ನಿತೀಶ್‌ರನ್ನು ಕೆಳಗಿಳಿಸಿ ಪೇಟ ಕಳಚುತ್ತೇನೆ ಅಂದಿದ್ದ ಚೌಧರಿ ಈಗ ಬಿಹಾರದ ಹೊಸ ಬಾಸ್!..ಮುರೇಠಾ ಶಪಥದ ರೋಚಕ ಕಥೆ ಇಲ್ಲಿದೆ ನೋಡಿ | Samrat Choudhary

ಇದು ಸುಮಾರು ಮೂರು ವರ್ಷಗಳ ಹಿಂದಿನ ಕತೆ, ನಿತೀಶ್ ಕುಮಾರ್ ಅಂದು ಆರ್‌ಜೆಡಿ ಮತ್ತು ಕಾಂಗ್ರೆಸ್ ಜೊತೆ ಸೇರಿ ಮಹಾಘಟಬಂಧನ ಸರ್ಕಾರ ನಡೆಸುತ್ತಿದ್ದ ಕಾಲವದು. ವಿಧಾನಸಭೆಯ ವಿಪಕ್ಷ ನಾಯಕನಾಗಿದ್ದ ಸಾಮ್ರಾಟ್ ಚೌಧರಿ ಯಾವಾಗಲೂ ತಲೆಗೆ ಒಂದು ಸಾಂಪ್ರದಾಯಿಕ ಮುರೇಠಾ (ಪೇಟ) ಧರಿಸುತ್ತಿದ್ದರು. ಇದನ್ನು ಕಂಡು ನಿತೀಶ್ ಕುಮಾರ್ ವ್ಯಂಗ್ಯವಾಗಿ, ನೀವು ಯಾವಾಗಲೂ ಈ ಪೇಟ ಏಕೆ ಧರಿಸುತ್ತೀರಿ ಎಂದು ಪ್ರಶ್ನಿಸಿದ್ದರಂತೆ.

ಇದಕ್ಕೆ ತಕ್ಷಣವೇ ಉತ್ತರಿಸಿದ್ದ ಚೌಧರಿ, ನಿಮ್ಮನ್ನು ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗಿಳಿಸುವುದೇ ನನ್ನ ಸಂಕಲ್ಪ. ನಿಮ್ಮನ್ನು ಅಧಿಕಾರದಿಂದ ಕಿತ್ತೆಸೆಯುವ ದಿನವಷ್ಟೇ ಈ ಪೇಟ ನನ್ನ ತಲೆಯಿಂದ ಕೆಳಗಿಳಿಯುತ್ತದೆ ಎಂದು ಇಡೀ ಸದನವೇ ಬೆಚ್ಚಿಬೀಳುವಂತೆ ಪ್ರತಿಜ್ಞೆ ಮಾಡಿದ್ದರು. ಅಂದಿನಿಂದ ನಿತೀಶ್ ಅಧಿಕಾರ ಕಳೆದುಕೊಳ್ಳುವವರೆಗೂ ಪೇಟ ತೆಗೆಯುವುದಿಲ್ಲ ಎಂದು ಅವರು ಹಠ ಹಿಡಿದಿದ್ದರು.

ಇಂದು ಕಾಲಚಕ್ರ ಉರುಳಿದೆ. ಒಮ್ಮೆ ನಿತೀಶ್ ಕುಮಾರ್ ಸದ್ದಿಲ್ಲದೆ ರಾಜೀನಾಮೆ ನೀಡಿ ಅಧಿಕಾರ ಹಸ್ತಾಂತರಿಸುವಂತೆ ಮಾಡುವಲ್ಲಿ ಚೌಧರಿ ಯಶಸ್ವಿಯಾಗಿದ್ದಾರೆ. ಯಾವ ಕುರ್ಚಿಯನ್ನು ಕಿತ್ತೆಸೆಯುತ್ತೇನೆ ಎಂದು ಶಪಥ ಮಾಡಿದ್ದರೋ, ಇಂದು ಅದೇ ಕುರ್ಚಿಯ ಮೇಲೆ ಸಾಮ್ರಾಟ್ ಚೌಧರಿ ವಿರಾಜಮಾನರಾಗಿದ್ದಾರೆ. ಒಬ್ಬ ಮಾಜಿ ಆರ್‌ಜೆಡಿ ನಾಯಕನಾಗಿ, ನಿತೀಶ್ ಕುಮಾರ್​ ಅವರ ಕಟು ಟೀಕಾಕಾರನಾಗಿದ್ದರು. ಸದ್ಯ ಬಿಹಾರದ ಚುಕ್ಕಾಣಿ ಹಿಡಿದಿರುವ ಚೌಧರಿ ಪ್ರಯಾಣ ನಿಜಕ್ಕೂ ಆಶ್ಚರ್ಯಕರ. ಬಿಹಾರದ ರಾಜಕೀಯದಲ್ಲಿ ಸಾಮಾನ್ಯವಾಗಿ ಕಂಡುಬರುವಂತೆ, ಅವರು ಅಂದು ಬರೆದ ರೀತಿಯಲ್ಲೇ ಶಪಥ ಈಡೇರದಿರಬಹುದು, ಆದರೆ ನಿತೀಶ್‌ರನ್ನು ಅಧಿಕಾರದಿಂದ ದೂರ ಸರಿಸುವ ಹಠಕ್ಕೆ ಇಂದು ಜಯ ಸಿಕ್ಕಿದೆ.

57 ವರ್ಷದ ಸಾಮ್ರಾಟ್ ಚೌಧರಿ ಬಿಹಾರದ ಅತ್ಯಂತ ಪ್ರಭಾವಿ ಹಿಂದುಳಿದ ವರ್ಗ (OBC) ಸಮುದಾಯವಾದ ಕುಶ್ವಾಹ (ಕೊಯೇರಿ) ಜಾತಿಗೆ ಸೇರಿದವರಾಗಿದ್ದು, ಬಿಹಾರದ ಜನಸಂಖ್ಯೆಯಲ್ಲಿ ಯಾದವರ ಬಳಿಕ ಅತ್ಯಂತ ದೊಡ್ಡ ಮತಬ್ಯಾಂಕ್ ಎನಿಸಿರುವ ಕುಶ್ವಾಹ ಸಮುದಾಯವನ್ನು ಓಲೈಸುವುದು ಈ ಆಯ್ಕೆಯ ಹಿಂದಿನ ಪ್ರಮುಖ ಉದ್ದೇಶವಾಗಿದೆ. ಮುಂದಿನ ಮುಖ್ಯಮಂತ್ರಿಯಾಗುವವರು ಇದೇ ಸಮುದವರಾಗಿರಬೇಕು ಎಂದು ನಿತೀಶ್ ಕುಮಾರ್ ನೇತೃತ್ವದ ಜೆಡಿಯು (JDU) ಕೂಡ ಮನವಿ ಮಾಡಿತ್ತು ಎಂದು ಮೂಲಗಳು ತಿಳಿಸಿವೆ(ಏಜೆನ್ಸೀಸ್​​).