ಇತಿಹಾಸ ಸೃಷ್ಟಿಸಿದ ಸ್ಕೈರೂಟ್ ಸಂಸ್ಥೆ: ಮೊದಲ ಯತ್ನದಲ್ಲೇ ದೇಶದ ಮೊದಲ ಖಾಸಗಿ ರಾಕೆಟ್ 'ವಿಕ್ರಮ್-1' ಉಡಾವಣೆ ಯಶಸ್ವಿ! Vikram 1

ಶ್ರೀಹರಿಕೋಟ: ಭಾರತದ ಖಾಸಗಿ ಬಾಹ್ಯಾಕಾಶ ರಂಗದಲ್ಲಿ ಶನಿವಾರ ಮತ್ತೊಂದು ಐತಿಹಾಸಿಕ ಸುವರ್ಣ ಅಧ್ಯಾಯ ಬರೆಯಲ್ಪಟ್ಟಿದೆ. ಸ್ಕೈರೂಟ್ ಏರೋಸ್ಪೇಸ್ ಸಂಸ್ಥೆಯು ದೇಶದ ಮೊದಲ ಖಾಸಗಿ ಅಭಿವೃದ್ಧಿತ ಕಕ್ಷೀಯ ದರ್ಜೆಯ (Orbital-class) ರಾಕೆಟ್ 'ವಿಕ್ರಮ್-1' ( Vikram 1 ) ಅನ್ನು ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಯಶಸ್ವಿಯಾಗಿ ನಭಕ್ಕೆ ಚಿಮ್ಮಿಸಿದೆ. ದಶಕಗಳ ಕನಸನ್ನು ನನಸು ಮಾಡಿದ ಈ ಯಶಸ್ವಿ ಉಡಾವಣೆಯು ಜಾಗತಿಕ ಬಾಹ್ಯಾಕಾಶ ಮಾರುಕಟ್ಟೆಯಲ್ಲಿ ಭಾರತದ ಖಾಸಗಿ ಉದ್ಯಮದ ಸಾಮರ್ಥ್ಯವನ್ನು ಜಗತ್ತಿಗೆ ಸಾರುವ ಮೂಲಕ ಒಂದು ಹೊಸ ಮೈಲಿಗಲ್ಲನ್ನು ಸ್ಥಾಪಿಸಿದೆ.

'ಮಿಷನ್ ಆಗಮನ್' ಎಂಬ ಈ ಹೆಮ್ಮೆಯ ಐತಿಹಾಸಿಕ ಕಾರ್ಯಾಚರಣೆಯು ಜಾಗತಿಕ ಕಕ್ಷೀಯ ಉಡಾವಣಾ ವ್ಯವಹಾರಕ್ಕೆ ಭಾರತದ ಖಾಸಗಿ ಉದ್ಯಮದ ಅಧಿಕೃತ ಪ್ರವೇಶವನ್ನು ಸಾರಿದೆ. ವಾಣಿಜ್ಯ ಸಂಸ್ಥೆಗಳೇ ಸ್ವತಂತ್ರವಾಗಿ ಕಕ್ಷೀಯ ರಾಕೆಟ್‌ಗಳನ್ನು ಅಭಿವೃದ್ಧಿಪಡಿಸಿ, ಯಶಸ್ವಿಯಾಗಿ ಉಡಾವಣೆ ಮಾಡಿದ ವಿಶ್ವದ ಕೆಲವೇ ಕೆಲವು ಆಯ್ದ ದೇಶಗಳ ಗಣ್ಯರ ಪಟ್ಟಿಗೆ ಭಾರತವೂ ಸೇರುವಂತೆ ಮಾಡುವಲ್ಲಿ ಈ ಮಿಷನ್ ಅತ್ಯಂತ ಪ್ರಮುಖ ಪಾತ್ರ ವಹಿಸಿದೆ.

ಗರ್ಜನೆ ಮತ್ತು ಧಗಧಗಿಸುವ ಅಗ್ನಿ ಜ್ವಾಲೆಯೊಂದಿಗೆ 'ವಿಕ್ರಮ್-1' ರಾಕೆಟ್ ನಭಕ್ಕೆ ಚಿಮ್ಮುತ್ತಿದ್ದಂತೆ, ಸ್ಕೈರೂಟ್ ಸಂಸ್ಥೆಯ ವಿಜ್ಞಾನಿಗಳ ವರ್ಷಗಳ ಕಠಿಣ ಪರಿಶ್ರಮ, ತಾಂತ್ರಿಕ ನಾವೀನ್ಯತೆ ಹಾಗೂ ನಿರಂತರ ಪರೀಕ್ಷೆಗಳ ಶ್ರಮ ಸಾರ್ಥಕವಾಗಿದೆ. ಉಡಾವಣೆಯ ಕೊನೆಯ ಕ್ಷಣದಲ್ಲಿ ಆಂತರಿಕ ತಪಾಸಣೆಗಾಗಿ ಸಣ್ಣದೊಂದು ವಿಳಂಬ (Hold) ಎದುರಾಗಿದ್ದರೂ ಸಹ, ರಾಕೆಟ್‌ನ ಎಲ್ಲಾ ಹಂತಗಳು ಯಾವುದೇ ದೋಷವಿಲ್ಲದೆ ಅತ್ಯಂತ ನಿಖರವಾಗಿ ಕಾರ್ಯನಿರ್ವಹಿಸಿದವು. ರಾಕೆಟ್‌ನ ಪ್ರತಿಯೊಂದು ಹಂತದ ಬೇರ್ಪಡಿಕೆಯೂ ಅತ್ಯಂತ ವ್ಯವಸ್ಥಿತವಾಗಿ ಹಾಗೂ ಅಚ್ಚುಕಟ್ಟಾಗಿ ನಡೆಯುವ ಮೂಲಕ ಇಡೀ ಕಾರ್ಯಾಚರಣೆ ಅದ್ಭುತ ಯಶಸ್ಸು ಕಂಡಿತು.

ಸುಮಾರು ಏಳು ಮಹಡಿಗಳಷ್ಟು ಎತ್ತರವಿರುವ 'ವಿಕ್ರಮ್-1' ಸಂಪೂರ್ಣ ಕಾರ್ಬನ್ ಸಂಯೋಜಿತ (ಆಲ್-ಕಾರ್ಬನ್ ಕಾಂಪೋಸಿಟ್) ಬಹು-ಹಂತದ ಉಡಾವಣಾ ವಾಹನವಾಗಿದ್ದು, 350 ಕೆಜಿವರೆಗಿನ ಉಪಗ್ರಹಗಳನ್ನು ಭೂಮಿಯ ಕೆಳ ಕಕ್ಷೆಗೆ (ಲೋ ಅರ್ಥ್ ಆರ್ಬಿಟ್) ತಲುಪಿಸುವ ಸಾಮರ್ಥ್ಯ ಹೊಂದಿದೆ. ಅತ್ಯಾಧುನಿಕ 3D-ಪ್ರಿಂಟೆಡ್ ರಾಕೆಟ್ ಇಂಜಿನ್‌ಗಳು ಮತ್ತು ಹೆಚ್ಚಿನ ದಕ್ಷತೆಯ ಘನ ರಾಕೆಟ್ ಮೋಟಾರ್‌ಗಳು ಸೇರಿದಂತೆ ಸ್ಕೈರೂಟ್ ಸಂಸ್ಥೆಯು ಸಂಪೂರ್ಣವಾಗಿ ಸ್ವದೇಶಿ ತಂತ್ರಜ್ಞಾನದಡಿ ತನ್ನದೇ ಪ್ರಯೋಗಾಲಯದಲ್ಲಿ ಅಭಿವೃದ್ಧಿಪಡಿಸಿರುವ ಪ್ರೊಪಲ್ಷನ್ ಸಿಸ್ಟಮ್‌ಗಳ ಶಕ್ತಿ ಇದರಲ್ಲಿದೆ.

ಈ ಐತಿಹಾಸಿಕ ಮೊದಲ ಪ್ರಾಯೋಗಿಕ ಹಾರಾಟದಲ್ಲಿ ಗ್ರಾಹಾ ಸ್ಪೇಸ್, ಕಾಸ್ಮೋಸರ್ವ್, ಡಿಕ್ಯೂಬ್ಡ್ ಸಂಸ್ಥೆಗಳ ತಂತ್ರಜ್ಞಾನ ಪ್ರದರ್ಶನ ಪೇಲೋಡ್‌ಗಳು ಹಾಗೂ ಸ್ಕೈರೂಟ್‌ನ ಸ್ವಂತ 'ಸ್ಕೋಪ್' (SCOPE) ಪ್ರಯೋಗದ ಉಪಕರಣಗಳನ್ನು ಯಶಸ್ವಿಯಾಗಿ ಕೊಂಡೊಯ್ಯಲಾಗಿದೆ. ಇವುಗಳ ಜೊತೆಗೆ, ಪ್ರಧಾನಿ ನರೇಂದ್ರ ಮೋದಿ ಅವರು ಕೈಬರಹದಲ್ಲಿ ಬರೆದಿರುವ "ವಂದೇ ಮಾತರಂ" ಪೋಸ್ಟ್‌ಕಾರ್ಡ್, ಪ್ರಸ್ತುತ ಮತ್ತು ಮಾಜಿ ಇಸ್ರೋ ಅಧ್ಯಕ್ಷರುಗಳು, ಭಾರತೀಯ ಗಗನಯಾತ್ರಿಗಳು, ಸ್ಕೈರೂಟ್ ಉದ್ಯೋಗಿಗಳು, ಹೂಡಿಕೆದಾರರು ಹಾಗೂ ವಿಶ್ವದಾದ್ಯಂತದ ಬೆಂಬಲಿಗರ ಹಸ್ತಾಕ್ಷರಗಳಿರುವ ಸಂದೇಶಗಳನ್ನು ಒಳಗೊಂಡ ಸಾಂಕೇತಿಕ ಪೇಲೋಡ್‌ಗಳು ಸಹ ಈ ರಾಕೆಟ್ ಮೂಲಕ ಬಾಹ್ಯಾಕಾಶ ಸೇರಿವೆ.

ಈ ಮಹತ್ವಾಕಾಂಕ್ಷಿ ಮಿಷನ್‌ನ ಯಶಸ್ಸು ಕೇವಲ ರಾಕೆಟ್‌ನ ಹಾರಾಟದ ದಕ್ಷತೆಯನ್ನು ಸಾಬೀತುಪಡಿಸುವುದಕ್ಕೆ ಮಾತ್ರ ಸೀಮಿತವಾಗಿಲ್ಲ, ಬದಲಿಗೆ ಇದು ಸ್ಕೈರೂಟ್ ಸಂಸ್ಥೆಗೆ ಅತ್ಯಂತ ಪ್ರಮುಖವಾದ ಎಂಜಿನಿಯರಿಂಗ್ ದತ್ತಾಂಶಗಳನ್ನು (ಡೇಟಾ) ಒದಗಿಸಲಿದೆ. ಈ ಅಮೂಲ್ಯ ಮಾಹಿತಿಯು ಮುಂಬರುವ ದಿನಗಳಲ್ಲಿ 'ವಿಕ್ರಮ್' ಸರಣಿಯ ಉಡಾವಣಾ ವಾಹನಗಳನ್ನು ಮತ್ತಷ್ಟು ಅಪ್​ಡೇಟ್​ ಮಾಡಲು ಮತ್ತು ಮಾರುಕಟ್ಟೆಯಲ್ಲಿ ನಿರಂತರ ವಾಣಿಜ್ಯ ಉಡಾವಣೆಗಳ ಸರಣಿಯನ್ನು ಸ್ಥಾಪಿಸಲು ದಾರಿಯಾಗಲಿದೆ. ಇದರೊಂದಿಗೆ, ಇಸ್ರೋ ಸಂಸ್ಥೆಯ ಜೊತೆಗೂಡಿ ಖಾಸಗಿ ಕಂಪನಿಗಳೂ ಸಹ ರಾಕೆಟ್, ಉಪಗ್ರಹ ಹಾಗೂ ಉಡಾವಣಾ ಸೇವೆಗಳನ್ನು ಸ್ವತಂತ್ರವಾಗಿ ನಿರ್ಮಿಸಲು ಮುಕ್ತ ಅವಕಾಶ ಕಲ್ಪಿಸಿದ ಭಾರತದ ಬಾಹ್ಯಾಕಾಶ ವಲಯದ ಐತಿಹಾಸಿಕ ಸುಧಾರಣೆಗಳಿಗೆ ಈ ಯಶಸ್ಸು ಸಿಕ್ಕ ಬಹುದೊಡ್ಡ ಗೆಲುವಾಗಿದೆ.

ವೇಗವಾಗಿ ಬೆಳೆಯುತ್ತಿರುವ ಜಾಗತಿಕ ಸಣ್ಣ ಉಪಗ್ರಹಗಳ ಮಾರುಕಟ್ಟೆಗೆ ಅತ್ಯಂತ ಕೈಗೆಟುಕುವ ವೆಚ್ಚದಲ್ಲಿ, ನಂಬಿಕಸ್ಥ ಮತ್ತು ತ್ವರಿತ ಬಾಹ್ಯಾಕಾಶ ಸೇವೆಗಳನ್ನು ಒದಗಿಸುವ ದೂರದೃಷ್ಟಿಯೊಂದಿಗೆ ಇಸ್ರೋದ ಮಾಜಿ ವಿಜ್ಞಾನಿಗಳಾದ ಪವನ್ ಕುಮಾರ್ ಚಂದನಾ ಮತ್ತು ನಾಗಾ ಭರತ್ ಡಾಕಾ ಅವರು 2018 ರಲ್ಲಿ 'ಸ್ಕೈರೂಟ್' ಸಂಸ್ಥೆಯನ್ನು ಸ್ಥಾಪಿಸಿದ್ದರು. ಈ ನವೋದ್ಯಮವು ಈ ಹಿಂದೆ 2022 ರಲ್ಲಿ ತನ್ನ 'ವಿಕ್ರಮ್-S' ಸಬ್-ಆರ್ಬಿಟಲ್ ರಾಕೆಟ್ ಅನ್ನು ಯಶಸ್ವಿಯಾಗಿ ಉಡಾವಣೆ ಮಾಡುವ ಮೂಲಕ ಬಾಹ್ಯಾಕಾಶ ತಲುಪಿದ ಭಾರತದ ಮೊದಲ ಖಾಸಗಿ ಕಂಪನಿ ಎಂಬ ಇತಿಹಾಸ ಸೃಷ್ಟಿಸಿತ್ತು. ಆ ಯಶಸ್ಸಿನ ಮುಂದುವರಿದ ಭಾಗವಾಗಿ ಈಗ 'ವಿಕ್ರಮ್-1' ಕಕ್ಷೀಯ ರಾಕೆಟ್ ಅನ್ನು ಯಶಸ್ವಿಯಾಗಿ ಕಳುಹಿಸಿ ಜಾಗತಿಕ ಮಟ್ಟದಲ್ಲಿ ದೇಶದ ಕೀರ್ತಿಯನ್ನು ಹೆಚ್ಚಿಸಿದೆ, (ಏಜೆನ್ಸೀಸ್​).