ಇಂಡೋ-ಪಾಕ್​ ಗಡಿಯಲ್ಲಿ ನೇತಾಡುವ ಬಾಟಲಿಗಳ ರಹಸ್ಯವೇನು? ಬಿಎಸ್ಎಫ್ ಸೈನಿಕರ ತಂತ್ರಗಾರಿಕೆಗೆ ನೆಟ್ಟಿಗರು ಫಿದಾ! Indo-Pak Border

Indo-Pak Border: ಭಾರತ ಮತ್ತು ಪಾಕಿಸ್ತಾನದ ನಡುವಿನ ಗಡಿ (Indo-Pak border) ಯೆಂದರೆ ಅಲ್ಲಿ ಯಾವಾಗಲೂ ಯುದ್ಧದ ಕಾರ್ಮೋಡ, ಗುಂಡಿನ ಸದ್ದು ಅಥವಾ ಬಿಗಿ ಭದ್ರತೆಯ ದೃಶ್ಯಗಳೇ ಕಣ್ಣಮುಂದೆ ಬರುತ್ತವೆ. ಗಡಿ ಭದ್ರತಾ ಪಡೆಯ (BSF) ಸೈನಿಕರು ಅತ್ಯಾಧುನಿಕ ಗನ್‌ಗಳು, ಥರ್ಮಲ್ ಸ್ಕ್ಯಾನರ್‌ಗಳು ಮತ್ತು ಲೇಸರ್ ಸೆನ್ಸರ್‌ಗಳ ಮೂಲಕ ಗಡಿಯನ್ನು ಕಾಯುತ್ತಿರುತ್ತಾರೆ.

ಆದರೆ, ಈ ಹೈಟೆಕ್ ಉಪಕರಣಗಳ ನಡುವೆ ಸಾವಿರಾರು ಖಾಲಿ ಬಾಟಲಿಗಳು ಗಡಿಯ ಮುಳ್ಳುತಂತಿ ಬೇಲಿಗೆ ನೇತಾಡುತ್ತಿರುವುದನ್ನು ನೀವು ಗಮನಿಸಿದ್ದೀರಾ? ಮೇಲ್ನೋಟಕ್ಕೆ ಇದು ವಿಚಿತ್ರ ಎನಿಸಿದರೂ, ದೇಶದ ರಕ್ಷಣೆಯಲ್ಲಿ ಈ ಖಾಲಿ ಬಾಟಲಿಗಳು ವಹಿಸುವ ಪಾತ್ರ ಮಾತ್ರ ಅಸಾಮಾನ್ಯವಾದದ್ದಾಗಿದೆ.

ಗಡಿಯಲ್ಲಿ ಭಯೋತ್ಪಾದಕರು ಅಥವಾ ಅಕ್ರಮ ನುಸುಳುಕೋರರನ್ನು ಪತ್ತೆಹಚ್ಚಲು ಬಿಎಸ್ಎಫ್ ಸೈನಿಕರು ಬಳಸುವ ಅತ್ಯಂತ ಹಳೆಯ ಮತ್ತು ಅಷ್ಟೇ ಪರಿಣಾಮಕಾರಿ ದೇಸಿ ತಂತ್ರ ಇದಾಗಿದೆ. ಗಡಿಯುದ್ದಕ್ಕೂ ಇರುವ ಕಬ್ಬಿಣದ ಮುಳ್ಳುತಂತಿ ಬೇಲಿಗಳಿಗೆ ಸಣ್ಣ ಅಂತರದಲ್ಲಿ ಖಾಲಿ ಗಾಜಿನ ಅಥವಾ ಪ್ಲಾಸ್ಟಿಕ್ ಬಾಟಲಿಗಳನ್ನು ತಲೆಕೆಳಗಾಗಿ ನೇತುಹಾಕಲಾಗುತ್ತದೆ. ಇವು ಕೇವಲ ಅಲಂಕಾರದ ವಸ್ತುಗಳಲ್ಲ, ಬದಲಿಗೆ ಇವು ಸೈನಿಕರಿಗೆ ಎಚ್ಚರಿಕೆ ನೀಡುವ ನೈಸರ್ಗಿಕ ಅಲಾರಂಗಳಂತೆ ಕೆಲಸ ಮಾಡುತ್ತವೆ.

ಕತ್ತಲ ರಾತ್ರಿಯಲ್ಲಿ ಅಥವಾ ದಟ್ಟವಾದ ಮಂಜು ಮುಸುಕಿದ ವಾತಾವರಣದಲ್ಲಿ ಶತ್ರುಗಳು ಗಡಿ ದಾಟಲು ಪ್ರಯತ್ನಿಸುತ್ತಾರೆ. ಅಂತಹ ಸಂದರ್ಭದಲ್ಲಿ ಅವರು ಮುಳ್ಳುತಂತಿ ಬೇಲಿಯನ್ನು ಕತ್ತರಿಸಲು ಅಥವಾ ಅದರ ಮೇಲೆ ಹತ್ತಲು ಪ್ರಯತ್ನಿಸಿದಾಗ, ತಂತಿಗಳು ಅಲುಗಾಡುತ್ತವೆ.

ವಿಶೇಷವಾಗಿ ಪಂಜಾಬ್ ಮತ್ತು ಜಮ್ಮು ಗಡಿಯಲ್ಲಿ ಚಳಿಗಾಲದ ಸಮಯದಲ್ಲಿ ಅತಿಯಾದ ಮಂಜು ಇರುತ್ತದೆ. ಎಷ್ಟರಮಟ್ಟಿಗೆ ಎಂದರೆ ಹತ್ತಿರ ನಿಂತಿರುವ ವ್ಯಕ್ತಿಯೂ ಕಾಣಿಸುವುದಿಲ್ಲ. ಇಂತಹ ಸಮಯದಲ್ಲಿ ಹೈಟೆಕ್ ಕ್ಯಾಮೆರಾಗಳು ಕೂಡ ವಿಫಲವಾಗಬಹುದು. ಆದರೆ, ಈ ಬಾಟಲಿಗಳ ಶಬ್ದವು ಎಂದಿಗೂ ವಿಫಲವಾಗುವುದಿಲ್ಲ. ಮಂಜಿನ ಹೊದಿಕೆಯ ನಡುವೆ ಶತ್ರುಗಳು ಗುಟ್ಟಾಗಿ ಬರಲು ಪ್ರಯತ್ನಿಸಿದಾಗ ಈ ಬಾಟಲಿಗಳೇ ಅವರ ಸಂಚನ್ನು ಬಯಲು ಮಾಡುತ್ತವೆ ಎಂದು ಸೇನಾ ಮೂಲಗಳು ಹೇಳುತ್ತವೆ.

ಇಂದಿನ ಕಾಲದಲ್ಲಿ ಲೇಸರ್ ಗೋಡೆಗಳು ಮತ್ತು ಹೈ-ಡೆಫಿನಿಷನ್ ಕ್ಯಾಮೆರಾಗಳು ಲಭ್ಯವಿದ್ದರೂ, ಅವುಗಳಿಗೆ ವಿದ್ಯುತ್ ಅಥವಾ ತಾಂತ್ರಿಕ ದೋಷಗಳು ಎದುರಾಗಬಹುದು. ಆದರೆ, ಈ ಬಾಟಲಿ ತಂತ್ರಕ್ಕೆ ಯಾವುದೇ ಬ್ಯಾಟರಿ ಅಥವಾ ಮೇಂಟೆನೆನ್ಸ್ ಅಗತ್ಯವಿಲ್ಲ. ಅತ್ಯಂತ ಕಡಿಮೆ ಖರ್ಚಿನಲ್ಲಿ, ಕಸದಂತೆ ಬಿದ್ದಿರುವ ಬಾಟಲಿಗಳನ್ನು ಬಳಸಿ ಗಡಿಯನ್ನು ಸುರಕ್ಷಿತವಾಗಿರಿಸುವ ಸೈನಿಕರ ಈ ಸಮಯಪ್ರಜ್ಞೆ ನಿಜಕ್ಕೂ ಅದ್ಭುತವಾಗಿದೆ.

ಗಡಿಯಲ್ಲಿ ನೇತಾಡುವ ಈ ಪ್ರತಿಯೊಂದು ಖಾಲಿ ಬಾಟಲಿಯೂ ನಮ್ಮ ಸೈನಿಕರ ಕಣ್ಗಾವಲಿನ ಒಂದು ಭಾಗವಾಗಿದ್ದು, ದೇಶದ ಭದ್ರತೆಯಲ್ಲಿ ಮೌನವಾಗಿ ಕೆಲಸ ಮಾಡುತ್ತಿವೆ. ಸೈನಿಕರ ಈ ಚಾಣಾಕ್ಷ ತಂತ್ರ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ವ್ಯಾಪಕ ಮೆಚ್ಚುಗಗೆ ಪಾತ್ರವಾಗುತ್ತಿದ್ದು, ಭಾರತದ ಸೈನಿಕರು ಕಡಿಮೆ ಸಂಪನ್ಮೂಲದಲ್ಲಿಯೂ ಸಹ ದೇಶದ ರಕ್ಷಣೆ ಹೇಗೆ ಮಾಡಬಹುದು ಎನ್ನುವುದಕ್ಕೆ ಸಾಕ್ಷಿಯಾಗಿದ್ದಾರೆ ಎಂದು ಹೇಳುತ್ತಿದ್ದಾರೆ,(ಏಜನ್ಸೀಸ್​).