ಏನಿದು ಬಿರಿಯಾನಿ ಗೇಟ್​? ಈ ವರದಿ ಬಗ್ಗೆ ನೀವು ತಿಳಿಯಲೇಬೇಕು

ತುಂಬ ಜನರು ಇಷ್ಟಪಟ್ಟು ತಿನ್ನುವ ಖಾದ್ಯ ಹೈದರಾಬಾದ್ ಬಿರಿಯಾನಿ! ಈ ಖಾದ್ಯದಿಂದಲೇ ಖ್ಯಾತಿ ಗಳಿಸಿದ ಹೋಟೆಲ್​ಗಳಿಗೆ ಕೊರತೆ ಇಲ್ಲ. ರುಚಿ ಹಾಗೂ ಗುಣಮಟ್ಟಕ್ಕೆ ಮನಸೋಲುವ ಗ್ರಾಹಕರು, ಬಿಲ್ ಸ್ವಲ್ಪ ಹೆಚ್ಚಾದರೂ ತಲೆ ಕೆಡಿಸಿಕೊಳ್ಳದೆ, ಅದನ್ನು ಪಾವತಿಸಿ ಸಂತೃಪ್ತಿಯ ಭಾವದಲ್ಲಿ ಮರಳುತ್ತಾರೆ. ಆದರೆ, ಭಾರಿ ವಹಿವಾಟು ನಡೆಸುವ ಹೋಟೆಲ್​ಗಳು ತೆರಿಗೆ ಪಾವತಿಸುವಾಗ ಮಾತ್ರ ವಂಚನೆಯ ಹಾದಿ ತುಳಿಯುತ್ತಿರುವುದು ಭಾರಿ ಕಳವಳ ಮೂಡಿಸಿದೆ. ಇಂಥದ್ದೇ ತೆರಿಗೆ ವಂಚನೆಯ ಪ್ರಕರಣ ಈಗ ದೇಶಾದ್ಯಂತ ‘ಬಿರಿಯಾನಿ ಗೇಟ್’ ಹೆಸರಿನಲ್ಲಿ ಸುದ್ದಿಯಲ್ಲಿದೆ.

ಬಿಲ್ಲಿಂಗ್ ಸಾಫ್ಟ್​ವೇರ್​ನಲ್ಲಿ ಬಿಲ್​ಗಳನ್ನು ಅಳಿಸಿ ಅಥವಾ ಎಡಿಟ್ ಮಾಡಿ, ವಹಿವಾಟನ್ನೇ ಕಡಿಮೆ ತೋರಿಸುವ ಮೂಲಕ ಐಟಿ ರಿಟರ್ನ್ಸ್​ನಲ್ಲಿ ಮೋಸ ಎಸಗಲಾಗಿದೆ. ಇದು ಮೊದಲು ಹೈದರಾಬಾದಿನಲ್ಲಿ ಪತ್ತೆಯಾಗಿ, ಬೆಚ್ಚಿಬೀಳಿಸಿತು. ಇದೇ ಬಗೆಯ ಅಕ್ರಮ ಇನ್ನಷ್ಟು ಕಡೆ ನಡೆದಿರಬಹುದು ಎಂಬ ಗುಮಾನಿಯಲ್ಲಿ ಆದಾಯ ತೆರಿಗೆ ಇಲಾಖೆ ಪರಿಶೀಲನೆ ನಡೆಸಿದಾಗ, ಈ ವಂಚನೆಯ ಜಾಲ ಹಲವು ರಾಜ್ಯಗಳಿಗೆ ವಿಸ್ತರಿಸಿಕೊಂಡಿರುವುದು ದೃಢಪಟ್ಟಿದೆ. ಹಾಗಾಗಿಯೇ, ಈಗ ದೇಶಾದ್ಯಂತ ತನಿಖೆಗೆ ಆದೇಶಿಸಲಾಗಿದೆ. ಮಾತ್ರವಲ್ಲ, ಮನುಷ್ಯರ ಕಣ್ಣಿಗೆ ಕಾಣದ ವಂಚನೆಗಳನ್ನು ಕೃತಕ ಬುದ್ಧಿಮತ್ತೆ (ಎಐ) ಹೇಗೆ ಪತ್ತೆ ಮಾಡಬಲ್ಲದು ಎಂಬುದಕ್ಕೆ ಈ ಪ್ರಕರಣ ಅತ್ಯುತ್ತಮ ಉದಾಹರಣೆಯಾಗಿದೆ.

ಸಿಬ್ಬಂದಿ ಮೋಸ ಅಥವಾ ವಂಚನೆ ಮಾಡಬಾರದು ಎಂಬ ಕಾರಣಕ್ಕಾಗಿಯೇ ಹೋಟೆಲ್​ಗಳಲ್ಲಿ ಗ್ರಾಹಕರಿಂದ ಕಾರ್ಡ್, ಯುಪಿಐ ಮತ್ತು ನಗದು ರೂಪದಲ್ಲಿ ಪಡೆದ ಪಾವತಿಯನ್ನು ಸಾಫ್ಟ್​ವೇರ್​ನಲ್ಲಿ ನೋಂದಣಿ ಮಾಡಲಾಗುತ್ತದೆ. ಆದರೆ, ಇಲ್ಲಿ ಹೋಟೆಲ್ ಮಾಲೀಕರೇ ಬಿಲ್ಲಿಂಗ್ ಸಾಫ್ಟ್​ವೇರ್ ದುರುಪಯೋಗ ಪಡಿಸಿಕೊಂಡಿರುವುದು ದೃಢಪಟ್ಟಿದೆ. ಸಾಮಾನ್ಯವಾಗಿ, ನಗದು ರೂಪದಲ್ಲಿ ಸ್ವೀಕರಿಸಲಾದ ಪಾವತಿಯ ನೋಂದಣಿಯನ್ನು ಅಳಿಸಿ ಹಾಕಲಾಗಿದೆ. ಏಕೆಂದರೆ, ಆದಾಯ ತೆರಿಗೆ ವಿಭಾಗಕ್ಕೆ ನಗದು ವಹಿವಾಟು ಟ್ರಾ್ಯಕ್ ಮಾಡುವುದು ಕಷ್ಟಸಾಧ್ಯ. ಅಲ್ಲದೆ, ಹಲವು ಪ್ರಕರಣಗಳಲ್ಲಿ ಕೆಲ ಆಯ್ದ ದಿನಾಂಕಗಳ ಎಲ್ಲ ಬಿಲ್​ಗಳ ಎಂಟ್ರಿಯನ್ನು ಡಿಲೀಟ್ ಮಾಡಲಾಗಿದೆ. ಕೆಲ ಹೋಟೆಲ್​ಗಳ ಆಯ್ದ ಕ್ಯಾಶ್ ಇನ್​ವಾಯ್ಸ್​ಗಳನ್ನು ಅಳಿಸಿ ಹಾಕಿವೆ.

ಏನಿದು ಪ್ರಕರಣ?

ಹೈದರಾಬಾದ್​ನ ಕೆಲವು ಪ್ರಸಿದ್ಧ ಬಿರಿಯಾನಿ ಹೋಟೆಲ್​ಗಳು ದಿನಕ್ಕೆ ಲಕ್ಷಾಂತರ ರೂಪಾಯಿ ವ್ಯವಹಾರ ಮಾಡುತ್ತಿದ್ದರೂ, ತೆರಿಗೆ ಪಾವತಿಸುವಾಗ ಮಾತ್ರ ಅತಿ ಕಡಿಮೆ ಆದಾಯ ತೋರಿಸುತ್ತಿದ್ದವು. ಗ್ರಾಹಕರಿಂದ ಹಣವನ್ನು ಡಿಜಿಟಲ್ ಪಾವತಿ (ಯುಪಿಐ/ಕಾರ್ಡ್) ಮೂಲಕ ಪಡೆಯುವ ಬದಲು ಹೆಚ್ಚಾಗಿ ನಗದು ರೂಪದಲ್ಲಿ ಪಡೆಯಲಾಗುತ್ತಿರುವುದು ತನಿಖೆಯಲ್ಲಿ ದೃಢಪಟ್ಟಿದೆ. 2019-20ರಿಂದ 2025-26ರವರೆಗೆ ಕನಿಷ್ಠ 70 ಸಾವಿರ ಕೋಟಿ ರೂಪಾಯಿ ಮೌಲ್ಯದ ಬಿರಿಯಾನಿ ಮಾರಾಟವನ್ನು ಮರೆಮಾಚಲಾಗಿದೆ.

ರಾಜ್ಯವಾರು ವಂಚನೆ

• ರಾಜ್ಯ ತೆರಿಗೆ ವಂಚನೆ ಮೊತ್ತ
• ಆಂಧ್ರಪ್ರದೇಶ 2,500 ಕೋಟಿ ರೂ.
• ಕರ್ನಾಟಕ 2000 ಕೋಟಿ ರೂ.
• ತೆಲಂಗಾಣ 1,500 ಕೋಟಿ ರೂ.
• ತಮಿಳುನಾಡು 1200 ಕೋಟಿ ರೂ.

ವಂಚನೆ ಬೆಳಕಿಗೆ ಬಂದಿದ್ದು ಹೇಗೆ?

ಆದಾಯ ತೆರಿಗೆ ಇಲಾಖೆಯು ಕೇವಲ ಹೋಟೆಲ್ ನೀಡಿದ ದಾಖಲೆಗಳನ್ನು ನಂಬದೆ, ಎಐ ಟೂಲ್​ಗಳ ಸಹಾಯದಿಂದ ‘ಪರೋಕ್ಷ ದತ್ತಾಂಶ’ಗಳನ್ನು (Indirect Data) ವಿಶ್ಲೇಷಿಸಿತು. ಹೋಟೆಲ್​ಗೆ ಸರಬರಾಜಾಗುವ ಅಕ್ಕಿ, ಮಾಂಸ, ಎಣ್ಣೆ ಮತ್ತು ಮಸಾಲೆ ಪದಾರ್ಥಗಳ ಪ್ರಮಾಣವನ್ನು ಎಐ ಟೂಲ್ ಪರಿಶೀಲಿಸಿತು. ಈ ಸಂದರ್ಭದಲ್ಲಿ ಎಐ ಟೂಲ್ ಒಂದು ಸರಳ ಪ್ರಶ್ನೆ ಕೇಳಿತು- ‘ನೀವು ಕೇವಲ 200 ಪ್ಲೇಟ್ ಬಿರಿಯಾನಿ ಮಾರಾಟ ಮಾಡಿದ್ದರೆ, 500 ಕೆಜಿ ಮಾಂಸ ಮತ್ತು 300 ಕೆಜಿ ಅಕ್ಕಿ ಏಕೆ ಖರೀದಿಸಿದ್ದೀರಿ?’ ಈ ಒಂದು ತಾಳೆಯಾಗದ ಅಂಶವೇ ದೊಡ್ಡ ಹಗರಣವನ್ನು ಬಯಲು ಮಾಡಿತು.

ಲೆಕ್ಕಪತ್ರದ ಕೈಚಳಕ

ಹೋಟೆಲ್ ಮಾಲೀಕರು ಮಾರಾಟವಾದ ಬಿರಿಯಾನಿ ಪ್ರಮಾಣವನ್ನು ಲೆಕ್ಕಪತ್ರದಲ್ಲಿ ಮರೆಮಾಚುತ್ತಿದ್ದರು. ಉದಾ ಹರಣೆಗೆ, ದಿನಕ್ಕೆ 1,000 ಪ್ಲೇಟ್ ಮಾರಾಟವಾದರೆ, ದಾಖಲೆಗಳಲ್ಲಿ ಕೇವಲ 200 ಪ್ಲೇಟ್ ಎಂದು ತೋರಿಸಿ ತೆರಿಗೆ ವಂಚಿಸುತ್ತಿದ್ದರು.

ಆದಾಯ ತೆರಿಗೆ ಇಲಾಖೆ ಎದುರಿಸುತ್ತಿರುವ ಸವಾಲುಗಳು

• ನಗದು ವಹಿವಾಟು: ಇಂದಿಗೂ ಸಣ್ಣ ಮತ್ತು ಮಧ್ಯಮ ಹೋಟೆಲ್​ಗಳಲ್ಲಿ ಬಹುಪಾಲು ವ್ಯವಹಾರ ನಗದು ರೂಪದಲ್ಲಿ ನಡೆಯುತ್ತದೆ. ಡಿಜಿಟಲ್ ದಾಖಲೆ ಇಲ್ಲದಿದ್ದಾಗ ವಂಚನೆ ಪತ್ತೆ ಹಚ್ಚುವುದು ಕಷ್ಟ.
• ಡೇಟಾ ಗೋಪ್ಯತೆ: ವೈಯಕ್ತಿಕ ಮತ್ತು ವ್ಯವಹಾರಿಕ ಡೇಟಾವನ್ನು ವಿಶ್ಲೇಷಿಸುವಾಗ ಕಾನೂನಾತ್ಮಕ ಅಡೆತಡೆಗಳು ಎದುರಾಗುತ್ತವೆ.
• ತಂತ್ರಜ್ಞಾನದ ಮೇಲ್ದರ್ಜೆ: ವಂಚಕರು ಕೂಡ ಎಐ ಬಳಸಿ ನಕಲಿ ಇನ್ವಾಯ್ಸ್ ಸೃಷ್ಟಿಸುವ ಮೂಲಕ ತಂತ್ರಜ್ಞಾನವನ್ನು ಮರೆಮಾಚಲು ಪ್ರಯತ್ನಿಸುತ್ತಾರೆ. ಇವರಿಗಿಂತ ಒಂದು ಹೆಜ್ಜೆ ಮುಂದೆ ಇರುವುದು ಇಲಾಖೆಗೆ ಸವಾಲಾಗಿದೆ.
• ಸಿಬ್ಬಂದಿ ತರಬೇತಿ: ಅತ್ಯಾಧುನಿಕ ಎಐ ಸಾಫ್ಟ್ ವೇರ್​ಗಳನ್ನು ನಿರ್ವಹಿಸಲು ಇಲಾಖೆಯ ಎಲ್ಲ ಸಿಬ್ಬಂದಿಗೂ ಉನ್ನತ ಮಟ್ಟದ ತಾಂತ್ರಿಕ ಜ್ಞಾನದ ಅವಶ್ಯಕತೆಯಿದೆ.

ವಂಚನೆ ಪತ್ತೆಗೆ ಬಳಸಿದ ಎಐ ಟೂಲ್​ಗಳು ಮತ್ತು ತಂತ್ರಜ್ಞಾನ

ಆದಾಯ ತೆರಿಗೆ ಇಲಾಖೆಯು ಪ್ರಮುಖವಾಗಿ ‘ಪ್ರೊಜೆಕ್ಟ್ ಇನ್​ಸೈಟ್’ ಎಂಬ ಯೋಜನೆಯಡಿ ಸುಧಾರಿತ ಎಐ ಸಾಧನಗಳನ್ನು ಬಳಸುತ್ತಿದೆ. ‘ಇನ್​ಸೈಟ್ ಪೋರ್ಟಲ್’ ತೆರಿಗೆದಾರರ ಪ್ಯಾನ್ ಕಾರ್ಡ್ ಅನ್ನು ಸಾಮಾಜಿಕ ಜಾಲತಾಣಗಳು, ಬ್ಯಾಂಕ್ ವಹಿವಾಟು ಮತ್ತು ಜೀವನಶೈಲಿಯೊಂದಿಗೆ ಲಿಂಕ್ ಮಾಡುತ್ತದೆ.

Machine Learning Algorithms: ಇವುಗಳು ವಹಿವಾಟಿನ ಮಾದರಿಗಳನ್ನು ಗುರುತಿಸುತ್ತವೆ. ಅಸಹಜವಾದ ಖರ್ಚು ಅಥವಾ ಕಡಿಮೆ ಆದಾಯದ ವರದಿ ಕಂಡುಬಂದಾಗ ಇವು ಎಚ್ಚರಿಕೆ ನೀಡುತ್ತವೆ.

Big Data Analytics: ಕೋಟಿಗಟ್ಟಲೆ ವಹಿವಾಟುಗಳನ್ನು ಕ್ಷಣಾರ್ಧದಲ್ಲಿ ಸ್ಕಾ್ಯನ್ ಮಾಡಲು ಇದನ್ನು ಬಳಸಲಾಗುತ್ತದೆ.

ಡೇಟಾ ಅನಲಿಟಿಕ್ಸ್ ಪಾತ್ರ: ಡೇಟಾ ಅನಲಿಟಿಕ್ಸ್ ‘ಡಿಜಿಟಲ್ ಪತ್ತೇದಾರಿ’ಯಂತೆ ಕೆಲಸ ಮಾಡುತ್ತದೆ. ಗ್ಯಾಸ್ ಸಿಲಿಂಡರ್ ಬಳಕೆ, ವಿದ್ಯುತ್ ಬಿಲ್, ಹೋಟೆಲ್ ಮಾಲೀಕನ ಜಿಎಸ್​ಟಿ ರಿಟರ್ನ್ಸ್ ಮತ್ತು ಹೋಟೆಲ್​ನ ಆನ್​ಲೈನ್ ಡೆಲಿವರಿ ಡೇಟಾವನ್ನು ಸಂಗ್ರಹಿಸಲಾ ಗುತ್ತದೆ. ಹೋಟೆಲ್ ತೋರಿಸಿದ ಆದಾಯ ಮತ್ತು ಖರ್ಚುಗಳನ್ನು ಎಐ ಹೋಲಿಕೆ ಮಾಡುತ್ತದೆ.

Predictive Modeling: ನಿರ್ದಿಷ್ಟ ಪ್ರಮಾಣದ ಕಚ್ಚಾ ವಸ್ತುಗಳಿಂದ ಎಷ್ಟು ಬಿರಿಯಾನಿ ತಯಾರಿಸಬಹುದು ಮತ್ತು ಎಷ್ಟು ಲಾಭ ಬರಬೇಕು ಎಂಬುದನ್ನು ಎಐ ಲೆಕ್ಕಾಚಾರ ಮಾಡುತ್ತದೆ. ಒಂದು ವೇಳೆ ಹೋಟೆಲ್ ತೋರಿಸಿದ ಲಾಭವು ಎಐ ಲೆಕ್ಕಾಚಾರಕ್ಕಿಂತ ತೀರಾ ಕಡಿಮೆಯಿದ್ದರೆ, ಅದು ವಂಚನೆ ಎಂದು ಸಾಬೀತಾಗುತ್ತದೆ.

ತನಿಖೆಯಲ್ಲಿ ಸಿಕ್ಕಿದ್ದೇನು?

• ವಿಶ್ಲೇಷಣೆಗೆ ಒಳಪಡಿಸಿದ ಡೇಟಾ 60 ಟೆರಾಬೈಟ್ (ಟಿಬಿ)
• ಜಿಎಸ್​ಟಿ ಸಂಖ್ಯೆ ಮತ್ತು ಆನ್​ಲೈನ್ ಪಬ್ಲಿಕ್ ರೆಕಾರ್ಡ್ ಮೂಲಕ ಹೋಟೆಲ್​ಗಳನ್ನು ಪತ್ತೆ ಹಚ್ಚಲಾಗಿದೆ. ತನಿಖೆ ಮೊದಲು ಹೈದರಾಬಾದ್, ವಿಶಾಖಪಟ್ಟಣಂ ಮತ್ತು ಸುತ್ತಮುತ್ತಲ ನಗರಗಳಲ್ಲಿ ಆರಂಭವಾಯಿತು. ಬಳಿಕ, ದೇಶಾದ್ಯಂತ ವಿಸ್ತರಿಸಲಾಗಿದೆ.
• 2019-20ರಿಂದ 2025-26ರ ಡೇಟಾವನ್ನು ವಿಶ್ಲೇಷಿಸಲಾಗಿದ್ದು, ಈ ಅವಧಿಯಲ್ಲಿ 1.77 ಲಕ್ಷ ಹೋಟೆಲ್​ಗಳಲ್ಲಿ 2.43 ಲಕ್ಷ ಕೋಟಿ ರೂ. ಮೌಲ್ಯದ ಬಿರಿಯಾನಿ ಮಾರಾಟವಾಗಿದೆ. ಆದರೆ, ಕನಿಷ್ಠ 27%ರಷ್ಟು ವ್ಯವಹಾರವನ್ನು ಮರೆಮಾಚಲಾಗಿದೆ.
• 13000 ಕೋಟಿ ರೂ. ಬಿಲ್​ಗಳನ್ನು ಡಿಲೀಟ್ ಅಥವಾ ಮಾರ್ಪಾಡು ಮಾಡಿರುವುದು ದೃಢಪಟ್ಟಿದೆ. 
• ಗ್ರಾಹಕರು ಪಾವತಿಸಿದ ಬಳಿಕ (ಕಡಿಮೆ ವ್ಯವಹಾರ ತೋರಿಸಲು) 19,400 ಕೋಟಿ ರೂ. ಮೌಲ್ಯದ ಬಿಲ್​ಗಳನ್ನು ತಿದ್ದಲಾಗಿದೆ.
• ತೆಲಂಗಾಣ ಮತ್ತು ಆಂಧ್ರಪ್ರದೇಶ- ಈ ಎರಡು ರಾಜ್ಯಗಳಲ್ಲೇ 3,734 ಪ್ಯಾನ್ ಕಾರ್ಡ್​ಗಳ ವಹಿವಾಟನ್ನು ಪರಿಶೀಲಿಸಲಾಗಿದೆ. ಈ ಪೈಕಿ 2,650 ಪ್ಯಾನ್​ಗಳ ಮೂಲಕ ನಡೆದ ವಹಿವಾಟು ಅನುಮಾನಾಸ್ಪದವಾಗಿ ಕಂಡುಬಂದಿದೆ. ಈ ಎರಡೂ ರಾಜ್ಯಗಳಲ್ಲೇ 5,141 ಕೋಟಿಯ ವಹಿವಾಟನ್ನು ಮರೆಮಾಚಲಾಗಿದೆ. 684 ಪ್ರಕರಣಗಳಲ್ಲಿ ಮರೆಮಾಚಲಾದ ಅಥವಾ ಮುಚ್ಚಿಡಲಾದ ವಹಿವಾಟಿನ ಮೊತ್ತ 1 ಕೋಟಿಗಿಂತ ಅಧಿಕ.
• ದಾಖಲೆಯಲ್ಲಿ ಬಿಲ್ಲಿಂಗ್ನ 13-14% ಭಾಗವನ್ನು ತಿದ್ದಲಾಗಿದೆ ಅಥವಾ ಡಿಲೀಟ್ ಮಾಡಲಾಗಿದೆ.