ವಾಟ್ ಬ್ರೋ.. ಏನಿದು ಬ್ರೋ?: ಸಿಎಂ ವಿಜಯ್ ಕಾಲೆಳೆದ ಸಂಸದ ಎ. ರಾಜಾ! ಮಾಧ್ಯಮಗಳಿಗೆ ಹೆದರಿ ಓಡಿ ಬಂದ್ರಿ ಎಂದು ತೀವ್ರ ವಾಗ್ದಾಳಿ! A. Raja Mocks Cm Vijay

ಸಿಎಂ ವಿಜಯ್ ಅವರ ಇತ್ತೀಚಿನ ನಡೆ ಹಾಗೂ ಭಾಷಣಗಳನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡ ಸಂಸದ ಎ. ರಾಜಾ ಮಾಧ್ಯಮಗಳ ಎದುರು ಹರಿಹಾಯ್ದಿದ್ದಾರೆ. ಅಲ್ಲ ಬ್ರೋ.. ಏನಿದು ಬ್ರೋ ನಡೀತಿರೋದು ಇಲ್ಲಿ ಎಂದಿದ್ದಾರೆ. ಯಾಕೆ ಬ್ರೋ ಹೀಗೆಲ್ಲಾ ಮಾಡ್ತಿದ್ದೀರಾ, ನಮ್ಮ ನಾಯಕ ಎಂ. ಕೆ. ಸ್ಟಾಲಿನ್ ಮತ್ತು ಡಿಎಂಕೆ ಹೆಸರನ್ನು ಜಪಿಸದಿದ್ದರೆ ನಿಮಗೆ ನಿದ್ದೆಯೇ ಬರುವುದಿಲ್ಲವೇ ಎಂದು ರಾಜಾ ಬಹಿರಂಗವಾಗಿ ಅಣಕಿಸಿದ್ದಾರೆ.

ಸಿಎಂ ವಿಜಯ್ ಅವರ ಇತ್ತೀಚಿನ ನವದೆಹಲಿ ಪ್ರವಾಸವನ್ನು ತೀವ್ರವಾಗಿ ಪ್ರಶ್ನಿಸಿರುವ ಎ. ರಾಜಾ, ಅದನ್ನೊಂದು ಸಂವಿಧಾನ ವಿರೋಧಿ ನಡೆ ಎಂದು ಕರೆದಿದ್ದಾರೆ. ನೀವು ದೆಹಲಿಗೆ ಹೋದಾಗ ಕೇವಲ ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರನ್ನು ಮಾತ್ರ ಏಕೆ ಭೇಟಿಯಾದ್ರಿ ಎಂದಿದ್ದಾರೆ. ದೇಶದ ಬೇರೆ ಯಾವುದೇ ಪ್ರಮುಖ ನಾಯಕರನ್ನು ಭೇಟಿಯಾಗುವ ಧೈರ್ಯ ನಿಮಗೇಕೆ ಇರಲಿಲ್ಲ, ಅದಕ್ಕಿಂತ ಮಿಗಿಲಾಗಿ, ದೇಶದ ಪ್ರಧಾನಿಯನ್ನು ಭೇಟಿಯಾದ ನಂತರ ಪ್ರೆಸ್ ಮೀಟ್ ನಡೆಸಿ ಜನರಿಗೆ ಮಾಹಿತಿ ನೀಡುವುದು ಮುಖ್ಯಮಂತ್ರಿಯ ಸಾಂವಿಧಾನಿಕ ಜವಾಬ್ದಾರಿ. ಆದರೆ ವಿಜಯ್ ದೆಹಲಿಯ ಮಾಧ್ಯಮಗಳಿಗೆ ಮುಖ ತೋರಿಸದೆ ಅಡಗಿ ಓಡಿ ಬಂದಿದ್ದೇಕೆ ಎಂದು ಸಾಲು ಸಾಲು ಪ್ರಶ್ನೆಗಳ ಬಾಣ ಬಿಟ್ಟಿದ್ದಾರೆ.

ವಿಧಾನಸಭೆಯಲ್ಲಿ ಹಾಗೂ ಸಚಿವಾಲಯದಲ್ಲಿ ವಿರೋಧ ಪಕ್ಷದ ನಾಯಕರ ಪ್ರಶ್ನೆಗಳಿಗೆ ಉತ್ತರಿಸಲಾಗದೆ ಕಂಪ್ಲೀಟ್ ಮೌನಕ್ಕೆ ಶರಣಾಗುವ ಸಿಎಂ ವಿಜಯ್, ಕೇವಲ ತಿರುಚಿಯ ಸಾರ್ವಜನಿಕ ವೇದಿಕೆಗಳಲ್ಲಿ ನಮ್ಮ ವಿರುದ್ಧ ಇಷ್ಟೊಂದು ಜೋರಾಗಿ ಕಿರುಚಾಡುವುದರ ಹಿಂದೆ ಯಾವ ರಹಸ್ಯ ಅಡಗಿದೆ ಎಂದು ರಾಜಾ ಲೇವಡಿ ಮಾಡಿದ್ದಾರೆ.

ಡಿಎಂಕೆ ಎಂದಿಗೂ ಅಸಂಸದೀಯ ಪದಗಳನ್ನು ಬಳಸುವುದಿಲ್ಲ ಮತ್ತು ಗೌರವ ನೀಡಿದರೆ ಮಾತ್ರ ಗೌರವ ವಾಪಸ್ ನೀಡುತ್ತದೆ ಎಂದು ಎಚ್ಚರಿಸಿರುವ ಎ. ರಾಜಾ ಅವರ ಈ ಹೇಳಿಕೆ, ಮುಂಬರುವ ದಿನಗಳಲ್ಲಿ ತಮಿಳುನಾಡಿನಾದ್ಯಂತ ಟಿವಿಕೆ ಹಾಗೂ ಡಿಎಂಕೆ ಕಾರ್ಯಕರ್ತರ ನಡುವೆ ಭೀಕರ ಸಂಘರ್ಷಕ್ಕೆ ದಾರಿ ಮಾಡಿಕೊಟ್ಟಿದೆ,(ಏಜೆನ್ಸೀಸ್​).