ಮೈಲಿಗಲ್ಲುಗಳಲ್ಲಿ ನೀವಿದನ್ನು ಗಮನಿಸಿದ್ದೀರಾ? ಈ ಬಣ್ಣಗಳ ಹಿಂದಿದೆ ನಿಮಗೆ ಗೊತ್ತಿರದ ರೋಚಕ ಸಂಗತಿ | Coloured Milestones

Milestones: ಹೆದ್ದಾರಿಗಳಲ್ಲಿ ಅಳವಡಿಸಲಾದ ಕಿಲೋಮೀಟರ್ ಸೂಚಿಸುವ ಇಂತಹ ಮೈಲಿಗಲ್ಲುಗಳನ್ನು ಪ್ರತಿಯೊಬ್ಬರು ನೋಡಿಯೇ ನೋಡಿರುತ್ತಾರೆ. ಯಾವುದಾದರೂ ಊರಿಂದ ಊರಿಗೆ ಪ್ರಯಾಣಿಸುವಾಗ ದಾರಿಯೇ ಮಧ್ಯೆ ಈ ರೀತಿಯ ಮೈಲಿಗಲ್ಲುಗಳು ಊರಿನ ದೂರವನ್ನು ಅಳೆದು, ಇಷ್ಟೇ ದೂರವಿದೆ ಎಂದು ಹೇಳುತ್ತದೆ. ಕಿಲೋಮೀಟರ್​ ಹಾಗೂ ಆಯಾ ಸ್ಥಳದ ಹೆಸರನ್ನು ಸೂಚಿಸುವ ಈ ಮೈಲಿಗಲ್ಲುಗಳಲ್ಲಿರುವ ಬಣ್ಣಗಳು ಏನು ಹೇಳುತ್ತವೆ? ಯಾವ ಕಾರಣಕ್ಕಾಗಿ ಇದರ ಮೇಲೆ ವಿವಿಧ ಬಣ್ಣಗಳನ್ನು ಬಳೆಯಲಾಗಿದೆ? ಇದರ ಹಿಂದಿರುವ ಉದ್ದೇಶವೇನು ಎಂಬ ಸಂಗತಿ ಬಹುತೇಕರಿಗೆ ಇಂದಿಗೂ ಗೊತ್ತಿಲ್ಲ.

ಸಾಮಾನ್ಯವಾಗಿ ಹೊರಗಿನ ರಾಜ್ಯಗಳ ಮೈಲಿಗಲ್ಲುಗಳ ಮೇಲೆ ಇಂಗ್ಲಿಷ್​ ಅಥವಾ ಹಿಂದಿಯಲ್ಲಿ ಊರಿನ ಹೆಸರನ್ನು ಬರೆಯಲಾಗಿರುತ್ತದೆ. ಕೆಲವು ರಾಜ್ಯಗಳಲ್ಲಿ ಮಾತ್ರ ಅಲ್ಲಿನ ಭಾಷೆಯಲ್ಲಿಯೇ ಅಕ್ಷರಗಳನ್ನು ಬರೆದು, ಕಿ.ಮೀ ಸೂಚಿಸಲಾಗುತ್ತದೆ. ಕೇವಲ ರಾಜ್ಯದಿಂದ ರಾಜ್ಯಕ್ಕೆ ಮಾತ್ರ ಸೀಮತವಾಗದ ಈ ಮೈಲಿಗಲ್ಲುಗಳು, ತಾಲೂಕು, ಗ್ರಾಮಗಳ ದೂರವನ್ನು ಸಹ ತಿಳಿಸುತ್ತದೆ. ನಮ್ಮ ದೇಶವು 58.98 ಲಕ್ಷ ಕಿಲೋಮೀಟರ್‌ಗಳ ವಿಸ್ತಾರವಾದ ರಸ್ತೆಗಳನ್ನು ಹೊಂದಿದ್ದು, ಗ್ರಾಮೀಣ ರಸ್ತೆ, ರಾಷ್ಟ್ರೀಯ ಹೆದ್ದಾರಿ, ರಾಜ್ಯ ಹೆದ್ದಾರಿ ಮತ್ತು ಎಕ್ಸ್‌ಪ್ರೆಸ್‌ವೇಗಳನ್ನು ಒಳಗೊಂಡಿವೆ.

ಕೇಸರಿ ಬಣ್ಣದಲ್ಲಿ ಚಿತ್ರಿಸಲಾದ ಮೈಲಿಗಲ್ಲು ನೀವು ಗ್ರಾಮೀಣ ರಸ್ತೆಯಲ್ಲಿ ಪ್ರಯಾಣಿಸುತ್ತಿದ್ದೀರಿ ಎಂದು ಹೇಳುತ್ತದೆ. ಪ್ರಧಾನ ಮಂತ್ರಿ ಗ್ರಾಮ ಸಡಕ್ ಯೋಜನೆ (PMGSY) ಮತ್ತು ಜವಾಹರ್ ರೋಜ್‌ಗಾರ್ ಯೋಜನೆ (JRY) ನಂತಹ ಮಹತ್ವಾಕಾಂಕ್ಷೆಯ ಉಪಕ್ರಮಗಳ ಅಡಿಯಲ್ಲಿ ನಿರ್ಮಿಸಲಾದ ಗ್ರಾಮೀಣ ರಸ್ತೆಗಳು, 3.93 ಲಕ್ಷ ಕಿ.ಮೀ. ಉದ್ದವನ್ನು ವ್ಯಾಪಿಸಿವೆ. ಇವು ನೀವು ಹಳ್ಳಿ ಮಾರ್ಗಗಳಲ್ಲಿ ಸಾಗುತ್ತಿದ್ದೀರಿ ಎಂಬುದನ್ನು ತಿಳಿಸುತ್ತದೆ.

ಹಳದಿ ಬಣ್ಣದ ಮೈಲಿಗಲ್ಲು ನೀವು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಪ್ರಯಾಣಿಸುತ್ತಿದ್ದೀರಿ ಎಂದು ಹೇಳುತ್ತದೆ. ಅವು ವಿವಿಧ ನಗರಗಳು ಮತ್ತು ರಾಜ್ಯಗಳ ಸಂಪರ್ಕ ಇರುವುದನ್ನು ಪ್ರತಿನಿಧಿಸುತ್ತವೆ.

ಕಪ್ಪು, ನೀಲಿ ಮತ್ತು ಬಿಳಿ ಬಣ್ಣಗಳನ್ನು ಹೊಂದಿರುವ ಮೈಲಿಗಲ್ಲುಗಳು ನೀವು ನಗರ ಅಥವಾ ಜಿಲ್ಲೆಯನ್ನು ಸಂಪರ್ಕಿಸುವ ರಸ್ತೆಗಳಲ್ಲಿ ಪ್ರಯಾಣಿಸುತ್ತಿದ್ದೀರಿ ಎಂದು ಸೂಚಿಸುತ್ತದೆ. ಪ್ರಸ್ತುತ, ಭಾರತದಲ್ಲಿ 5,61,940 ಕಿ.ಮೀ ಉದ್ದದ ಜಿಲ್ಲಾ ರಸ್ತೆಗಳ ಜಾಲವಿದೆ.

ಹಸಿರು ಬಣ್ಣವನ್ನು ಹೊಂದಿರುವ ಮೈಲಿಗಲ್ಲುಗಳನ್ನು ರಾಜ್ಯ ಹೆದ್ದಾರಿಗಳಲ್ಲಿ ಅಳವಡಿಸಲಾಗಿರುತ್ತದೆ. ಅವು ರಾಜ್ಯದ ವಿವಿಧ ನಗರಗಳನ್ನು ಸಂಪರ್ಕಿಸುತ್ತವೆ ಮತ್ತು 2016ರಲ್ಲಿ ನೀಡಲಾದ ದತ್ತಾಂಶದ ಪ್ರಕಾರ, 1,76,166 ಕಿ.ಮೀ ಉದ್ದವನ್ನು ಈ ಮೈಲಿಗಲ್ಲುಗಳು ವ್ಯಾಪಿಸಿವೆ ಎಂದು ವರದಿಯಾಗಿದೆ,(ಏಜೆನ್ಸೀಸ್).