ದೀದಿಗೆ ಈ ಬಾರಿ 'ಸೇಫ್' ಅಲ್ಲವಂತೆ ಭವಾನಿಪುರ... ಹರೀಶ್ ಚಟರ್ಜಿ ಬೀದಿಯಲ್ಲಿ ಅಡಗಿದೆ ದೊಡ್ಡ ರಾಜಕೀಯ ರಹಸ್ಯ! | The Secret Of Bhabanipur

ಭವಾನಿಪುರ ಎಂಬ ಹೆಸರೇ ಒಂದು ಶಕ್ತಿ. ಭವಾನಿ ದೇವಿಯ ಆಶೀರ್ವಾದವಿರುವ ಈ ನೆಲ, ಪವಿತ್ರ ಕಾಳಿಘಾಟ್ ದೇವಾಲಯದ ಪ್ರವೇಶ ದ್ವಾರದಂತಿದೆ. ಒಂದು ಕಾಲದ ಶಾಂತ ವಸಾಹತು ಇಂದು ವಿಶ್ವಮಾನವ ಸಂಸ್ಕೃತಿಯ ಸಮ್ಮಿಳನ ಕೇಂದ್ರವಾಗಿ ಮಾರ್ಪಟ್ಟಿದೆ. ಇಲ್ಲಿನ ಜನಸಂಖ್ಯಾ ವಿನ್ಯಾಸ ಯಾವುದೇ ರಾಜಕೀಯ ಪಕ್ಷಕ್ಕೂ ಸುಲಭದ ತುತ್ತಲ್ಲ.

1984ರಲ್ಲಿ ರಾಜಕೀಯ ಪ್ರವೇಶಿಸಿದ ದಿನದಿಂದಲೂ ಮಮತಾ ಬ್ಯಾನರ್ಜಿ ಅವರಿಗೆ ಭವಾನಿಪುರ ಅಜೇಯ ಕೋಟೆಯಾಗಿತ್ತು. ಆದರೆ, 2021ರ ಚುನಾವಣಾ ಫಲಿತಾಂಶಗಳು ತೃಣಮೂಲ ಕಾಂಗ್ರೆಸ್‌ಗೆ ಆತಂಕ ತಂದಿವೆ. ಸ್ವತಃ ಮುಖ್ಯಮಂತ್ರಿಗಳ ನಿವಾಸವಿರುವ ಹರೀಶ್ ಚಟರ್ಜಿ ಬೀದಿಯ ವಾರ್ಡ್‌ಗಳಲ್ಲೇ ಬಿಜೆಪಿ ಭಾರಿ ಮುನ್ನಡೆ ಸಾಧಿಸಿದ್ದು, ದೀದಿ ಕೋಟೆಯಲ್ಲಿ ಬಿರುಕು ಮೂಡಿರುವುದನ್ನು ಸಾಬೀತುಪಡಿಸಿತ್ತು. ಈ ಬಾರಿ ಬಿಜೆಪಿ ತನ್ನ ಪ್ರಬಲ ಅಸ್ತ್ರ ಸುವೇಂದು ಅಧಿಕಾರಿಯನ್ನು ಕಣಕ್ಕಿಳಿಸಿರುವುದು ಸಮರವನ್ನು ಮತ್ತಷ್ಟು ರೋಚಕಗೊಳಿಸಿದೆ.

ಜಾದು ಬಾಬು ಬಜಾರ್‌ನ ಗದ್ದಲದ ನಡುವೆ 30 ವರ್ಷಗಳಿಂದ ರಿಕ್ಷಾ ಎಳೆಯುತ್ತಿರುವ ವ್ಯಕ್ತಿಯೊಬ್ಬರ ಮಾತುಗಳು ಕ್ಷೇತ್ರದ ವಾಸ್ತವವನ್ನು ತೆರೆದಿಡುತ್ತವೆ. ನಮ್ಮ ದುಡಿಮೆ ಬತ್ತಿ ಹೋಗುತ್ತಿದೆ. ಅಧಿಕಾರಕ್ಕೆ ಯಾರು ಬಂದರೆ ನಮಗೇನು ಲಾಭ..? ನಮ್ಮ ಬದುಕು ಸುಧಾರಿಸದಿದ್ದರೆ ಈ ಸಿಂಹಾಸನಗಳ ಆಟ ನಮಗೇಕೆ..? ಎಂದರೆ. ಇತ್ತ ಮಾಂಸದ ವ್ಯಾಪಾರಿಯೊಬ್ಬರು ಸರ್ಕಾರದ ಯೋಜನೆಗಳನ್ನು ಸ್ವಾಗತಿಸಿದರೂ, ಭವಿಷ್ಯದ ಸಾಮಾಜಿಕ ಭದ್ರತೆಯ ಬಗ್ಗೆ ಆತಂಕ ವ್ಯಕ್ತಪಡಿಸುತ್ತಾರೆ.

ನಿಷ್ಠಾವಂತ ಬೆಂಬಲಿಗರು: ಲಕ್ಷ್ಮಿರ್ ಭಂಡಾರ್​ನಂತಹ ಯೋಜನೆಗಳಿಂದ ಸಬಲೀಕರಣಗೊಂಡಿರುವ ಕೆಳವರ್ಗದ ಮತದಾರರು ಇಂದಿಗೂ 'ಮಾ, ಮತಿ, ಮಾನುಷ್' ಘೋಷಣೆಗೆ ಬದ್ಧರಾಗಿದ್ದಾರೆ.

ಟಿಎಂಸಿಯ ಬೂತ್ ಮಟ್ಟದ ಕಾರ್ಯಕರ್ತರ ಜಾಲ ಅತ್ಯಂತ ಬಲಿಷ್ಠವಾಗಿದೆ, ಆದರೆ, ಬಿಜೆಪಿ ಈ ಬಾರಿ ನಗರದ ಗಣ್ಯರ ಅಸಮಾಧಾನ ಮತ್ತು ಸುವೇಂದು ಅಧಿಕಾರಿ ಅವರ ಆಕ್ರಮಣಕಾರಿ ಪ್ರಚಾರದ ಮೇಲೆ ನಂಬಿಕೆ ಇಟ್ಟಿದೆ. ಭವಾನಿಪುರ ಈಗ ಸುರಕ್ಷಿತ ಕ್ಷೇತ್ರ ಎಂಬ ಹಣೆಪಟ್ಟಿಯನ್ನು ಕಳೆದುಕೊಂಡಿದ್ದು, ಆಧುನಿಕ ಆಕಾಂಕ್ಷೆಗಳು ಮತ್ತು ಸಾಂಪ್ರದಾಯಿಕ ನಿಷ್ಠೆಗಳ ನಡುವಿನ ಯುದ್ಧಭೂಮಿಯಾಗಿ ಮಾರ್ಪಟ್ಟಿದೆ.

2026ರ ಫಲಿತಾಂಶ ಕೇವಲ ಒಬ್ಬ ವ್ಯಕ್ತಿಯ ಗೆಲುವಲ್ಲ, ಅದು ಬಂಗಾಳದ ರಾಜಕೀಯ ಭವಿಷ್ಯದ ದಿಕ್ಸೂಚಿಯಾಗಲಿ ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ(ಏಜೆನ್ಸೀಸ್​).