ರಾಜಕೀಯಕ್ಕೆ ಬರದಿದ್ದರೆ ರಾಹುಲ್ ಗಾಂಧಿ ಏನಾಗುತ್ತಿದ್ದರು? ಇಲ್ಲಿದೆ ನೋಡಿ ಅಚ್ಚರಿಯ ಉತ್ತರ! | Rahul Gandhi

ಕೇರಳ ಪ್ರವಾಸದಲ್ಲಿರುವ ಅವರು, ಶನಿವಾರ ತಿರುವನಂತಪುರಂನ ಟೆಕ್ನೋಪಾರ್ಕ್‌ನಲ್ಲಿ ಐಟಿ ವೃತ್ತಿಪರರೊಂದಿಗೆ ಸಂವಹನ ನಡೆಸುವಾಗ ಈ ವಿಷಯ ಹಂಚಿಕೊಂಡರು.

ತಮ್ಮ ಕುಟುಂಬಕ್ಕೂ ಮತ್ತು ವಿಮಾನಯಾನಕ್ಕೂ ಇರುವ ಅವಿನಾಭಾವ ಸಂಬಂಧವನ್ನು ನೆನಪಿಸಿಕೊಂಡ ರಾಹುಲ್ ಗಾಂಧಿ, "ನಾನೊಬ್ಬ ತರಬೇತಿ ಪಡೆದ ಪೈಲಟ್. ನನ್ನ ತಂದೆ ರಾಜೀವ್ ಗಾಂಧಿ ಮತ್ತು ಚಿಕ್ಕಪ್ಪ ಸಂಜಯ್ ಗಾಂಧಿ ಕೂಡ ಪೈಲಟ್ ಆಗಿದ್ದರು. ವಿಮಾನಯಾನ ಎನ್ನುವುದು ನಮ್ಮ ಕುಟುಂಬದ ರಕ್ತದಲ್ಲೇ ಹರಿದು ಬಂದಿದೆ. ಹಾಗಾಗಿ, ನಾನು ರಾಜಕೀಯ ಆರಿಸಿಕೊಳ್ಳದಿದ್ದರೆ ವೈಮಾನಿಕ ಕ್ಷೇತ್ರದಲ್ಲಿ ಸಂಶೋಧನೆ ಅಥವಾ ಉದ್ಯಮವನ್ನು ಮಾಡುತ್ತಿದ್ದೆ," ಎಂದರು.

ಇದೇ ವೇಳೆ ಜಾಗತಿಕ ಆರ್ಥಿಕತೆ ಮತ್ತು ಉತ್ಪಾದನಾ ವಲಯದ ಬಗ್ಗೆ ಮಾತನಾಡಿದ ಅವರು, ಚೀನಾದ ಕೈಗಾರಿಕಾ ವ್ಯವಸ್ಥೆಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು. "ಇಡೀ ವಿಶ್ವದಲ್ಲೇ ಸಾಟಿಯಿಲ್ಲದಂತಹ ಬೃಹತ್ ಕೈಗಾರಿಕಾ ವ್ಯವಸ್ಥೆಯನ್ನು ಚೀನಾ ನಿರ್ಮಿಸಿದೆ. ಉತ್ಪಾದನಾ ವಲಯದಲ್ಲಿ ಚೀನಾ ಹೊಂದಿರುವ ಹಿಡಿತ ಅಸಾಧಾರಣವಾದುದು," ಎಂದು ಅವರು ಬಣ್ಣಿಸಿದರು.

ಆದರೆ, ಚೀನಾದ ರಾಜಕೀಯ ವ್ಯವಸ್ಥೆಯನ್ನು ಅವರು ಟೀಕಿಸಿದರು. "ಚೀನಾದ ಕೈಗಾರಿಕಾ ಶಕ್ತಿ ದೊಡ್ಡದಿದ್ದರೂ, ಅಲ್ಲಿನ ರಾಜಕೀಯ ವ್ಯವಸ್ಥೆ ಪ್ರಜಾಪ್ರಭುತ್ವ ವಿರೋಧಿಯಾಗಿದೆ ಮತ್ತು ಒತ್ತಾಯಪೂರ್ವಕವಾಗಿದೆ. ಭಾರತ ಎಂದಿಗೂ ಇಂತಹ ವ್ಯವಸ್ಥೆಯನ್ನು ಬೆಂಬಲಿಸುವುದಿಲ್ಲ," ಎಂದು ಸ್ಪಷ್ಟಪಡಿಸಿದರು.

ಭಾರತ ಮತ್ತು ಅಮೆರಿಕದಂತಹ ರಾಷ್ಟ್ರಗಳು ಹೆಚ್ಚಾಗಿ ಸೇವಾ ವಲಯ (Services) ಮತ್ತು ಬಳಕೆ (Consumption) ಮೇಲೆ ಅವಲಂಬಿತವಾಗಿವೆ. ಆದರೆ ಚೀನಾ ಉತ್ಪಾದನೆಯಲ್ಲಿ (Manufacturing) ಮುಂಚೂಣಿಯಲ್ಲಿದೆ. "ದೊಡ್ಡ ಮಟ್ಟದ ಮತ್ತು ಸುಸ್ಥಿರ ಉದ್ಯೋಗಗಳು ಸೃಷ್ಟಿಯಾಗುವುದು ಐಟಿ ವಲಯದಲ್ಲಲ್ಲ, ಬದಲಾಗಿ ಬೃಹತ್ ಕಾರ್ಖಾನೆಗಳಲ್ಲಿ. ಭಾರತವು ತನ್ನ ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳುತ್ತಿರುವುದು ಚೀನಾಕ್ಕೆ ಆತಂಕ ತಂದಿದೆ," ಎಂದು ರಾಹುಲ್ ವಿಶ್ಲೇಷಿಸಿದರು.

ತಮ್ಮ ಎರಡು ದಿನಗಳ ಕೇರಳ ಪ್ರವಾಸದ ಭಾಗವಾಗಿ ಇಡುಕ್ಕಿಯ ಕುಟ್ಟಿಕ್ಕಾನಂಗೆ ಭೇಟಿ ನೀಡಿದ ರಾಹುಲ್, ಅಲ್ಲಿನ ಚಹಾ ತೋಟದ ಕಾರ್ಮಿಕರೊಂದಿಗೆ ಸಮಾಲೋಚನೆ ನಡೆಸಿದರು. ಕಾರ್ಮಿಕರ ಜೀವನೋಪಾಯ ಮತ್ತು ಎದುರಿಸುತ್ತಿರುವ ಸವಾಲುಗಳ ಬಗ್ಗೆ ಮಾಹಿತಿ ಪಡೆದರು. ಬಳಿಕ ವರ್ಕಲಾದ ಶಿವಗಿರಿ ಮಠಕ್ಕೆ ಭೇಟಿ ನೀಡಿ, ಸಮಾಜ ಸುಧಾರಕ ಶ್ರೀ ನಾರಾಯಣ ಗುರುಗಳ ಸಮಾಧಿಗೆ ಗೌರವ ಸಲ್ಲಿಸಿದರು,(ಏಜೆನ್ಸೀಸ್​).