WestBengal Election: ಬಂಗಾಳದಲ್ಲಿ ಬಿಜೆಪಿ ಗೆದ್ದಿದ್ದಕ್ಕೆ ತಲೆ ಬೋಳಿಸಿಕೊಂಡ ಬಾಂಗ್ಲಾ ವಲಸಿಗ!

ಧೂಪ್ಗುರಿಯ ನಿವಾಸಿ ಖೋಕೋನ್ ತಾಲೂಕ್ದಾರ್ ಎಂಬುವವರು ಬಿಜೆಪಿ ಜಯಭೇರಿ ಬಾರಿಸಿದ ತಕ್ಷಣ ಸಾರ್ವಜನಿಕವಾಗಿ ತಲೆ ಬೋಳಿಸಿಕೊಂಡಿದ್ದಾರೆ. 1993ರಲ್ಲಿ ಬಾಂಗ್ಲಾದೇಶದಿಂದ ಮುಸ್ಲಿಂ ಮೂಲಭೂತವಾದಿಗಳ ಕಿರುಕುಳ ತಾಳಲಾರದೆ ಭಾರತಕ್ಕೆ ವಲಸೆ ಬಂದಿದ್ದ ಖೋಕೋನ್, ಅಂದಿನಿಂದಲೂ ಬಿಜೆಪಿಯ ಕಟ್ಟಾ ಬೆಂಬಲಿಗರಾಗಿದ್ದರು.

"ಬಾಂಗ್ಲಾದೇಶದಿಂದ ನನ್ನನ್ನು ಹೊರಹಾಕಿದ ದಿನದಿಂದಲೂ ನಾನು ಎದೆಯ ಮೇಲೆ ಬಿಜೆಪಿಯ ಬ್ಯಾಡ್ಜ್ ಧರಿಸುತ್ತಿದ್ದೆ. ಬಂಗಾಳದಲ್ಲಿ ಬಿಜೆಪಿ ಸರ್ಕಾರ ರಚನೆಯಾದ ದಿನ ನಾನು ತಲೆ ಬೋಳಿಸಿಕೊಳ್ಳುತ್ತೇನೆ ಎಂದು ಪ್ರತಿಜ್ಞೆ ಮಾಡಿದ್ದೆ. ಇಂದು ನನ್ನ ಆ ಕನಸು ನನಸಾಗಿದೆ," ಎಂದು ಖೋಕೋನ್ ಭಾವುಕರಾಗಿ ನುಡಿದರು. ಇವರ ಈ ಭಾವನಾತ್ಮಕ ಕ್ಷಣಕ್ಕೆ ಇಡೀ ಧೂಪ್ಗುರಿ ಸಾಕ್ಷಿಯಾಯಿತು.

ಇತ್ತ ಜಲ್ಪೈಗುರಿ ಜಿಲ್ಲೆಯ ಬಿರ್ಪಾರಾದಲ್ಲಿ ರಾಜಕೀಯ ಚಿತ್ರಣ ಸಂಪೂರ್ಣ ಬದಲಾಗಿದೆ. ಬಿರ್ಪಾರಾದ ಹಳೆಯ ಬಸ್ ನಿಲ್ದಾಣದಲ್ಲಿರುವ ಸರ್ಕಾರಿ ಕಟ್ಟಡದ ಮೇಲಿನ ಮಹಡಿಯಲ್ಲಿ ದೀರ್ಘಕಾಲದಿಂದ ತೃಣಮೂಲ ಕಾಂಗ್ರೆಸ್ (TMC) ತನ್ನ ಕಚೇರಿಯನ್ನು ನಡೆಸುತ್ತಿತ್ತು. ಆದರೆ ಸೋಮವಾರ ಬಿಜೆಪಿ ಕಾರ್ಯಕರ್ತರು ಈ ಕಚೇರಿಯ ಮೇಲೆ ಕೇಸರಿ ಧ್ವಜವನ್ನು ಹಾರಿಸಿ ಅದನ್ನು ತಮ್ಮ ವಶಕ್ಕೆ ಪಡೆದಿದ್ದಾರೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಬಿಜೆಪಿ ಮುಖಂಡ ದಿಲೀಪ್ ದಾಸ್, "ನಾವು ಯಾವುದೇ ಕಚೇರಿಯನ್ನು ಆಕ್ರಮಿಸಿಕೊಂಡಿಲ್ಲ. ಇದು ಸರ್ಕಾರಕ್ಕೆ ಸೇರಿದ ಪ್ರಯಾಣಿಕರ ಕಾಯುವ ಕೋಣೆಯಾಗಿತ್ತು. ತೃಣಮೂಲದವರು ಇದನ್ನು ಅಕ್ರಮವಾಗಿ ಆಕ್ರಮಿಸಿಕೊಂಡಿದ್ದರು. ಈಗ ನಾವು ಅದನ್ನು ಸಾರ್ವಜನಿಕರ ಹಿತದೃಷ್ಟಿಯಿಂದ ಖಾಲಿ ಮಾಡಿಸಿದ್ದೇವೆ ಅಷ್ಟೆ," ಎಂದಿದ್ದಾರೆ. ಕುತೂಹಲದ ವಿಷಯವೆಂದರೆ, ದಿಲೀಪ್ ದಾಸ್ ಕೆಲ ದಿನಗಳ ಹಿಂದಷ್ಟೇ ಬಿಜೆಪಿಯಿಂದ ಟಿಎಂಸಿಗೆ ಹೋಗಿ, ಮರುದಿನವೇ ಮರಳಿ ಬಿಜೆಪಿಗೆ ಬಂದಿದ್ದರು!

ಜಲ್ಪೈಗುರಿಯ ಪ್ರತಿಷ್ಠಿತ ಆನಂದ್ ಚಂದ್ರ ಕಾಲೇಜು ಆವರಣದಲ್ಲೂ ಕೇಸರಿ ಹವಾ ಜೋರಾಗಿದೆ. ಈವರೆಗೆ ಟಿಎಂಸಿ ವಿದ್ಯಾರ್ಥಿ ಘಟಕದ ಹಿಡಿತದಲ್ಲಿದ್ದ ಕಾಲೇಜು ಆವರಣವು ಈಗ ಬಿಜೆಪಿ ಕಾರ್ಯಕರ್ತರು ಮತ್ತು ಬೆಂಬಲಿಗರಾದ 'ರಾಮ ಭಕ್ತರ' ನಿಯಂತ್ರಣಕ್ಕೆ ಬಂದಿದೆ. ಇಡೀ ಕಾಲೇಜು ಆವರಣದಲ್ಲಿ ಕೇಸರಿ ಧ್ವಜಗಳು ರಾರಾಜಿಸುತ್ತಿವೆ.

ಈ ದಿಢೀರ್ ಬೆಳವಣಿಗೆಯ ಬಗ್ಗೆ ತೃಣಮೂಲದ ಬ್ಲಾಕ್ ಉಪಾಧ್ಯಕ್ಷ ರಾಜೀವ್ ಮುಖರ್ಜಿ ಅವರನ್ನು ಪ್ರಶ್ನಿಸಿದಾಗ, "ನಾನು ಸದ್ಯ ಊರಿನಲ್ಲಿ ಇಲ್ಲ, ಹಾಗಾಗಿ ಅಲ್ಲಿ ಏನು ನಡೆಯುತ್ತಿದೆ ಎಂಬ ಮಾಹಿತಿ ನನಗಿಲ್ಲ," ಎಂದು ಹೇಳುವ ಮೂಲಕ ಜಾರಿಕೊಂಡಿದ್ದಾರೆ.

ಒಟ್ಟಾರೆಯಾಗಿ, ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬರುತ್ತಿದ್ದಂತೆಯೇ ಹಲವು ವರ್ಷಗಳ ರಾಜಕೀಯ ಸಮೀಕರಣಗಳು ಬದಲಾಗುತ್ತಿವೆ. ಟಿಎಂಸಿ ಭದ್ರಕೋಟೆಗಳು ಒಂದೊಂದಾಗಿ ಕಮಲದ ಮಯವಾಗುತ್ತಿವೆ,(ಏಜೆನ್ಸೀಸ್​).