ಇನ್ಮೇಲೆ ಮಿತ್ರಪಕ್ಷಗಳ ಸಹವಾಸವೇ ಬೇಡ!...ಡಿಎಂಕೆಗೆ ಕಾಂಗ್ರೆಸ್ ಶಾಕ್ ಬೆನ್ನಲ್ಲೇ ಕನಿಮೊಳಿ ಖಡಕ್ ಸಂದೇಶ | Kanimozhi

ನಟ ವಿಜಯ್ ನೇತೃತ್ವದ ತಮಿಳಗ ವೆಟ್ರಿ ಕಳಗಂ (TVK) ಪಕ್ಷವು ಡಿಎಂಕೆಯ ಮಾಜಿ ಮಿತ್ರಪಕ್ಷಗಳಾದ ಎಡಪಕ್ಷಗಳು (Left Parties), ವಿಸಿಕೆ (VCK) ಮತ್ತು ಐಯುಎಂಎಲ್ (IUML) ಬೆಂಬಲದೊಂದಿಗೆ ತಮಿಳುನಾಡಿನಲ್ಲಿ ನೂತನ ಸರ್ಕಾರ ರಚಿಸಿದೆ. ಆರಂಭದಲ್ಲಿ ಡಿಎಂಕೆ ನಾಯಕತ್ವದ ಒಪ್ಪಿಗೆಯ ಮೇರೆಗೇ ಈ ಪಕ್ಷಗಳು ಟಿವಿಕೆಗೆ ಬೆಂಬಲ ನೀಡಿದ್ದವು ಎನ್ನಲಾಗಿತ್ತು.

ಆದರೆ, ಚುನಾವಣಾ ಫಲಿತಾಂಶದ ಬಳಿಕ ಡಿಎಂಕೆ ಮತ್ತು ಕಾಂಗ್ರೆಸ್ ನಡುವಿನ ಸಂಬಂಧ ಸಂಪೂರ್ಣ ಹಳಸಿದೆ. ನೂತನವಾಗಿ ಆಯ್ಕೆಯಾದ ಕಾಂಗ್ರೆಸ್ ಶಾಸಕರು ಶಿಷ್ಟಾಚಾರದ ಸೌಜನ್ಯಕ್ಕಾಗಿಯೂ ಮಾಜಿ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್​ರನ್ನು ಭೇಟಿಯಾಗದಿದ್ದಾಗ ಸ್ಟಾಲಿನ್ ತೀವ್ರ ಅಸಮಾಧಾನ ಹೊರಹಾಕಿದ್ದರು. ಕಾಂಗ್ರೆಸ್ ಕೂಡ ಡಿಎಂಕೆ ಜೊತೆಗಿನ ಮೈತ್ರಿ ಕಡಿದುಕೊಂಡು ವಿಜಯ್ ಟಿವಿಕೆ ಜೊತೆ ಕೈಜೋಡಿಸಿದೆ. ಕೈ ನಾಯಕರ ಈ ನಡೆಯನ್ನು ಡಿಎಂಕೆ ವಿಶ್ವಾಸದ್ರೋಹ ಎಂದು ಕರೆದಿದೆ.

ರಾಜ್ಯದಲ್ಲಿ ವಿಜಯ್ ನೇತೃತ್ವದ ಟಿವಿಕೆ ಪಕ್ಷವು ಅತ್ಯಂತ ಬಲಿಷ್ಠವಾಗಿ ಹೊರಹೊಮ್ಮುತ್ತಿರುವುದು ಮತ್ತು ಮೈತ್ರಿಕೂಟಗಳು ಉಲ್ಟಾ ಆಗುತ್ತಿರುವ ಬೆನ್ನಲ್ಲೇ, ತೂತುಕುಡಿಯಲ್ಲಿ ನಡೆದ ಪಕ್ಷದ ಕಾರ್ಯಕ್ರಮವೊಂದರಲ್ಲಿ ಕನಿಮೊಳಿ ಆಡಿರುವ ಮಾತುಗಳು ರಾಜಕೀಯ ವಲಯದ ಗಮನ ಸೆಳೆದಿವೆ. ಪಕ್ಷದ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಕನಿಮೋಳಿ, ನಾವು ಈಗ ಮಿತ್ರಪಕ್ಷಗಳ ಬಗ್ಗೆ ಯೋಚಿಸಬೇಕಾದ ಕಾಲಘಟ್ಟದಲ್ಲಿದ್ದೇವೆ. ಮೊದಲು ನಮ್ಮನ್ನು ನಾವು ಬಲಪಡಿಸಿಕೊಳ್ಳಬೇಕು, ಸ್ವತಂತ್ರವಾಗಿ ಶಕ್ತಿಶಾಲಿಯಾದರೆ, ಯಾರ ಬೆಂಬಲವೂ ಇಲ್ಲದೆ ಡಿಎಂಕೆ ಅಧಿಕಾರ ಹಿಡಿಯಬಲ್ಲದು. ನಾವು ಶೀಘ್ರದಲ್ಲೇ ಗೆದ್ದು ತೋರಿಸಲಿದ್ದೇವೆ. ನಮ್ಮ ಪಕ್ಷದ ಬಲ ಎಂತಹದ್ದು ಎಂಬುದನ್ನು ಶೀಘ್ರದಲ್ಲೇ ನಿರೂಪಿಸಲಿದ್ದೇವೆ ಎಂದು ಮಿತ್ರಪಕ್ಷಗಳಿಗೆ ನೇರ ಎಚ್ಚರಿಕೆ ನೀಡಿದ್ದಾರೆ.

ಮತ್ತೊಂದೆಡೆ, ಡಿಎಂಕೆ ಅಧ್ಯಕ್ಷ ಎಂ.ಕೆ. ಸ್ಟಾಲಿನ್ ಈಗಾಗಲೇ ಚುನಾವಣಾ ಸೋಲಿಗೆ ಕಾರಣಗಳನ್ನು ಹುಡುಕಲು ಉನ್ನತ ಮಟ್ಟದ ಸಮಿತಿಯೊಂದನ್ನು ರಚಿಸಿದ್ದಾರೆ. ಮುಂಬರುವ ತಿಂಗಳುಗಳಲ್ಲಿ ಡಿಎಂಕೆ ಸಂಘಟನೆಯಲ್ಲಿ ಭಾರಿ ಬದಲಾವಣೆಗಳಾಗುವ ಸಾಧ್ಯತೆಯಿದೆ. ನಟ ವಿಜಯ್ ಸರ್ಕಾರವು ಶೀಘ್ರದಲ್ಲೇ ಪತನಗೊಳ್ಳಲಿದೆ ಎಂದು ಭವಿಷ್ಯ ನುಡಿದಿರುವ ಸ್ಟಾಲಿನ್, ಅದಕ್ಕೆ ಸಿದ್ಧರಾಗಿರುವಂತೆ ಕಾರ್ಯಕರ್ತರಿಗೆ ಸೂಚಿಸಿದ್ದಾರೆ.

ಮೂಲಗಳ ಪ್ರಕಾರ, ಕನಿಮೊಳಿ 2026ರ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸಲು ಆಸಕ್ತಿ ಹೊಂದಿದ್ದರು, ಆದರೆ ಪಕ್ಷದ ಹೈಕಮಾಂಡ್ ಅದಕ್ಕೆ ಅನುಮತಿ ನೀಡಿರಲಿಲ್ಲ. ಆದರೆ ಈಗ ಎದುರಾಗಿರುವ ಭಾರಿ ಹಿನ್ನಡೆಯ ನಂತರ, ತಮಿಳುನಾಡು ರಾಜಕಾರಣದಲ್ಲಿ ಡಿಎಂಕೆ ಪಕ್ಷವನ್ನು ಪುನರ್​​ನಿರ್ಮಿಸಲು ಕನಿಮೊಳಿಗೆ ಮುಂದಿನ ದಿನಗಳಲ್ಲಿ ದೊಡ್ಡ ಜವಾಬ್ದಾರಿ ನೀಡುವ ಸಾಧ್ಯತೆಯಿದೆ ಎನ್ನಲಾಗುತ್ತಿದೆ(ಏಜೆನ್ಸೀಸ್​​).