ಸ್ವಾತಂತ್ರ್ಯದ ಬಳಿಕ ಸಾರ್ವಕಾಲಿಕ ದಾಖಲೆ ಅಳಿಸಿಹಾಕಿದ ಬಂಗಾಳ-ತಮಿಳುನಾಡು ಜನ; ಮತದಾರರ ಬದ್ಧತೆಗೆ ಸಲಾಂ ಎಂದ ಜ್ಞಾನೇಶ್ ಕುಮಾರ್ | Election Commission

ಕೇಂದ್ರ ಚುನಾವಣಾ ಆಯೋಗದ ಇತ್ತೀಚಿನ ಅಂಕಿಅಂಶಗಳ ಪ್ರಕಾರ, ಪಶ್ಚಿಮ ಬಂಗಾಳದಲ್ಲಿ ಮೊದಲ ಹಂತದಲ್ಲೇ ಶೇ. 92.18 ರಷ್ಟು ದಾಖಲೆಯ ಮತದಾನವಾಗಿದ್ದರೆ, ತಮಿಳುನಾಡಿನಲ್ಲಿ ಶೇ. 85 ರಷ್ಟು ಮತದಾನ ದಾಖಲಾಗಿದೆ. ಕ್ಷೇತ್ರಗಳಾದ್ಯಂತ ಬಿಗಿ ಭದ್ರತಾ ವ್ಯವಸ್ಥೆಗಳ ನಡುವೆಯೂ ಜನರು ಸಾಲುಗಟ್ಟಿ ಬಂದು ಮತ ಚಲಾಯಿಸಿರುವುದು ಸಕ್ರಿಯ ಚುನಾವಣಾ ಪ್ರಕ್ರಿಯೆಗೆ ಸಾಕ್ಷಿಯಾಗಿದೆ.

ಈ ಐತಿಹಾಸಿಕ ಮತದಾನದ ಕುರಿತು ಪ್ರತಿಕ್ರಿಯಿಸಿರುವ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್, ಪ್ರಜಾಪ್ರಭುತ್ವದ ಈ ಮಹೋತ್ಸವದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡ ಎರಡೂ ರಾಜ್ಯಗಳ ಪ್ರತಿಯೊಬ್ಬ ಮತದಾರರಿಗೂ ನಮಸ್ಕಾರಗಳನ್ನು ಅರ್ಪಿಸಿದ್ದಾರೆ. ಸ್ವಾತಂತ್ರ್ಯದ ಬಳಿಕ ಪಶ್ಚಿಮ ಬಂಗಾಳ ಮತ್ತು ತಮಿಳುನಾಡಿನಲ್ಲಿ ಇದುವರೆಗಿನ ಅತ್ಯಧಿಕ ಶೇಕಡಾವಾರು ಮತದಾನ ಇದಾಗಿದ್ದು, ಆಯೋಗವು ಮತದಾರರ ಈ ಬದ್ಧತೆಯನ್ನು ಶ್ಲಾಘಿಸಿದೆ. 2021 ರ ಚುನಾವಣೆಯಲ್ಲಿ ಬಂಗಾಳದಲ್ಲಿ ಶೇ. 85.2 ಮತ್ತು ತಮಿಳುನಾಡಿನಲ್ಲಿ ಶೇ. 76.6 ರಷ್ಟು ಮತದಾನವಾಗಿತ್ತು, ಆದರೆ ಈ ಬಾರಿ ಆ ಎಲ್ಲಾ ದಾಖಲೆಗಳು ಅಳಿಸಿಹೋಗಿವೆ.

ಪಶ್ಚಿಮ ಬಂಗಾಳದ ಜಿಲ್ಲಾವಾರು ಅಂಕಿಅಂಶಗಳನ್ನು ಗಮನಿಸಿದರೆ, ದಕ್ಷಿಣ ದಿನಾಜ್‌ಪುರದಲ್ಲಿ ಗರಿಷ್ಠ ಶೇ. 94.85 ರಷ್ಟು ಮತದಾನವಾಗಿದ್ದರೆ, ಕೂಚ್ ಬೆಹಾರ್‌ನಲ್ಲಿ ಶೇ. 94.54, ಬಿರ್ಭುಮ್‌ನಲ್ಲಿ ಶೇ. 93.70, ಜಲಪೈಗುರಿಯಲ್ಲಿ ಶೇ. 93.23 ಮತ್ತು ಮುರ್ಷಿದಾಬಾದ್‌ನಲ್ಲಿ ಶೇ. 92.93 ರಷ್ಟು ಮತದಾನವಾಗಿದೆ.

ಬಂಗಾಳದ ಬಹುತೇಕ ಜಿಲ್ಲೆಗಳಲ್ಲಿ ಶೇ. 90 ಕ್ಕಿಂತ ಹೆಚ್ಚು ಮತದಾನವಾಗಿರುವುದು ಸ್ಥಿರ ಪ್ರವೃತ್ತಿಯನ್ನು ತೋರಿಸುತ್ತದೆ. ಅದೇ ರೀತಿ ತಮಿಳುನಾಡಿನಲ್ಲಿ ಕರೂರು ಶೇ. 92.48 ಮತದಾನದೊಂದಿಗೆ ಮುಂಚೂಣಿಯಲ್ಲಿದ್ದರೆ, ಸೇಲಂ, ಧರ್ಮಪುರಿ, ಈರೋಡ್ ಮತ್ತು ನಾಮಕ್ಕಲ್ ಜಿಲ್ಲೆಗಳಲ್ಲಿ ಕೂಡ ಶೇ. 90 ರ ಹತ್ತಿರದಷ್ಟು ಮತದಾನ ದಾಖಲಾಗಿದೆ. ಇದೇ ವೇಳೆ ನಡೆದ ಉಪಚುನಾವಣೆಗಳಲ್ಲಿ ಗುಜರಾತ್‌ನ ಉಮ್ರೆತ್‌ನಲ್ಲಿ ಶೇ. 59.04, ಮಹಾರಾಷ್ಟ್ರದ ರಾಹುರಿಯಲ್ಲಿ ಶೇ. 55.70 ಮತ್ತು ಬಾರಾಮತಿಯಲ್ಲಿ ಶೇ. 57.77 ರಷ್ಟು ಮತದಾನವಾಗಿದೆ.

ದಾಖಲೆ ಪ್ರಮಾಣದ ಮತದಾನದ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಸಂತಸ ವ್ಯಕ್ತಪಡಿಸಿದ್ದು, ಕೃಷ್ಣನಗರದಲ್ಲಿ ನಡೆದ ಪ್ರಚಾರ ಸಭೆಯಲ್ಲಿ ಮಾತನಾಡಿದ ಅವರು, ಇದು ಬದಲಾವಣೆಗಾಗಿ ಅಗಾಧವಾದ ಜನಾದೇಶವನ್ನು ಸೂಚಿಸುತ್ತದೆ ಎಂದು ಬಣ್ಣಿಸಿದ್ದಾರೆ. ಬಂಗಾಳದ 152 ಕ್ಷೇತ್ರಗಳಲ್ಲಿ ಹಿಂಸಾಚಾರವನ್ನು ಕನಿಷ್ಠ ಮಟ್ಟಕ್ಕೆ ಇಳಿಸಿ ಚುನಾವಣೆ ನಡೆಸಿದ್ದಕ್ಕಾಗಿ ಆಯೋಗವನ್ನು ಅಭಿನಂದಿಸಿದರು.

ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಚುನಾವಣೆಯ ಕುರಿತು ಪ್ರತಿಕ್ರಿಯಿಸಿದ್ದು, ಹೆಚ್ಚಿನ ಮತದಾನದ ಪ್ರಮಾಣವು ತೃಣಮೂಲ ಕಾಂಗ್ರೆಸ್ ಈಗಾಗಲೇ ಗೆಲ್ಲುವ ಸ್ಥಿತಿಯಲ್ಲಿದೆ ಎಂಬುದನ್ನು ತೋರಿಸುತ್ತದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಕೇಂದ್ರದಲ್ಲಿ ಬಿಜೆಪಿಯ ಅಂತ್ಯವನ್ನು ತಾವು ಬಯಸುವುದಾಗಿ ಹೇಳಿದ ಅವರು, ಚುನಾವಣೆಯ ಬಳಿಕ ಎಲ್ಲಾ ವಿರೋಧ ಪಕ್ಷಗಳನ್ನು ಒಗ್ಗೂಡಿಸಿ ದೆಹಲಿಯನ್ನು ವಶಪಡಿಸಿಕೊಳ್ಳುವುದಾಗಿ ಘೋಷಿಸಿದ್ದಾರೆ.

ಈ ಮಟ್ಟದ ಮತದಾನದ ನಡುವೆ ಕೆಲ ಅಹಿತಕರ ಘಟನೆಗಳು ಕೂಡ ವರದಿಯಾಗಿದ್ದು, ಪಶ್ಚಿಮ ಮೇದಿನಿಪುರ ಜಿಲ್ಲೆಯ ಪಿಂಗ್ಲಾ ವಿಭಾಗದ ಒಂದು ಮತಗಟ್ಟೆಯಲ್ಲಿ ಮತದಾನ ನಡೆಯುತ್ತಿದ್ದ ಸಮಯದಲ್ಲಿಯೇ ಮತಗಟ್ಟೆಯನ್ನು ಗಮನಿಸದೆ ಬಿಟ್ಟು ಹೋಗಿದ್ದಕ್ಕಾಗಿ ಅಲ್ಲಿನ ಎಲ್ಲಾ ಚುನಾವಣಾ ಸಿಬ್ಬಂದಿಯನ್ನು ಆಯೋಗವು ಅಮಾನತುಗೊಳಿಸಿದೆ. ಈ ಬಗ್ಗೆ ತನಿಖೆಗೆ ಆದೇಶಿಸಲಾಗಿದ್ದು, ಜಿಲ್ಲಾ ಚುನಾವಣಾ ಅಧಿಕಾರಿಯಿಂದ ವರದಿ ಕೇಳಲಾಗಿದೆ(ಏಜೆನ್ಸೀಸ್​).