಸುತ್ತಿದ್ದಾರೆ. ಹಣೆಯಲ್ಲಿ ಹಾಗೂ ಮುಂದಲೆಯಲ್ಲಿ ಕುಂಕುಮ ಇಟ್ಟುಕೊಂಡಿರುವ ಹಾಗೂ ಭಾರತೀಯಳಂತೆ ಕಾಣುವ ಈ ಮಹಿಳೆಯ ಕಣ್ಣುಗಳೇ ಇಡೀ ಫೋಟೋದ ಕೇಂದ್ರ ಬಿಂದು. ಯಾರನ್ನೋ ಹೆದರಿಸುತ್ತಿರುವಂತೆ ಕೋಪದಿಂದ, ದೊಡ್ಡದಾಗಿ ಬಿಟ್ಟಿರುವ ಕಣ್ಣುಗಳನ್ನು ಚಿಕ್ಕ ಮಕ್ಕಳೇನಾದರೂ ನೋಡಿದರೆ ಹೆದರುವುದು ಗ್ಯಾರಂಟಿ. ಅಂದಹಾಗೆ, ದೃಷ್ಟಿ ನಿವಾರಣೆಗಾಗಿ ಈ ಫೋಟೋವನ್ನು ವ್ಯಾಪಕವಾಗಿ ಬಳಸಲಾಗುತ್ತಿದೆ. ನಿರ್ಮಿಸುತ್ತಿರುವ ಹಾಗೂ ಹೊಸದಾಗಿ ನಿರ್ಮಾಣವಾದ ಕಟ್ಟಡ ಮತ್ತು ಜನರ ಕಣ್ಣುಕುಕ್ಕವ ಯಾವುದೇ ವಸ್ತುಗಳ ಮೇಲೆ ಜನರ ಕೆಟ್ಟ ದೃಷ್ಟಿ ಬೀಳದಿರಲಿ ಎಂಬ ಉದ್ದೇಶದಿಂದ ಈ ಫೋಟೋವನ್ನು ಅಳವಡಿಸಲಾಗುತ್ತದೆ. ಈ ಫೋಟೋ ನೋಡಿದರೆ ಸಾಕು ಎಲ್ಲರ ದೃಷ್ಟಿ ಮೊದಲು ಫೋಟೋ ಕಡೆ ಹೋಗುತ್ತದೆ. ಇದರಿಂದ ಜನರ ಕೆಟ್ಟ ದೃಷ್ಟಿ ಬೀಳುವುದಿಲ್ಲ ಎಂಬ ನಂಬಿಕೆ ಇದೆ.

ಈ ಫೋಟೋಗಳನ್ನು ನೋಡಿದವರಿಗೆ ಆ ಮಹಿಳೆ ಯಾರು ಅನ್ನೋ ಪ್ರಶ್ನೆ ಮೂಡದೇ ಇರುವುದಿಲ್ಲ. ಅದೇ ರೀತಿ ಬೆಂಗಳೂರಿನಲ್ಲಿ ವಾಸಿಸುತ್ತಿರುವ ಮಹಾರಾಷ್ಟ್ರ ಮೂಲದ ಮಹಿಳೆಯೊಬ್ಬರಿಗೂ ಈ ಪ್ರಶ್ನೆ ಮೂಡಿದೆ. ಉತ್ತರ ತಿಳಿದುಕೊಳ್ಳುವ ಕುತೂಹಲದಿಂದ @unitechy ಹೆಸರಿನ ತಮ್ಮ ಎಕ್ಸ್​ ಖಾತೆಯ ಮೂಲಕ ವೈರಲ್​ ಫೋಟೋ ಶೇರ್​ ಮಾಡಿ ಈಕೆ ಯಾರು ಎಂದು ಪ್ರಶ್ನಿಸಿದ್ದಾರೆ. ಬೆಂಗಳೂರಿನ ಹೊರ ಭಾಗದಲ್ಲಿ ನಿರ್ಮಾಣ ಕಾರ್ಯ ನಡೆಯುತ್ತಿರುವ ಪ್ರತಿ ಕಟ್ಟಡದಲ್ಲೂ ನಾನು ಈ ಮಹಿಳೆಯನ್ನು ಕಂಡಿದ್ದೇನೆ. ಈಕೆ ಯಾರೆಂದು ತಿಳಿಯಲು ನಾನು ಗೂಗಲ್ ಲೆನ್ಸ್‌ನಲ್ಲೂ ಸಹ ಹುಡುಕಿದೆ. ಆದರೆ, ಆಕೆಯ ಬಗ್ಗೆ ಯಾವುದೇ ವಿವರಗಳು ಸಿಗಲಿಲ್ಲ. ಈಕೆ ಯಾರು ನಿಮಗೆ ಗೊತ್ತಾ? ಎಂದು ಪ್ರಶ್ನೆ ಮಾಡಿದ್ದಾರೆ.

ನೆಟ್ಟಿಗರೊಬ್ಬರು ಇದು ನಿರ್ಮಾಣಕ್ಕಾಗಿ ಇಡಲಾಗಿರುವ ನಜರ್‌ಬಟ್ಟು (ನಕಾರಾತ್ಮಕ ಶಕ್ತಿಗಳನ್ನು ದೂರವಿಡಲು ದುಷ್ಟ ಕಣ್ಣಿಗೆ ಸಮಾನವಾದದ್ದು) ಎಂದಿದ್ದಾರೆ.