West Bengal: ಪ್ರಧಾನಿಗೆ ಝಾಲ್ ಮುರಿ ಕೊಟ್ಟಿದ್ದ ವ್ಯಾಪಾರಿ ವಿಕ್ರಮ್ ಸೌಗೆ ಪಾಕ್, ಬಾಂಗ್ಲಾದಿಂದ ಬೆದರಿಕೆ ಕರೆ!

ಕಳೆದ ತಿಂಗಳು ಪಶ್ಚಿಮ ಬಂಗಾಳದ ವಿಧಾನಸಭಾ ಚುನಾವಣಾ ಪ್ರಚಾರದ ವೇಳೆ ಒಂದು ರೋಚಕ ಘಟನೆ ನಡೆದಿತ್ತು. ಏಪ್ರಿಲ್ 19 ರಂದು ಜಾರ್ಗ್ರಾಮ್‌ನಲ್ಲಿ ನಡೆದ ಭರ್ಜರಿ ಚುನಾವಣಾ ರ‍್ಯಾಲಿ ಮುಗಿಸಿ ಮರಳುತ್ತಿದ್ದ ಪ್ರಧಾನಿ ನರೇಂದ್ರ ಮೋದಿ ಅವರು, ಹಠಾತ್ತನೆ ರಸ್ತೆ ಬದಿಯಲ್ಲಿದ್ದ ವಿಕ್ರಮ್ ಸೌ ಅವರ ಪುಟ್ಟ ಅಂಗಡಿಯ ಮುಂದೆ ತಮ್ಮ ಕಾರು ನಿಲ್ಲಿಸಿದ್ದರು. ಕಾರಿನಿಂದ ಇಳಿದು ನೇರವಾಗಿ ಅಂಗಡಿಗೆ ತೆರಳಿದ ಪ್ರಧಾನಿ, ಬಂಗಾಳದ ಜನಪ್ರಿಯ ತಿಂಡಿ ‘ಝಾಲ್ ಮುರಿ’ ಸವಿದಿದ್ದರು. ಆ ವಿಡಿಯೋ ಮತ್ತು ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದವು. ಸ್ವತಃ ಪ್ರಧಾನಿ ಮೋದಿ ಅವರೇ ತಮ್ಮ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಫೋಟೋ ಹಂಚಿಕೊಂಡು, "ಬಂಗಾಳದ ಝಾಲ್ ಮುರಿ ತುಂಬಾ ರುಚಿಕರವಾಗಿದೆ" ಎಂದು ಬರೆದುಕೊಂಡಿದ್ದರು. ಈ ಒಂದೇ ಒಂದು ಘಟನೆಯಿಂದ ವಿಕ್ರಮ್ ಸೌ ದೇಶಾದ್ಯಂತ ಮನೆಮಾತಾಗಿದ್ದರು.

ಆದರೆ, ಈ ಖ್ಯಾತಿಯೇ ಈಗ ವಿಕ್ರಮ್ ಪಾಲಿಗೆ ಮುಳ್ಳಾಗಿದೆ. ಕಳೆದ ಕೆಲವು ದಿನಗಳಿಂದ ವಿಕ್ರಮ್ ಅವರ ಮೊಬೈಲ್‌ಗೆ ಪಾಕಿಸ್ತಾನ ಮತ್ತು ಬಾಂಗ್ಲಾದೇಶದ ಕೋಡ್‌ಗಳಿರುವ ಅಂತಾರಾಷ್ಟ್ರೀಯ ಸಂಖ್ಯೆಗಳಿಂದ ನಿರಂತರವಾಗಿ ಫೋನ್ ಕರೆಗಳು ಹಾಗೂ ವಿಡಿಯೋ ಕರೆಗಳು ಬರುತ್ತಿವೆ. ಫೋನ್ ಮಾಡಿದ ಅಪರಿಚಿತರು, ಪ್ರಧಾನಿಗೆ ತಿಂಡಿ ಮಾರಿದ್ದಕ್ಕೆ ತೀವ್ರ ಆಕ್ರೋಶ ಹೊರಹಾಕಿದ್ದು, ನಿನ್ನನ್ನು ಮತ್ತು ನಿನ್ನ ಇಡೀ ಕುಟುಂಬವನ್ನು ಬಾಂಬ್ ಇಟ್ಟು ಉಡಾಯಿಸುತ್ತೇವೆ ಎಂದು ಕೊಲೆ ಬೆದರಿಕೆ ಹಾಕುತ್ತಿದ್ದಾರೆ ಎಂದು ವಿಕ್ರಮ್ ಕಣ್ಣೀರಿಟ್ಟಿದ್ದಾರೆ. ಇದರಿಂದ ತೀವ್ರ ಹೆದರಿರುವ ಕುಟುಂಬಸ್ಥರು ಮನೆಯಿಂದ ಹೊರಬರಲು ಭಯಪಡುತ್ತಿದ್ದಾರೆ. ಸದ್ಯ ವಿಕ್ರಮ್ ಸ್ಥಳೀಯ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.

ಸಾಮಾನ್ಯ ವ್ಯಾಪಾರಿಯೊಬ್ಬನ ‘ಝಾಲ್ ಮುರಿ’ ಕೇವಲ ಅಂತರರಾಷ್ಟ್ರೀಯ ಮಟ್ಟದ ಬೆದರಿಕೆಗೆ ಮಾತ್ರ ಸೀಮಿತವಾಗಿಲ್ಲ, ಅದು ಬಂಗಾಳ ರಾಜಕೀಯದಲ್ಲೂ ದೊಡ್ಡ ಚರ್ಚೆಗೆ ಕಾರಣವಾಗಿತ್ತು. ಪ್ರಧಾನಿ ಮೋದಿ ಅವರು ಅಂಗಡಿಗೆ ಭೇಟಿ ನೀಡಿದ್ದನ್ನು ಆಗಿನ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಕಟುವಾಗಿ ಟೀಕಿಸಿದ್ದರು ಮತ್ತು ಇದು "ಮುಂಚಿತವಾಗಿಯೇ ಯೋಜಿಸಲಾದ ದೊಡ್ಡ ನಾಟಕ" ಎಂದು ಕರೆದಿದ್ದರು. ಇದಕ್ಕೆ ಪ್ರತಿಯಾಗಿ ಪ್ರಧಾನಿ ಮೋದಿ ಕೂಡ ಮಮತಾ ವಿರುದ್ಧ ವಾಗ್ದಾಳಿ ನಡೆಸಿ, "ನಾನು ಖಾರವಾದ ಝಾಲ್ ಮುರಿ ತಿಂದೆ, ಆದರೆ ಉರಿ ತೃಣಮೂಲ ಕಾಂಗ್ರೆಸ್ (TMC) ನಾಯಕರಿಗೆ ಆಗುತ್ತಿದೆ" ಎಂದು ಲೇವಡಿ ಮಾಡಿದ್ದರು.

ಚುನಾವಣಾ ಪ್ರಚಾರ ಮುಗಿದು ಪ್ರಧಾನಿ ವಿದೇಶಿ ಪ್ರವಾಸಕ್ಕೆ ತೆರಳಿದಾಗಲೂ ನೆದರ್ಲ್ಯಾಂಡ್ಸ್‌ನಲ್ಲಿ ಈ ಝಾಲ್ ಮುರಿ ಬಗ್ಗೆ ಪ್ರಸ್ತಾಪಿಸಿ ಆ ತಿಂಡಿಯ ಜನಪ್ರಿಯತೆಯನ್ನು ಕೊಂಡಾಡಿದ್ದರು. ಆದರೆ, ರಾಜಕೀಯ ನಾಯಕರ ಜಿದ್ದಾಜಿದ್ದಿನ ನಡುವೆ, ಕೇವಲ 10 ರೂಪಾಯಿಗೆ ಪ್ರಧಾನಿಗೆ ತಿಂಡಿ ಮಾರಿ ಸಂಭ್ರಮಿಸಿದ್ದ ಬಡ ವ್ಯಾಪಾರಿ ಮಾತ್ರ ಇಂದು ಯಾವುದೇ ತಪ್ಪಿಲ್ಲದೆ ಗಡಿಯಾಚೆಗಿನ ದುಷ್ಕರ್ಮಿಗಳ ಟಾರ್ಗೆಟ್ ಆಗಿರುವುದು ದುರದೃಷ್ಟಕರ ಎಂದು ವಿಶ್ಲೇಷಣೆ ಮಾಡಲಾಗುತ್ತಿದೆ,(ಏಜೆನ್ಸೀಸ್​).