ವಿರಾಟ್, ಪಡಿಕ್ಕಲ್​ ಅರ್ಭಟ: ಹೈದರಾಬಾದ್ ವಿರುದ್ಧ ಹಾಲಿ ಚಾಂಪಿಯನ್ಸ್ ಆರ್‌ಸಿಬಿಗೆ 6 ವಿಕೆಟ್‌ಗಳ ಭರ್ಜರಿ ಜಯ! RCB Win

ಕಳೆದ ಸೀಸನ್‌ನಲ್ಲಿ ಆರಂಭಿಕ ಮೂರು ಪಂದ್ಯಗಳನ್ನು ಸೋತು ಸಂಕಷ್ಟಕ್ಕೆ ಸಿಲುಕಿದ್ದ ಆರ್‌ಸಿಬಿ, ಈ ಬಾರಿ ಆ ತಪ್ಪುಗಳನ್ನು ಮಾಡಲಿಲ್ಲ. ಹೈದರಾಬಾದ್ ತಂಡದ 201 ರನ್‌ಗಳ ಸವಾಲನ್ನು ಆರ್‌ಸಿಬಿ ಬ್ಯಾಟರ್‌ಗಳು ತಮಾಷೆಯಂತೆ ಸ್ವೀಕರಿಸಿದರು. ಆರಂಭದಿಂದಲೇ ಮೈದಾನದ ಮೂಲೆ ಮೂಲೆಗೂ ಚೆಂಡನ್ನು ಅಟ್ಟಿದ ಬೆಂಗಳೂರು ಆಟಗಾರರು, ಹೈದರಾಬಾದ್ ಬೌಲರ್‌ಗಳ ಆತ್ಮವಿಶ್ವಾಸವನ್ನೇ ಕುಗ್ಗಿಸಿದರು.

ಕಿಂಗ್ ವಿರಾಟ್ ಕೊಹ್ಲಿ (ಅ. 63, 38 ಎಸೆತ) ಮತ್ತು ಕನ್ನಡಿಗ ದೇವದತ್ ಪಡಿಕ್ಕಲ್(61 ರನ್​,26 ಎಸೆತ) ಅವರ ಬ್ಯಾಟಿಂಗ್ ವೈಭವಕ್ಕೆ ಚಿನ್ನಸ್ವಾಮಿ ಕ್ರೀಡಾಂಗಣ ಸಾಕ್ಷಿಯಾಯಿತು. ಕೊಹ್ಲಿ ತಮ್ಮ ಎಂದಿನ ಆಕ್ರಮಣಕಾರಿ ಶೈಲಿಯಲ್ಲೇ ಬ್ಯಾಟ್ ಬೀಸಿದರೆ, ಪಡಿಕ್ಕಲ್ ಅವರಿಗೆ ತಕ್ಕ ಸಾಥ್ ನೀಡಿದರು. ಈ ಜೋಡಿಯ ಅಬ್ಬರಕ್ಕೆ ಎಸ್‌ಆರ್‌ಎಚ್ ಫೀಲ್ಡರ್‌ಗಳು ಕೇವಲ ಪ್ರೇಕ್ಷಕರಂತೆ ನಿಲ್ಲಬೇಕಾಯಿತು. 202 ರನ್‌ಗಳ ಗುರಿಯನ್ನು ಇನ್ನೂ 26 ಎಸೆತಗಳು ಬಾಕಿ ಇರುವಂತೆಯೇ 6 ವಿಕೆಟ್‌ಗಳ ಅಂತರದಿಂದ ತಲುಪಿರುವುದು ಆರ್‌ಸಿಬಿಯ ಬ್ಯಾಟಿಂಗ್ ಶಕ್ತಿಗೆ ಹಿಡಿದ ಕನ್ನಡಿಯಾಗಿದೆ.

ಇದು ಕೇವಲ ಜಯವಲ್ಲ, ಇದು ಆರ್‌ಸಿಬಿ ಈ ಬಾರಿಯೂ ಕಪ್ ಗೆಲ್ಲಲು ಬಂದಿದೆ ಎಂಬ ಎಚ್ಚರಿಕೆಯ ಸಂದೇಶ. ಬ್ಯಾಟಿಂಗ್, ಬೌಲಿಂಗ್ ಮತ್ತು ಫೀಲ್ಡಿಂಗ್ ಮೂರೂ ವಿಭಾಗಗಳಲ್ಲಿ ಆರ್‌ಸಿಬಿ ಸಂಪೂರ್ಣ ಪ್ರಾಬಲ್ಯ ಸಾಧಿಸಿತು. ಪಂದ್ಯದ ಪ್ರತಿ ಹಂತದಲ್ಲೂ ಹೈದರಾಬಾದ್ ತಂಡವನ್ನು ಅಕ್ಷರಶಃ ಬೇಟೆಯಾಡಿದ ಬೆಂಗಳೂರು, ತವರಿನ ಅಭಿಮಾನಿಗಳಿಗೆ ಭರ್ಜರಿ ರಸದೌತಣ ನೀಡಿದೆ.

ಇಶಾನ್ ಕಿಶನ್ ಅವರ 80 ರನ್‌ಗಳ ಹೋರಾಟ ಮತ್ತು ಅನಿಖೇತ್ ವರ್ಮಾ ಅವರ 43 ರನ್‌ಗಳ ಬಿರುಸಿನ ಆಟ ವ್ಯರ್ಥವಾಯಿತು. 201 ರನ್ ಗಳಿಸಿದರೂ ಬೌಲಿಂಗ್‌ನಲ್ಲಿ ಶಿಸ್ತು ಕಾಣದ ಕಾರಣ ಹೈದರಾಬಾದ್ ಹೀನಾಯ ಸೋಲು ಅನುಭವಿಸಿತು. ಆರ್‌ಸಿಬಿಯ ಆರ್ಭಟಕ್ಕೆ ಎಸ್‌ಆರ್‌ಎಚ್ ತಂಡದ ಸ್ಟ್ರಾಟಜಿಗಳೆಲ್ಲವೂ ಧೂಳೀಪಟವಾದವು,(ಏಜೆನ್ಸೀಸ್).