ವಕೀಲ ವೃತ್ತಿಯಿಂದ 5ನೇ ಬಾರಿ ಮುಖ್ಯಮಂತ್ರಿ ಗದ್ದುಗೆಗೆ: ಸ್ಕೂಟರ್ ಮೇಲೆ ಬರುವ ಸಿಎಂ ರಂಗಸ್ವಾಮಿ ರಾಜಕೀಯ ಕಥೆ ಇಲ್ಲಿದೆ.. | N Rangaswamy

ರಂಗಸ್ವಾಮಿ ಅವರು 1950ರ ಆಗಸ್ಟ್ 4ರಂದು ಪುದುಚೇರಿಯಲ್ಲಿ ಜನಿಸಿದರು. ಇವರ ಪೂರ್ಣ ಹೆಸರು ನಟೇಶನ್ ಕೃಷ್ಣಸಾಮಿ ಗೌಂಡರ್ ರಂಗಸ್ವಾಮಿ. ಅತ್ಯಂತ ಸಾಮಾನ್ಯ ಕುಟುಂಬದಿಂದ ಬಂದ ಇವರು, ಟ್ಯಾಗೋರ್ ಕಲಾ ಕಾಲೇಜಿನಲ್ಲಿ ಬಿ.ಕಾಂ ಪದವಿ ಪಡೆದರು. ನಂತರ ಅಂಬೇಡ್ಕರ್ ಸರ್ಕಾರಿ ಕಾನೂನು ಕಾಲೇಜಿನಿಂದ ಎಲ್.ಎಲ್.ಬಿ ಪದವಿ ಮುಗಿಸಿ ವಕೀಲರಾಗಿ ವೃತ್ತಿ ಆರಂಭಿಸಿದರು.

ಆದರೆ, ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ, ಸರಳತೆಗೆ ಹೆಸರಾಗಿದ್ದ ಕೆ. ಕಾಮರಾಜ್ ಅವರ ತತ್ವಗಳಿಗೆ ಮಾರುಹೋದ ರಂಗಸ್ವಾಮಿ, ವಕೀಲ ವೃತ್ತಿ ಬಿಟ್ಟು ಪೂರ್ಣ ಪ್ರಮಾಣದಲ್ಲಿ ಸಾರ್ವಜನಿಕ ಸೇವೆಗೆ ಅಂದರೆ ರಾಜಕೀಯಕ್ಕೆ ಧುಮುಕಿದರು.

ರಂಗಸ್ವಾಮಿ ಅವರ ಚುನಾವಣಾ ರಾಜಕೀಯದ ಆರಂಭ ಸುಲಭವಾಗಿರಲಿಲ್ಲ. 1990ರಲ್ಲಿ ತಟ್ಟಂಚಾವಡಿ ಕ್ಷೇತ್ರದಿಂದ ಸ್ಪರ್ಧಿಸಿ ಮೊದಲ ಬಾರಿಗೆ ಸೋಲು ಅನುಭವಿಸಿದರು. ಆದರೆ ದೃತಿಗೆಡದ ಅವರು, ಸರಿಯಾಗಿ ಒಂದು ವರ್ಷದ ನಂತರ ಅಂದರೆ 1991ರಲ್ಲಿ ಮತ್ತೆ ಅದೇ ಕ್ಷೇತ್ರದಿಂದ ಸ್ಪರ್ಧಿಸಿ ಮೊದಲ ಬಾರಿಗೆ ವಿಧಾನಸಭೆ ಪ್ರವೇಶಿಸಿದರು.

ಅಲ್ಲಿಂದ ಮುಂದೆ ಅವರು ಕೃಷಿ, ಪ್ರವಾಸೋದ್ಯಮ, ಶಿಕ್ಷಣ ಮತ್ತು ಲೋಕೋಪಯೋಗಿ ಇಲಾಖೆಗಳಂತಹ ಪ್ರಮುಖ ಖಾತೆಗಳನ್ನು ನಿಭಾಯಿಸಿ ಆಡಳಿತದಲ್ಲಿ ಪಳಗಿದರು. ಈ ಅನುಭವವೇ ಅವರಿಗೆ 2001ರಲ್ಲಿ ಮೊದಲ ಬಾರಿಗೆ ಮುಖ್ಯಮಂತ್ರಿ ಪಟ್ಟ ತಂದುಕೊಟ್ಟಿತು.

ಕಾಂಗ್ರೆಸ್ ಪಕ್ಷದ ಮೂಲಕವೇ ಎರಡು ಬಾರಿ ಮುಖ್ಯಮಂತ್ರಿಯಾಗಿದ್ದ ರಂಗಸ್ವಾಮಿ ಅವರಿಗೆ 2008ರಲ್ಲಿ ದೊಡ್ಡ ಆಘಾತ ಕಾಯುತ್ತಿತ್ತು. ಪಕ್ಷದೊಳಗಿನ ಆಂತರಿಕ ಕಲಹದಿಂದಾಗಿ ಅವರು ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕಾಯಿತು. ಇದು ಅವರಿಗೆ ರಾಜಕೀಯವಾಗಿ ಮಾಡಲಾದ ಅವಮಾನವಾಗಿತ್ತು.

ಈ ಅವಮಾನವನ್ನೇ ಸವಾಲಾಗಿ ಸ್ವೀಕರಿಸಿದ ಅವರು, 2011ರಲ್ಲಿ ಕಾಂಗ್ರೆಸ್ ತೊರೆದು ಕೇವಲ ಮೂರು ತಿಂಗಳ ಅವಧಿಯಲ್ಲಿ 'ಆಲ್ ಇಂಡಿಯಾ ಎನ್.ಆರ್. ಕಾಂಗ್ರೆಸ್' (AINRC) ಎಂಬ ಹೊಸ ಪಕ್ಷವನ್ನು ಕಟ್ಟಿ ಇತಿಹಾಸ ನಿರ್ಮಿಸಿದರು. ಅದೇ ವರ್ಷ ನಡೆದ ಚುನಾವಣೆಯಲ್ಲಿ ಜಯಭೇರಿ ಬಾರಿಸಿ, ಪಕ್ಷ ಕಟ್ಟಿದ 3 ತಿಂಗಳಲ್ಲೇ ಮತ್ತೆ ಮುಖ್ಯಮಂತ್ರಿಯಾಗಿ ಅಧಿಕಾರ ಹಿಡಿದದ್ದು ಭಾರತೀಯ ರಾಜಕೀಯದ ದೊಡ್ಡ ಅಚ್ಚರಿಗಳಲ್ಲಿ ಒಂದು.

ರಂಗಸ್ವಾಮಿ ಅವರ ಬಗ್ಗೆ ಹೇಳಲೇಬೇಕಾದ ಪ್ರಮುಖ ವಿಷಯವೆಂದರೆ ಅವರ ಸರಳತೆ. ಮುಖ್ಯಮಂತ್ರಿಯಾಗಿದ್ದರೂ ಅವರು ಇಂದಿಗೂ ಸಾಮಾನ್ಯರಂತೆ ಬದುಕುತ್ತಾರೆ. ಅವರು ಅವಿವಾಹಿತರಾಗಿದ್ದು, ಭಾರಿ ಭದ್ರತೆಯಿಲ್ಲದೆ ದ್ವಿಚಕ್ರ ವಾಹನದಲ್ಲಿ ಸಂಚರಿಸುವುದನ್ನು ಇಂದಿಗೂ ಪುದುಚೇರಿಯ ಜನ ಕಾಣಬಹುದು. ಇದೇ ಕಾರಣಕ್ಕೆ ಅವರನ್ನು ಜನರು ಪ್ರೀತಿಯಿಂದ 'ಮಕ್ಕಳ್ ಮುದಲ್ವರ್' (ಜನರ ಮುಖ್ಯಮಂತ್ರಿ) ಎಂದು ಕರೆಯುತ್ತಾರೆ.

2021ರ ಚುನಾವಣೆಯಲ್ಲಿ ಎನ್.ಆರ್. ಕಾಂಗ್ರೆಸ್ ಪಕ್ಷವು ಬಿಜೆಪಿ ಮತ್ತು ಎಐಎಡಿಎಂಕೆ ಜೊತೆ ಮೈತ್ರಿ ಮಾಡಿಕೊಂಡು ಜಯ ಸಾಧಿಸಿತು. ಇದರೊಂದಿಗೆ ರಂಗಸ್ವಾಮಿ ಅವರು ನಾಲ್ಕನೇ ಬಾರಿಗೆ ಪುದುಚೇರಿಯ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದರು. ಆ ಮೂಲಕ ಕೇಂದ್ರಾಡಳಿತ ಪ್ರದೇಶದ ರಾಜಕೀಯದಲ್ಲಿ ಅಜೇಯ ನಾಯಕರಾಗಿ ಹೊರಹೊಮ್ಮಿದರು. ಇದೀಗ ಮತ್ತೊಮ್ಮೆ 2026ನೇ ಸಾಲಿನ ವಿಧಾನಸಭಾ ಚುನಾವಣೆಯಲ್ಲಿ ಎನ್​ಡಿಎ ಪಕ್ಷ ಗೆಲುವು ಸಾಧಿಸಿದ್ದು, ಅವರೇ ಮುಖ್ಯಮಂತ್ರಿಯಾಗುವ ಸಾಧ್ಯತೆ ದಟ್ಟವಾಗಿದೆ.

ಎನ್. ರಂಗಸ್ವಾಮಿ ಅವರ ಜೀವನವು ತಾಳ್ಮೆ ಮತ್ತು ಹಠವಿದ್ದರೆ ಶೂನ್ಯದಿಂದ ಸಾಮ್ರಾಜ್ಯ ಕಟ್ಟಬಹುದು ಎಂಬುದಕ್ಕೆ ಸಾಕ್ಷಿಯಾಗಿದೆ. ಪ್ರಾದೇಶಿಕ ಅಸ್ಮಿತೆಯನ್ನು ಉಳಿಸಿಕೊಂಡು, ಜನರೊಂದಿಗೆ ನೇರ ಸಂಪರ್ಕವಿಟ್ಟುಕೊಳ್ಳುವ ಅವರ ಶೈಲಿ ಇಂದಿನ ಯುವ ರಾಜಕಾರಣಿಗಳಿಗೆ ಒಂದು ಪಾಠವಾಗಿದೆ,(ಏಜೆನ್ಸೀಸ್​).