ಏನಾದರೂ ಮಾಡಲು ಬಿಡ್ರಪ್ಪ... ಭಾರತವನ್ನೇ ಅಣಕಿಸಿದ ವಿಜಯ್​ ಮಲ್ಯ, ಲಲಿತ್​ ಮೋದಿ! Biggest Fugitives

ನವದೆಹಲಿ: ಅತಿದೊಡ್ಡ ಹಣಕಾಸು ವಂಚನೆ ಎಸಗಿ ( Biggest Fugitives ) ದೇಶ ಬಿಟ್ಟು ಪರಾರಿಯಾಗಿರುವ ಉದ್ಯಮಿ ವಿಜಯ್​ ಮಲ್ಯ ಹಾಗೂ ಇಂಡಿಯನ್​ ಪ್ರೀಮಿಯರ್​ ಲೀಗ್​ನ ಮಾಜಿ ಅಧ್ಯಕ್ಷ ಲಲಿತ್​ ಮೋದಿ, ಭಾರತವನ್ನು ಅಣಕಿಸುವಂತಹ ಮಾತುಗಳನ್ನಾಡಿದ್ದಾರೆ. ಇದಕ್ಕೆ ಸಂಬಂಧಿಸಿದ ವಿಡಿಯೋವೊಂದು ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದೆ.

ಪ್ರಸ್ತುತ ವಿಜಯ್​ ಮಲ್ಯ ಹಾಗೂ ಲಲಿತ್​ ಮೋದಿ ಇಬ್ಬರು ಲಂಡನ್​ನಲ್ಲಿ ವಾಸವಿದ್ದಾರೆ. ವಿಜಯ್ ಮಲ್ಯ ಅವರ 70ನೇ ಹುಟ್ಟುಹಬ್ಬವನ್ನು ಸಂಭ್ರಮಿಸಲು ಡಿಸೆಂಬರ್ 16ರಂದು ಲಲಿತ್ ಮೋದಿ ಅವರು ತಮ್ಮ ಲಂಡನ್ ನಿವಾಸದಲ್ಲಿ ಭಾರಿ ಪಾರ್ಟಿಯನ್ನು ಆಯೋಜನೆ ಮಾಡಿದ್ದರು. ಇದೀಗ ಲಲಿತ್ ಮೋದಿ, ಪಾರ್ಟಿಯ ವಿಡಿಯೋ ತುಣಕೊಂದನ್ನು ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದು, ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ವೈರಲ್​ ಆಗಿರುವ ವಿಡಿಯೋದಲ್ಲಿ ಲಲಿತ್ ಮೋದಿ ಅವರು ವಿಜಯ್ ಮಲ್ಯ ಜತೆಗೆ ನಿಂತು, We are the two biggest fugitives from India (ನಾವಿಬ್ಬರೂ ಭಾರತದ ಅತಿ ದೊಡ್ಡ ದೇಶಭ್ರಷ್ಟರು) ಎಂದು ಹೇಳುತ್ತಾರೆ. ಅಲ್ಲದೆ, ವಿಡಿಯೋಗೆ ನೀಡಿರುವ ಅಡಿಬರಹದಲ್ಲಿ Let me do something to break the internet down again. Something for you folks. Wat your heart out with envy (ನಿಮಗೆ ಏನಾದರೂ ವಿಷಯ ಬೇಕಲ್ಲವೇ, ಮತ್ತೊಮ್ಮೆ ಇಂಟರ್ನೆಟ್ ಅನ್ನು ಬ್ರೇಕ್ ಮಾಡೋಕೆ ಏನಾದರೂ ಮಾಡಲು ಬಿಡಿ. ನಿಮ್ಮ ಹೃದಯ ದ್ವೇಷದಿಂದ ತುಂಬಿದೆ) ಎಂದು ಬರೆದುಕೊಳ್ಳುವ ಮೂಲಕ ಭಾರತವನ್ನು ಅಣಕಿಸಿದ್ದಾರೆ.

ಸದ್ಯ ಈ ವಿಡಿಯೋ ಭಾರೀ ವೈರಲ್ ಆಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಟೀಕೆಗೆ ಗುರಿಯಾಗಿದೆ. ಭಾರತದ ಸರ್ಕಾರ ಮತ್ತು ಇಲ್ಲಿನ ಕಾನೂನು ವ್ಯವಸ್ಥೆಯನ್ನು ಇವರಿಬ್ಬರು ಅಣಕಿಸುತ್ತಿದ್ದಾರೆ ಎಂದು ಅನೇಕರು ಹೇಳುತ್ತಿದ್ದಾರೆ. ಅಲ್ಲದೆ, ನಮ್ಮ ದೇಶದ ಸಿಬಿಐ ಮತ್ತು ಇಡಿ ಅಧಿಕಾರಿಗಳನ್ನು ಇಬ್ಬರು ವ್ಯಂಗ್ಯವಾಡುತ್ತಿದ್ದಾರೆ ಎಂದು ಕಾಮೆಂಟ್​ ಮಾಡುತ್ತಿದ್ದಾರೆ. ಇವರಿಬ್ಬರನ್ನು ಇಷ್ಟು ಬೆಳೆಯಲು ಬಿಡಲೇಬಾರದಿತ್ತು ಎನ್ನುವ ಮೂಲಕ ಭಾರತ ಸರ್ಕಾರವನ್ನೇ ಟೀಕಿಸುತ್ತಿದ್ದಾರೆ.

ಭಾರತಕ್ಕೆ ಯಾವಾಗ ಮರಳುವ ಉದ್ದೇಶ ಹೊಂದಿದ್ದೀರಿ? ಎಂದು ಪರಾರಿಯಾದ ಉದ್ಯಮಿ ವಿಜಯ್ ಮಲ್ಯಾ ಅವರಿಗೆ ಬಾಂಬೆ ಹೈಕೋರ್ಟ್ ನೇರ ಪ್ರಶ್ನೆಯೊಂದನ್ನು ಎತ್ತಿದೆ. ಫ್ಯೂಜಿಟಿವ್ ಎಕನಾಮಿಕ್ ಆಫೆಂಡರ್ಸ್ ಆಕ್ಟ್ (FEO Act) 2018ರ ಸಾಂವಿಧಾನಿಕ ಸಿಂಧುತ್ವವನ್ನು ಪ್ರಶ್ನಿಸಿ ಮಲ್ಯಾ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯ ಸಂದರ್ಭದಲ್ಲಿ ನ್ಯಾಯಮೂರ್ತಿಗಳಾದ ಚಂದ್ರಶೇಖರ್ ಮತ್ತು ಗೌತಮ್ ಅಂಖಡ್ ಅವರಿದ್ದ ದ್ವಿಸದಸ್ಯ ಪೀಠವು ಈ ಪ್ರಶ್ನೆಯನ್ನು ಕೇಳಿದೆ. 2016ರ ಮಾರ್ಚ್‌ನಿಂದ ಬ್ರಿಟನ್‌ನಲ್ಲಿ ವಾಸಿಸುತ್ತಿರುವ ಮಲ್ಯಾ ಅವರು, ಕಿಂಗ್‌ಫಿಷರ್ ಏರ್‌ಲೈನ್ಸ್ ಸಾಲ ಬಾಕಿ ಪ್ರಕರಣದಲ್ಲಿ ವಂಚನೆ ಮತ್ತು ಹಣ ಅಕ್ರಮ ವರ್ಗಾವಣೆ ಆರೋಪಗಳನ್ನು ಎದುರಿಸುತ್ತಿದ್ದಾರೆ. ಅವರು ಹೈಕೋರ್ಟ್‌ಗೆ ಎರಡು ಅರ್ಜಿಗಳನ್ನು ಸಲ್ಲಿಸಿದ್ದಾರೆ. ಒಂದು, ತಮ್ಮನ್ನು ಪರಾರಿ ಆರ್ಥಿಕ ಅಪರಾಧಿ ಎಂದು ಘೋಷಿಸಿದ ವಿಶೇಷ ನ್ಯಾಯಾಲಯದ ಆದೇಶವನ್ನು ರದ್ದುಗೊಳಿಸುವಂತೆ. ಮತ್ತೊಂದು, FEO ಕಾಯ್ದೆಯ ಸಾಂವಿಧಾನಿ ಕತೆಯನ್ನು ಪ್ರಶ್ನಿಸುವಂತೆ ಕೇಳಿದ್ದಾರೆ. ಮಲ್ಯಾ ಅವರು ನ್ಯಾಯಾಲಯದ ಅಧಿಕಾರ ವ್ಯಾಪ್ತಿಗೆ ಒಳಪಡುವವರೆಗೆ (ಅಂದರೆ ಭಾರತಕ್ಕೆ ಮರಳಿ ಒಳಗಾಗುವವರೆಗೆ) ಕಾಯ್ದೆಯ ಸಿಂಧುತ್ವದ ಅರ್ಜಿಯನ್ನು ವಿಚಾರಣೆಗೆ ತೆಗೆದುಕೊಳ್ಳುವುದಿಲ್ಲ ಎಂದು ಪೀಠ ಸ್ಪಷ್ಟವಾಗಿ ಹೇಳಿದೆ.

ಅಂದಹಾಗೆ, ಕಿಂಗ್‌ಫಿಷರ್ ಏರ್‌ಲೈನ್ಸ್‌ ಕುಸಿತದ ಬಳಿಕ ಕಾನೂನು ಕುಣಿಕೆಯಲ್ಲಿ ವಿಜಯ್ ಮಲ್ಯ ಸಿಲುಕಿದ್ದಾರೆ. ಬಂಧನದ ಭೀತಿಯಿಂದಾಗಿ 2016, ಮಾರ್ಚ್ ತಿಂಗಳಲ್ಲಿ ಭಾರತವನ್ನು ತೊರೆದರು. 9,000 ಕೋಟಿ ರೂ.ಗಳಿಗೂ ಹೆಚ್ಚಿನ ಬ್ಯಾಂಕ್ ಸಾಲವನ್ನು ಮರುಪಾವತಿ ಮಾಡದ ಆರೋಪ ಮಲ್ಯ ಮೇಲಿದೆ. ಹೀಗಾಗಿ ಭಾರತೀಯ ಅಧಿಕಾರಿಗಳು ವಿಜಯ್​ ಮಲ್ಯರನ್ನು ಬಂಧಿಸಿ ಕರೆತರಲು ಸಾಕಷ್ಟು ಪ್ರಯತ್ನ ಮಾಡುತ್ತಿದ್ದಾರೆ. ಇನ್ನು ಐಪಿಎಲ್ ಆರಂಭಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಲಲಿತ್ ಮೋದಿ, ಬಿಡ್ ರಿಗ್ಗಿಂಗ್ ಮತ್ತು ಹಣ ವರ್ಗಾವಣೆ ಸೇರಿದಂತೆ ಹಣಕಾಸಿನ ಅಕ್ರಮಗಳ ಆರೋಪದ ನಂತರ ಐಪಿಎಲ್ ಅಧ್ಯಕ್ಷ ಸ್ಥಾನದಿಂದ ವಜಾಗೊಂಡಿದ್ದಾರೆ. ಲಲಿತ್​ ಕೂಡ ಬಂಧನ ಭೀತಿಯಿಂದ 2010 ರಲ್ಲಿ ಭಾರತವನ್ನು ತೊರೆದರು, (ಏಜನ್ಸೀಸ್).