91 ಲಕ್ಷ ಹೆಸರುಗಳ ಕಟ್, 93% ಮತದಾನದ ದಾಖಲೆ! ಇದು ಪೌರತ್ವದ ಆತಂಕವೋ ಅಥವಾ ಬದಲಾವಣೆಯ ಅಲೆಯೋ..? ಬಂಗಾಳದ ಅಸಲಿ ಚಿತ್ರಣ ಇಲ್ಲಿದೆ! | West Bengal Election

ಈ ಹಿಂದೆ ಕೋವಿಡ್-19 ಸಾಂಕ್ರಾಮಿಕದ ನಡುವೆ ನಡೆದ 2021ರ ಚುನಾವಣೆಯಲ್ಲಿ 82.30% ಮತದಾನವಾಗಿತ್ತು. ಅಂದು ಆರೋಗ್ಯದ ಕಾಳಜಿ ಮತ್ತು ಆಡಳಿತಾರೂಢ ಟಿಎಂಸಿ ಹಾಗೂ ಬಿಜೆಪಿ ನಡುವಿನ ತೀವ್ರ ಪೈಪೋಟಿಯ ನಡುವೆಯೂ 7.34 ಕೋಟಿ ಮತದಾರರಲ್ಲಿ 5.99 ಕೋಟಿ ಜನರು ಮತ ಚಲಾಯಿಸಿದ್ದರು. ಪರಿಣಾಮವಾಗಿ ಟಿಎಂಸಿ 213 ಸ್ಥಾನಗಳೊಂದಿಗೆ ಅಧಿಕಾರ ಉಳಿಸಿಕೊಂಡಿತ್ತು.

ಈ ಬಾರಿ ಮೊದಲ ಹಂತದಲ್ಲೇ 3.6 ಕೋಟಿ ನೋಂದಾಯಿತ ಮತದಾರರಲ್ಲಿ 92.9% ಜನರು ತಮ್ಮ ಹಕ್ಕು ಚಲಾಯಿಸಿರುವುದು ಹೊಸ ಇತಿಹಾಸ ಸೃಷ್ಟಿಸಿದೆ. ಈ ಬೆಳವಣಿಗೆಯನ್ನು ಭಾರತದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಮುಕ್ತಕಂಠದಿಂದ ಶ್ಲಾಘಿಸಿದ್ದು, ಪಶ್ಚಿಮ ಬಂಗಾಳ ಮತ್ತು ತಮಿಳುನಾಡಿನ ಪ್ರತಿಯೊಬ್ಬ ಮತದಾರರಿಗೂ ಚುನಾವಣಾ ಆಯೋಗದ ಪರವಾಗಿ ನಮನ ಸಲ್ಲಿಸಿದ್ದಾರೆ.

ಈ ಹೆಚ್ಚಿನ ಮತದಾನಕ್ಕೆ ಚುನಾವಣಾ ಆಯೋಗ ನಡೆಸಿದ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಮುಖ ಕಾರಣವೆಂದು ವಿಶ್ಲೇಷಿಸಲಾಗುತ್ತಿದೆ. ಈ ಪ್ರಕ್ರಿಯೆಯು ವಿವಾದಕ್ಕೆ ಕಾರಣವಾಗಿದ್ದರೂ, ಸುಮಾರು 91 ಲಕ್ಷ ಹೆಸರುಗಳನ್ನು ಪಟ್ಟಿಯಿಂದ ಅಳಿಸಿಹಾಕಲಾಗಿತ್ತು. ಇದರಲ್ಲಿ ಸತ್ತವರು, ಸ್ಥಳಾಂತರಗೊಂಡವರು ಮತ್ತು ನ್ಯಾಯಾಂಗ ತೀರ್ಪಿನ ಬಳಿಕ ಅನರ್ಹರಾದವರ ಹೆಸರುಗಳು ಸೇರಿದ್ದವು.

ಒಟ್ಟಾರೆ ಮತದಾರರ ಸಂಖ್ಯೆ 7.6 ಕೋಟಿಯಿಂದ 6.8 ಕೋಟಿಗೆ ಇಳಿಕೆಯಾದದ್ದು ಶೇಕಡಾವಾರು ಮತದಾನದ ಏರಿಕೆಗೆ ಒಂದು ತಾಂತ್ರಿಕ ಕಾರಣವಾಗಿದೆ. ಮಾಜಿ ಮುಖ್ಯ ಚುನಾವಣಾ ಆಯುಕ್ತ ಎಸ್.ವೈ. ಖುರೈಶಿ ಹೇಳುವಂತೆ, ಈ 70 ಲಕ್ಷ ಹೆಸರುಗಳನ್ನು ಅಳಿಸದಿದ್ದರೆ ಮತದಾನದ ಪ್ರಮಾಣವು ವಾಸ್ತವವಾಗಿ 83% ರಷ್ಟಿರುತ್ತಿತ್ತು. ಇದರ ಜೊತೆಗೆ ಮುರ್ಷಿದಾಬಾದ್, ಮಾಲ್ಡಾ ಮತ್ತು ನಾಡಿಯಾದಂತಹ ಜಿಲ್ಲೆಗಳಲ್ಲಿ ಅತಿ ಹೆಚ್ಚು ಹೆಸರು ಅಳಿಸುವಿಕೆ ದಾಖಲಾಗಿದ್ದು, ಇದು ಮತದಾರರಲ್ಲಿ ಒಂದು ರೀತಿಯ ಆತಂಕ ಮೂಡಿಸಿದೆ.

ಈ ಬೃಹತ್ ಮತದಾನದ ಹಿಂದೆ ಪೌರತ್ವ ಮತ್ತು ಮತದಾನದ ಹಕ್ಕನ್ನು ಕಳೆದುಕೊಳ್ಳುವ ಭಯವು ಪ್ರಮುಖ ಪಾತ್ರ ವಹಿಸಿದೆ ಎನ್ನಲಾಗುತ್ತಿದೆ, ಮತದಾರರ ಪಟ್ಟಿಯಿಂದ ಹೆಸರು ಕೈಬಿಟ್ಟರೆ ಭವಿಷ್ಯದಲ್ಲಿ ಎನ್‌ಆರ್‌ಸಿ (NRC) ಮೂಲಕ ಪೌರತ್ವ ಕಸಿದುಕೊಳ್ಳಬಹುದು ಎಂಬ ಆತಂಕವನ್ನು ರಾಜಕೀಯ ಪಕ್ಷಗಳು ಬಿತ್ತಿದ್ದವು. ಈ ಭಯದಿಂದಾಗಿ ದೆಹಲಿ, ಮುಂಬೈ ಮತ್ತು ಬೆಂಗಳೂರಿನಂತಹ ನಗರಗಳಲ್ಲಿ ಕೆಲಸ ಮಾಡುತ್ತಿದ್ದ ವಲಸೆ ಕಾರ್ಮಿಕರು ಹಿಂಡುಹಿಂಡಾಗಿ ರಾಜ್ಯಕ್ಕೆ ಮರಳಿ ಬಂದು ಮತ ಚಲಾಯಿಸಿದ್ದಾರೆ ಎಂದು ವರದಿಯಾಗಿದೆ.

ವಿಶೇಷವಾಗಿ ಮುರ್ಷಿದಾಬಾದ್‌ನ ಕೆಲವು ಕ್ಷೇತ್ರಗಳಲ್ಲಿ 96% ಕ್ಕಿಂತ ಹೆಚ್ಚು ಮತದಾನವಾಗಿರುವುದು ಈ ಅಸ್ತಿತ್ವದ ಹೋರಾಟಕ್ಕೆ ಸಾಕ್ಷಿಯಾಗಿದ್ದು, ಜಿಲ್ಲೆಯಲ್ಲಿ ನಡೆದ ಎಸ್‌ಐಆರ್ ಪ್ರಕ್ರಿಯೆಯ ಅಂತಿಮ ಸುತ್ತಿನಲ್ಲಿ ಅತಿ ಹೆಚ್ಚು ಮತದಾರರ ಹೆಸರುಗಳ ಡಿಲೀಟ್ ಆಗಿವೆ. ಮೊದಲ ಹಂತದ ಚುನಾವಣೆ ನಡೆದ ಜಿಲ್ಲೆಯ ಪ್ರಮುಖ ಕ್ಷೇತ್ರಗಳಾದ ಸಮ್ಸರ್‌ಗಂಜ್, ಲಾಲ್‌ಗೋಲಾ, ಭಾಗವಂಗೋಲಾ ಮತ್ತು ರಘುನಾಥ್‌ಗಂಜ್‌ಗಳಲ್ಲಿ ತಲಾ 96% ಕ್ಕಿಂತ ಹೆಚ್ಚು ಮತದಾನವಾಗಿದೆ. ಇದು ಅಸಾಧಾರಣವಾಗಿ ಹೆಚ್ಚಿನ ಮತದಾನದ ಪ್ರಮಾಣವಾಗಿದ್ದು, ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.

ಗಮನಾರ್ಹ ವಿಷಯವೆಂದರೆ, ಈ ನಾಲ್ಕೂ ಕ್ಷೇತ್ರಗಳಲ್ಲಿ ಎಸ್‌ಐಆರ್ ಪ್ರಕ್ರಿಯೆಯ ಸಮಯದಲ್ಲಿ ಸುಮಾರು 46,100 ರಿಂದ 74,775 ರಷ್ಟು ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿತ್ತು. ತಮ್ಮ ಅಸ್ತಿತ್ವ ಮತ್ತು ಹಕ್ಕನ್ನು ಉಳಿಸಿಕೊಳ್ಳಬೇಕೆಂಬ ಜನರ ಆತಂಕವು ಈ ಅತಿ ಹೆಚ್ಚಿನ ಮತದಾನಕ್ಕೆ ನೇರ ಕಾರಣವಾಗಿರುವ ಸಾಧ್ಯತೆಯಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಇದರ ಜೊತೆಗೆ ಸುಮಾರು 2.4 ಲಕ್ಷ ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಗಳ (CAPF) ನಿಯೋಜನೆಯು ಜನರಿಗೆ ಸುರಕ್ಷಿತವಾಗಿ ಬೂತ್‌ಗಳಿಗೆ ಬಂದು ಮತ ಚಲಾಯಿಸಲು ದಾರಿ ಮಾಡಿಕೊಟ್ಟಿದೆ.

ರಾಜಕೀಯವಾಗಿ ಈ ಹೆಚ್ಚಿನ ಮತದಾನ ಯಾರಿಗೆ ಲಾಭ ತರಲಿದೆ ಎಂಬ ಪ್ರಶ್ನೆಗೆ ಉಭಯ ಪಕ್ಷಗಳೂ ತಮ್ಮದೇ ಆದ ವ್ಯಾಖ್ಯಾನ ನೀಡುತ್ತಿವೆ. ಟಿಎಂಸಿ ನಾಯಕ ಕುನಾಲ್ ಘೋಷ್ ಇದು ಮಮತಾ ಬ್ಯಾನರ್ಜಿ ಸರ್ಕಾರಕ್ಕೆ ಸಿಕ್ಕ ಬೆಂಬಲ ಎಂದು ಹೇಳುತ್ತಾ 125ಕ್ಕೂ ಹೆಚ್ಚು ಸ್ಥಾನ ಗೆಲ್ಲುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಮತ್ತೊಂದೆಡೆ, ಬಿಜೆಪಿ ಇದನ್ನು ಬದಲಾವಣೆಯ ಸಂಕೇತವೆಂದು ನೋಡುತ್ತಿದೆ.

ಸಾಮಾನ್ಯವಾಗಿ ಹೆಚ್ಚಿನ ಮತದಾನವು ಆಡಳಿತ ವಿರೋಧಿ ಅಲೆಯ ಸಂಕೇತವೆಂದು ಭಾವಿಸಲಾಗುತ್ತದೆಯಾದರೂ, ಕಳೆದ ದಶಕದಲ್ಲಿ ಅನೇಕ ರಾಜ್ಯಗಳಲ್ಲಿ ಆಡಳಿತಾರೂಢ ಪಕ್ಷಗಳೂ ಇಂತಹ ಸಂದರ್ಭದಲ್ಲಿ ಲಾಭ ಪಡೆದಿರುವ ಉದಾಹರಣೆಗಳಿವೆ. ಆದ್ದರಿಂದ, ಈ ದಾಖಲೆ ಮತದಾನವು ಆಡಳಿತ ವಿರೋಧಿ ಅಲೆಯೋ ಅಥವಾ ಆಡಳಿತದ ಪರವಾದ ಬಲವರ್ಧನೆಯೋ ಎಂಬುದು ಮೇ 4ರ ಫಲಿತಾಂಶದಿಂದ ಸ್ಪಷ್ಟವಾಗಲಿದೆ(ಏಜೆನ್ಸೀಸ್​​).