ಇರಾನ್ ಮೇಲೆ ಯುದ್ಧಕಾರ್ಮೋಡ

ಅಮೆರಿಕ ಮತ್ತು ಇರಾನ್ ನಡುವೆ ಯುದ್ಧದ ಕಾರ್ಮೋಡಗಳು ದಟ್ಟವಾಗಿವೆ. ಅಮೆರಿಕವು ಇರಾನ್ ಮೇಲೆ ದೊಡ್ಡ ಮಟ್ಟದ ದಾಳಿಗೆ ಸಿದ್ಧತೆ ನಡೆಸುತ್ತಿದ್ದು, ಪರ್ಷಿಯನ್ ಗಲ್ಪ್ ಮತ್ತು ಮಧ್ಯಪ್ರಾಚ್ಯದಲ್ಲಿ ತನ್ನ ಸೇನಾ ಬಲವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸಿದೆ. ಇದನ್ನು 2003ರ ಇರಾಕ್ ಯುದ್ಧದ ನಂತರದ ಅತಿದೊಡ್ಡ ಸೇನಾ ಜಮಾವಣೆ ಎಂದು ಕರೆಯಲಾಗುತ್ತಿದೆ. ‘ಈ ಸಿದ್ಧತೆಯು ಕೇವಲ ಒಂದು ಬಾರಿಯ ದಾಳಿಯಲ್ಲ, ಬದಲಿಗೆ ಹಲವು ವಾರಗಳ ಕಾಲ ನಡೆಯಬಹುದಾದ ಸುದೀರ್ಘ ಕಾರ್ಯಾಚರಣೆಯಾಗಿದೆ’ ಎಂದು ಅಮೆರಿಕದ ಸೇನಾ ಅಧಿಕಾರಿಗಳು ಸುಳಿವು ನೀಡಿದ್ದಾರೆ. 

ಒಂದು ವೇಳೆ ಯುದ್ಧ ಆರಂಭವಾದರೆ ಅದು ಮಧ್ಯಪ್ರಾಚ್ಯದ ಇಡೀ ಭೂಪಟವನ್ನೇ ಬದಲಿಸಬಹುದು ಮತ್ತು ಜಾಗತಿಕ ಆರ್ಥಿಕತೆಯ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ. ಭಾರತವು ಇರಾನ್ ಮತ್ತು ಅಮೆರಿಕ ಎರಡರ ಜತೆಗೂ ಉತ್ತಮ ಬಾಂಧವ್ಯ ಹೊಂದಿದೆ. ಆದ್ದರಿಂದ ಸಂಘರ್ಷದಲ್ಲಿ ಭಾರತವು ತಟಸ್ಥ ನಿಲುವು ತಳೆದಿದೆ ಮತ್ತು ಮಾತುಕತೆಯ ಮೂಲಕ ಸಮಸ್ಯೆ ಬಗೆಹರಿಸಲು ಒತ್ತಾಯಿಸುತ್ತಿದೆ.

ಮುಂದುವರಿದ ಸಂಘರ್ಷ: ಅಮೆರಿಕವು ಇತ್ತೀಚಿನ ತಿಂಗಳುಗಳಲ್ಲಿ ಇರಾನ್ ವಿರುದ್ಧ ತನ್ನ ಸೇನಾ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿದ್ದು, ಈ ಹಂತದಲ್ಲಿ ‘ಆಪರೇಷನ್ ಸದರ್ನ್ ಸ್ಪಿಯರ್’ ಮತ್ತು ಅದಕ್ಕೆ ಪೂರಕವಾದ ಸೇನಾ ಬೆಳವಣಿಗೆಗಳು ಮಹತ್ವ ಪಡೆದಿವೆ. ಆಪರೇಷನ್ ಸದರ್ನ್ ಸ್ಪಿಯರ್, ಇದು ಆರಂಭದಲ್ಲಿ ಇರಾನ್ ವಿರುದ್ಧದ ಕಾರ್ಯಾಚರಣೆಯಾಗಿರಲಿಲ್ಲ, ಆದರೆ ಈಗಿನ ಜಾಗತಿಕ ಸಂಘರ್ಷದಲ್ಲಿ ಅಮೆರಿಕದ ಸೇನಾ ಶಕ್ತಿಯ ಪ್ರದರ್ಶನವಾಗಿ ಮಾರ್ಪಟ್ಟಿದೆ. 

ಆಪರೇಷನ್ ಸದರ್ನ್ ಸ್ಪಿಯರ್ ಕಾರ್ಯಾಚರಣೆಯನ್ನು ಅಮೆರಿಕದ ನೌಕಾಪಡೆಯು 2025ರಲ್ಲಿ ಕೆರಿಬಿಯನ್ ಮತ್ತು ದಕ್ಷಿಣ ಅಮೆರಿಕ ಭಾಗದಲ್ಲಿ ಮಾದಕ ದ್ರವ್ಯ ಭಯೋತ್ಪಾದನೆ ತಡೆಯಲು ಆರಂಭಿಸಿತು. ಈ ಕಾರ್ಯಾಚರಣೆಯಲ್ಲಿ ಮೊದಲ ಬಾರಿಗೆ ರೋಬೋಟಿಕ್ ಮತ್ತು ಸ್ವಯಂಚಾಲಿತ ಹಡಗು ಗಳನ್ನು ಬಳಸಲಾಯಿತು. ಇತ್ತೀಚಿನ ವರದಿಗಳ ಪ್ರಕಾರ, ಈ ಕಾರ್ಯಾಚರಣೆಯಲ್ಲಿ ಯಶಸ್ವಿಯಾದ ಹೈಬ್ರಿಡ್ ಫ್ಲೀಟ್ (ಮನುಷ್ಯರು ಮತ್ತು ರೋಬೋಟ್​ಗಳ ಜಂಟಿ ಪಡೆ) ತಂತ್ರಜ್ಞಾನವನ್ನು ಅಮೆರಿಕ ಈಗ ಇರಾನ್ ವಿರುದ್ಧದ ಸಿದ್ಧತೆಗಳಿಗೂ ಬಳಸಿಕೊಳ್ಳುತ್ತಿದೆ. ಇದು ಶತ್ರುಗಳಿಗೆ ತಿಳಿಯದಂತೆ ಸಮುದ್ರದ ಆಳದಲ್ಲಿ ಗೂಢಚರ್ಯು ನಡೆಸಲು ಮತ್ತು ಕ್ಷಿಪಣಿ ದಾಳಿ ಮಾಡಲು ಅಮೆರಿಕಕ್ಕೆ ಹೆಚ್ಚಿನ ಬಲ ನೀಡಿದೆ.

 ನೌಕಾಪಡೆ ಸನ್ನದ್ಧ: ಅಮೆರಿಕದ ಅತ್ಯಂತ ಶಕ್ತಿಶಾಲಿ ಯುದ್ಧನೌಕೆಯಾದ ‘ಯುಎಸ್​ಎಸ್ ಅಬ್ರಹಾಂ ಲಿಂಕನ್’ ಈಗಾಗಲೇ ಇರಾನ್ ಕರಾವಳಿಯಲ್ಲಿದೆ. ಇದರ ಜೊತೆಗೆ ವಿಶ್ವದ ಅತಿದೊಡ್ಡ ವಿಮಾನ ವಾಹಕ ನೌಕೆ ‘ಯುಎಸ್​ಎಸ್ ಗೆರಾಲ್ಡ್ ಆರ್. ಫೋರ್ಡ್’ ಕೂಡ ಮೆಡಿಟರೇನಿಯನ್ ಸಮುದ್ರದ ಮೂಲಕ ಇರಾನ್ ಕಡೆಗೆ ಧಾವಿಸುತ್ತಿದೆ. ಎರಡು ಬೃಹತ್ ವಿಮಾನವಾಹಕ ನೌಕೆಗಳು ಒಂದೇ ಕಡೆ ಇರುವುದು ಪೂರ್ಣ ಪ್ರಮಾಣದ ಯುದ್ಧದ ಮುನ್ಸೂಚನೆಯಾಗಿದೆ.

ವಾಯುಪಡೆ ಸಜ್ಜು: ಎಫ್-35 ಸೇರಿದಂತೆ ಐವತ್ತಕ್ಕೂ ಹೆಚ್ಚು ಅತ್ಯಾಧುನಿಕ ಯುದ್ಧ ವಿಮಾನಗಳನ್ನು ನಿಯೋಜಿಸಲಾಗಿದೆ. ಇವು ಗಳಿಗೆ ಇಂಧನ ತುಂಬಿಸುವ ಕೆಸಿ-135 ವಿಮಾನಗಳು ಕೂಡ ಸನ್ನದ್ಧವಾಗಿವೆ. ಇವು ಇರಾನ್​ನ ವಾಯು ರಕ್ಷಣಾ ವ್ಯವಸ್ಥೆಯನ್ನು ಸುಲಭವಾಗಿ ಭೇದಿಸಬಲ್ಲವು.

ಆಪರೇಷನ್ ಮಿಡ್ನೈಟ್ ಹ್ಯಾಮರ್: ಇಸ್ರೇಲ್ ಮತ್ತು ಅಮೆರಿಕ ಜಂಟಿಯಾಗಿ ಇರಾನ್​ನ ಪರಮಾಣು ಕೇಂದ್ರಗಳ ಮೇಲೆ ನಡೆಸಬಹುದಾದ ಸಂಭಾವ್ಯ ದಾಳಿಗೆ ಈ ಗುಪ್ತನಾಮವನ್ನು ನೀಡಲಾಗಿದೆ ಎಂದು ವರದಿಯಾಗಿದೆ.

 ರಕ್ಷಣಾತ್ಮಕ ಕ್ರಮ: ಇರಾನ್​ನಿಂದ ಪ್ರತಿ ದಾಳಿ ಸಂಭವಿಸಬಹುದು ಎಂಬ ಮುನ್ನೆಚ್ಚರಿಕೆಯಿಂದ ಕತಾರ್​ನಂತಹ ದೇಶಗಳಲ್ಲಿರುವ ಅಮೆರಿಕದ ವಾಯುನೆಲೆಗಳಿಂದ ಅನಗತ್ಯ ಸಿಬ್ಬಂದಿಯನ್ನು ತೆರವುಗೊಳಿಸಲಾಗುತ್ತಿದೆ.

ಬೆಲೆ ಏರಿಕೆ: ಇರಾನ್ ತನ್ನ ತೈಲ ರಫ್ತು ನಿಲ್ಲಿಸಿದರೆ ಅಥವಾ ಸಮುದ್ರ ಮಾರ್ಗಗಳನ್ನು ತಡೆದರೆ, ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್​ಗೆ 100 ಡಾಲರ್ ದಾಟಬಹುದು. ಇದರಿಂದ ಭಾರತ ಸೇರಿದಂತೆ ಎಲ್ಲೆಡೆ ಪೆಟ್ರೋಲ್-ಡೀಸೆಲ್ ಬೆಲೆ ಗಗನಕ್ಕೇರುತ್ತದೆ.

ಜಾಗತಿಕ ಆರ್ಥಿಕ ಕುಸಿತ: ಸಾರಿಗೆ ವೆಚ್ಚ ಹೆಚ್ಚಾಗುವುದರಿಂದ ಆಹಾರ ಪದಾರ್ಥಗಳ ಬೆಲೆ ಏರಿಕೆ (ಹಣದುಬ್ಬರ) ಉಂಟಾಗಿ ಜಗತ್ತು ಆರ್ಥಿಕ ಹಿಂಜರಿತಕ್ಕೆ ತುತ್ತಾಗಬಹುದು.

ನಿರಾಶ್ರಿತರ ಸಮಸ್ಯೆ: ಮಧ್ಯಪ್ರಾಚ್ಯದಲ್ಲಿ ಯುದ್ಧ ಸಂಭವಿಸಿದರೆ ಲಕ್ಷಾಂತರ ಜನರು ಯುರೋಪ್ ಮತ್ತು ನೆರೆಹೊರೆಯ ದೇಶಗಳಿಗೆ ವಲಸೆ ಹೋಗಬೇಕಾಗುತ್ತದೆ, ಇದು ಸಾಮಾಜಿಕ ಅಸ್ಥಿರತೆಗೆ ಕಾರಣವಾಗುತ್ತದೆ.

ಮೂಲಗಳ ಪ್ರಕಾರ, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ವಾರಾಂತ್ಯದೊಳಗೆ ಅಂತಿಮ ನಿರ್ಧಾರ ತೆಗೆದುಕೊಳ್ಳುವ ಸಾಧ್ಯತೆಯಿದೆ. ಒಂದು ವೇಳೆ ದಾಳಿ ನಡೆದರೆ ಅದು ಇರಾನ್​ನ ಪರಮಾಣು ಕೇಂದ್ರಗಳು ಮತ್ತು ಕ್ಷಿಪಣಿ ತಯಾರಿಕಾ ಘಟಕಗಳ ಮೇಲೆ ಮಾತ್ರ ಕೇಂದ್ರೀಕೃತವಾಗಿರುತ್ತದೆ ಎನ್ನಲಾಗುತ್ತಿದೆ.

ಪರಮಾಣು ಕಾರ್ಯಕ್ರಮ: ಇರಾನ್ ತನ್ನ ಪರಮಾಣು ಕೇಂದ್ರಗಳಲ್ಲಿ ಯುರೇನಿಯಂ ಅನ್ನು ಶಸ್ತ್ರಾಸ್ತ್ರ ತಯಾರಿಕೆಗೆ ಬೇಕಾದ ಮಟ್ಟಕ್ಕೆ ಸಂಸ್ಕರಿಸುತ್ತಿದೆ ಎಂಬುದು ಅಮೆರಿಕದ ಪ್ರಮುಖ ಆರೋಪ. 2015ರ ಅಣು ಒಪ್ಪಂದದಿಂದ ಅಮೆರಿಕ ಹಿಂದೆ ಸರಿದ ಬಳಿಕ ಈ ಸಂಘರ್ಷ ತೀವ್ರಗೊಂಡಿದೆ. ಇರಾನ್ ತನ್ನ ಪರಮಾಣು ಶಸ್ತ್ರಾಸ್ತ್ರ ತಯಾರಿಕೆಯನ್ನು ನಿಲ್ಲಿಸಬೇಕೆಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತೆ ಎಚ್ಚರಿಕೆ ನೀಡಿದ್ದಾರೆ. ಆದರೂ, ಇರಾನ್ ಅಣ್ವಸ್ತ್ರ ತಯಾರಿಕೆಯನ್ನು ಮುಂದಿವರಿಸಿದೆ ಎನ್ನಲಾಗಿದೆ. ಅಲ್ಲದೆ, ಜೆನೀವಾದಲ್ಲಿ ನಡೆದ ಸಂಧಾನ ಮಾತುಕತೆಗಳು ವಿಫಲವಾಗಿರುವುದು ಯುದ್ಧದ ಸಾಧ್ಯತೆಯನ್ನು ಹೆಚ್ಚಿಸಿದೆ.

 ಆಂತರಿಕ ದಂಗೆ: ಇರಾನ್​ನಲ್ಲಿ 2025ರ ಅಂತ್ಯದಲ್ಲಿ ನಡೆದ ಸರ್ಕಾರ ವಿರೋಧಿ ಪ್ರತಿಭಟನೆಗಳನ್ನು ಅಲ್ಲಿನ ಖಮೇನಿ ಸರ್ಕಾರ ಹಿಂಸಾತ್ಮಕವಾಗಿ ಹತ್ತಿಕ್ಕಿದೆ. ಸಾವಿರಾರು ಪ್ರತಿಭಟನಾಕಾರರ ಹತ್ಯೆಯಾಗಿದೆ ಎಂದು ಆರೋಪಿಸಿರುವ ಅಮೆರಿಕ, ಇರಾನ್ ಮೇಲೆ ಕಠಿಣ ಕ್ರಮಕ್ಕೆ ಮುಂದಾಗಿದೆ. ಮಾನವ ಹಕ್ಕುಗಳ ಉಲ್ಲಂಘನೆ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದೆ.

 ಪ್ರಾದೇಶಿಕ ಅಸ್ಥಿರತೆ: ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ಮಿತ್ರರಾಷ್ಟ್ರಗಳಾದ ಇಸ್ರೇಲ್ ಮತ್ತು ಸೌದಿ ಅರೇಬಿಯಾ ವಿರುದ್ಧ ಹೋರಾಡುವ ಹೌತಿಗಳು (ಯೆಮನ್), ಹೆಜ್ಬೊಲ್ಲಾ (ಲೆಬನಾನ್) ಮತ್ತು ಹಮಾಸ್​ನಂತಹ ಸಂಘಟನೆಗಳಿಗೆ ಇರಾನ್ ಶಸ್ತ್ರಾಸ್ತ್ರ ಹಾಗೂ ಹಣಕಾಸಿನ ನೆರವು ನೀಡುತ್ತಿದೆ ಎಂಬುದು ಅಮೆರಿಕದ ಕೋಪಕ್ಕೆ ಕಾರಣ. ಇರಾನ್ ಬೆಂಬಲಿತ ಸಶಸ್ತ್ರ ಗುಂಪುಗಳು ಅಮೆರಿಕದ ಹಿತಾಸಕ್ತಿಗಳ ಮೇಲೆ ದಾಳಿ ಮಾಡುತ್ತಿವೆ ಮತ್ತು ಇತ್ತೀಚೆಗೆ ಇರಾನ್ ‘ಹೊಮುಜ್ ಜಲಸಂಧಿ’ಯನ್ನು ಭಾಗಶಃ ಮುಚ್ಚುವುದಾಗಿ ಘೊಷಿಸಿರುವುದು ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ಆತಂಕ ಮೂಡಿಸಿದೆ. ಹೊಮುಜ್ ವಿಶ್ವದ 20%ಕ್ಕೂ ಹೆಚ್ಚು ತೈಲ ಸಾಗಣೆಯಾಗುವ ಪ್ರಮುಖ ಮಾರ್ಗವಾಗಿದ್ದು, ಇದನ್ನು ತಡೆಯುವುದು ಅಮೆರಿಕದ ದೃಷ್ಟಿಯಲ್ಲಿ ಯುದ್ಧಕ್ಕೆ ಆಹ್ವಾನ ನೀಡಿದಂತೆ.

ಪ್ರಸ್ತುತ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಂತಿಮ ನಿರ್ಧಾರವನ್ನು ಇನ್ನೂ ಪ್ರಕಟಿಸಿಲ್ಲ. ಆದರೆ, ಇರಾನ್ ತಕ್ಷಣವೇ ಮಾತುಕತೆಗೆ ಬರದಿದ್ದರೆ ಅಥವಾ ಪರಮಾಣು ಯೋಜನೆ ಕೈಬಿಡದಿದ್ದರೆ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಿದ್ದಾರೆ.

 ಭಾರತವು ಇರಾನ್​ನಲ್ಲಿ ಅಭಿವೃದ್ಧಿಪಡಿಸುತ್ತಿರುವ ಚಾಬಹಾರ್ ಬಂದರು ಅಪಾಯಕ್ಕೆ ಸಿಲುಕಬಹುದು. ಅಲ್ಲದೆ, ಪರ್ಷಿಯನ್ ಗಲ್ಪ್​ನಲ್ಲಿ ಕೆಲಸ ಮಾಡುವ ಲಕ್ಷಾಂತರ ಭಾರತೀಯರ ಸುರಕ್ಷತೆಯ ಪ್ರಶ್ನೆ ಉದ್ಭವಿಸುತ್ತದೆ.

ಕ್ಷಿಪಣಿ ನಿಯೋಜನೆ: ಇರಾನ್ ತನ್ನ ದೀರ್ಘ ವ್ಯಾಪ್ತಿಯ ಖೋರಂಶಹರ್-4 ಕ್ಷಿಪಣಿಗಳನ್ನು ಭೂಗತ ನೆಲೆಗಳಲ್ಲಿ ಸನ್ನದ್ಧಗೊಳಿಸಿದೆ. ಇವು ಇಸ್ರೇಲ್ ಮತ್ತು ಮಧ್ಯಪ್ರಾಚ್ಯದ ಅಮೆರಿಕನ್ ನೆಲೆಗಳನ್ನು ತಲುಪುವ ಸಾಮರ್ಥ್ಯ ಹೊಂದಿವೆ.

ಜಂಟಿ ಸಮರಾಭ್ಯಾಸ: ಅಮೆರಿಕಕ್ಕೆ ಎಚ್ಚರಿಕೆ ನೀಡಲು ಇರಾನ್, ರಷ್ಯಾ ಮತ್ತು ಚೀನಾ ದೇಶಗಳೊಂದಿಗೆ ಜಂಟಿ ನೌಕಾ ಸಮರಾಭ್ಯಾಸವನ್ನು ಯೋಜಿಸಿದೆ.

ಮಾತುಕತೆಯ ಹಾದಿ: ಇಷ್ಟೆಲ್ಲ ಉದ್ವಿಗ್ನತೆಯ ನಡುವೆಯೂ ಇರಾನ್​ನ ಸವೋನ್ನತ ನಾಯಕ ಆಯತುಲ್ಲಾ ಅಲಿ ಖಮೇನಿ, ಅಮೆರಿಕ ಬೆದರಿಕೆ ಹಾಕುವುದನ್ನು ನಿಲ್ಲಿಸಿದರೆ ನಾವು ನ್ಯಾಯಯುತ ಮಾತುಕತೆಗೆ ಸಿದ್ಧ ಎಂದು ಹೇಳುವ ಮೂಲಕ ರಾಜತಾಂತ್ರಿಕ ದಾರಿಯನ್ನು ಮುಕ್ತವಾಗಿರಿಸಿದ್ದಾರೆ.