ವೈರಲ್​ ಹುಡ್ಗನಿಗೆ ಗುರುವೇ ಈ ಲಾರಿ ಚಾಲಕ! ವಿಡಿಯೋ ಮಾತ್ರವಲ್ಲ, ಅರುಣ್​ ಕನಸಿಗೂ ಅಡಿಪಾಯ ಇವರೇ... ​

Viral Boy: ಸಾಮಾಜಿಕ ಜಾಲತಾಣದಲ್ಲಿ ಪ್ರತಿನಿತ್ಯ ಸಾವಿರಾರು ವಿಡಿಯೋಗಳು ಹರಿದಾಡುತ್ತಿರುತ್ತವೆ. ಬಹುತೇಕ ವಿಡಿಯೋಗಳಲ್ಲಿ ಅದರಲ್ಲೂ ಟ್ರೋಲ್​ ಅಥವಾ ಕಾಮಿಡಿ ವಿಡಿಯೋಗಳಲ್ಲಿ ಓರ್ವ ಯುವಕನ ನಗುವಿನ ವಿಡಿಯೋ ತುಣುಕು ಮಾತ್ರ ಸಾಮಾನ್ಯವಾಗಿಬಿಟ್ಟಿದೆ. ಆ ಹುಡುಗ ಟೀ ಗ್ಲಾಸ್​ ಹಿಡಿದು, ಹಲ್ಲು ಕಿಸಿದು, ಗಹಗಹಿಸಿ ನಗುವುದನ್ನು ಯಾರೇ ನೋಡಿದರು ಅವರ ಮುಖದಲ್ಲೂ ನಗು ಮೂಡುವುದು ಪಕ್ಕಾ. ಪ್ರತಿ ಕಾಮಿಡಿ ವಿಡಿಯೋದಲ್ಲಿ ಈ ಹುಡುಗನ ವಿಡಿಯೋ ತುಣುಕು ಇದ್ದೇ ಇರುತ್ತದೆ. ಆದರೆ, ಈತ ಯಾರೆಂದು ಪ್ರಶ್ನೆ ಮಾಡಿದರೆ, ಬಹುತೇಕ ಮಂದಿಗೆ ಉತ್ತರವೇ ಗೊತ್ತಿರಲಿಲ್ಲ. ಕಡೆಗೂ ಆ ಪ್ರಶ್ನೆಗೆ ಉತ್ತರ ಸಿಕ್ಕಿದೆ. ಅವನೇ ಅರುಣ್​ ಕುಮಾರ್​.

ಯಾವ ಮೀಮ್‌, ಟ್ರೋಲ್​ಗಳನ್ನು ನೋಡಿದರೂ ಅಲ್ಲಿ ಅರುಣ್​ ನಗುವಿನದ್ದೇ ಸದ್ದು. ಅದು ಮಧ್ಯದಲ್ಲಿಯೇ ಇರಲಿ ಅಥವಾ ಕೊನೆಯಲ್ಲಿಯೇ ಇರಲಿ. ಒಟ್ಟಿನಲ್ಲಿ, ಆ ವಿಡಿಯೋ ನೋಡಿದರೆ ನಗು ಬರುತ್ತದೆಯೋ ಇಲ್ಲವೋ. ಆದ್ರೆ, ಅರುಣ್​ ಗಹಗಹಿಸಿ ನಕ್ಕಿದ್ದನ್ನು ನೋಡಿದರೆ, ಎಲ್ಲಿಲ್ಲದ ನಗು ನಮ್ಮಲ್ಲಿ ಮೂಡುತ್ತದೆ. ಅಂದಹಾಗೆ, ಈ ವಿಡಿಯೋದಲ್ಲಿರುವ ಅರುಣ್​, ತೆಲಂಗಾಣ ರಾಜ್ಯದ ನಿವಾಸಿ. ಇಲ್ಲಿನ ಜಯಶಂಕರ್​ ಬೊಪ್ಪಳಪಲ್ಲಿ ಜಿಲ್ಲೆಯ ನಾಲಪ್ಪುಚಟುವಲ್ಲಿ ಗ್ರಾಮದವನು.

ಅಂದಹಾಗೆ ಅರುಣ್​, ಲಾರಿಯಲ್ಲಿ ಸಹಾಯಕನಾಗಿ ಕೆಲಸ ಮಾಡುತ್ತಿದ್ದಾನೆ. ಈತನ ಜತೆಗಿರುವ ಲಾರಿ ಚಾಲಕನ ಹೆಸರು ನೆಹರು. ಗಮನಾರ್ಹ ಸಂಗತಿ ಏನೆಂದರೆ, ನೀವು ನೋಡುತ್ತಿರುವ ವೈರಲ್​ ವಿಡಿಯೋ ಹಿಂದಿನ ಸೃಷ್ಟಿಕರ್ತನೇ ಈ ನೆಹರು. ಒಂದು ಟೀ ಕುಡಿದು ಲಾರಿ ಹತ್ತೋಣ ಎಂದು ರಸ್ತೆಯ ಪಕ್ಕದಲ್ಲಿ ನಿಲ್ಲಿಸಿದಾಗ, ಚಾಲಕ ನೆಹರು, ಅರುಣ್​ ನಗೆಯನ್ನು ಸೆರೆಹಿಡಿದು, ಸಾಮಾಜಿಕ ಜಾಲಯಾಣಗಳಲ್ಲಿ ಹರಿಬಿಟ್ಟರು. ಅಂದಿನಿಂದ ಎಲ್ಲರ ಫೇವರೆಟ್​ ಆಗಿರುವ ಅರುಣ್​ ಬಾಳು ಮಾತ್ರ ನಾವು ನಗುವಂತಿಲ್ಲ.

ಬಡತನದಲ್ಲಿ ಬೆಂದು ಹೋಗಿರುವ ಅರುಣ್​, ನಾಲ್ಕನೇ ತರಗತಿಯಲ್ಲಿ ಓದುತ್ತಿರುವಾಗಲೇ ಶಾಲೆ ಬಿಟ್ಟು ಹತ್ತನೇ ವಯಸ್ಸಿನಲ್ಲಿ ಕೆಲಸ ಮಾಡಲು ಶುರುಮಾಡಿದ. ಬಾಲ್ಯದ ಸುಂದರ ಕ್ಷಣಗಳು, ಆನಂದವನ್ನು ಬದಗಿಟ್ಟು, ತನ್ನ ಕುಟುಂಬವನ್ನು ಸಾಕಲು ಲಾರಿ ಕ್ಲೀನರ್​ ಆಗಿ ನೆಹರು ಜೊತೆ ಸೇರಿಕೊಂಡ. ವಿದ್ಯಾಭ್ಯಾಸದಿಂದ ದೂರ ಉಳಿದ ಅರುಣ್​, ಅದೊಂದು ವಿಡಿಯೋ ಮೂಲಕ ರಾತ್ರೋರಾತ್ರಿ ಜಾಗತಿಕ ಮಟ್ಟದಲ್ಲಿ ಸಂಚಲನ ಮೂಡಿಸಿದ. ಅಂದಿನಿಂದ, ಅನೇಕರು ಅರುಣ್ ನಗೆಯ ದೃಶ್ಯವನ್ನು ತಮ್ಮ ಮೀಮ್​ಗಳಲ್ಲಿ ಪದೇ ಪದೇ ಬಳಸುತ್ತಿದ್ದಾರೆ. ಇತ್ತೀಚೆಗಷ್ಟೇ ಅರುಣ್ ಕುಮಾರ್, ಎಸ್ಸೆಸ್ಸೆಲ್ಸಿ ಪರೀಕ್ಷೆಯಲ್ಲಿ ಉತ್ತೀರ್ಣನಾಗಿದ್ದು, ಹೆತ್ತವರು ಹಾಗೂ ತನ್ನ ಗುರುವಾದ ಲಾರಿ ಚಾಲಕನ ಮುಖದಲ್ಲಿ ಮಂದಹಾಸ ಮೂಡಿಸಿದ್ದಾನೆ.

ಕೇವಲ ವಿಡಿಯೋ ವೈರಲ್​ ಮಾಡಿದ ಕ್ರೆಡಿಟ್​ ಮಾತ್ರವಲ್ಲ, ಅರುಣ್ ಕುಮಾರ್‌ಗೆ ಮಾರ್ಗದರ್ಶಕರಾಗಿಯೂ ನೆಹರು ಜೊತೆಗಿದ್ದಾರೆ. ಲಾರಿ ಕ್ಲೀನರ್​ ಆಗಿ ತನ್ನೊಂದಿಗೆ ಕೆಲಸ ಮಾಡಿಕೊಂಡಿರುವ ಅರುಣ್​ಗೆ 10ನೇ ಪರೀಕ್ಷೆ ಕಟ್ಟುವಂತೆ ಪ್ರೇರೆಪಿಸಿದ್ದೇ ಇವರು. ಕೇವಲ ಎಕ್ಸಾಂ ಬರೀ ಎಂದು ಸುಮ್ಮನಾಗದ ನೆಹರು, ತಮ್ಮ ಸ್ವಂತ ದುಡಿಮೆಯೇ ಹಣದಿಂದ ಆತನಿಗೆ ಓದಲು ಪುಸ್ತಕ, ಶುಲ್ಕ, ಪೆನ್ನು ಸೇರಿದಂತೆ ಸಮಯಕ್ಕೆ ಸರಿಯಾಗಿ ಊಟದ ವ್ಯವಸ್ಥೆ ಎಲ್ಲವನ್ನೂ ಒದಗಿಸಿದ್ದಾರೆ. ಅಷ್ಟಕ್ಕೂ, ನೆಹರು ಇಷ್ಟೆಲ್ಲ ಮಾಡುವುದರ ಹಿಂದೆ ಒಂದು ಬಲವಾದ ಕಾರಣವೂ ಇದೆ.

ಇದೇ ಪರಿಸ್ಥಿತಿಯಲ್ಲಿದ್ದ ನೆಹರು, ತಮ್ಮ ಕುಟುಂಬವನ್ನು ಸಾಕಲು ಕಾಲೇಜನ್ನು ಬಿಟ್ಟು ಕೆಲಸಕ್ಕೆ ಹೋಗುವಂತಾಯಿತು. ಓದುವುದನ್ನು ತೊರೆದು ಲಾರಿ ಬಂಡಿಯಲ್ಲಿ ಬದುಕು ಕಟ್ಟಿಕೊಂಡ ನೆಹರು, ಆ ಜೀವನ ಹೇಗಿರುತ್ತದೆ ಎಂಬುದನ್ನು ಚೆನ್ನಾಗಿ ಅರಿತಿದ್ದ ಕಾರಣ, ಅರುಣ್ ಕುಮಾರ್​ ಬೆನ್ನಿಗೆ ನಿಂತರು. ಅಂದು ನನಗೆ ಬಂದ ಪರಿಸ್ಥಿತಿಯೇ ಇಂದು ಈ ಹುಡುಗನಿಗಿದೆ. ನಾನು ಪಟ್ಟ ಕಷ್ಟ ಈತನಿಗೆ ಬರಬಾರದು ಎಂಬ ಉದ್ದೇಶದಲ್ಲಿ ಅರುಣ್ ಓದಿಗೆ ಮುಂದಾಗಿದ್ದಾರೆ.

ಲಾರಿ ಒಳಗೆಯೇ ಅರುಣ್‌ಗೆ ಸ್ಟಡಿ ರೂಮ್​ ಮಾಡಿಕೊಟ್ಟಿರುವ ನೆಹರು, ದೀರ್ಘ ಪ್ರಯಾಣದ ನಡುವೆ, ನೆಹರು ಅರುಣ್‌ಗೆ ತನಗೆ ಗೊತ್ತಿರುವಷ್ಟು ಹೇಳಿಕೊಡುವುದು ಮತ್ತು ಹೆಚ್ಚಿನ ಪಾಠಗಳಿಗೆ ಅಗತ್ಯವಿರುವ ಪುಸ್ತಕವನ್ನು ತಂದುಕೊಟ್ಟಿದ್ದಾರೆ. ಇಡೀ ಜಗತ್ತು ಅರುಣ್ ಕುಮಾರ್ ಅನ್ನು ಕೇವಲ 12 ಸೆಕೆಂಡ್ ಮೀಮ್ ಆಗಿ ನೋಡುವುದಕ್ಕಷ್ಟೇ ಸೀಮಿತ ಮಾಡಿಕೊಂಡಾಗ, ನೆಹರು ಮಾತ್ರ ಆತನ ಜೀವನದಲ್ಲಿ ಬೆಳಕು ತರಲು ಮುಂದಾಗಿದ್ದು ನಿಜಕ್ಕೂ ಶ್ಲಾಘನೀಯ. ನೆಹರು ಅವರ ದೃಢಸಂಕಲ್ಪ ಮತ್ತು ಅರುಣ್​ನ ಕಠಿಣ ಪರಿಶ್ರಮ ಈಗ ಒಂದು ಉತ್ತಮ ಫಲಿತಾಂಶವನ್ನೇ ತಂದುಕೊಟ್ಟಿರುವುದು ಗಮನಾರ್ಹ,(ಏಜೆನ್ಸೀಸ್).