ಏನಿದು 7 ನಿಮಿಷ ಕ್ಯಾನ್ಸರ್​ ಇಂಜೆಕ್ಷನ್​? ಒಂದು ಡೋಸ್​ ಬೆಲೆ ಕೇಳಿದ್ರೆ ನಿಮ್ಮ ಹುಬ್ಬೇರೋದು ಖಚಿತ | Cancer Injection

Cancer Injection: ಕ್ಯಾನ್ಸರ್ ಎಂಬ ಸದ್ದಿಲ್ಲದ, ಮಾರಣಾಂತಿಕ ಖಾಯಿಲೆಯನ್ನು ಗುಣಪಡಿಸುವ 7 ನಿಮಿಷಗಳ ಇಂಜೆಕ್ಷನ್​ವೊಂದು​ ಭಾರತಕ್ಕೆ ಲಗ್ಗೆಯಿಟ್ಟಿದ್ದು, ಇದರ ಬೆಲೆ ಮತ್ತು ವಿಶೇಷತೆಗಳ ಬಗ್ಗೆ ಕೇಳಿದರೆ ಖಂಡಿತ ನಿಮ್ಮ ಹುಬ್ಬೇರುತ್ತದೆ.

ಕ್ಯಾನ್ಸರ್​ ಅಂದಾಕ್ಷಣ ರೋಗಿಗಳಿಗೆ ಮೊದಲಿಗೆ ನೆನಪಾಗುವುದೇ ಕೀಮೋಥೆರಪಿ ಎಂಬ ನೋವಿನ ಚಿಕಿತ್ಸೆ. ಬ್ಲಡ್​, ಬೋನ್​, ಸ್ಕಿನ್​, ಶ್ವಾಸಕೋಶ ಹೀಗೆ ನಾನಾ ರೀತಿಯ ಕ್ಯಾನ್ಸರ್​ ರೋಗಗಳಿಂದ ಬಳಲುವ ಅದೆಷ್ಟೋ ಸಂಖ್ಯೆಯ ಭಾರತೀಯರಿಗೆ ಈ ಒಂದು ಇಂಜೆಕ್ಷನ್​ ಸಿಹಿ ಸುದ್ದಿಯನ್ನು ಹೊತ್ತು ತಂದಿದೆ. ಭಾರತದಲ್ಲಿ ಶ್ವಾಸಕೋಶದ ಕ್ಯಾನ್ಸರ್‌ಗೆ ಹೊಸ ಟೆಕ್ನಾಲಜಿ ಈಗ ಲಭ್ಯವಾಗಿದೆ. ಪ್ರಮುಖ ಔಷಧ ಸಂಸ್ಥೆಯಾದ ರೋಚೆ ಫಾರ್ಮಾ ಇಂಡಿಯಾ, "ಟೆಸೆಂಟ್ರಿಕ್" ಎಂಬ ಹೊಸ ಇಮ್ಯುನೊಥೆರಪಿ ಇಂಜೆಕ್ಷನ್ ಅನ್ನು ಜನರ ಮುಂದಿಟ್ಟಿದೆ.

ಕೇವಲ 7 ನಿಮಿಷಗಳಲ್ಲಿ ಇದನ್ನು ಪೂರ್ಣಗೊಳಿಸಬಹುದು ಮತ್ತು ಕೂಡಲೇ ಕೆಲಸ ಮಾಡಲು ಪ್ರಾರಂಭಿಸುವ ಒಂದು ವಿಶೇಷ ಇಂಜೆಕ್ಷನ್ ಆಗಿದೆ. ಈ ಇಂಜೆಕ್ಷನ್ ಚಿಕಿತ್ಸೆಯ ಸಮಯವನ್ನು ಕಡಿತಗೊಳಿಸಲಿದ್ದು, ಶ್ವಾಸಕೋಶದ ಕ್ಯಾನ್ಸರ್ (NSCLC) ರೋಗಿಗಳಿಗೆ ಹೆಚ್ಚು ಉಪಯುಕ್ತವಾಗಿದೆ. ಇದರ ವಿಶೇಷತೆ ಏನೆಂದರೆ, ಚಿಕಿತ್ಸೆಯ ಸಮಯವನ್ನು ಇಳಿಸುವುದರ ಜೊತೆಗೆ ರೋಗಿಗಳು ಆಸ್ಪತ್ರೆಗಳಲ್ಲಿ ಹೆಚ್ಚು ಸಮಯ ಉಳಿಯುವ ಅನಿವಾರ್ಯತೆಯನ್ನು ಕಡಿಮೆ ಮಾಡಲಿದೆ.

ಈ ಇಂಜೆಕ್ಷನ್ 'ಅಟೆಜೋಲಿಜುಮಾಬ್' ಎಂಬ ಇಮ್ಯುನೊಥೆರಪಿ ಔಷಧವನ್ನು ಬಳಸುತ್ತದೆ. ಇದು ನಿಯಮಿತ ಕಿಮೊಥೆರಪಿಯಂತೆ ಕ್ಯಾನ್ಸರ್ ಕೋಶಗಳ ಮೇಲೆ ಕೆಲಸ ಮಾಡುವುದಿಲ್ಲ. ಬದಲಿಗೆ, ದೇಹದ ಪ್ರತಿರಕ್ಷಣಾ ವ್ಯವಸ್ಥೆಯು ಕ್ಯಾನ್ಸರ್ ಕೋಶಗಳನ್ನು ಗುರುತಿಸಲು ಮತ್ತು ನಾಶ ಮಾಡಲು ಸಹಾಯ ಮಾಡುತ್ತದೆ. ಕ್ಯಾನ್ಸರ್ ಕೋಶಗಳು ಸಾಮಾನ್ಯವಾಗಿ ಪಿಡಿ-11 (PD-L1) ಎಂಬ ಪ್ರೋಟೀನ್ ಮೂಲಕ ರೋಗನಿರೋಧಕ ವ್ಯವಸ್ಥೆಯಿಂದ ಅಡಗಿಕೊಳ್ಳುತ್ತವೆ. ಟೆಸೆಂಟ್ರಿಕ್ ಆ ಪ್ರೋಟೀನ್ ಅನ್ನು ನಿರ್ಬಂಧಿಸುತ್ತದೆ.

ಇದು ಮೆಡಿಸಿನ್​ ಕ್ಯಾನ್ಸರ್ ಕೋಶಗಳನ್ನು ಸುಲಭವಾಗಿ ಗುರುತಿಸಲು ಮತ್ತು ದಾಳಿ ಮಾಡಲು ಅನುಕೂಲ ಮಾಡಿಕೊಡುತ್ತದೆ. ಕೀಮೋಥೆರಪಿ ಔಷಧಿಗಳು ಆರೋಗ್ಯಕರ ಕೋಶಗಳ ಜೊತೆಗೆ ಕ್ಯಾನ್ಸರ್ ಕೋಶಗಳ ಮೇಲೂ ದಾಳಿ ಮಾಡುತ್ತವೆ. ಆದರೆ, ಈ ಇಂಜೆಕ್ಷನ್ ಕೇವಲ ಕ್ಯಾನ್ಸರ್ ಕೋಶಗಳನ್ನು ಮಾತ್ರ ಟಾರ್ಗೆಟ್​ ಮಾಡುತ್ತದೆ.

7 ನಿಮಿಷಗಳ ಇಂಜೆಕ್ಷನ್​ ಕೆಲಸವೇನೋ ಅದ್ಭುತ. ಆದ್ರೆ, ಇದರ ಬೆಲೆ ಕೇಳಿದ್ರೆ ತಲೆ ತೀರುಗೋದು ಖಂಡಿತ. ಕಾರಣ, ಈ ಔಷಧಿ ಸಾಮಾನ್ಯ ಜನರ ಕೈಗೆಟುಕುವಂತಿಲ್ಲ. ಇದರ ಒಂದು ಡೋಸ್‌ಗೆ 3.7 ಲಕ್ಷ ರೂ. ಖರ್ಚು ತಗುಲಲಿದೆ. ಅನೇಕ ರೋಗಿಗಳಿಗೆ 6 ಡೋಸ್‌ಗಳ ಅವಶ್ಯಕತೆ ಇರಬಹುದು. ಶ್ರೀಮಂತ ರೋಗಿಗಳಿಗೆ ಇದು ದೊಡ್ಡದಲ್ಲ ಅನಿಸಿದರೂ, ಮಿಡಲ್​ ಕ್ಲಾಸ್​ ಮತ್ತು ಬಡ ವರ್ಗದ ಜನರಿಗಂತು ಅಕ್ಷರಶಃ ಕಷ್ಟಸಾಧ್ಯವೇ.

ವೈದ್ಯರ ಪ್ರಕಾರ, ಈ ಔಷಧಿಯನ್ನು ಎಲ್ಲಾ ರೋಗಿಗಳಿಗೆ ಕೊಡುವಂತದ್ದಲ್ಲ. ರೋಗಿಯ ಗೆಡ್ಡೆಯನ್ನು ಮೊದಲು PD-L1 ಪ್ರೋಟೀನ್ ಮಟ್ಟಕ್ಕಾಗಿ ಪರೀಕ್ಷೆ ಮಾಡಲಾಗುತ್ತದೆ. ಈ ಪ್ರೋಟೀನ್‌ನ ಹೆಚ್ಚಿನ ಮಟ್ಟವನ್ನು ಹೊಂದಿರುವ ರೋಗಿಗಳು ಈ ಚಿಕಿತ್ಸೆಗೆ ಒಳಪಡುವ ಸಾಧ್ಯತೆ ಹೆಚ್ಚು ಎಂದು ಹೇಳಲಾಗಿದೆ. ರೋಗಿಯ ಆರೋಗ್ಯ ಸ್ಥಿತಿ ಮತ್ತು ಕ್ಯಾನ್ಸರ್‌ನ ಹಂತದ ಆಧಾರದ ಮೇಲೆ ವೈದ್ಯರು ಚಿಕಿತ್ಸೆಯನ್ನು ನಿರ್ಧರಿಸುತ್ತಾರೆ ಎಂಬುದು ಇಲ್ಲಿ ಗಮನಿಸಬೇಕಾದ ವಿಷಯ,(ಏಜೆನ್ಸೀಸ್).