ನಾವು ಈಗಾಗಲೇ ಗೆದ್ದಾಗಿದೆ! ಮತದಾನದ ಬೆನ್ನಲ್ಲೇ ದೀದಿ ಸ್ಫೋಟಕ ಭವಿಷ್ಯ! ಅಮಿತ್ ಷಾ ಪ್ಲಾನ್ ಉಲ್ಟಾ ಆಯ್ತಾ..? Mamata Banerjee

ಈ ಬಗ್ಗೆ ಕೋಲ್ಕತ್ತಾದ ಬೋ ಬಜಾರ್ ಪ್ರದೇಶದಲ್ಲಿ ನಡೆದ ಬೃಹತ್ ರ‍್ಯಾಲಿಯಲ್ಲಿ ಮಾತನಾಡಿದ ದೀದಿ, ಬಂಗಾಳದ ಗೆಲುವಿನ ನಂತರ ದೆಹಲಿಯತ್ತ ಕಣ್ಣಿಟ್ಟಿರುವುದಾಗಿ ಘೋಷಿಸುವ ಮೂಲಕ ರಾಷ್ಟ್ರ ರಾಜಕಾರಣದಲ್ಲಿ ಸಂಚಲನ ಮೂಡಿಸಿದ್ದಾರೆ.

ಅಭೂತಪೂರ್ವ ಜನಸ್ತೋಮವನ್ನು ಉದ್ದೇಶಿಸಿ ಮಾತನಾಡಿದ ದೀದಿ, ನಾನು ಯಾವುದೇ ಉನ್ನತ ಹುದ್ದೆಯ ಆಕಾಂಕ್ಷಿಯಲ್ಲ. ನನಗೆ ಅಧಿಕಾರ ಮುಖ್ಯವಲ್ಲ, ಕೇಂದ್ರದಲ್ಲಿರುವ ಬಿಜೆಪಿ ಸರ್ಕಾರದ ಅಂತ್ಯವೇ ನನ್ನ ಏಕೈಕ ಗುರಿ. ಬಂಗಾಳದ ಗೆಲುವಿನ ನಂತರ ನಾನು ಎಲ್ಲಾ ವಿರೋಧ ಪಕ್ಷಗಳನ್ನು ಒಗ್ಗೂಡಿಸಿ ದೆಹಲಿಯನ್ನು ಗೆಲ್ಲುತ್ತೇನೆ ಎಂದು ಸವಾಲು ಹಾಕಿದ್ದಾರೆ. ಮೊದಲ ಹಂತದಲ್ಲೇ ಟಿಎಂಸಿ ಭದ್ರಕೋಟೆ ಸುಭದ್ರವಾಗಿದೆ ಎಂದು ಪ್ರತಿಪಾದಿಸಿದ್ದಾರೆ.

ಗುರುವಾರ ನಡೆದ ಮೊದಲ ಹಂತದ ಮತದಾನದಲ್ಲಿ ಸಂಜೆ 5 ಗಂಟೆಯ ಹೊತ್ತಿಗೆ ಶೇಕಡಾ 89.93 ರಷ್ಟು ಬೃಹತ್ ಮತದಾನ ದಾಖಲಾಗಿದೆ. ಇದು ರಾಜ್ಯದ ಚುನಾವಣಾ ಇತಿಹಾಸದಲ್ಲೇ ಅತೀ ಹೆಚ್ಚಿನ ಪ್ರಮಾಣ ಎನ್ನಲಾಗಿದೆ.

ಅತಿ ಹೆಚ್ಚು ಮತದಾನ: ಬಂಕುರಾ ವಿಧಾನಸಭಾ ಕ್ಷೇತ್ರದಲ್ಲಿ ಶೇ. 22.05 ರಷ್ಟು ಮತದಾನ ಮೊದಲ ಎರಡು ಗಂಟೆಗಳಲ್ಲೇ ದಾಖಲಾಗಿತ್ತು. ಮುರ್ಷಿದಾಬಾದ್ ಮತ್ತು ಪಶ್ಚಿಮ ಮಿಡ್ನಾಪುರ ಜಿಲ್ಲೆಗಳಲ್ಲೂ ಮತದಾರರು ಉತ್ಸಾಹದಿಂದ ಭಾಗವಹಿಸಿದ್ದಾರೆ.

ಅತಿ ಕಡಿಮೆ ಮತದಾನ: ಕೋಚ್ ಬೆಹಾರ್ ದಕ್ಷಿಣ ಮತ್ತು ಮಾಲ್ಡಾ ಜಿಲ್ಲೆಯ ಕೆಲವು ಭಾಗಗಳಲ್ಲಿ ತುಲನಾತ್ಮಕವಾಗಿ ಕಡಿಮೆ ಮತದಾನ ನಡೆದಿದೆ.

ಮತದಾನದ ನಡುವೆಯೇ ಹಲವು ಕಡೆಗಳಲ್ಲಿ ಇಲೆಕ್ಟ್ರಾನಿಕ್ ಮತಯಂತ್ರಗಳ ತಾಂತ್ರಿಕ ದೋಷ ಕೇಳಿಬಂದಿದೆ. ಸೂರಿ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಸಂಜಯ್ ಅಧಿಕಾರಿ ಅವರು ತಮಗಾದ ಕಹಿ ಅನುಭವವನ್ನು ಹಂಚಿಕೊಂಡಿದ್ದಾರೆ. ಬೆಳಿಗ್ಗೆ 7 ಗಂಟೆಗೆ ಮತದಾನ ಮಾಡಲು ಹೋದರೂ ಯಂತ್ರ ಕೆಟ್ಟಿತ್ತು. ಗಂಟೆಗಟ್ಟಲೆ ಕಾದರೂ ಚುನಾವಣಾ ಆಯೋಗದ ಯಾವುದೇ ಪ್ರತಿನಿಧಿ ಬರಲಿಲ್ಲ. ನೂರಾರು ಮತದಾರರು ಕ್ಯೂನಲ್ಲಿ ನಿಂತು ಸುಸ್ತಾಗಿದ್ದಾರೆ ಎಂದು ಆಕ್ರೋಶ ಹೊರಹಾಕಿದ್ದಾರೆ.

ಈ ಹಂತದ ಚುನಾವಣೆಯು ಹಲವು ದಿಗ್ಗಜ ನಾಯಕರ ಭವಿಷ್ಯವನ್ನು ನಿರ್ಧರಿಸಲಿದೆ.

ಸುವೇಂದು ಅಧಿಕಾರಿ (ಬಿಜೆಪಿ, ನಂದಿಗ್ರಾಮ): ಪ್ರತಿಪಕ್ಷ ನಾಯಕ ಸುವೇಂದು ಅವರು ತಮ್ಮ ಮತ ಚಲಾಯಿಸಿದ ನಂತರ ಶಾಂತಿಯುತ ಮತದಾನಕ್ಕೆ ಮನವಿ ಮಾಡಿದರು.

ನಿಸಿತ್ ಪ್ರಮಾಣಿಕ್ (ಬಿಜೆಪಿ): ಉತ್ತರ ಬಂಗಾಳದ ಪ್ರಬಲ ನಾಯಕರಾಗಿದ್ದಾರೆ.

ಅಧೀರ್ ರಂಜನ್ ಚೌಧರಿ (ಕಾಂಗ್ರೆಸ್, ಬಹರಂಪುರ): ಕಾಂಗ್ರೆಸ್‌ನ ಭದ್ರಕೋಟೆ ರಕ್ಷಿಸುವ ಹೊಣೆ ಇವರ ಮೇಲಿದೆ.

ಉದಯನ್ ಗುಹಾ ಮತ್ತು ಗೌತಮ್ ದೇವ್ (ಟಿಎಂಸಿ): ಮಮತಾ ಕ್ಯಾಬಿನೆಟ್‌ನ ಪ್ರಮುಖ ಸಚಿವರು.

ಪಶ್ಚಿಮ ಬಂಗಾಳದ ಒಟ್ಟು 294 ಸೀಟುಗಳ ಪೈಕಿ 152 ಸೀಟುಗಳಿಗೆ ಮೊದಲ ಹಂತದಲ್ಲಿ ಮತದಾನ ನಡೆದಿದೆ. ಮುಂದಿನ ನಿರ್ಣಾಯಕ ಸುತ್ತು ಏಪ್ರಿಲ್ 29 ರಂದು ನಡೆಯಲಿದ್ದು, ಇಡೀ ದೇಶ ಕಾತರದಿಂದ ಕಾಯುತ್ತಿರುವ ಫಲಿತಾಂಶ ಮೇ 4 ರಂದು ಪ್ರಕಟವಾಗಲಿದೆ.

ಬಿಜೆಪಿ ನಾಯಕರ ನುಸುಳುಕೋರ ಅಸ್ತ್ರ ಮತ್ತು ಮಮತಾ ಬ್ಯಾನರ್ಜಿ ಅವರ 'ಮಾ-ಮತಿ-ಮಾನುಷ್' ಘೋಷಣೆಗಳ ನಡುವೆ ಬಂಗಾಳದ ಮತದಾರ ಯಾರ ಕೈ ಹಿಡಿಯಲಿದ್ದಾನೆ ಎಂಬುದು ಈಗ ಮಿಲಿಯನ್ ಡಾಲರ್ ಪ್ರಶ್ನೆಯಾಗಿದೆ. ದಾಖಲೆ ಮತದಾನವು ಆಡಳಿತ ವಿರೋಧಿ ಅಲೆಯೋ ಅಥವಾ ಮಮತಾ ಬ್ಯಾನರ್ಜಿ ಮೇಲಿನ ಒಲವೋ ಎಂಬುದು ಮೇ ತಿಂಗಳಲ್ಲಿ ಬಹಿರಂಗವಾಗಲಿದೆ,(ಏಜೆನ್ಸೀಸ್).