ವ್ಯಕ್ತಿಯೊಬ್ಬರು ಮರಣ ಹೊಂದಿದ ನಂತರ ಅವರ ಹೆಸರಿನಲ್ಲಿರುವ ಜಮೀನು, ಮನೆ ಅಥವಾ ಬ್ಯಾಂಕ್ ಖಾತೆಯಲ್ಲಿರುವ ಹಣ ಯಾರಿಗೆ ಸೇರಬೇಕು ಎಂಬ ಬಗ್ಗೆ ಸ್ಪಷ್ಟವಾದ ಕಾನೂನುಗಳು ನಮ್ಮಲ್ಲಿವೆ. ಆದರೆ, ಆ ವ್ಯಕ್ತಿ ಬಳಸುತ್ತಿದ್ದ ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಇಮೇಲ್ ಖಾತೆಗಳು ಅಥವಾ ಅವರ ಡಿಜಿಟಲ್ ವಾಲೆಟ್‌ನಲ್ಲಿರುವ ಕ್ರಿಪ್ಟೋಕರೆನ್ಸಿಗಳ ಕಥೆಯೇನು? ಈ ಪ್ರಶ್ನೆಗೆ ಉತ್ತರವಾಗಿ ಭಾರತ ಸರ್ಕಾರವು ಈಗ 'ಡಿಜಿಟಲ್ ಲೀಗಲ್ ಹೇರ್' (Digital Legal Heir) ಅಥವಾ ಡಿಜಿಟಲ್ ಉತ್ತರಾಧಿಕಾರ ನಿಯಮಗಳನ್ನು ರೂಪಿಸಲು ಮುಂದಾಗಿದೆ.

ಭೌತಿಕವಾಗಿ ಕಾಣಿಸದಿದ್ದರೂ ಮೌಲ್ಯ ಹೊಂದಿರುವ ಆನ್‌ಲೈನ್ ದಾಖಲೆಗಳನ್ನು ಡಿಜಿಟಲ್ ಆಸ್ತಿ ಎನ್ನಲಾಗುತ್ತದೆ. ಇದರಲ್ಲಿ ಪ್ರಮುಖವಾಗಿ, ಸೋಶಿಯಲ್ ಮೀಡಿಯಾ ಖಾತೆಗಳು: ಫೇಸ್‌ಬುಕ್, ಎಕ್ಸ್ (ಟ್ವಿಟರ್), ಇನ್‌ಸ್ಟಾಗ್ರಾಮ್ ಇತ್ಯಾದಿ. ಹಣಕಾಸಿನ ಆಸ್ತಿ: ಕ್ರಿಪ್ಟೋಕರೆನ್ಸಿ, ಎನ್‌ಎಫ್‌ಟಿ (NFT), ಆನ್‌ಲೈನ್ ಗೇಮಿಂಗ್ ಪಾಯಿಂಟ್‌ಗಳು ಮತ್ತು ಡಿಜಿಟಲ್ ವಾಲೆಟ್‌ಗಳು. ಮಾಹಿತಿ ಸಂಗ್ರಹ: ಗೂಗಲ್ ಡ್ರೈವ್, ಐ-ಕ್ಲೌಡ್‌ನಲ್ಲಿರುವ ಫೋಟೋಗಳು, ವಿಡಿಯೋಗಳು ಮತ್ತು ಪ್ರಮುಖ ಇಮೇಲ್ ದಾಖಲೆಗಳು. ಯೂಟ್ಯೂಬ್ ಚಾನೆಲ್‌ಗಳು: ಆದಾಯ ತರುವಂತಹ ಯೂಟ್ಯೂಬ್ ಚಾನೆಲ್‌ಗಳು ಮತ್ತು ಬ್ಲಾಗ್‌ಗಳು.

ಈವರೆಗೆ ವ್ಯಕ್ತಿ ಮರಣ ಹೊಂದಿದಾಗ ಅವರ ಆನ್‌ಲೈನ್ ಖಾತೆಗಳನ್ನು ಪ್ರವೇಶಿಸಲು ಕುಟುಂಬ ಸದಸ್ಯರು ಹರಸಾಹಸ ಪಡಬೇಕಾಗುತ್ತಿತ್ತು. ಅನೇಕ ಕಂಪನಿಗಳು 'ಗೌಪ್ಯತೆಯ' (Privacy) ನೆಪವೊಡ್ಡಿ ಮೃತರ ಫೋಟೋ ಅಥವಾ ದಾಖಲೆಗಳನ್ನು ನೀಡಲು ನಿರಾಕರಿಸುತ್ತಿದ್ದವು. ಆದರೆ, ಹೊಸ ನಿಯಮದ ಪ್ರಕಾರ, ಪ್ರತಿಯೊಬ್ಬ ವ್ಯಕ್ತಿಯೂ ತನ್ನ ಡಿಜಿಟಲ್ ಆಸ್ತಿಗಳಿಗೆ ಒಬ್ಬ ಉತ್ತರಾಧಿಕಾರಿಯನ್ನು ನಾಮನಿರ್ದೇಶನ (Nominate) ಮಾಡಲು ಅವಕಾಶ ಸಿಗಲಿದೆ.

ಡಿಜಿಟಲ್ ವಿಲ್ (Digital Will): ಆಸ್ತಿಯನ್ನು ಹಂಚುವಂತೆ ಡಿಜಿಟಲ್ ಡೇಟಾವನ್ನು ಯಾರಿಗೆ ನೀಡಬೇಕು ಎಂದು ವ್ಯಕ್ತಿಯು ಬರೆದಿಡಬಹುದು. ಪ್ಲಾಟ್‌ಫಾರ್ಮ್‌ಗಳ ಹೊಣೆಗಾರಿಕೆ: ಗೂಗಲ್, ಮೆಟಾ (ಫೇಸ್‌ಬುಕ್) ನಂತಹ ಸಂಸ್ಥೆಗಳು ಬಳಕೆದಾರರಿಗೆ 'ನಾಮಿನಿ' ಸೇರಿಸುವ ಆಯ್ಕೆಯನ್ನು ಕಡ್ಡಾಯವಾಗಿ ನೀಡಬೇಕಾಗುತ್ತದೆ. ದತ್ತಾಂಶದ ಹಕ್ಕು: ಉತ್ತರಾಧಿಕಾರಿಯು ಮೃತರ ಖಾತೆಯನ್ನು ಮುಚ್ಚುವ (Delete) ಅಥವಾ ನೆನಪಿಗಾಗಿ (Memorialize) ಉಳಿಸಿಕೊಳ್ಳುವ ಹಕ್ಕನ್ನು ಹೊಂದಿರುತ್ತಾರೆ.ಹಣಕಾಸು ಸುರಕ್ಷತೆ: ಕ್ರಿಪ್ಟೋಕರೆನ್ಸಿಯಂತಹ ಹೂಡಿಕೆಗಳು ವಾರಸುದಾರರಿಲ್ಲದೆ ವ್ಯರ್ಥವಾಗುವುದನ್ನು ಈ ಕಾನೂನು ತಡೆಯಲಿದೆ.

ಈ ಕಾನೂನು ಜಾರಿಯಾಗುವಲ್ಲಿ ದೊಡ್ಡ ಸವಾಲೆಂದರೆ 'ಖಾಸಗಿತನ'. ಮೃತರ ಖಾಸಗಿ ಚಾಟ್‌ಗಳು ಅಥವಾ ಮಾಹಿತಿಯನ್ನು ಕುಟುಂಬಸ್ಥರಿಗೆ ನೀಡುವುದು ಸರಿಯೇ ಎಂಬ ಚರ್ಚೆ ನಡೆಯುತ್ತಿದೆ. ಹೀಗಾಗಿ, ಕೇವಲ ಹಣಕಾಸು ಅಥವಾ ನೆನಪಿನ ದಾಖಲೆಗಳಿಗೆ ಮಾತ್ರ ಪ್ರವೇಶ ನೀಡುವ ಬಗ್ಗೆ ಸರ್ಕಾರ ಗಂಭೀರವಾಗಿ ಚಿಂತಿಸುತ್ತಿದೆ.

ಕಾನೂನು ಸಂಪೂರ್ಣವಾಗಿ ಜಾರಿಯಾಗುವ ಮೊದಲೇ ನೀವು ನಿಮ್ಮ ಗೂಗಲ್ ಖಾತೆಯಲ್ಲಿ 'ಇನ್-ಆಕ್ಟಿವ್ ಅಕೌಂಟ್ ಮ್ಯಾನೇಜರ್' ಅಥವಾ ಫೇಸ್‌ಬುಕ್‌ನಲ್ಲಿ 'ಲೆಗಸಿ ಕಾಂಟ್ಯಾಕ್ಟ್' ಆಯ್ಕೆಗಳನ್ನು ಬಳಸಿ ನಿಮ್ಮ ನಂಬಿಕಸ್ಥರನ್ನು ನಾಮಿನಿ ಮಾಡುವುದು ಒಳಿತು,(ಏಜೆನ್ಸೀಸ್​).