ಸಿಎಂ ವಿಜಯ್‌ ಭವಿಷ್ಯವನ್ನು ಸುನಾಮಿಗೆ ಹೋಲಿಸಿದ್ದ ಜ್ಯೋತಿಷಿಗೆ ಈಗ ಪಟ್ಟ! ಸರ್ಕಾರದ ವಿಶೇಷ ಅಧಿಕಾರಿಯಾಗಿ ರಾಧನ್ ಪಂಡಿತ್ ನೇಮಕ | Radhan Pandit

ಇತ್ತೀಚಿನ ವಿಧಾನಸಭಾ ಚುನಾವಣೆಯಲ್ಲಿ ಟಿವಿಕೆ ಪಕ್ಷಕ್ಕೆ ದೊಡ್ಡ ಗೆಲುವು ಸಾಧಿಸಲಿದೆ ಎಂದು ರಾಧನ್ ಪಂಡಿತ್ ಮೊದಲೇ ಭವಿಷ್ಯ ನುಡಿದಿದ್ದರು, ವಿಜಯ್ ಜಾತಕವನ್ನು ಅಸಾಧಾರಣ ಎಂದು ಕರೆದಿದ್ದ ಅವರು, ವಿಜಯ್​ ಇನ್ನು ಹೆಚ್ಚಿನ ಯಶಸ್ಸು ಪಡೆಯಲಿದ್ದಾರೆ ಮತ್ತು ಬಹುಮತದೊಂದಿಗೆ ಮುಖ್ಯಮಂತ್ರಿಯಾಗುತ್ತಾರೆ ಎಂದು ಹೇಳಿದ್ದರು. ಎಕ್ಸಿಟ್​ ಪೋಲ್​ ಸಮಯದಲ್ಲಿ ಇತರ ಸಮೀಕ್ಷೆಗಳನ್ನು ತಳ್ಳಿಹಾಕಿದ್ದರು.

ಎಕ್ಸಿಟ್​ ಪೋಲ್​ ಹೊರಬಿದ್ದ ಬಳಿಕ ಮಾತನಾಡಿದ್ದ ರಿಕಿ ರಾಧನ್ ಪಂಡಿತ್, ನಾವು ಈ ಸಮೀಕ್ಷೆಗಳನ್ನು ಒಪ್ಪಿಕೊಳ್ಳುವುದಿಲ್ಲ, ಈ ಚುನಾವಣೆಯಲ್ಲಿ ನಾವು 140 ರಿಂದ 170 ಸ್ಥಾನಗಳಲ್ಲಿ ಗೆಲುವು ಸಾಧಿಸುತ್ತೇವೆ, ಈಗಾಗಲೇ ನಮ್ಮ ಪಕ್ಷದ ವತಿಯಿಂದ ಚೆನ್ನಾಗಿ ಅಧ್ಯಯನ ಮಾಡಿದ್ದು, ಕನಿಷ್ಠ 45% ಮತ ಪಡೆಯಲಿದ್ದೇವೆ, ಮತ ಎಣಿಕೆಗೆ 108 ಗಂಟೆಗಳು ಬಾಕಿ ಇದ್ದು, 109 ನೇ ಗಂಟೆಯಲ್ಲಿ ನಾವು ಪ್ರಮಾಣ ವಚನ ಸ್ವೀಕರಿಸಲಿದ್ದೇವೆ. ನಮ್ಮ ವಿಜಯ್ ಮುಖ್ಯಮಂತ್ರಿಯಾಗುತ್ತಾರೆ ಎಂದು ತಿಳಿಸಿದ್ದರು.

ವಿಜಯ್ ರಾಜಕೀಯ ಪ್ರಯಾಣದುದ್ದಕ್ಕೂ ರಾಧನ್ ಆಪ್ತ ಸಲಹೆಗಾರರಲ್ಲಿ ಒಬ್ಬರಾಗಿದ್ದು, ತಮಿಳುನಾಡಿನಲ್ಲಿ ಪ್ರಮುಖ ಆಧ್ಯಾತ್ಮಿಕ ಗುರು ಮತ್ತು ಜ್ಯೋತಿಷಿ ಎಂದೇ ಖ್ಯಾತರಾಗಿರುವ ರಾಧನ್ ಪಂಡಿತ್ ಮಾರ್ಗದರ್ಶನವನ್ನು ಈ ಹಿಂದೆ ಮಾಜಿ ಮುಖ್ಯಮಂತ್ರಿ ಜೆ. ಜಯಲಲಿತಾ ಕೂಡ ಪಡೆಯುತ್ತಿದ್ದರು ಎಂದು ಹೇಳಲಾಗುತ್ತಿದೆ. ಸಾಮಾಜಿಕ ಜಾಲತಾಣಗಳ ಮೂಲಕವೂ ಜ್ಯೋತಿಷ್ಯದ ಕುರಿತಾಗಿ ಮಾಹಿತಿ ನೀಡುವ ಇವರು ಕಳೆದ ನಾಲ್ಕು ದಶಕಗಳಿಂದ ಈ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿದ್ದಾರೆ(ಏಜೆನ್ಸೀಸ್​​).