ED ವಶಪಡಿಸಿಕೊಂಡ ಸಾವಿರಾರು ಕೋಟಿ ಹಣ ಎಲ್ಲಿ ಹೋಗುತ್ತದೆ? ಅದರ ಖಜಾನೆಯಲ್ಲಿ ಎಷ್ಟು ಹಣವಿದೆ!

ಇತ್ತೀಚಿನ ವರ್ಷಗಳಲ್ಲಿ ED ದಾಳಿಗಳ ಸಂಖ್ಯೆ ಹೆಚ್ಚಾಗಿದ್ದು, ವಶಪಡಿಸಿಕೊಂಡ ಹಣದ ಪ್ರಮಾಣವು ಸಾವಿರಾರು ಕೋಟಿಗಳನ್ನು ದಾಟಿದೆ. ಆದರೆ, ಈ ಭಾರಿ ಮೊತ್ತದ ಹಣವನ್ನು ED ಎಲ್ಲಿ ಇಡುತ್ತದೆ? ಈ ಹಣ ಸರ್ಕಾರಕ್ಕೆ ಸೇರುತ್ತದೆಯೇ ಎಂಬ ಪ್ರಶ್ನೆಗಳು ಪ್ರತಿಯೊಬ್ಬ ನಾಗರಿಕನಲ್ಲೂ ಮೂಡುವುದು ಸಹಜ.

ED ವಶಪಡಿಸಿಕೊಂಡ ಹಣವು ತಕ್ಷಣವೇ ಸರ್ಕಾರದ ಖಜಾನೆಗೆ ಸೇರುವುದಿಲ್ಲ. ಇದು ಸುದೀರ್ಘ ಕಾನೂನು ಪ್ರಕ್ರಿಯೆಗೆ ಒಳಪಡುತ್ತದೆ. ಹೌದು, ವಶಪಡಿಸಿಕೊಂಡ ನಗದನ್ನು ED ತಕ್ಷಣವೇ ತನ್ನ ಕಚೇರಿಯಲ್ಲಿ ಇಟ್ಟುಕೊಳ್ಳುವುದಿಲ್ಲ. ಅದರ ಬದಲಿಗೆ, ಆ ಹಣವನ್ನು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ನಲ್ಲಿರುವ ವಿಶೇಷ ಖಾತೆಯಲ್ಲಿ ಜಮೆ ಮಾಡಲಾಗುತ್ತದೆ. ವಶಪಡಿಸಿಕೊಂಡ ಹಣವು ಅಕ್ರಮ ಮಾರ್ಗದಿಂದ ಬಂದಿದೆ ಎಂದು ಕೋರ್ಟ್ ತೀರ್ಪು ನೀಡಿದ ನಂತರವೇ ಆ ಹಣವನ್ನು ಸರ್ಕಾರ ಮುಟ್ಟುಗೋಲು ಹಾಕಿಕೊಳ್ಳುತ್ತದೆ. ಒಂದು ವೇಳೆ ಆರೋಪಿಯು ಕೋರ್ಟ್‌ನಲ್ಲಿ ತನ್ನ ನಿರಪರಾಧಿತ್ವವನ್ನು ಸಾಬೀತುಪಡಿಸಿದರೆ, ಆ ಹಣವನ್ನು ವಾಪಸ್ ನೀಡಬೇಕಾಗುತ್ತದೆ. ಕಾನೂನು ಪ್ರಕ್ರಿಯೆ ಮುಗಿದು, ಹಣವು ಸರ್ಕಾರದ ವಶಕ್ಕೆ ಬಂದ ನಂತರ, ಅದನ್ನು 'ಕನ್ಸಾಲಿಡೇಟೆಡ್ ಫಂಡ್ ಆಫ್ ಇಂಡಿಯಾ'ಕ್ಕೆ ವರ್ಗಾಯಿಸಲಾಗುತ್ತದೆ. ಅಲ್ಲಿಂದ ಆ ಹಣವನ್ನು ದೇಶದ ಅಭಿವೃದ್ಧಿ ಕಾರ್ಯಗಳಿಗೆ ಬಳಸಲಾಗುತ್ತದೆ.

ED ಬಳಿ ಯಾವುದೇ ಖಾಸಗಿ ಖಜಾನೆ ಇರುವುದಿಲ್ಲ. ಅದು ವಶಪಡಿಸಿಕೊಂಡ ಹಣದ ಅಂಕಿಅಂಶಗಳನ್ನು ಮಾತ್ರ ನಿರ್ವಹಿಸುತ್ತದೆ. ಕಳೆದ ಕೆಲವು ವರ್ಷಗಳಲ್ಲಿ, ED ಸಾವಿರಾರು ಕೋಟಿ ರೂಪಾಯಿಗಳ ಆಸ್ತಿಯನ್ನು ಜಪ್ತಿ ಮಾಡಿದೆ. ಕೇವಲ ಹಣ ಮಾತ್ರವಲ್ಲದೆ, ಸ್ಥಿರ ಆಸ್ತಿಗಳು, ಚಿನ್ನಾಭರಣ ಮತ್ತು ಐಷಾರಾಮಿ ವಾಹನಗಳನ್ನು ಕೂಡ ವಶಪಡಿಸಿಕೊಳ್ಳಲಾಗುತ್ತದೆ. ವಶಪಡಿಸಿಕೊಂಡ ಆಸ್ತಿಯ ಒಟ್ಟು ಮೌಲ್ಯವು ಲಕ್ಷಾಂತರ ಕೋಟಿಗಳನ್ನು ತಲುಪಬಹುದು, ಆದರೆ ಇದು ನಗದು ರೂಪದಲ್ಲಿರುವುದಿಲ್ಲ.

ಹಣ ವಶಪಡಿಸಿಕೊಂಡ ತಕ್ಷಣವೇ ಪ್ರಕರಣ ಮುಗಿಯುವುದಿಲ್ಲ. ಮನಿ ಲಾಂಡರಿಂಗ್ ತಡೆ ಕಾಯ್ದೆ (PMLA) ಅಡಿಯಲ್ಲಿ ನಡೆಯುವ ಈ ಹೋರಾಟಗಳು ವರ್ಷಗಳವರೆಗೆ ನಡೆಯಬಹುದು. ಅಂತಿಮವಾಗಿ ನ್ಯಾಯಾಲಯದ ತೀರ್ಪಿನ ಆಧಾರದ ಮೇಲೆ ಹಣದ ವಿಲೇವಾರಿ ನಿರ್ಧಾರವಾಗುತ್ತದೆ,(ಏಜೆನ್ಸೀಸ್​).